Bag-ong Programa sang Sirkito nga Asambleya

¹ Ang bag-ong programa sang sirkito nga asambleya sugod sa Pebrero magahinun-anon sang tema nga “Agoma ang Daku Pa nga Kalipay sa Paghatag.” (Binu. 20:35) Ang kalipay ginalaragway subong “isa ka kahimtangan sang pagkaayo kag pagkakontento.” Madamong tawo karon ang nakasapo sing umalagi lamang nga kalipay sa kabuhi. Apang, si Jehova nagatudlo sa aton kon paano kita makabenepisyo sing dayon. (Isa. 48:​17; 1 Juan 2:17) Ang bag-ong programa sang sirkito nga asambleya magapadaku kon paano naton maagom ang daku pa nga kalipay paagi sa paghatag sa espirituwal nga paagi.

² Magatuon kita sing praktikal nga mga paagi kon paano naton magamit ang aton kaugalingon sa ministeryo. Ang pila sang mga pamulongpulong nga ihatag sang nagalakbay nga mga manugtatap ginatig-uluhan: “Pagpakig-abyan Paagi sa Dimatarong nga mga Manggad,” “Tahura ang Balaan nga Aman nga ‘Mga Hiyas sa mga Tawo.’” kag “Agoma ang Madamong Bahin sang Matuod nga Kalipay.” Ang mga nagahandum nga mabawtismuhan sa asambleya dapat makigsugilanon sa nagadumala nga manugtatap agod makahimo sia sing kahimusan nga marepaso sang mga gulang ang mga pamangkot sa bawtismo upod sa ila. Ang pag-alagad kay Jehova nga may matinlo nga kaangtanan magadala sing daku nga kalipay sa mga bag-ong bawtismado.

³ Ang pagkilala sing nagakaigo sa awtoridad ni Jehova nagahatag man sing matuod nga kalipay kag kalig-unan. Ang tanan nga tawo dapat makahibalo sini. Gani, ang pamulongpulong publiko sa sirkito nga asambleya magahinun-anon sang tema nga “Maghiusa Upod sa Malipayon nga Katawhan sang Dios.” Pat-ura nga agdahon ang tanan nga nagpakita sing interes sa kamatuoran nga magtambong sa sining pamulongpulong. Wala sila makasapo sing matuod nga kalig-unan kag mapinadayunon nga kalipay sa idalom sang tawhanon nga paggahom. (Manugw. 8:9) Apang daw ano nga kalipay ang masapwan nila sa pagpakig-upod sa malipayon nga katawhan ni Jehova!​—Sal. 144:​15b.

⁴ Walay sapayan sang nagalubha nga mga kahimtangan sa sining sistema sang mga butang, ang mga nakaagom sing daku pa nga kalipay sa paghatag sa espirituwal indi gid pagpaslawon sang malipayon nga Dios. (1 Tim. 1:11) Ang bag-ong programa sang sirkito nga asambleya magapasundayag sang kamatuoran sini. Indi ini pagwasiha!