“Magpanaksi Sing Maid-id sa Maayong Balita”
1. Anong maayong balita ang aton ginapaambit sa iban?
1 Sa karon, talagsa lang ang maayong balita, busa pribilehiyo naton “nga magpanaksi sing maid-id sa maayong balita tuhoy sa wala tupong nga kaayo sang Dios.” (Binu. 20:24) Nagadalahig ini sa pagpahibalo sa mga tawo nga ang “katapusan nga mga adlaw” sa indi madugay pagabuslan sang matarong nga bag-ong kalibutan ni Jehova, nga sa amo nga tion ‘ang mga butang sang una magtaliwan na.’ (2 Tim. 3:1-5; Bug. 21:4) Sa sina nga tion wala na sing balatian. (Isa. 33:24) Magagua sa handumanan nga lulubngan ang napatay nga mga hinigugma kag magaupod liwat sa ila pamilya kag mga abyan. (Juan 5:28, 29) Himuon nga matahom nga paraiso ang bug-os nga duta. (Isa. 65:21-23) Pila lamang ini sa maayong balita nga ginapaambit naton!
2. Ngaa ang panag-on sang Memoryal magahatag sing maayo gid nga mga kahigayunan sa pagpanaksi sing maayong balita?
2 Ang bulan sang Marso, Abril, kag Mayo magahatag sa aton sing maayo gid nga kahigayunan sa pagbantala sining maayong balita. Maayo ang klima sa sini nga mga bulan kag mas malawig ang adlaw sangsa gab-i, sa amo makahinguyang kita sing mas madugay sa ministeryo. Dugang pa, ang labing importante nga okasyon, ang Memoryal, pagasaulugon sa pagtunod sang adlaw sa Sabado, Marso 22 sa bug-os nga kalibutan. Karon na ang tion sa paghanda agod madugangan ang aton hilikuton sa pag-alagad sa latagon.
3. Ano ang makabulig sa aton agod madugangan ang aton hilikuton subong pamilya?
3 Pag-auxiliary Payunir: Mahimo mo bala mabag-o ang imo iskedyul agod makaauxiliary payunir ka sing isa, duha, ukon tatlo ka bulan? Ngaa indi ini pagbinagbinagon sa masunod nga pagtinuon sang inyo pamilya? Upod ang maayo nga kooperasyon, ang isa ukon kapin pa nga katapo sang pamilya mahimo nga makaauxiliary payunir. (Hulu. 15:22) Ipangamuyo ini, kag pat-od nga pakamaayuhon ni Jehova ang inyo panikasog. (Hulu. 16:3) Bisan pa wala sing makaauxiliary payunir sa pamilya, ang tanan nga katapo sang pamilya sarang makapahamtang sing espesipiko nga mga tulumuron agod madugangan ang ila pagpakigbahin sa ministeryo samtang nagapanghikot upod sa mga makaauxiliary payunir.
4. Kon bug-os tion ang aton trabaho, paano naton maiskedyul ang aton mga hilikuton agod makaauxiliary payunir?
4 Kon bug-os tion ang imo trabaho, ang isa ka maayo nga iskedyul magapaposible sa imo nga makaauxiliary payunir. Ayhan magamit mo ang tigpalanyaga sa pagbantala. Ukon mahimo ka mangayo sing personal nga teritoryo nga malapit sa inyo balay ukon sa imo ulubrahan kag magbantala sing isa ka oras antes kag pagkatapos sang trabaho. Mahimo mo man madugangan ang tion sa pagbantala sa imo iskedyul paagi sa pagpaisol sang indi tanto ka importante nga mga hilikuton sa masunod nga bulan kag paagi sa pagministeryo sing bug-os adlaw sa mga talipuspusan sang semana. Ang iban nagabakasyon gikan sa ila trabaho sing isa ukon duha ka adlaw kag ginahinguyang ini sa pag-alagad sa latagon.
