Mga Reperensia Para sa Pagkabuhi kag Pagministeryo nga Workbook Para sa Miting
© 2023 Watch Tower Bible and Tract Society of Pennsylvania
NOBIEMBRE 6-12
MGA BAHANDI SA PULONG SANG DIOS | JOB 13-14
“Kon ang Tawo Mapatay, Mabuhi Pa Bala Sia Liwat?”
Ang Aton Pagtinguha Para sa Mas Malawig nga Kabuhi
BISAN karon pila lamang ang magapamatok sa sining ideya tuhoy sa kalip-uton sang kabuhi, walay sapayan nga ginsulat ini mga 3,500 ka tuig na ang nagligad. Wala pirme sing kaayawan ang mga tawo nga matilawan sing malip-ot ang labing maayo nga bahin sang kabuhi kag dayon magtigulang kag mapatay. Busa, nagdamo ang mga pamaagi sa pagpalawig sing kabuhi sa bug-os nga maragtas.
Sang panahon ni Job, ginkaon sang mga Egiptohanon ang mga pantog sang mga sapat sa walay pulos nga pagtinguha nga mapanumbalik ang ila pagkapamatan-on. Ang isa sang panguna nga mga tulumuron sang alchemy sang Edad Media amo ang paghimo sing isa ka elixir nga makahatag sing mas malawig nga kabuhi. Madamo nga alchemist ang nagpati nga ang ginpatubas sing artipisyal nga bulawan makahatag sing di-mamalatyon nga kabuhi kag nga ang pagkaon sa bulawan nga pinggan makapalawig sing kabuhi. Ginhunahuna sang dumaan nga Intsik nga mga Taoista nga sarang nila mabag-o ang kemika sang lawas paagi sa paggamit sing mga teknik subong sang pagpamalandong, pagginhawa nga mga ehersisyo, kag dieta kag sa amo matigayon ang pagkadi-mamalatyon.
Ang Espanyol nga manuglagulad nga si Juan Ponce de León kilala bangod sang iya walay kaayawan nga pagpangita sa tuburan sang pagkapamatan-on. Ang isa ka doktor sang ika-18 nga siglo nagrekomendar sa iya libro nga Hermippus Redivivus nga ang lamharon nga mga ulay bukuton sa isa ka diutay nga hulot sa panahon sang tigpamulak kag kolektahon sa mga botelya ang hangin nga ila ginapusnga kag gamiton subong nagapalawig-sing-kabuhi nga bulong. Indi na kinahanglan nga hambalon pa, wala sining mga metodo ang nagmadinalag-on.
Matubo Pa Bala Liwat ang Gintapas nga Kahoy?
KON ipaanggid sa matahom nga sedro sang Lebanon, ang tiko kag nagalubag nga kahoy nga olibo daw indi salapakon. Pero may talalupangdon nga ikasarang ang mga kahoy nga olibo nga mabuhi bisan sa mabudlay nga kahimtangan. Ang pila ginabulubanta nga mga 1,000 na ka tuig. Bangod sang masangkad nga gamot sini, mahimo pa ini mabuhi bisan pa tapson ang puno. Samtang buhi pa ang gamot sini, matubo pa ini liwat.
Kumbinsido ang patriarka nga si Job nga bisan pa mapatay sia, mabuhi sia liwat. (Job 14:13-15) Gingamit niya ang kahoy—mahimo ang kahoy nga olibo—para ilaragway ang iya pagsalig sa ikasarang sang Dios sa pagbanhaw sa iya. “Bisan ang kahoy may paglaum,” siling ni Job. “Bisan tapson, magatubo ini liwat.” Kon mag-ulan pagkatapos sang grabe nga tig-ilinit, ang laya nga tuod mabuhi liwat kon manalingsing ang ugat sini kag “magapananga kaangay sang bag-o nga tanom.”—Job 14:7-9.
“Magahandum Ka”
Sa pangamuyo ni Job, madamo kita sing matun-an parte kay Jehova: Importante sa iya ang mga pareho ni Job nga ginabutang ang ila kaugalingon sa iya mga kamot, para madihon niya sila kag mangin kalahamut-an sa iya. (Isaias 64:8) Ginapabaloran gid ni Jehova ang iya matutom nga mga sumilimba. ‘Ginahandum’ niya ang mga napatay nga matutom sa iya. Ang Hebreo nga tinaga nga gingamit sa sini “amo ang isa sa pinakamakusog nga tinaga para ipabutyag ang grabe gid nga paghandum,” suno sa isa ka iskolar. Gani, wala lamang ginadumdom ni Jehova ang iya mga sumilimba, kundi ginahandum gid niya nga banhawon sila.
