Kon Paano Maghanda Para sa Miting sa Serbisyo

1. Ano ang katuyuan sang Miting sa Serbisyo, kag paano kita labi nga makabenepisyo sa sini?

¹ Ang Miting sa Serbisyo gindesinyo agod sangkapan kita para mangin mabungahon sa ministeryo. Ang panguna nga ginabinagbinag diri amo ang pagbantala sing maayong balita sang Ginharian, paghimo sing mga disipulo, kag pagpahibalo sang nagahilapit nga paghukom sang Dios. (Mat. 28:20; Mar 13:10; 2 Ped. 3:7) Labi kita nga makabenepisyo sa sining importante nga miting kon nagahanda kita sing maayo kag nagapakigbahin sa sini.

2. Paano kita makahanda sa pagpamati kon ang bahin isa ka pamulongpulong?

² Pamulongpulong: Kon ang bahin isa ka pamulongpulong, masami nga may ginahatag nga reperensia nga makita sa iskedyul. Mahimo mo repasuhon ina nga reperensia, pati na ang ginsambit nga mga teksto, kag hunahunaa kon paano mo ini maggamit sa imo ministeryo.

3. Paano naton handaan ang pamangkot-kag-sabat nga paghinun-anon?

³ Pamangkot-kag-Sabat nga Paghinun-anon: Ini nga bahin dumalahan pareho sa Pagtinuon sa Ang Lalantawan, nga may malip-ot nga introduksion kag konklusion. Markahi ang panguna nga mga punto sa kada parapo, kag maghanda sing malip-ot nga mga komento nga nagapadaku sa mga punto nga ginabinagbinag.

4. Paano naton handaan ang mga bahin nga may paghinun-anon upod sa tumalambong?

⁴ Paghinun-anon Upod sa Tumalambong: Ini nga bahin ihatag subong isa ka pamulongpulong, apang ang humalambal dapat mangabay sa mga tumalambong nga magpakigbahin. Kon namarkahan mo ang panguna nga mga punto kag natan-aw ang ginsambit nga mga teksto, mahimo ka makakomento kon mamangkot ang may bahin. Dapat tinguhaan gid sang utod nga nagadumala sini nga bahin nga pakomentuhon ang tumalambong.

5. Paano kita makabenepisyo sing labi sa mga pasundayag?

⁵ Mga Pasundayag: Ang pila ka bahin may realistiko nga mga pasundayag nga nagapakita kon paano ang impormasyon nga ginbinagbinag mahimo maggamit sa lokal nga teritoryo. Ang mga gulang, eksperiensiado nga mga manugbantala, ukon mga payunir mahimo pangabayon nga magpasundayag. Samtang nagahanda ka sa sini nga bahin, hunahunaa kon paano ini ipresentar. Kon may yara sampol nga presentasyon, hunahunaa kon paano mo ini ihambal sa imo kaugalingon nga mga tinaga kag kon paano mo ini mapasibusibu sa nanuhaytuhay nga tagbalay. Pat-ura nga may dala ka nga literatura ukon magasin nga pagagamiton sa pasundayag. Sa gab-i sang inyo Pangpamilya nga Pagsimba, maayo nga ensayuhon ninyo ang pila sa sining mga pasundayag.

6. Ano ang pila ka rason ngaa dapat kita maghanda para sa Miting sa Serbisyo?

⁶ Ang Miting sa Serbisyo mangin mas makalilipay kon nakahanda kita sa mga bahin sang programa kag ginhunahuna ini antes sang miting. Kon sundon naton ini nga mga panugda, labi nga pagpalig-on ang aton mahatag kag mabaton. (Roma 1:11, 12) Kon nagapain kita sing tion para sa paghanda sa Miting sa Serbisyo, mas masangkapan kita sa pagtuman sang aton komisyon.—2 Tim. 3:17.