Mga Ministro sang Maayong Balita

SI Jehova naghatag sa aton sing himpit nga huwaran nga dapat sundon—ang iya Anak, si Jesucristo. (1 Ped. 2:21) Ang bisan sin-o nga mangin sumulunod ni Jesus magabantala sang maayong balita subong ministro sang Dios. Makapaumpaw gid ini sa espirituwal, amo nga si Jesus nagsiling: “Kari sa akon, kamo tanan nga ginabudlayan kag ginabug-atan, kag papahuwayon ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kapahuwayan para sa inyo kaugalingon.” (Mat. 11:28, 29) Gintuman gid niya ang iya saad sa mga nagbaton sini nga imbitasyon!

² Subong Puno nga Ministro sang Dios, gin-agda ni Jesus ang pila ka indibiduwal nga mangin sumulunod niya. (Mat. 9:9; Juan 1:43) Ginhanas niya sila sa ministeryo kag ginpadala sila agod himuon man ang ginahimo niya. (Mat. 10:1–11:1; 20:28; Luc. 4:43) Sang ulihi, ginpadala niya ang 70 pa agod makigbahin sa pagbantala sing maayong balita tuhoy sa Ginharian sang Dios. (Luc. 10:1, 8-11) Sang ginpadala ni Jesus ini nga mga disipulo, nagsiling sia sa ila: “Ang nagapamati sa inyo nagapamati man sa akon. Kag ang nagasikway sa inyo nagasikway man sa akon. Gani, ang nagasikway sa akon nagasikway man sa Iya nga nagpadala sa akon.” (Luc. 10:16) Sa sini nga paagi, ginpadaku ni Jesus ang mabug-at nga responsibilidad sang mga disipulo. Itiglawas nila si Jesus kag ang Labing Mataas nga Dios! Amo man sini ang kahimtangan sang tanan nga nagbaton sang imbitasyon ni Jesus: “Kari ka, mangin sumulunod ko.” (Luc. 18:22; 2 Cor. 2:17) Ang tanan nga nagbaton sini ginsugo sang Dios nga magbantala sing maayong balita sang Ginharian kag maghimo sing mga disipulo.—Mat. 24:14; 28:19, 20.

³ Bangod ginbaton naton ang imbitasyon ni Jesus nga magsunod sa iya, ‘nakilala’ naton si Jehova nga Dios kag si Jesucristo. (Juan 17:3) Gintudluan kita sang dalanon ni Jehova. Paagi sa iya bulig, ginbag-o naton ang aton panghunahuna, ginsuklob ang bag-o nga personalidad, kag ginpahisanto ang aton pamatasan sa matarong nga talaksan ni Jehova. (Roma 12:1, 2; Efe. 4:22-24; Col. 3:9, 10) Ang aton tinagipusuon nga apresasyon nagpahulag sa aton nga magdedikar kay Jehova kag simbuluhan ini paagi sa pagpabawtismo sa tubig. Sa tion sang aton bawtismo, gin-ordenahan kita subong mga ministro.

⁴ Dumduma pirme nga ang pag-alagad sa Dios dapat himuon nga wala sing sala kag may matinlo nga tagipusuon. (Sal. 24:3, 4; Isa. 52:11; 2 Cor. 6:14–7:1) Paagi sa pagtuo kay Jesucristo, nakatigayon kita sing matinlo nga konsiensia. (Heb. 10:19-23, 35, 36; Bug. 7:9, 10, 14) Ginlaygayan ni apostol Pablo ang mga Cristiano nga himuon ang tanan para sa himaya sang Dios agod indi masandad ang iban. Ginpatalupangod man ni apostol Pedro ang kapuslanan sang huwaran nga paggawi para maganyat sa kamatuoran ang mga indi tumuluo. (1 Cor. 10:31, 33; 1 Ped. 3:1) Paano mo mabuligan ang isa nga mangin kalipikado nga makaupod naton subong ministro sang maayong balita?

