Magpadayon sa Pagbantala
1 Nag-abot na ang makahalanguyos nga mga tion. Ang sibil nga pagbinangig, etniko nga mga inaway, kinaugali nga mga kalamidad, kag iban pa makahaladlok nga mga hitabo kinaandan na lamang. Mas labi nga ginakinahanglan sang tawhanon nga pamilya ang maayong balita karon. Apang, lapnag ang di-pagsapak sa espirituwal nga mga butang. Sa pila ka duog, mahimo mabudlay masalapuan ang mga tawo sa ila puluy-an kag mas mabudlay pa gid makasalapo sing mga tawo nga mamati sa aton ukon maluyag sa pagtuon sa Biblia. Walay sapayan sini, importante nga magpadayon kita sa pagbantala sing maayong balita sang natukod na nga Ginharian sang Dios.—Mat. 24:14.
2 Gugma sa mga Tawo: Ang aton nga pagbantala nagapatalupangod sang gugma ni Jehova sa katawhan. “Indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Ped. 3:9; Ezeq. 33:11) Gani, subong sang ginsiling ni Jesus, sia nagsugo “sa tanan nga kapungsuran ang maayong balita dapat anay ibantala.” (Mar. 13:10) Ginpangabay sang Dios ang mga tawo nga magliso sa iya agod maluwas sa nagapakari nga paghukom sa kalibutan ni Satanas. (Joel 2:28, 29, 32; Sof. 2:2, 3) Nagapasalamat bala kita nga ginhatagan kita ni Jehova sini nga kahigayunan?—1 Tim. 1:12, 13.
3 Ang bug-os kalibutan nga report nagapakita nga sang 2004 nga tuig sang pag-alagad, may promedyo nga 6,085,387 ka pagtinuon sa Biblia ang ginahiwat kada bulan, kag may promedyo nga mga 5,000 ka bag-o nga mga disipulo ang ginabawtismuhan kada semana! Ang pila sining bag-o nga mga nagdedikar nasalapuan bangod sang pagpakamaayo ni Jehova sa padayon nga panikasog sang mga manugbantala sa pagpakighambal sa tanan sa ila mga teritoryo. Daw ano nga kalipay ang gindulot sini sa mga kongregasyon, kag daw ano nga pribilehiyo nga mangin masigkamanugpangabudlay sang Dios sa sining nagaluwas-kabuhi nga hilikuton!—1 Cor. 3:5, 6, 9.
4 Pagdayaw sa Ngalan Sang Dios: Nagapadayon kita sa pagbantala agod madayaw si Jehova sing dayag kag mapakabalaan ang iya ngalan sa tanan nga katawhan. (Heb. 13:15) Napatalang ni Satanas “ang bug-os napuy-an nga duta” sa pagpati nga ang Dios wala sing gahom sa paglubad sa mga palaligban sang katawhan, nga wala sia nagasapak sa pag-antos sang tawo, ukon nga wala gani sia nagaluntad. (Bug. 12:9) Paagi sa aton pagbantala, ginapangapinan naton ang kamatuoran tuhoy sa aton dalayawon nga langitnon nga Amay. Kabay nga padayon naton nga dayawon ang iya ngalan—karon kag sa walay katubtuban.—Sal. 145:1, 2.