5. Paano ninyo mabuligan ang mga may edad na ukon may balatian agod makaauxiliary payunir?
5 Kon may edad ka na ukon may balatian ukon nagaluya na ang panglawas, mahimo ka makaauxiliary payunir paagi sa paghinguyang sing diutay nga tion kada adlaw sa ministeryo. Pangabaya si Jehova nga hatagan ka sing “gahom nga labaw sa kinaandan.” (2 Cor. 4:7) Ang isa ka utod nga babayi nag-auxiliary payunir sa edad nga 106! Sa bulig sang iya mga paryente nga Cristiano kag sang iban sa kongregasyon, nakabantala sia sa mga pamalay, nakaduaw liwat, nakadumala sing pagtuon sa Biblia, kag nakigbahin sa iban pa nga mga hilikuton sa pagministeryo. Napulo ka tawo ang nasugdan niya sa pagtuon sa Biblia. “Kon ginapamensaran ko ang dalayawon nga pribilehiyo sa pag-auxiliary payunir,” siling niya, “ang akon tagipusuon puno gid sing gugma kag pagpasalamat kay Jehova, sa iya Anak, kag sa Iya mahigugmaon nga organisasyon. Luyag ko gid magsiling ‘salamat Jehova!’”
6. Paano makaauxiliary payunir ang bawtismado nga mga estudyante?
6 Kon ikaw isa ka bawtismado nga pamatan-on nga estudyante, mahimo ka man makaauxiliary payunir. Kaangay sa mga nagatrabaho sing bug-os tion, mahimo nga maiskedyul mo man ang mga talipuspusan sang semana para sa pagministeryo. Ayhan mahimo ka man magbantala sing isa ka oras ukon kapin pa pagkatapos sang klase. May mga selebrasyon bala sa eskwelahan nga mahimo mo mahinguyang sa pagministeryo? Kon luyag mo mag-auxiliary payunir, istoryaha ang imo mga ginikanan tuhoy sa sini.
7. Ano ang mahimo sang mga gulang agod mapabaskog ang kapagsik sa ministeryo sa panag-on sang Memoryal?
7 Pabaskuga ang Kapagsik: Daku ang mahimo sang halimbawa sang mga gulang sa pagpabaskog sang kapagsik sa kongregasyon. (1 Ped. 5:2, 3) Mahimo nga mamat-od sila nga mag-iskedyul sing dugang pa nga mga miting sa pag-alagad sa latagon para sa mga magapakigbahin sa ministeryo sa aga, pagkatapos sang klase, ukon pagkatapos sang trabaho. Dapat pat-uron sang manugtatap sang pag-alagad nga may kalipikado nga mga manugbantala nga maasayn sa pagpanguna, may bastante nga teritoryo kag may mga magasin kag literatura para sa sining pinasahi nga bulan.
8. Ano ang matun-an naton gikan sa eksperiensia sang isa ka kongregasyon?
8 Sa isa ka kongregasyon, abanse nga ginsugdan sang mga gulang ang pagpalig-on sa mga manugbantala nga mag-auxiliary payunir. Ginapahibalo nila kada semana sa kongregasyon kon pila ang naaprobahan subong auxiliary payunir. Sa amo, napasalig yadtong luyag mag-auxiliary payunir nga madamo sila sing mangin kaupod sa pag-alagad. Naghimos sila sing dugang pa nga mga miting sa pag-alagad sa latagon para sa kaagahon kag kagab-ihon. Ang resulta amo nga 53 ka manugbantala ang nag-auxiliary payunir sa Abril, halos katunga sang kongregasyon!
9. Ngaa maayo gid nga tion ang panag-on sang Memoryal para sa mga kalipikado nga magsugod sa pagbantala?
9 Buligi ang Iban sa Pagbantala: Kon kalipikado na ang mga bag-uhan kag mga pamatan-on nga mangin manugbantala, mahimo sila paupdon sa eksperiensiado nga mga manugbantala sa pag-alagad sa latagon. Ini nga kahigayunan bukas sa panag-on sang Memoryal kay madamo sa kongregasyon ang nagadugang sang ila pagpanghikot sa latagon sa sini nga tion. May estudyante ka bala sa Biblia nga nagauswag kag nagapahisuno na sang iya kabuhi sa matarong nga mga talaksan ni Jehova? May mabuot ka bala nga mga kabataan nga nagauswag sa espirituwal apang indi pa mga manugbantala? Kon ipabutyag nila nga luyag nila mangin di-bawtismado nga manugbantala kag sa banta mo kalipikado sila, ipahibalo ini sa isa sa mga gulang. Ang nagadumala nga manugtatap magatangdo sing duha ka gulang agod masugilanon ka kag ang imo bata ukon estudyante sa Biblia tuhoy sa sini nga butang.
