Ang Kampanya sa Pagpahibalo sang Memoryal Magasugod sa Marso 1
1. San-o magasugod ang pagpanagtag sing imbitasyon sa Memoryal, kag ngaa mas malawig ini subong?
1 Sa Biernes, Marso 1, magasugod ang aton pagpanagtag sing imbitasyon sa Memoryal sini nga tuig. Ang Memoryal hiwaton sa Marso 26, gani ang pagpanagtag sing imbitasyon mas malawig sangsa nagliligad nga tinuig. Bangod sini, mas madamo nga tawo ang makabaton sing imbitasyon, ilabi na sa mga kongregasyon nga may malapad nga teritoryo.
2. Ano ang mga kahimusan sa pagkuha sing imbitasyon kag pagkobre sa teritoryo?
2 Mangin Organisado: Ang mga gulang magahatag sing instruksion kon paano kobrehan ang teritoryo, lakip na kon bala bilinan sing mga imbitasyon ang mga balay nga wala sing tawo. Kon may nabilin pa nga mga imbitasyon pagkatapos makobrehan ang teritoryo, mahimo ini ipanagtag sa pangpubliko nga pagpanaksi. Kinahanglan pat-uron sang manugtatap sang pag-alagad nga may bastante nga imbitasyon sa bulutangan sang literatura, pero indi dapat pag-ipagua tanan. Dapat magkuha lamang kita sing kinahanglan naton para sa isa ka semana.
3. Ano ang dapat naton dumdumon kon nagapanagtag sing imbitasyon?
3 Ano ang Aton Ihambal? Mas maayo nga malip-ot lang para madamo kita sing mapanagtagan. May sampol nga presentasyon sa pahina 4 nga mahimo ipasibu naton sa aton teritoryo. Siempre pa, indi kita dapat magdalidali kon mainabyanon ukon may mga pamangkot ang tagbalay. Kon nagapanagtag sa Sabado kag Domingo, mahimo man kita magtanyag sing mga magasin kon nagakaigo. Sa Marso 2, magapanagtag kita sing imbitasyon sa baylo nga magtanyag sing mga pagtuon sa Biblia.
4. Ngaa dapat kita mangin makugi sa pagpanagtag sing imbitasyon?
4 Nagalaum kita nga madamo ang magatambong sa Memoryal. Ipaathag sa pamulongpulong kon sin-o gid si Jesus. (1 Cor. 11:26) Ipaathag man kon paano kita mabuligan sang iya kamatayon. Kag ipadaku man kon ngaa importante nga dumdumon naton sia. (Juan 17:3) Kabay pa nga mangin makugi kita sa pagpanagtag sing imbitasyon!