“Hupti nga Maayo ang Inyo Paggawi sa Tunga sang mga Pungsod”

1. Ngaa importante nga huptan ang maayo nga paggawi sa tion sang rehiyonal nga kombension?

¹ Madamo ang nagaobserbar sa aton kombension kada tuig, gani importante nga ipresentar naton sing nagakaigo ang aton Dios nga ginasimba paagi sa aton paggawi. (Lev. 20:26) Ang aton maayo nga pamatasan subong man ang aton pamayo kag pamustura dapat nagapakilala sa aton bilang matuod nga sumulunod sang Cristo. Sa tion sang aton rehiyonal nga kombension, paano naton ‘huptan nga maayo ang aton paggawi sa tunga sang mga pungsod’ sa amo makahatag sing himaya sa aton Amay sa langit?—1 Ped. 2:12.

2. Ano nga mga kahigayunan nga mapakita naton ang Cristianong personalidad sa tion sang kombension?

² Ipakita ang Cristianong Personalidad: Ang gugma nga ginapakita naton sa isa kag isa kag kon paano naton ginapakig-angutan ang “mga yara sa gua” tuhay gid sa espiritu nga ginapakita sang kalibutan. (Col. 3:10; 4:5; 2 Tim. 3:1-5) Dapat kita mangin mainayuhon kag mapailubon kon nagakaon sa mga restawran, bisan pa may problema nga mag-utwas. Maayo man nga pamatasan nga magbilin sing tip sa mga nagahatag sing serbisyo.

3. Ano ang ginapahanumdom sa mga ginikanan, kag ngaa?

³ Dapat bantayan sing maayo sang mga ginikanan ang ila kabataan sa duog sang kombension, restawran, kag sa ila dalayunan. (Hulu. 29:15) Ang manedyer sang restawran sa isa ka hotel nagsiling sa mag-asawa: “Nanamian gid kami sa inyo. Mabuot kag matinahuron kamo kag ang inyo mga kabataan. Ginadayaw kamo sang mga empleyado, tani diri na lang kamo kada weekend.”

4. Samtang nagatambong sa aton kombension, ano ang dapat naton bantayan sa aton panagway?

⁴ Maugdang nga Pamayo: Ang aton pamayo sa tion sang kombension dapat nagakaigo kag maugdang, wala nagasunod sa estilo nga uso sa kalibutan. (1 Tim. 2:9) Bisan sa pagpulupamasyar antes kag pagkatapos sang sesyon, indi kita magsuksok sing sobra ka kaswal ukon baraghal nga pamayo. Sa amo indi kita mahuya nga isuksok ang aton badge kag makahatag sing panaksi kon may kahigayunan. Ang aton panagway kag maayo nga paggawi samtang nagatambong sa aton kombension indi lamang makapukaw sa mga interesado sa nagaluwas sing kabuhi nga mensahe sang Biblia kundi makahatag man sing kalipay kay Jehova.—Sof. 3:17.