Kon Paano ang mga Katapo sang Pamilya Nagabinuligay nga Makapakigbahin sing Bug-os​—⁠Sa Pagtuon sa Biblia

¹ Ang kamatuoran nagahatag sing tunay nga kahulugan kag katuyuan sa pagkabuhi sang pamilya, apang ang kadalag-an sa pag-alagad kay Jehova indi matigayon sing awtomatiko. Kinahanglan ang tion kag panikasog agod matukod ang isa ka mabakod sa espirituwal nga panimalay. Kinahanglan gid nga ang mga katapo sang pamilya magapangabudlay sing suod sa sining panikasog. Ining nahauna nga artikulo sang tatlo-ka-bahin nga serye magakonsentrar sa kon paano makabinuligay ang mga pamilya sa pagpalambo sing maayo nga batasan sa pagtuon.

² Paagi sa Pagbasa Sing Biblia Kada Adlaw: Ang Hulubaton 24:5 nagasiling nga “ang tawo nga may ihibalo nagahatag sing kusog.” Ang ihibalo nga natigayon paagi sa tayuyon nga pagbasa sang Pulong sang Dios nagahatag sa isa ka tawo sing nasulod nga kusog nga kinahanglan agod mapamatukan ang mga pagsalakay ni Satanas sa iya espirituwalidad. (Sal. 1:​1, 2) Ginabasa bala ninyo ang Biblia adlaw-adlaw subong isa ka pamilya? Ang Iskedyul Sang Teokratikong Eskwelahan sa Pagministro nagabalay sing “Dugang Pa nga Iskedyul sa Pagbasa Sing Biblia” kada semana sa bug-os nga tuig. Agod masunod ini, nagakinahanglan ini sing mga napulo ka minuto lamang sa tion sang pamilya kada adlaw. Magpili sing kombeniente nga tion, subong sang pamahaw, pagkatapos sing panihapon, ukon antes magtulog, nga basahon ang Biblia kag binagbinagon ang teksto sa sina nga adlaw gikan sa Pag-usisa sa Kasulatan. Himua ini nga bahin sang adlaw-adlaw nga rutina sang imo pamilya.

³ Paagi sa Pagtuon Sing Tingob Kada Semana: Ang pangpamilya nga pagtuon sa Biblia dapat amo ang importante gid nga tion sa semana sang isa ka pamilya. Dapat ini suportahan sang tagsa ka katapo paagi sa malangkagon nga pagpakigbahin sa pagtinuon. Luyag binagbinagon sang ulo sang pamilya ang mga kinahanglanon sang pamilya kon nagapili sing materyal nga pagatun-an kag sing adlaw, tion, kag kalawigon sang pagtinuon. Hatagi sing prioridad ang pangpamilya nga pagtuon sa semanal nga iskedyul. Indi pagtuguti nga upangan ini sang indi tanto ka importante nga mga butang.​—⁠Filip. 1:​10, 11.

⁴ Ginautod sang isa ka amay nga masunson makabaton sa iya balay sing mga tawag may kaangtanan sa negosyo ang telepono sa tion sang pagtinuon sang pamilya. Kon may mga kliyente nga magaabot sa balay, ginaagda niya sila sa pagbuylog sa pagtinuon ukon sa paghulat tubtob matapos ini. Ang amay determinado nga wala sing butang nga magaupang sa pagtinuon sang pamilya. May daku ini nga epekto sa iya pamilya, kag tuhoy sa iya negosyo, nagtin-ad ini.

⁵ Makalilipay gid kon ang mga katapo sang pamilya nagabinuligay sa espirituwal nga mga hilikuton! Ang katutom sa aton mga panikasog nga makapakigbahin sing bug-os sa pangpamilya nga pagtuon sa Biblia magaresulta sa mga pagpakamaayo ni Jehova.​—⁠Sal. 1:⁠3.