10. Ano ang sarang mahimo sang mga gulang agod buligan ang mga nagbugnaw?
10 Ang masunod man nga mga bulan maayo gid nga tion para ipadayon sang mga nagbugnaw ang ila pag-alagad upod sa kongregasyon. Dapat panikasugan gid sang mga manugtatap sang Pagtinuon sang Kongregasyon sa Libro kag sang iban pa nga mga gulang nga maduaw sila kag ipalab-ot sa ila ang mainit kag personal nga imbitasyon nga manghikot upod sa ila sa ministeryo. Kon madugay na sila nga nagbugnaw, dapat istoryahon anay sila sang duha ka gulang agod mahibaluan kon bala kalipikado sila sa pagbantala.—km 11/00 p. 7.
11. Ano ang labing dalayawon nga pagpabutyag sang “wala tupong nga kaayo sang Dios?”
11 Paghanda Para sa Memoryal: Ang gawad amo ang labing dalayawon nga pagpabutyag sang “wala tupong nga kaayo sang Dios.” (Binu. 20:24) Minilyon ka mainapresyahon nga mga tawo sa bug-os nga kalibutan ang magatipon sa Sabado, Marso 22, pagtunod sang adlaw, agod saulugon ang Memoryal sang kamatayon ni Cristo. Luyag naton agdahon kag buligan ang tanan nga bunayag sing tagipusuon nga mga tawo sa pagtambong sa sining importante nga okasyon nga nagapamatuod sang wala tupong nga kaayo ni Jehova sa katawhan.
12. Sin-o ang aton dapat agdahon sa Memoryal?
12 Ilista ang imo luyag nga imbitahon. Walay duhaduha nga nalakip sa imo listahan ang imo mga paryente, mga kaingod, mga kakilala sa ulubrahan ukon sa eskwelahan, mga estudyante sa Biblia sang una kag karon, kag ang tanan nga pirme mo ginaduaw. Kon mamangkot ang pila sang imo ginaagda tuhoy sa Memoryal, mahimo nga mabuligan ka sang artikulo sa apendise tuhoy sa Panihapon sang Ginuo sa pahina 206-8 sang Ginatudlo Sang Biblia nga libro. Mahimo pa gani ini magdul-ong sa pagtuon sa Biblia, bangod magahatag ini sa imo sing kahigayunan nga mapresentar sa iya ang publikasyon nga ginagamit naton sa mga pagtuon sa Biblia.
13. Paano ginpakamaayo ni Jehova ang panikasog sang duha ka manugbantala nga namat-od nga agdahon ang iban sa Memoryal?
13 Ang isa ka utod nga babayi naglista sing 48 ka pamilya agod agdahon sa Memoryal. Kon maagda na gani niya sila, ginamarkahan niya ang ila ngalan kag ginasulat ang petsa kon san-o niya sila naagda. Malipayon gid sia kay 26 ka tawo sa iya ginpang-agda ang nagtambong sa Memoryal! Gin-agda sang isa ka utod nga lalaki nga tag-iya sang tiendahan ang isa niya ka trabahador nga pari sang una. Nagtambong ang tawo kag pagkatapos sini nagtuaw sia, “Mas madamo pa ako sing natun-an sa Biblia sa sulod lang sang isa ka oras sangsa 30 ka tuig nga ginhinguyang ko sa Katoliko nga Simbahan.” Pagkatapos sang Memoryal, ginbaton niya ang isa ka pagtuon sa Ginatudlo Sang Biblia nga libro.
