Apresyaha ang mga Galamiton sa Teokratikong mga Hilikuton
1 Sang naghimo sing mga kahimusan sa pagpakay-o sang templo, gindayaw ni Hari Josias ang mga gintugyanan sa pag-obra sini, nga nagasiling: “Indi na kinahanglan nga isipon ang kuwarta sa kamot sang mga gintugyanan sini, kay nagapangabudlay sila sing matutom.” (2 Hari 22:3-7) Ang apresasyon sini nga mga tawo sa sagrado nga mga butang maathag sa kon paano nila ginagamit ang galamiton nga ginsalig sa ila. Sa karon, samtang nagapakigbahin kita sa balaan nga hilikuton sang maayong balita sang Dios, dapat man kita magpakita sing pagkamasaligan sa paggamit sang mga galamiton nga ginhatag sa aton.
2 Sa Ministeryo sa Latagon: Ang pag-apresyar sa importante nga mensahe nga yara sa aton mga publikasyon kag ang ihibalo sa kagastuhanan agod mahimo ini magapahulag sa aton nga pabaloran gid ini. Indi nagakaigo nga ipanagtag lang naton ang aton mga literatura sa mga tawo nga wala nagapakita sing matuod nga apresasyon sa mensahe sang Biblia. Kon diutay ang interes sang isa ka tawo sa maayong balita, sarang naton matanyag sa iya ang isa ka tract sa baylo sang iban nga literatura.
3 Ipanagtag ang mga literatura sa paagi nga nagapakita sing pagpabalor sa sini. Indi ini pag-ibilin sa publiko nga mga duog diin mahimo nga magalinapta lamang ini. Agod indi makauyang, hibalua kon ano nga literatura ang yara sa inyo antes magkuha sing dugang pa. Kon pirme may sobra ang ginakuha mo nga magasin kada isyu, binagbinaga nga buhinan ang imo order.
4 Mga Publikasyon nga Ginagamit sing Personal: Dapat yadtong kinahanglanon lamang naton ang aton orderon. Ilabi na nga dapat mangin mainandamon kon nagapangabay sing deluxe nga mga Biblia, mga Reference Bible, kag iban nga dalagku nga mga publikasyon, subong sang Concordance, Index, mga tomo sang Insight, kag Proclaimers nga libro, kay daku ang nagasto sa paghimo sini.
5 Ginasulatan mo bala sang imo ngalan kag direksion ang imo personal nga mga kopya sang publikasyon? Makabulig ini agod indi pag-islan dayon ang mga publikasyon nga nadula. Kon nadula mo ang isa ka songbook, Biblia, ukon ginatun-an nga publikasyon, ayhan makita mo ini sa mga nakita nga butang sa Kingdom Hall ukon sa asambleya.—Luc. 15:8, 9.
6 Gamiton naton sing maalamon ang aton mga literatura. Isa ini ka paagi nga mapasundayag naton ang aton pagkamasaligan sa paggamit sang mga pagkabutang sang Ginharian nga gintugyan sa aton ni Jehova.—Luc. 16:10.