Pagkasadya sa Pag-uswag nga Ginahatag sang Dios
1 Ang mga Cristiano sadtong nahaunang siglo makugi nga mga manugbantala sang Ginharian. Nagkasadya sila sang ‘ang mga kongregasyon nagdugang sa kadamuon adlaw-adlaw.’ (Binu. 16:5) Ang ila masidla nga pagbantala naglab-ot sa Asia, Europa, kag Aprika, nga nagresulta sa bugana nga ani sang mga tumuluo.
2 Nagtagna si Jesus nga sa katapusan nga mga adlaw, ang pagbantala nga hilikuton magalab-ot ‘sa bug-os napuy-an nga duta kag sa tanan nga kapungsuran’! (Mat. 24:14) Sang 1996 nga tuig sang pag-alagad, padayon kami nga nakabaton sing mga report nahanungod sa makatilingala nga mga pag-uswag kag sa bag-ong kataason sang mga manugbantala halin sa mga kadutaan sa bug-os nga globo. Madamong bag-ong kongregasyon ang naporma. Bangod sining madasig nga pag-uswag, ginatos ka bag-ong Kingdom Hall kag Assembly Hall ang kinahanglan nga patindugon kag pila man ka mga pasilidad sang sanga ang pasangkaron.
3 Ang Aton Ministeryo sa Ginharian sang Agosto 1996 nagreport sang masangkad nga konstruksion nga ginahimo sa Aprika. Ang kaanggid nga hilikuton ginahimo man sa bug-os nga Latin Amerika. Para sa 1996 nga tuig sang pag-alagad, ang Mexico nagreport sing makahayanghag nga kataason nga 470,098 ka manugbantala kag sing promedyo nga 600,751 ka pagtuon sa Biblia, nga nagakinahanglan nga maporma ang 466 ka bag-ong kongregasyon! Ang pagpasangkad sa mga pasilidad sang ila sanga ginaiskedyul nga matapos sa talipuspusan sang 1998. Bangod sang kaanggid nga pag-uswag sa madamo pa nga pungsod, wala untat ang lainlain nga sahi sang mga teokratikong proyekto sa konstruksion.
4 Ang kagastuhanan sa konstruksion mataas bisan diin, kag diutay lamang nga materyal ang maamot sang aton mga kauturan sa madamong kadutaan. Apang, bangod sang ila daku nga kakugi sa pag-alagad kay Jehova, nagauswag gid sila sa espirituwal kag sa daku man nga kadamuon. Ang Hulubaton 28:27 nagapasalig sa aton nga “sia nga nagahatag sa isa nga diutay sing ikasarang indi mawad-an.” Ang aton kahanda sa pagbulig nga mabayaran ang mga kinahanglanon sining mga kauturan subong man ang iban pa nga kagastuhanan sa konstruksion magaresulta sa “pag-alalangay” sang materyal nga mga butang, nagapaposible agod maagom sang tanan ang kalipay nga bunga sang paghatag kag ang kalipay nga bunga sang pagtan-aw sa pag-uswag nga ginahatag ni Jehova!—2 Cor. 8:14, 15; Binu. 20:35.
[Retrato sa pahina 4, 5]
Sanga sa Paraguay
[Retrato sa pahina 4]
Sanga sa Ecuador
[Retrato sa pahina 4, 5]
Ginapatindog nga Ekstension sa Mexico
[Retrato sa pahina 4, 5]
Sanga sa Dominican Republic
[Retrato sa pahina 4]
Sanga sa Brazil Lakip ang Ekstension
[Retrato sa pahina 4, 5]
Sanga sa Uruguay nga Ginapatindog
[Retrato sa pahina 5]
Tipiko nga manubo sing badyet nga mga Kingdom Hall sa Latin Amerika
1. Brazil
2. Nicaragua
3. Chile
4. Colombia
5. Mejico
6. Brazil
7. Peru
8. Venezuela
9. Mejico