Apendise

Mensahe sa Cristiano nga mga Ginikanan:

Subong mga ginikanan, handum ninyo nga buligan ang inyo pinalangga nga kabataan nga higugmaon si Jehova kag idedikar ang ila kaugalingon sa iya. Ano ang mahimo ninyo agod mabuligan sila nga magpabawtismo? Ano ang dapat nila himuon agod mangin handa sa sining importante gid nga tikang?

Ginsilingan ni Jesus ang iya mga sumulunod: “Tudlui ninyo sila agod mangin disipulo ko. Bawtismuhi ninyo sila.” (Mat. 28:19) Suno sa sini, ang panguna nga kinahanglanon para sa bawtismo amo ang mangin disipulo—isa nga wala lamang nakaintiende kag nagapati sa mga panudlo sang Cristo kundi nagatuman man sini. Masarangan ini bisan sang pamatan-on.

Magpahamtang sang maayo nga halimbawa sa imo kabataan, kag ipatudok sa ila ang mga panudlo ni Jehova. (Deut. 6:6-9) Nagalakip ini sang mga impormasyon sa libro nga Magkabuhi sing Wala Katapusan! agod itudlo sa ila ang sadsaran nga mga kamatuoran sang Biblia kag ihanda sila nga mangatarungan kag magkabuhi suno sa mga prinsipio sang Biblia. Buligi ang imo kabataan nga magpaathag sang ila mga ginapatihan sa ila kaugalingon nga mga tinaga. (1 Ped. 3:15) Ang ihibalo kag pagpalig-on nga mabaton nila halin sa imo kag sa ila personal nga pagtuon, sa pangpamilya nga pagsimba, sa mga miting sang kongregasyon, kag sa maayo nga mga kaupod magabulig sa ila nga mag-uswag tubtob sa bawtismo kag pagkatapos sini. Magpahamtang sang espirituwal nga mga tulumuron para sa ila.

Ang Hulubaton 20:11 nagasiling: “Paagi sa iya mga buhat ginapakita sang bata kon bala husto kag matarong ang iya ginahimo.” Ano ang magapakita kon bala ang isa ka bata, lalaki man ukon babayi, nangin disipulo ni Jesucristo kag handa na sa pagpabawtismo?

Ang bata nga handa na sa pagpabawtismo dapat masinulundon sa iya (mga) ginikanan. (Binu. 5:29; Col. 3:20) Ang Biblia nagasiling tuhoy kay Jesus sang sia 12 anyos: “Padayon sia nga nagpasakop sa [iya mga ginikanan].” (Luc. 2:51) Siempre pa, indi ka makapaabot nga himpit ang imo bata. Apang ang isa nga nagahandum nga magpabawtismo nagapanikasog nga ilugon ang halimbawa ni Jesus kag kilala nga nagapasakop sa iya mga ginikanan.

Ginapakita man niya nga interesado sia sa pagtuon sang mga kamatuoran sang Biblia. (Luc. 2:46) Luyag bala sang inyo bata nga magtambong kag makigbahin sa mga miting? (Sal. 122:1) Regular bala ang iya pagbasa sa Biblia kag personal nga pagtuon?—Mat. 4:4.

Ang bata nga nagauswag padulong sa bawtismo nagapanikasog nga unahon ang intereses sang Ginharian. (Mat. 6:33) Nahibaluan niya nga may responsibilidad sia nga ipaambit ang iya pagtuo sa iban. Nagapakigbahin sia sa nagkalainlain nga aspekto sang ministeryo kag wala nahuya nga magpakilala nga sia isa ka Saksi ni Jehova sa iya mga manunudlo kag klasmeyt. Serioso sia sa iya mga asaynment sa Pagkabuhi kag Pagministeryo nga Miting.

Nagapanikasog man sia nga magpabilin nga matinlo sa moral paagi sa paglikaw sa pagpakig-upod sa malain nga mga tawo. (Hulu. 13:20; 1 Cor. 15:33) Ginapakita niya ini sa iya pagpili sang musika, pelikula, palaguaon sa telebisyon, video game, kag paggamit sang Internet.

Madamo ang napahulag tungod sa mapisan nga pagpanikasog sang ila mga ginikanan, naghimo sang kamatuoran nga ila, kag nakalipikar sa bawtismo sang sila pamatan-on pa lang. Pakamaayuhon gid kamo ni Jehova samtang ginabuligan ninyo ang inyo kabataan nga malab-ot ining importante nga tikang sa ila kaangtanan kay Jehova.

Mensahe sa Di-bawtismado nga Manugbantala:

Isa ka pribilehiyo nga mag-alagad upod sa kongregasyon subong di-bawtismado nga manugbantala. Dapat ka dayawon bangod sang imo espirituwal nga pag-uswag. Nakilala mo ang Dios paagi sa pagtuon sang iya Pulong kag nagatuo ka sa iya mga saad.—Juan 17:3; Heb. 11:6.

Antes ka magtuon upod sa mga Saksi ni Jehova, mahimo nga nagapakig-upod ka anay sa iban nga relihion ukon basi wala ka gani sing ginapakig-updan nga relihion. Ukon basi nagahimo ka anay sang supak sa mga prinsipio sang Biblia. Apang karon ginpakita mo ang imo pagtuo paagi sa paghinulsol, nga nagakahulugan nga ginakasubo mo gid ang nahimo mo nga mga sala sadto, kag paagi sa pagbag-o, nga nagakahulugan nga ginsikway mo ang imo malain nga dalanon kag desidido ka nga himuon ang matarong sa panulok sang Dios.—Binu. 3:19.