BAG-O NGA MGA MANUGBANTALA

⁵ Sa umpisa pa lang sang imo pagdumala sang pagtuon sa Biblia sa isa ka interesado, palig-una sia nga isugid sa iban ang iya ginatun-an. Mahimo niya ini isugid sing di-pormal sa iya mga paryente, abyan, katrabaho, kag sa iban pa. Isa ini ka importante nga tikang sa pagtudlo sa mga bag-uhan nga mangin sumulunod ni Jesucristo subong ministro sang maayong balita. (Mat. 9:9; Luc. 6:40) Samtang nagauswag sa espirituwal ang bag-uhan kag maanad sa pagpanaksi sing di-pormal, pat-od gid nga ipabutyag niya ang iya handum nga makigbahin sa pagministeryo.

PAGLAB-OT SA MGA KINAHANGLANON

⁶ Antes agdahon ang isa nga mag-upod sa imo sa pamalaybalay sa una nga tion, dapat pat-uron mo nga nalab-ot niya ang pila ka kalipikasyon. Ang isa ka tawo nga nagaupod sa aton sa ministeryo sa latagon nagapakilala sang iya kaugalingon sa publiko nga isa sia sa mga Saksi ni Jehova. Gani dapat nga napahisanto na niya ang iya kabuhi sa matarong nga talaksan ni Jehova kag mahimo na sia mangin di-bawtismado nga manugbantala.

⁷ Samtang ginatun-an mo ang isa kag ginabinagbinag sa iya ang mga prinsipio sang Biblia, mahimo gid nga mahibaluan mo ang iya mga kahimtangan. Mahimo mo maobserbahan nga ginaaplikar na niya ang iya natun-an. Apang may pila ka bahin sa kabuhi sang estudyante nga luyag binagbinagon sang mga gulang upod sa inyo nga duha.

⁸ Ang koordenitor sang hubon sang mga gulang magahimo sing kahimusan para mabinagbinag sang duha ka gulang (ang isa katapo sang komite sang pag-alagad sang kongregasyon) ini nga butang upod sa imo kag sa imo estudyante. Sa mga kongregasyon nga gamay lang ang mga gulang, mahimo ini i-asayn sa isa ka gulang kag kalipikado nga ministeryal nga alagad. Dapat dayon ini himuon sang mga utod nga gin-asayn. Ang matuod, kon mahibaluan nila ang handum sang estudyante sa tion sang miting sang kongregasyon, mahimo nga istoryahon nila dayon kamo sang imo estudyante sa tapos sang miting. Dapat nga relaks kamo. Antes aprobahan ang estudyante nga mangin di-bawtismado nga manugbantala, dapat makita sa iya ang masunod:

1. (1) Nagapati sia nga ang Biblia Pulong sang Dios.—2 Tim. 3:16.

2. (2) Nahibaluan niya kag ginapatihan ang panguna nga mga panudlo sang Kasulatan amo nga kon pamangkuton sia, magasabat sia suno sa Biblia kag indi suno sa mga panudlo sang butig nga relihion ukon sa iya kaugalingon nga mga ideya.—Mat. 7:21-23; 2 Tim. 2:15.

3. (3) Ginatuman niya ang sugo sang Biblia nga makig-upod sa katawhan ni Jehova sa mga miting sang kongregasyon kon masarangan niya.—Sal. 122:1; Heb. 10:24, 25.

4. (4) Nahibaluan niya ang ginatudlo sang Biblia tuhoy sa seksuwal nga imoralidad, lakip ang panghilahi, poligamya, kag homoseksuwalidad, kag nagakabuhi sia nahisanto sa sini nga mga panudlo. Kon may ginapuyo sia nga isa nga tuhay sing sekso, nga indi niya paryente, kinahanglan nga kasal sila sing legal.—Mat. 19:9; 1 Cor. 6:9, 10; 1 Tim. 3:2, 12; Heb. 13:4.

5. (5) Ginatuman niya ang pagdumili sang Biblia sa pagpahubog kag wala sia nagadroga ukon nagagamit sing bulong nga natural ukon sintetiko nga may epekto sa hunahuna nga wala ginareseta sang doktor.—2 Cor. 7:1; Efe. 5:18; 1 Ped. 4:3, 4.

