Ginhilway sang Kamatuoran

SA Estados Unidos, kapin sa isa ka milyon ka tawo ang nabukot sa mga bilangguan. Sa sini, halos tatlo ka libo ang ginpamatbatan sing kamatayon. Handurawa ang imo kaugalingon sa sina nga kahimtangan. Ano ang batyagon mo? Makahaladlok gid matuod hunahunaon ini nga butang. Apang, sa isa ka kahulugan, ang tanan nga tawo yara sa kaanggid nga kahimtangan. Ang Biblia nagasiling: “Ang tanan nakasala kag nawad-an sing himaya sang Dios.” (Roma 3:23) Huo, subong mga kaliwat ni Adan, “bilanggo” kita sang isa ka makasasala nga kahimtangan. (Roma 5:12) Mabatyagan naton kada adlaw ang mga epekto sang aton pagkabilanggo, subong sang nabatyagan anay sang Cristianong apostol nga si Pablo, nga nagsulat: “Nakita ko ang tuhay nga kasuguan sa akon mga bahin nga nagapakig-away batok sa kasuguan sang akon hunahuna kag nagadala sa akon sa kabihagan sa kasuguan sang sala nga yari sa akon mga bahin.”​—⁠Roma 7:⁠23.

Subong resulta sang aton makasasala nga kinaugali, ang kada isa sa aton napamatbatan sing kamatayon, kon sa aton pa, kay ang Biblia nagasiling: “Ang bayad sang sala amo ang kamatayon.” (Roma 6:23) Sibu nga ginlaragway ni salmista Moises ang aton kahimtangan: “Kapituan ka tuig lang ang sa aton​—⁠kawaluan ka tuig, kon mabakod kita; apang ang lamang nga ginadala sini sa aton amo ang kabudlayan kag kasubo; sa indi madugay ang kabuhi nagataliwan, kag wala na kita.”​—⁠Salmo 90:​10, Today’s English Version; ipaanggid ang Santiago 4:⁠14.

Ginahunahuna ni Jesus ang pagkaulipon sang katawhan sa sala kag kamatayon sang magsiling sia sa iya mga sumulunod: “Ang kamatuoran magahilway sa inyo.” (Juan 8:32) Paagi sadtong mga pulong, ginpaalinton ni Jesus sa iya mga sumulunod ang paglaum nga labi pa sa kahilwayan gikan sa paggahom sang Roma​—⁠gintanyag niya sa ila ang kapatawaran sa sala kag ang kahilwayan gikan sa kamatayon! Paano ini ihatag sa ila? “Kon ang Anak maghilway sa inyo,” siling ni Jesus sa ila, “matuod gid nga mangin hilway kamo.” (Juan 8:36) Huo, paagi sa paghalad sang iya kabuhi, “ang Anak,” nga si Jesus, nangin isa ka tumbas nga halad sa paggawad sang nadula ni Adan. (1 Juan 4:10) Ginbuksan sini ang dalan agod ang tanan matinumanon nga katawhan mahilway gikan sa pagkaulipon sa sala kag kamatayon. Ang bugtong nga Anak sang Dios napatay “agod nga ang bisan sin-o nga magtuo sa iya indi mawala kundi may kabuhi nga walay katapusan.”​—⁠Juan 3:⁠16.

Sa amo ang kamatuoran nga makahilway sa aton nasentro kay Jesucristo. Ang mga tawo nga nangin suod nga mga sumulunod niya may paglaum nga mahilway gikan sa sala kag kamatayon kon ang Ginharian sang Dios bug-os nga magagahom sa mga nagakatabo sa duta. Bisan sa karon, ang mga tawo nga nagabaton sing kamatuoran sang Pulong sang Dios nagaeksperiensia sing matuod nga kahilwayan. Sa anong mga paagi?