Sa pihak nga bahin, mahimo nga “kutob sa pagkalapsag” nahibaluan mo na ang balaan nga mga sinulatan. Bangod sini naamligan ka sa indi Cristiano nga paggawi kag mabug-at nga sala. (2 Tim. 3:15) Natun-an mo nga pamatukan ang pag-ipit sang mga katubotubo kag ang iban nga mga pagsulay sa paghimo sang malain sa panulok ni Jehova. Ginpakita mo ang pagtuo paagi sa pagsuporta sa matuod nga pagsimba kag pagpaambit sang imo mga ginapatihan sa iban. Nahanas ka sa Cristianong ministeryo. Karon nagdesisyon ka nga mag-alagad kay Jehova subong di-bawtismado nga manugbantala.

Nakilala mo man si Jehova sang daku ka na ukon natun-an mo ang dalanon ni Jehova halin sang pagkalapsag, ayhan ginahunahuna mo karon ang paghimo sang duha pa ka tikang sa imo pag-uswag sa espirituwal—ang dedikasyon kag bawtismo. Madedikar mo ang imo kaugalingon kay Jehova paagi sa pagpalapit sa iya sa pangamuyo kag sa pagpabutyag sang imo personal nga desisyon nga sia lamang ang imo simbahon sa wala sing katubtuban. (Mat. 16:24) Bilang pagsimbulo sina nga dedikasyon magapabawtismo ka sa tubig. (Mat. 28:19, 20) Paagi sa dedikasyon kag bawtismo, mangin isa ikaw ka ordenado nga ministro ni Jehova nga Dios. Isa gid ka makalilipay nga pribilehiyo!

Apang subong sang natun-an mo sa Biblia mahimo ka makaeksperiensia sing madamo nga kabudlayan. Dumduma nga wala madugay sang ginbawtismuhan si Jesus, gintuytuyan sia sang espiritu sang Dios pakadto sa kamingawan kag “didto natabo ang pagsulay sa iya sang Yawa.” (Mat. 4:1) Pagkatapos sang imo bawtismo subong disipulo sang Cristo, mapaabot mo ang dugang pa nga pagtilaw. (Juan 15:20) Mahimo nga tilawan ka sa nanuhaytuhay nga paagi. Mahimo pamatukan ka sang imo pamilya. (Mat. 10:36) Mahimo yagutaon ka sang imo mga klasmeyt, katrabaho, kag sang imo anay kaupdanan. Dumduma pirme ang ginsiling ni Jesus sa Marcos 10:29, 30: “Sa pagkamatuod nagasiling ako sa inyo, wala sing bisan sin-o nga nagbiya sang balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga uma tungod sa akon kag tungod sa maayong balita ang indi makabaton sa sini nga tion sing 100 ka pilo nga mga balay, mga utod nga lalaki, mga utod nga babayi, mga iloy, mga anak, kag mga uma, lakip ang mga paghingabot, kag sa palaabuton nga sistema sang mga butang, sing kabuhi nga wala sing katapusan.” Gani padayon nga mangabudlay sing lakas agod magpabilin nga malapit kay Jehova kag magkabuhi suno sa iya matarong nga mga talaksan.

Kon luyag mo na magpabawtismo, ipahibalo ini sa koordenitor sang mga gulang sa kongregasyon. Ang mga pamangkot pagkatapos sini nga mensahe amo ang basihan sang mga paghinun-anon sang mga gulang sa imo agod pat-uron kon bala kalipikado ka nga bawtismuhan. Mahimo sugdan mo nga repasuhon sing personal ini nga mga pamangkot subong bahin sang imo regular nga programa sang pagtuon.

Bilang paghanda para sa sining mga paghinun-anon, basaha kag pamalandungi ang ginkutlo nga mga reperensia nga Kasulatan. Ayhan luyag mo maghimo sing personal nga mga nota sa sining libro ukon sa iban nga papel. Mahimo mo gamiton ining mga nota kag buksan ining libro sa tion sang imo paghinun-anon upod sa mga gulang. Kon indi mo mahangpan ang bisan diin sa mga pamangkot, indi magpangalag-ag sa pagpangayo sing bulig sa nagtuon sa imo sa Biblia ukon sa mga gulang.

Sa imo paghinun-anon upod sa mga gulang, indi kinahanglan nga malawig ukon masibod ang imo sabat sa mga pamangkot. Mas maayo ang simple kag direkta nga sabat sa imo kaugalingon nga mga tinaga. Sa kalabanan nga mga pamangkot, mapuslanon man nga sambiton mo ang isa ukon duha ka teksto sa Biblia nga nagapakita sang basihan sang imo sabat sa Kasulatan.

Kon kulang pa ang imo ihibalo sa sadsaran nga mga panudlo sang Biblia, ang mga gulang magahimo sing kahimusan agod buligan ka nga mapabutyag sa imo kaugalingon nga mga tinaga ang husto nga paghangop sa Kasulatan kag mangin kalipikado nga mabawtismuhan sa ulihi.

[Patalupangod sa mga gulang sang kongregasyon: Ang mga instruksion kon paano himuon ang paghinun-anon upod sa mga kandidato sa bawtismo makita sa pahina 208-212.]