6. (6) Nahangpan niya ang benepisyo sang paglikaw sa indi maayo nga pagpakig-upod.—1 Cor. 15:33.

7. (7) Wala na sia sing kaangtanan sa tanan nga organisasyon sang iya butig nga relihion sang una. Nag-untat na sia sa pagtambong sa ila mga serbisyo kag sa pagpakigbahin ukon pagsuportar sa ila mga hilikuton.—2 Cor. 6:14-18; Bug. 18:4.

8. (8) Wala na sia nagapakigbahin sa mga hublag sa pulitika sang kalibutan.—Juan 6:15; 15:19; Sant. 1:27.

9. (9) Nagapati sia kag nagakabuhi nahisanto sa ginasiling sang Isaias 2:4 tuhoy sa mga hublag sang mga pungsod.

10. (10) Luyag gid niya nga mangin isa sa mga Saksi ni Jehova.—Sal. 110:3.

⁹ Kon indi sigurado ang mga gulang kon ano ang pagpati sang estudyante tuhoy sa pila sini, dapat nila sia pamangkuton, ayhan ginagamit ang mga kasulatan nga ginsambit diri subong basihan sang ila paghinun-anon. Importante gid nga mahangpan niya nga ang mga nagapakigbahin sa pagbantala upod sa mga Saksi ni Jehova dapat nga magakabuhi nahisanto sa mga kinahanglanon sang Kasulatan. Ang iya mga komento magabulig sa mga gulang nga mapat-od nga nahibaluan niya ang ginapaabot sa iya kag kalipikado sia sa makatarunganon nga kasangkaron sa pagpakigbahin sa ministeryo sa latagon.

¹⁰ Pahibaluon gilayon sang mga gulang ang estudyante kon bala kalipikado sia. Sa kalabanan nga kahimtangan, ginahimo nila ini sa hingapusan sang paghinun-anon. Kon kalipikado sia, abiabihon sia sang mga gulang subong manugbantala. (Roma 15:7) Dapat sia palig-unon nga sugdan gilayon ang pagpakigbahin sa ministeryo sa latagon kag ihatag ang iya report sa pag-alagad sa latagon sa katapusan sang bulan. Mahimo ipaathag sang mga gulang nga kon mangin kalipikado ang estudyante sang Biblia subong di-bawtismado nga manugbantala kag magreport sang pag-alagad sa latagon sa nahauna nga tion, himuan sia sing Congregation’s Publisher Record kag ilakip ini sa file sang kongregasyon. Ginakolekta sang mga gulang ini nga personal nga impormasyon sang manugbantala para maatipan sang organisasyon ang relihioso nga mga hilikuton sang mga Saksi ni Jehova sa bug-os nga kalibutan kag agod makapakigbahin ang manugbantala sa espirituwal nga mga hilikuton kag makabaton sang espirituwal nga pagsakdag. Dugang pa, mahimo man ipahanumdom sang mga gulang sa bag-o nga mga manugbantala nga ang bisan ano nga personal nga impormasyon ginatipigan suno sa Global Data Protection Policy sang mga Saksi ni Jehova, nga makita sa jw.org.

¹¹ May maayo nga epekto sa bag-o nga manugbantala kon pangilalahon naton sia sing maayo kag kon magpakita kita sing personal nga interes sa iya nahimuan. Mahimo ini magpahulag sa iya nga regular nga maghatag sang iya mga report sa pag-alagad kag manikasog pa gid sa pag-alagad kay Jehova.—Fil. 2:4; Heb. 13:2.

¹² Kon mapat-od sang mga gulang nga kalipikado ang estudyante sang Biblia sa pagpakigbahin sa ministeryo sa latagon, puede na sia hatagan sang iya kaugalingon nga kopya sang Organisado sa Paghimo sang Kabubut-on ni Jehova. Sa iya nahauna nga report sang pag-alagad sa latagon, ipahibalo sing malip-ot sa kongregasyon nga isa na sia ka di-bawtismado nga manugbantala.