Kahilwayan Gikan sa Kahadlok sa mga Patay

Minilyon karon ang nagakabuhi nga may kahadlok sa mga patay. Ngaa? Bangod gintudluan sila sang ila relihion nga sa tion sang kamatayon ang kalag nagaguwa sa lawas kag nagasaylo sa duog sang mga espiritu. Amo kon ngaa kinabatasan sa pila ka pungsod nga maghiwat ang mga paryente sang napatay sing bilasyon nga nagadugay sing pila ka adlaw kag gab-i. Masami ini nagalakip sing mabaskog nga kinanta kag pagbombo sing mga tambor. Nagapati ang mga nagapabilasyon nga magapahamuot ini sa napatay nga tawo kag magapugong sa iya espiritu sa pagbalik agod murtuhon ang mga nagakabuhi. Ang butig nga mga panudlo sang Cristiandad tuhoy sa mga patay ginabangdan lamang sang pagpadayon sining tradisyon.

Apang, ginapahayag sang Biblia ang kamatuoran tuhoy sa kahimtangan sang mga patay. Maathag ini nga nagasiling nga ang imo kalag amo ikaw, indi ang makatalanhaga nga bahin nimo nga nagapadayon sa pagkabuhi sa tapos sang kamatayon. (Genesis 2:7; Ezequiel 18:⁠4) Dugang pa, ang mga patay wala ginapaantos sa isa ka kalayuhon nga impierno, ukon bahin sila sang isa ka duog sang mga espiritu nga makaapektar sa mga buhi. “Apang ang mga patay,” siling sang Biblia, “wala sila makahibalo sing bisan ano . . . Kay sa Sheol (lulubngan], nga imo ginakadtuan walay buluhaton ukon pahito ukon ihibalo ukon kaalam.”​—⁠Manugwali 9:​5, 10.

Ining mga kamatuoran sang Biblia naghilway sa madamo nga tawo gikan sa kahadlok sa mga patay. Wala na sila nagahalad sing malahalon nga mga halad agod mapalinong ang ila mga katigulangan, ukon nagakabalaka pa sila nga ang ila mga hinigugma walay kaluoy nga ginapaantos bangod sang ila mga sala. Natun-an nila nga ang Biblia nagatanyag sing matahom nga paglaum para sa mga napatay, kay ginasugiran kita sini nga sa gintalana nga tion sang Dios, may “pagkabanhaw sang mga matarong kag mga dimatarong.” (Binuhatan 24:15; Juan 5:​28, 29) Sa amo, ang mga patay nagapahuway lamang karon, nga subong sang hamuok nga pagtulog.​—⁠Ipaanggid ang Juan 11:​11-14.

Ang kamatuoran nahanungod sa kahimtangan sang mga patay kag ang paglaum sa pagkabanhaw makahilway sa aton gikan sa kasubo nga ginadala sang kamatayon. Ini nga paglaum nagpabaskog sa isa ka mag-asawa sa Estados Unidos sang mapatay sa isa ka aksidente ang ila kuatro anyos nga anak nga lalaki. “May bakante sa amon kabuhi nga indi mapun-an tubtob makita namon liwat ang amon anak paagi sa pagkabanhaw,” baton sang iya iloy. “Apang nahibaluan namon nga umalagi lamang ang amon pag-antos, kay nanaad si Jehova nga pahiran niya ang amon mga luha sang kasubo.”​—⁠Bugna 21:​3, 4.

Kahilwayan Gikan sa Kahadlok sa Palaabuton

Ano ang ginatigana sang palaabuton? Masunog ayhan ang aton duta sa isa ka nuklear nga sunog? Ang pagkalaglag bala sang palibot sang duta magahimo sang aton planeta nga indi na mapuy-an? Magadul-ong bala sa anarkiya kag kinagubot ang pagnubo sang moral? Amo gid ini ang mga ginakahadlukan sang madamo karon.

Apang, nagatanyag ang Biblia sing kahilwayan gikan sa sining makahalit nga mga kahadlok. Nagapasalig ini sa aton nga “ang duta nagapabilin tubtob sa walay katubtuban.” (Manugwali 1:⁠4) Wala gintuga ni Jehova ang aton planeta agod laglagon lamang sang iresponsable nga mga tawo. (Isaias 45:18) Sa baylo, gintuga ni Jehova ang duta agod mangin isa ka paraiso nga puluy-an para sa nahiusa nga pamilya sang tawo. (Genesis 1:​27, 28) Amo gihapon ang iya katuyuan. Ang Biblia nagasugid sa aton nga “laglagon [sang Dios] ang mga nagalaglag sang duta.” (Bugna 11:18) Sa tapos sina, “ang mga mahagop mismo magapanag-iya sang duta,” siling sang Biblia, “kag makasapo gid sila sing bug-os nga kalipay sa kabuganaan sang paghidait.”​—⁠Salmo 37:11.