14. Ano nga kampanya sa bug-os nga kalibutan ang magasugod sa Marso 1?
14 Kampanya: Sugod sa Sabado, Marso 1 tubtob Marso 22, ang imbitasyon para sa Memoryal ipanagtag sa bug-os nga kalibutan. Pat-od nga ang tanan luyag gid nga makigbahin sing bug-os sa sining importante nga kampanya. Mas maayo kon personal naton nga ihatag sa tagbalay ang imbitasyon sa baylo nga ibilin naton ini sa ila puertahan. Apang, kon malapad ang inyo teritoryo, mahimo mamat-od ang mga gulang nga ibilin na lang sing mahalungon ang mga imbitasyon sa mga balay nga wala sing tawo. Sa mga talipuspusan sang semana, itanyag gihapon naton ang bag-o nga mga magasin.
15. Paano naton itanyag ang imbitasyon sa Memoryal?
15 Sanglit limitado lamang ang aton tion sa pagpanagtag sang imbitasyon, labing maayo kon lip-uton naton ang aton presentasyon. Mangin mainabyanon kag mapagsik. Mahimo ka magsiling sing subong sini: “Luyag namon nga maimbitar ka, ang imo pamilya, kag imo mga abyan sa sining importante nga okasyon nga pagahiwaton sa Marso 22. Yari ang imo imbitasyon. Palihug basaha ini para sa dugang nga impormasyon.” Mahimo nga magpamangkot ang tagbalay. Ukon mahimo nga batunon niya ang imbitasyon kag magsiling pa gani nga matambong sia. Tandai ang interes nga ginpakita kag duawon sia liwat.
16. Anong eksperiensia ang nagapakita sang kapuslanan sang kampanya sa pagpangimbitar sa mga tawo sa teritoryo nga magtambong sa Memoryal?
16 Sang nagligad nga tuig nakita sang isa ka soldado ang isa ka imbitasyon sa Memoryal sa ila puertahan. Namat-od sia nga magtambong apang dapat sia anay maglisensia sa iya opisyal. Sang ginpakita niya ang iya imbitasyon, naghipos ang opisyal kag nagsiling nga mga Saksi ang iya mga ginikanan kag nagatambong sia anay sa mga miting upod sa ila. Wala lamang niya ginpahanugutan ang soldado sa pagtambong kundi nag-upod man sia sa iya sa pagtambong sa Memoryal!
17. Paano naton mapakita nga wala naton nawasi ang katuyuan sang wala tupong nga kaayo sang Dios?
17 Magpakita Sing Apresasyon: Samtang nagahilapit na ang panag-on sang Memoryal sa 2008, kabay nga ipakita naton tanan ang wala tupong nga kaayo ni Jehova para sa aton. Nagsulat si apostol Pablo: “Nagahingyo man kami sa inyo nga indi ninyo pagwasihon ang katuyuan sang wala tupong nga kaayo sang Dios nga inyo nabaton.” (2 Cor. 6:1) Paano naton mapakita nga wala naton nawasi ang katuyuan sang wala tupong nga kaayo sang Dios? Nagsulat si Pablo: “Kundi sa tagsa ka paagi ginarekomendar namon ang amon kaugalingon subong mga ministro sang Dios.” (2 Cor. 6:4) Busa, ginapakita naton ang aton apresasyon sa dulot ni Jehova paagi sa aton maayong paggawi kag makugi nga pagbantala sing maayong balita. Sa sining panag-on sang Memoryal, may maayo gid kita nga kahigayunan sa pagdugang sang aton pag-alagad, nga magpanaksi sing maid-id sa maayong balita.
[Kahon sa pahina 3]
Sin-o ang Mahimo Mapalig-on sa Pag-auxiliary Payunir?
◼ Mga katapo sang pamilya
◼ Mga nagatrabaho sing bug-os tion
◼ Mga may edad na kag may balatian
◼ Mga estudyante
[Kahon sa pahina 4]
Kon Nagapanagtag Sing mga Imbitasyon Para sa Memoryal:
◼ Indi magpadugay; maghambal nga may kapagsik
◼ Ilista ang mga nagpakita sing interes kag balikan ini
◼ Itanyag ang mga magasin sa talipuspusan sang semana