PAGBULIG SA MGA PAMATAN-ON

¹³ Ang mga bata mahimo man mangin kalipikado subong mga manugbantala sang maayong balita. Ginpapalapit ni Jesus sa iya ang mga bata kag ginpakamaayo sila. (Mat. 19:13-15; 21:15, 16) Bisan pa mga ginikanan ang may panguna nga responsibilidad sa ila kabataan, mahimo nga luyag magbulig sang iban sa kongregasyon sa mga bata nga ginpahulag sang ila tagipusuon nga makigbahin sa pagbantala sang Ginharian. Kon ikaw isa ka ginikanan, ang imo maayo nga halimbawa sa pagministeryo nagapalig-on gid sa imo kabataan nga mangin makugi sa ila pag-alagad sa Dios. Ano pa gid ang aton mabulig sa isa ka bata nga huwaran sa iya paggawi kag ginpahulag sang iya tagipusuon nga isugid ang iya pagtuo sa iban?

¹⁴ Nagakaigo nga palapitan sang ginikanan ang isa sa mga gulang sa Komite sang Pag-alagad sang Kongregasyon agod binagbinagon kon bala ang bata kalipikado nga mangin manugbantala. Ang koordenitor sang hubon sang mga gulang magahimo sing kahimusan agod maistorya sang duha ka gulang (ang isa katapo sang komite sang pag-alagad sang kongregasyon) ang bata kag ang iya tumuluo nga (mga) ginikanan ukon guardian. Kon ang bata may ihibalo sa panguna nga kamatuoran sang Biblia kag may pamatuod nga luyag gid niya makigbahin sa pagministeryo, nagapakita ini sang iya pag-uswag. Sa tapos mabinagbinag ini kag ang iban pa nga butang nga kaanggid sa mga maaplikar sa mga adulto, mahimo magdesisyon ang duha ka gulang kon bala aprobahan ang bata subong di-bawtismado nga manugbantala. (Luc. 6:45; Roma 10:10) Kon nagapakig-istorya sa isa ka bata, mahimo nga indi na kinahanglan nga binagbinagon ang pila ka butang nga kinaandan na nga ginahinun-anunan upod sa adulto apang maathag nga indi maaplikar sa bata.

¹⁵ Sa tion sang pag-istoryahanay, dapat hatagan sang mga gulang sing komendasyon ang bata sa iya pag-uswag kag palig-unon sia nga himuon nga tulumuron ang pagpabawtismo. Wala sing duhaduha nga nanikasog gid ang mga ginikanan nga mapatudok ang kamatuoran sa ila bata, gani dapat man sila hatagan sing komendasyon. Agod mabuligan ang mga ginikanan sa pagbulig pa gid sa ila bata, ipatalupangod sa ila sang mga gulang ang “Mensahe sa Cristiano nga mga Ginikanan,” sa pahina 179-181.

DEDIKASYON KAG BAWTISMO

¹⁶ Kon ginakilala mo na kag ginahigugma si Jehova paagi sa pagtuman sang iya mga kinahanglanon kag pagpakigbahin sa ministeryo sa latagon, kinahanglan mo pabakuron ang imo personal nga kaangtanan sa iya. Paano? Paagi sa pagdedikar sang imo kabuhi sa iya kag simbuluhan ini paagi sa pagpabawtismo sa tubig.—Mat. 28:19, 20.

¹⁷ Ang dedikasyon nagakahulugan sing pagpain para sa sagrado nga katuyuan. Ang pagdedikar sa Dios amo ang pagpalapit sa iya sa pangamuyo kag solemne nga mangako nga gamiton mo ang imo kabuhi sa pag-alagad sa iya kag paglakat sa iya dalanon. Nagapahangop ini nga sia lang ang imo simbahon sa wala sing katubtuban. (Deut. 5:9) Personal ini kag pribado nga butang. Wala sing makahimo sini para sa imo.