Masaligan ini nga saad, kay ang Dios wala nagabutig. Nagsiling si Jehova paagi sa iya manalagna nga si Isaias: “Ang pulong nga nagaguwa sa akon baba . . . indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga ginpadalhan ko sini.” (Isaias 55:11; Tito 1:2) Busa, mapaabot naton nga may pagsalig ang katumanan sang saad sang Dios nga narekord sa Biblia sa 2 Pedro 3:13: “Nagahulat kita sing bag-ong mga langit kag bag-ong duta suno sa iya saad, kag sa sini magapuyo ang pagkamatarong.”

Kahilwayan Gikan sa Kahadlok sa Tawo

Nagahatag sa aton ang Biblia sing maayo gid nga mga huwaran sang mga lalaki kag mga babayi nga nagpakita sing pagkawalay kahadlok sa ila debosyon sa Dios. Lakip sa ila amo sanday Gideon, Barak, Debora, Daniel, Ester, Jeremias, Abigail, kag Jael​—⁠sa paghingalan sing pila lamang. Ining matutom nga mga lalaki kag mga babayi nagpakita sing panimuot sang salmista nga nagsulat: “Ginpahamtang ko ang akon pagsalig sa Dios. Indi ako mahadlok. Ano ang mahimo sa akon sang tawo?”​—⁠Salmo 56:⁠11.

Sang unang siglo, sanday apostol Pedro kag Juan nagpakita sing amo man nga kaisog sang ginmanduan sila sang relihioso nga awtoridad nga mag-untat sa pagbantala. “Para sa amon,” sabat nila, “indi namon mahimo nga mag-untat sa paghambal nahanungod sa mga butang nga amon nakita kag nabatian.” Subong resulta sang ila malig-on nga panindugan, si Pedro kag si Juan ginbilanggo sang ulihi. Sa tapos sang ila milagruso nga pagguwa sa bilangguan, nagbalik sila dayon sa ila hilikuton kag nagpadayon sa ‘pagpamulong nga may kasidla sang pulong sang Dios.’ Wala madugay gindala si Pedro kag ang iban pa nga mga apostoles sa atubangan sang Judiyong Sanhedrin. “Ginmanduan namon kamo sing maid-id nga indi na magpadayon sa pagpanudlo pasad sa sining ngalan,” siling sang mataas nga saserdote sa ila, “apang, yari karon! ginpuno ninyo ang Jerusalem sang inyo panudlo.” Si Pedro kag ang iban pa nga mga apostoles nagsabat: “Dapat namon tumanon ang Dios subong manuggahom sa baylo sang mga tawo.”​—⁠Binuhatan 4:​16, 17, 19, 20, 31; 5:​18-20, 27-29.

Sa ila hilikuton nga pagbantala sing maayong balita sang Ginharian sang Dios, ginatinguhaan sang mga Saksi ni Jehova karon nga ilugon ang kakugi sang mga Cristiano sang unang siglo. Bisan gani ang mga pamatan-on sa tunga nila masami nagapamatuod nga sila walay kahadlok paagi sa pagpakighambal sa iban tuhoy sa ila pagtuluuhan. Binagbinaga ang pila ka halimbawa.

