“Nagatindog Ako nga Malig-on! Nagatindog Ako nga Malig-on! Nagatindog Ako nga Malig-on!”
1 Yadto nga mga pulong sang isa ka matutom nga Cristiano nga nakalampuwas sa Holocaust nagapalanog sang determinasyon sang linibo ka Saksi—buhi kag patay—nga malig-on sa ila mga pagtuo walay sapayan sang kapintas sang mga Nazi. (Efe. 6:11, 13) Ang ila makakulunyag nga sugilanon sang kaisog kag kadalag-an ginasugid sa makapulukaw-sing-tagipusuon nga video nga Jehovah’s Witnesses Stand Firm Against Nazi Assault. Ang tanan sa kongregasyon ginapalig-on nga tan-awon ini kag magsugid sang ila impresyon kag balatyagon.
2 Pukawa ang imo hunahuna sining mga pamangkot: (1) Bangod sa ano nga mga rason nga ang mga Saksi ni Jehova nagtindog sing masidla batok sa mga Nazi? (2a) Anong nagasumpakilay nga mga punto-de-vista ang nagaluntad anay may kaangtanan sa panamyaw, kag ngaa? (2b) Paano ini nag-apektar sa Saksi nga mga pamilya? (3) Pila ka Saksi ang ginhunong sa mga kampo konsentrasyon, paano sila nakilal-an didto, kag paano sila gintratar sang mga Gestapo? (4) Ano nga bili ang indi luyag nga ibayad sang aton mga kauturan para sa kahilwayan? (5a) Paano kag san-o ang mga Saksi ni Jehova nagpamulong sing masidla batok sa kapintas sang rehimen ni Hitler? (5b) Ano ang reaksion ni Hitler? (6) Paano ang paghiusa sang katawhan ni Jehova napamatud-an nga nagaluwas sing kabuhi sa ila kag sa iban, sa pisikal kag espirituwal? (7) Ano nga ambahanon sang Ginharian ang ginsulat sa kampo konsentrasyon? (8) Ano nga mga halimbawa sang matutom nga mga lalaki, mga babayi, kag mga pamatan-on ang nagapapagsik sa imo nga huptan ang imo integridad kay Jehova, ano man ang matabo sa aton? (Tan-awa man ang 1999 Yearbook, pahina 144-7.) (9) Subong isa sang mga Saksi ni Jehova, ano ang ginapabatyag sini nga video sa imo nga indi ka bahin sang kalibutan?
3 Ang makapalig-on nga halimbawa sang mga Saksi ni Jehova nga ginlarawan sa Stand Firm nga video makabulig sa mga pamatan-on, bisan sa mga indi Saksi, sa pag-atubang sang importante nga mga problema subong sang pagkadi-mapahanuguton, pag-ipit sang mga katubotubo, kag konsiensia. Kon ikaw isa ka pamatan-on nga nagaeskwela sa elementarya ukon hayskul, mahatagan mo bala ang imo mga manunudlo sing kahigayunan nga gamiton ini nga materyal sa klase? Ayhan matanyagan mo sila sing isa ka kopya sang video kag malaragway ini subong isa ka wala makilal-i sing maayo nga maragtas ukon subong isa ka dokumentaryo nga may leksion sa moral.
4 Ang Stand Firm nga video isa ka maayo gid nga gamit agod ipakita kon paano ang panudlo sang Dios nagahatag sa aton sing espirituwal nga kusog nga pahamut-an ang Dios paagi sa pagpabilin nga malig-on sa kon ano ang matarong. (1 Cor. 16:13) Ipaambit ini sa tanan nga interesado sa kamatuoran.