¹⁸ Apang, indi bastante nga sugiran mo lang si Jehova sing pribado nga gusto mo nga panag-iyahan ka niya. Dapat mo ipakita sa iban nga nagdedikar ka sa Dios. Ginahimo mo ini paagi sa pagpabawtismo sa tubig, subong sang ginhimo ni Jesus. (1 Ped. 2:21; 3:21) Kon nakadesisyon ka na nga alagaron si Jehova kag gusto mo magpabawtismo, ano ang dapat mo himuon? Dapat mo ini ipahibalo sa koordenitor sang hubon sang mga gulang. Magahimo sia sing kahimusan nga maistorya ka sang pila ka gulang agod mapat-od nga nalab-ot mo ang ginapatuman sang Dios para sa bawtismo. Para sa dugang nga impormasyon, palihug repasuha ang “Mensahe sa Di-bawtismado nga Manugbantala,” nga makita sa pahina 182-184 sini nga libro, kag “Mga Pamangkot Para sa mga Luyag Magpabawtismo,” sa pahina 185-207.

PAGREPORT SANG PAG-USWAG SA MINISTERYO

¹⁹ Sa sulod sang mga tinuig, ang mga report tuhoy sa bug-os kalibutan nga pag-uswag sang putli nga pagsimba nagapalig-on gid sa katawhan ni Jehova. Sugod sang una nga ginsilingan ni Jesucristo ang iya mga disipulo nga ibantala ang maayong balita sa bug-os nga duta, ang matuod nga mga Cristiano interesado gid sa paghibalo kon paano ini ginahimo.—Mat. 28:19, 20; Mar. 13:10; Binu. 1:8.

²⁰ Ang una nga mga sumulunod ni Jesus nalipay sa pagpamati sa mga report tuhoy sa kadalag-an sang pagbantala. (Mar. 6:30) Ang libro sang Binuhatan sa Biblia nagasugid sa aton nga presente ang mga 120 ka disipulo sang ginpasagahay sa ila ang balaan nga espiritu sang Pentecostes 33 C.E. Sang ulihi, ang kadamuon sang mga disipulo nadugangan sing mga 3,000 kag dayon mga 5,000. Ginpahibalo sa report nga “padayon nga gindugang sa ila ni Jehova adlaw-adlaw ang mga tawo nga iya ginaluwas” kag “madamo man nga saserdote ang nangin tumuluo.” (Binu. 1:15; 2:5-11, 41, 47; 4:4; 6:7) Makapalig-on gid ini nga balita sang pag-uswag para sa mga disipulo! Ining makalilipay nga mga report mahimo gid nga nagpahulag sa ila nga magpadayon sa hilikuton nga ginhatag sa ila sang Dios, bisan pa sang grabe nga paghingabot nga ginpangunahan sang mga lider sang relihion sang mga Judiyo!

²¹ Sang mga 60-61 C.E., ginreport ni Pablo sa iya sulat sa mga taga-Colosas nga ang maayong balita “nagapamunga kag nagalambo sa bug-os nga kalibutan” kag “ginbantala sa tanan nga tinuga sa idalom sang langit.” (Col. 1:5, 6, 23) Ang una nga mga Cristiano nangin matinumanon sa Pulong, kag ginpabakod sila sang balaan nga espiritu agod matuman ang daku nga hilikuton nga pagbantala sa wala pa ang katapusan sang Judiyong sistema sang mga butang sang 70 C.E. Makapalig-on gid sa matutom nga mga Cristiano nga mabatian ang mga report kon ano na ang nahimo sa pagbantala!

²² Sing kaanggid, ang modernong-adlaw nga organisasyon ni Jehova nagatinguha nga mahuptan ang husto nga mga rekord parte sa hilikuton nga ginahimo bilang katumanan sang Mateo 24:14, nga nagasiling: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.” Subong dedikado nga mga alagad sang Dios, may hilingagawon kita nga hilikuton nga dapat himuon. Interesado gid kita nga mahibaluan nga ginahimo sing maid-id ina nga ministeryo antes mag-abot ang katapusan. Pat-uron ni Jehova nga ini nga hilikuton matapos, kag kon makigbahin kita, kahamut-an kita ni Jehova.—Ezeq. 3:18-21.

ANG IMO REPORT SANG PAG-ALAGAD SA LATAGON

²³ Ano ang dapat naton ireport? Ang Field Service Report slip nga ginaaman sang organisasyon nagapakita kon ano nga impormasyon ang dapat ilakip. Apang, mahimo makabulig ang masunod nga mga komento.