Si Stacie, isa ka tin-edyer, kinaugali nga mahuluy-on. Gani, isa gid ka hangkat sa iya sang primero ang pagpakighambal sa iban tuhoy sa iya pagtuluuhan. Ano ang iya ginhimo agod malandas ang iya pagkamahuluy-on? “Gintun-an ko ang Biblia kag ginpat-od nga nahangpan ko gid ang akon ginahambal,” siling niya. “Nangin mas mahapos ini, kag nagdugang ang akon kompiansa sa kaugalingon.” Ang maayong reputasyon ni Stacie ginbalita sa lokal nga pamantalaan. Ang artikulo, nga ginsulat sang isa ka manunudlo sa iya ginaeskwelahan, nagkomento: “Ang pagtuo [ni Stacie] daw amo ang nagahatag sa iya sing kusog nga landason ang madamo sang mga pag-ipit nga ginabatyag sang kalabanan nga tin-edyer. . . . Nagapati sia nga ang pag-alagad sa Dios dapat amo ang unahon sa iya hunahuna.”

Si Tommy nagsugod sa pagtuon tuhoy sa Biblia gikan sa iya mga ginikanan sang singko anyos lamang sia. Bisan sang bata pa sia, malig-on nga nanindugan sia para sa matuod nga pagsimba. Samtang ang lamharon nga mga kabutho niya nagdrowing sing mga laragway sang mga selebrasyon, si Tommy nagdrowing sing mga danyag sang ginsaad nga Paraiso sang Dios. Subong isa ka tin-edyer, natalupangdan ni Tommy nga madamo sang mga bumulutho ang indi makahangop sa mga pagtuluuhan sang mga Saksi ni Jehova. Sa baylo nga mag-isol sa kahadlok, ginpamangkot niya ang isa sang iya mga manunudlo kon mahimo sia makadumala sing pamangkot-kag-sabat nga paghambalanay upod sa iya klase agod nga masabat niya ang tanan nila nga pamangkot sa isa ka tion. Gintugutan ini, kag isa ka maayong panaksi ang nahatag.

Sang 17 anyos sia, nakasapo si Markietta sing isa ka maayo gid nga kahigayunan sa pagpakighambal sa iban sa iya klase nahanungod sa iya pagtuluuhan. “Ginhatagan kami sing asaynment nga maghimo sing pamulongpulong,” siling niya. “Ginkuha ko ang akon topiko gikan sa libro nga Questions Young People Ask​—⁠Answers That Work.a Nagpili ako sing lima ka kapitulo gikan sa libro kag ginsulat ang mga tig-ulo sa pisara. Ginpangabay ko ang klase nga pasunuron ini suno sa ginabatyag nila amo ang labing importante.” Nagsunod ang pagpaathag nga may pagpakigbahin sang klase. “Ginpakita ko sa klase ang libro,” hinakop ni Markietta, “kag madamo nga estudyante ang nangabay sing kopya. Bisan gani ang manunudlo ko nagsiling nga luyag man niya.”

Sarang Ikaw Mahilway sang Kamatuoran

Subong nakita na naton, ang kamatuoran sang Biblia may makahilway nga epekto sa tanan nga sahi sang edad nga nagatuon sini kag nagapasulod sang mensahe sini sa tagipusuon. Nagahilway ini sa ila gikan sa kahadlok sa mga patay, kahadlok sa palaabuton, kag kahadlok sa tawo. Sa ulihi, ang gawad ni Jesus magahilway sa matinumanon nga katawhan gikan sa sala kag kamatayon. Makalilipay gid ang magpuyo sing dayon sa isa ka paraiso nga duta, nga wala na ginabilanggo sang aton napanubli makasasala nga kahimtangan!​—⁠Salmo 37:⁠29.

Luyag mo bala makatuon sing dugang pa nahanungod sa mga pagpakamaayo nga ginsaad sang Dios? Kon amo, ano ang dapat mo himuon? Si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:⁠3) Gani kon luyag mo maeksperiensiahan ang kahilwayan nga ginsaad ni Jesus sa iya mga disipulo, dapat ikaw magtuon nahanungod kay Jehova nga Dios kag sa iya Anak. Dapat mo hibaluon kon ano ang kabubut-on sang Dios kag dayon himuon ini, kay ang Biblia nagasiling: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”​—⁠1 Juan 2:​17.

[Footnote]

[Kapsion sa pahina 7]

Sa idalom sang Ginharian sang Dios, ang katawhan sa katapusan hilwayon gikan sa sala kag kamatayon