Isa ka Pinasahi nga Imbitasyon
1. San-o magasugod ang aton pagpanagtag sing imbitasyon para sa 2014 rehiyonal nga kombension?
1 Kon nagaplano ka nga maghanda sang espesyal nga pagkaon nga nagakinahanglan sing daku nga preparasyon kag gasto, para sa imo mga abyan ukon pamilya, indi bala nga malangkag ka nga agdahon man ang iban? Sing kaanggid, daku nga panikasog ang ginhimo agod ihanda ang espirituwal nga pagkaon nga ipresentar sa aton 2014 rehiyonal nga kombension. Tatlo ka semana antes sang aton kombension, pribilehiyo naton nga agdahon ang iban. Ano ang makabulig sa aton sa pagpangagda nga may kalangkag?
2. Ano ang magapahulag sa aton nga makigbahin sing bug-os sa pagpanagtag sang imbitasyon?
2 Kon pamalandungan naton ang mga benepisyo nga aton matigayon sa espirituwal nga sinalusalo nga ginhanda ni Jehova sa aton mga kombension mapahulag kita nga makigbahin sing bug-os sa pagpanagtag sang imbitasyon. (Isa. 65:13, 14) Dapat tandaan man naton nga may maayo nga mga resulta ang aton pagpanagtag sing imbitasyon. Ang iban nga aton gin-imbitar mahimo magtambong sa kombension. Pero, madamo man ukon diutay ang matambong, ang aton panikasog sa tion sang kampanya magadayaw kay Jehova kag magapabanaag sang iya kaalwan.—Sal. 145:3, 7; Bug. 22:17.
3. Paano ipanagtag ang mga imbitasyon?
3 Dapat pat-uron sang hubon sang mga gulang kon paano sang kongregasyon mapanagtag sing lapnag ang imbitasyon, kon bala ibilin ang imbitasyon sa mga balay nga wala sing tawo ukon ipanagtag ini sa pagpanaksi sa publiko. Kon Sabado kag Domingo itanyag ang mga magasin lakip ang imbitasyon kon nagakaigo. Kon ang una nga Sabado sang bulan matupa sa petsa sang pagpanagtag sang imbitasyon, dapat magkonsentrar sa pagpanagtag sang imbitasyon sa baylo sa pagsugod sang pagtuon sa Biblia. Kon matapos na ang pagpanagtag, malipay gid kita kay nakigbahin kita nga may kalangkag kag madamo kita sing naimbitar agod makabenepisyo sa espirituwal nga sinalusalo nga ginhanda ni Jehova!