²⁴ Sa mga kolumna nga “Placements (Printed and Electronic),” ireport ang bug-os nga kadamuon sang mga publikasyon—naimprinta man ukon electronic—nga napaambit mo sa mga tawo nga indi bawtismado nga Saksi. Sa “Video Showings,” ireport kon pila ka beses mo ginpatan-aw ang isa sa aton mga video.

²⁵ Kon nagareport sa “Return Visits,” isipa kon pila ka beses ka nakaduaw liwat para tatapon ang interes nga ginpakita anay sang isa nga indi dedikado kag bawtismado nga Saksi. Ang return visit puede himuon paagi sa personal nga pagduaw, paagi sa sulat, pagtawag sa telepono, pag-text ukon pag-email, ukon pagdul-ong sang pila ka literatura. Sa kada tion nga mahiwat ang isa ka pagtuon sa Biblia, isipon ini nga isa ka return visit. Mahimo isipon sang isa ka ginikanan nga isa ka return visit kada semana ang iya pagdumala sang pangpamilya nga pagsimba kon may di-bawtismado nga bata nga presente.

²⁶ Bisan pa kada semana ang pagdumala sing pagtuon sa Biblia, ireport ini nga isa lang ka pagtuon kada bulan. Dapat ilista sang mga manugbantala ang kabilugan nga lainlain nga pagtuon sa Biblia nga iya gindumalahan sa sulod sang bulan. Mahimo malakip sa report sang mga pagtuon sa Biblia ang pagdumala sing pagtuon sa mga tawo nga indi dedikado kag bawtismado nga mga Saksi. Mahimo mo man maisip nga pagtuon sa Biblia ang pagdumala sa di-aktibo nga utod suno sa panuytoy sang isa ka miembro sang komite sang pag-alagad ukon sa bag-o nabawtismuhan nga utod nga wala pa nakatapos sa pagtuon sa Magkabuhi sing Wala Katapusan! nga libro.

²⁷ Importante gid nga maghatag sing sibu nga report sa “Hours.” Nagapatuhoy ini sa oras sang imo pagpakigbahin sa pamalaybalay nga ministeryo, mga pagduaw liwat, mga pagdumala sing pagtuon sa Biblia, ukon pagpanaksi sing pormal ukon di-pormal sa mga tawo nga indi dedikado kag bawtismado nga Saksi. Kon nagaupdanay ang duha ka manugbantala, pareho sila nga magaisip sing oras sa ila pagpanaksi, pero isa lang ang magaisip sing pagduaw liwat ukon pagdumala sing pagtuon sa Biblia. Ang mga ginikanan nga nagapakigbahin sa pagtudlo sa ila kabataan sa Pangpamilya nga Pagsimba mahimo mag-isip sing isa ka oras kada semana. Mahimo isipon sang utod ang oras sa iya paghatag sing pamulongpulong publiko. Mahimo man mag-isip sing oras ang interpreter sang pamulongpulong publiko. May importante nga mga buluhaton nga wala ginaisip ang oras, pareho sang paghanda para sa pag-alagad sa latagon, pagtambong sa mga miting para sa pag-alagad sa latagon, paghinguyang sing tion sa iban nga hilikuton kon nagaministeryo, kag iban pa.

²⁸ Ang kada manugbantala dapat magsunod sa ila nahanas sa Biblia nga konsiensia kon nagaisip sang ila oras sa pagpanaksi. Ang pila ka manugbantala nagabantala sa madamo katama sing tawo nga mga teritoryo samtang sa iban naman gamay lang ang pumuluyo kag kinahanglan magbiyahe sing malayo. Magkatuhay ang mga teritoryo; magkatuhay man ang pagtamod sang mga manugbantala sa ila ministeryo. Indi gusto pasundon sang Nagadumala nga Hubon sa ila konsiensia ang kongregasyon sa bug-os nga kalibutan kon paano isipon ang oras nga ginhinguyang sa pag-alagad sa latagon, ukon magtangdo sing bisan sin-o nga maghukom sa sini nga butang.—Mat. 6:1; 7:1; 1 Tim. 1:5.

