Pagpanaksi Bisan Walay Pulong
1 Bisan wala nagahambal, ang pisikal nga tinuga ni Jehova maathag nga nagapamatuod sa iya di-makita nga mga kinaiya. (Sal. 19:1-3; Roma 1:20) Sing kaanggid, ang aton maayong paggawi, Cristianong mga kinaiya, kag maugdang nga panagway nagapanaksi man bisan walay pulong. (1 Ped. 2:12; 3:1-4) Dapat nga handumon gid naton tanan nga ‘mapunihan ang panudlo sang aton Manluluwas, ang Dios, sa tanan nga butang’ paagi sa aton maayong paggawi.—Tito 2:10.
2 Paano mahimo sang di-himpit nga tawo nga makagalanyat ang mga panudlo sang Biblia? Posible lamang ini paagi sa pag-ubay sang Pulong sang Dios kag sa gahom sang balaan nga espiritu. (Sal. 119:105; 143:10) “Ang pulong sang Dios buhi kag gamhanan kag matalom pa sa bisan ano nga espada nga duha sing sulab.” (Heb. 4:12) Nagapanalupsop ini sa sulod naton kag nagapabag-o sang aton personalidad. (Col. 3:9, 10) Mapatubas sa aton sang balaan nga espiritu ang maayong mga kinaiya, subong sang pagkamainayuhon, pagkaayo, kalulo, kag pagpugong sa kaugalingon. (Gal. 5:22, 23) Ginatugutan bala naton nga manghikot ang pulong kag espiritu sang Dios sa aton kabuhi?—Efe. 4:30; 1 Tes. 2:13.
3 Matalupangdan Sang Iban: Kon sundon naton ang mga talaksan ni Jehova kag tinguhaan nga ipadayag ang iya mga kinaiya, matalupangdan ini sang iban. Binagbinaga halimbawa, may isa ka tawo nga ginahikayan sang iya mga katrabaho bangod sang iya kaputot. Ang isa ka utod nga babayi nga kaupod niya sa opisina nagatratar sa iya nga may dignidad kag pagtahod. Nagpahulag ini sa iya nga mamangkot kon ngaa lain sia sa iban. Nagpaathag ang utod nga ang iya pagkamatinahuron resulta sang iya pag-aplikar sa mga prinsipio sa Biblia. Ginpaambit man sang utod sa iya ang dalayawon nga paglaum sa Ginharian. Nagtuon sa Biblia ang tawo kag sang ulihi nagpabawtismo. Sang nagbalik sia sa ila duog, ang iya kaparyentehan nagdayaw gid sa iya maayong paggawi, kag ang pila sa ila nagbaton man sang kamatuoran.
4 Mahimaya sang iban ang Dios bangod sa aton maayong paggawi kag pagpanaksi sa ila sa ulubrahan, sa eskwelahan, ukon sa pagpakig-angot sa aton mga paryente kag mga kaingod.—Mat. 5:16.