²⁹ Ang tion nga ginahinguyang sa pag-alagad sa latagon dapat ireport subong bilog nga mga oras. Ang eksepsion sa sini amo kon limitado na lang ang mahimo sang manugbantala bangod sang katigulangon, pagkabaldado, nagatener na lang sa nursing home, ukon ayhan maluya na gid ang lawas. Ini nga manugbantala mahimo magreport sing tig-15 minutos. Bisan pa magpanaksi sia sing 15 minutos lamang sa isa ka bulan, dapat niya ini ireport. Isipon gihapon sia subong regular nga manugbantala sang Ginharian. Ini nga kahimusan maaplikar man sa manugbantala nga temporaryo nga nalimitehan, ayhan bangod indi sia makalakat sa sulod sang isa ka bulan ukon bangod nagbalatian ukon napilasan sia sing malubha. Ini nga kahimusan para lamang sa mga nalimitehan gid sa ila hilikuton. Pat-uron sang komite sang pag-alagad kon bala kalipikado ang manugbantala sa sini nga kahimusan.

CONGREGATION’S PUBLISHER RECORD

³⁰ Ang imo report sa pag-alagad sa latagon kada bulan ginarekord sa Congregation’s Publisher Record. Ini nga mga rekord iya sang lokal nga kongregasyon. Kon nagaplano ka nga magsaylo sing kongregasyon, pat-ura nga mapahibalo mo ang mga gulang. Siguraduhon sang sekretaryo nga ipadala ang imo mga rekord sa imo bag-o nga kongregasyon. Paagi sini, mas mahatagan ka sang atension sang mga gulang kag masuportahan sa espirituwal. Kon wala pa tatlo ka bulan nga wala ka sa inyo kongregasyon, palihug padayon nga ipadala ang imo mga report sang pag-alagad sa latagon sa imo ginatapuan nga kongregasyon.

KON NGAA NAGAREPORT KITA

³¹ Nagakalipat ka bala kon kaisa sa paghatag sang imo report sang pag-alagad sa latagon? Pat-od gid nga kita tanan nagakinahanglan kon kaisa sing mga pahanumdom. Apang kon ginapalambo naton ang husto nga panimuot tuhoy sa pagreport kag naintiendihan naton kon ngaa importante ini, mangin mas mahapos sa aton nga madumduman ang pagreport sang aton pag-alagad sa latagon.

³² Ang iban namangkot: “Sanglit nahibaluan ni Jehova ang akon ginahimo sa pag-alagad sa iya, ngaa kinahanglan ko pa maghatag sing report sa kongregasyon?” Matuod, nahibaluan ni Jehova kon ano ang aton nahimo, kag nahibaluan niya kon bala bug-os kalag ang aton pag-alagad ukon diutay lang ini kon ipaanggid sa aktual nga masarangan naton. Apang, dumduma nga ginrekord ni Jehova kon pila ka adlaw ang ginhinguyang ni Noe sa sulod sang arka kag kon pila ka tuig ang paglakbay sa kamingawan sang mga Israelinhon. Ang Dios naghupot sing rekord kon pila ang matutom kag kon pila ang naglalis. Ginrekord niya ang amat-amat nga pagpangdaug sa duta sang Canaan kag ang mga hinimuan sang matutom nga mga hukom sang Israel. Huo, ginrekord niya ang madamo nga detalye tuhoy sa mga hilikuton sang iya mga alagad. Gintuytuyan niya ang pagsulat sang mga natabo, nga nagapakita sang iya pagtamod tuhoy sa paghupot sing sibu nga mga rekord.

³³ Ang mga hitabo sa kasaysayan nga narekord sa Biblia nagapakita nga eksakto gid ang mga report kag ang mga rekord sang katawhan ni Jehova. Sa madamo nga kahimtangan, ang bug-os nga kahulugan sang rekord sang Biblia indi mapaalinton kon wala ginareport ang espesipiko nga kadamuon. Binagbinaga ang masunod nga mga halimbawa: Genesis 46:27; Exodo 12:37; Hukom 7:7; 2 Hari 19:35; 2 Cronica 14:9-13; Juan 6:10; 21:11; Binuhatan 2:41; 19:19.

³⁴ Bisan pa maathag nga wala naton ginareport ang tanan nga ginahimo naton sa pagsimba kay Jehova, may mapuslanon ini nga katuyuan sa iya organisasyon. Sang unang siglo, sang nagbalik ang mga apostoles halin sa pagbantala, ginreport nila kay Jesus ang “tanan nila nga ginhimo kag ginpanudlo.” (Mar. 6:30) Ginapakita sa mga report ang pila ka bahin sang aton ministeryo nga kinahanglan pauswagon. Makita sa mga numero nga may pag-uswag sa pila ka hilikuton apang sa iban nga bahin mahimo nga naghinay ang pagdamo ukon ang pag-uswag sang manugbantala. Ayhan kinahanglan ang pagpalig-on, ukon may mga problema nga dapat lubaron. Usisaon sang responsable nga mga manugtatap ang mga report kag panikasugan nga tadlungon ang bisan ano nga kahimtangan nga mahimo nagaupang sa pag-uswag sang mga indibiduwal ukon sang kongregasyon sa kabilugan.

³⁵ Ang mga report mapuslanon man sa organisasyon para mahibaluan kon sa diin nagakinahanglan sing mas madamo nga manugpangabudlay sa latagon. Sa diin nga lugar ang mas mabungahon? Diin ang may diutay lang nga pag-uswag? Ano nga mga publikasyon ang kinahanglan agod mabuligan ang mga tawo nga makatuon sang kamatuoran? Ang mga report nagabulig sa organisasyon sa pagplano kon ano nga mga literatura ang kinahanglan sa pagbantala sa lainlain nga bahin sang kalibutan, kag dayon ihatag ina nga mga kinahanglanon.

³⁶ Para sa kalabanan sa aton, mapalig-on kita sang mga report. Indi bala nalipay kita nga makabati tuhoy sa ginahimo sang aton kauturan sa pagbantala sing maayong balita sa bug-os nga kalibutan? Ang mga report tuhoy sa pag-uswag nagabulig sa aton nga makita ang kabilugan nga pagsangkad sang organisasyon ni Jehova. Ang mga eksperiensia nagapahalipay sa aton kag nagapalig-on nga mangin makugi pa gid kita, nga nagapahulag sa aton nga makigbahin sing bug-os sa pagbantala. (Binu. 15:3) Importante ang aton kooperasyon sa paghatag sang aton report sang pag-alagad sa latagon. Pagpakita ini nga nagakabalaka kita sa kauturan sa iban nga lugar. Sa sining diutay nga paagi, ginapakita naton nga nagapasakop kita sa kahimusan sang organisasyon ni Jehova.—Luc. 16:10; Heb. 13:17.

PAGPAHAMTANG SING MGA TULUMURON

³⁷ Indi naton dapat ipaanggid ang aton pag-alagad sa latagon sa iya sang iban. (Gal. 5:26; 6:4) Indi palareho ang aton mga kahimtangan. Sa pihak nga bahin, makatigayon kita sing daku nga benepisyo sa pagpahamtang sing makatarunganon nga mga tulumuron subong basihan sang aton pag-uswag sa ministeryo. Ang paglab-ot sa sini nga mga tulumuron makahatag sa aton sing kalipay bangod sang aton nahimo.

³⁸ Maathag nga ginapadasig ni Jehova ang pagtipon sa mga tawo nga iya amligan sa “dakung kapipit-an.” Nagakabuhi kita sa tion sang katumanan sang tagna ni Isaias: “Ang diutay mangin isa ka libo kag ang gamay nga pungsod mangin gamhanan. Ako, si Jehova, magapadasig sini sa nagakaigo nga tion sini.” (Bug. 7:9, 14; Isa. 60:22) Daku gid nga pribilehiyo nga mangin ministro sang maayong balita sa sining katapusan nga mga adlaw!—Mat. 24:14.