Espirituwal nga mga Hiyas
it-1-E 191
Abo
Ang abo nagasimbulo man sang mga butang nga indi importante ukon wala sing pulos; halimbawa, ginbaton ni Abraham sa atubangan ni Jehova nga ‘yab-ok lang sia kag abo.’ (Ge 18:27; tan-awa man ang Isa 44:20; Job 30:19.) Ginkumparar ni Job ang mga ginhambal sang iya indi matuod nga mga abyan sa ‘mga hulubaton nga wala sing pulos nga kaangay sang abo.’—Job 13:12.
NOBIEMBRE 13-19
MGA BAHANDI SA PULONG SANG DIOS | JOB 15-17
“Ginpakita ni Elifaz ang Indi Maayo nga Paagi sang Pagpaumpaw”
Batui ang Sayop nga Panghunahuna!
Ginpakita sang tatlo ka pamulongpulong ni Elifaz nga ang Dios wala sing kaluoy kag bisan ano pa ang himuon sang iya mga alagad, indi sia mahamuot. “Yari karon! Wala sia sing pagtuo sa iya mga alagad,” siling ni Elifaz kay Job, “kag ang iya mga anghel ginapabangdan niya sing kabuangan.” (Job 4:18) Dayon nagsiling sia tuhoy sa Dios: “Yari karon, ang Dios wala nagasalig sa iya mga balaan, kag bisan pa ang mga langit indi matinlo sa iya igtululok.” (Job 15:15) Kag namangkot sia: “Nahamuot bala ang Labing Gamhanan nga ikaw matarong?” (Job 22:3) Ugyon man si Bildad sa sini nga pagtamod, kay sia nagsiling: ‘Bisan ang bulan wala sing kasanag, kag ang mga bituon indi matinlo sa panulok sang Dios.’—Job 25:5.
Dapat kita magbantay nga indi kita maimpluwensiahan sang amo nga sahi sang panghunahuna. Bangod basi magbatyag kita nga sobra ang ginapaabot sang Dios sa aton. Ini nga sahi sang pagtamod magaguba sang aton kaangtanan kay Jehova. Isa pa, kon amo sini ang aton pangatarungan, ano ang mangin reaksion naton kon hatagan kita sing kinahanglanon nga disiplina? Sa baylo nga batunon ini sing mapainubuson, ang aton tagipusuon mahimo “maakig kay Jehova mismo,” kag mahimo maghinakit kita sa iya. (Hulubaton 19:3) Makahalalit gid ini sa aton espirituwalidad!
Iluga ang Pagkamapainubuson kag Pagkamapinalanggaon ni Jesus
16 Sa aton panghambal. Ang aton pagpalangga sa iban nagapahulag sa aton nga maghambal sing ‘makapalugpay sa mga ginapung-awan.’ (1 Tes. 5: 14) Ano ang aton isiling para mapalig-on sila? Mapalig-on naton sila paagi sa pagpabutyag sang aton matuod nga pag-ulikid kag pagkabalaka sa ila. Makahatag man kita sing sinsero nga komendasyon para mabuligan sila nga makita ang ila positibo nga mga kinaiya kag mga ikasarang. Mapahanumdom naton sa ila nga ginbuyok sila ni Jehova sa iya Anak, gani hamili sila para sa Iya. (Juan 6:44) Mapasalig naton sila nga nagaulikid gid si Jehova sa iya mga alagad nga “nagaantos” ukon “nalisdan.” (Sal. 34:18) Ang aton mainayuhon nga panghambal makapaayo sa mga nagakinahanglan sing lugpay.—Hulu. 16:24.
Espirituwal nga mga Hiyas
Talalupangdon nga mga Punto Gikan sa Tulun-an ni Job
7:9, 10; 10:21; 16:22—Ginapahangop bala sining mga pinamulong nga wala nagapati si Job sa pagkabanhaw? Mga komento ini tuhoy sa mahanabo kay Job sa dili madugay. Ano, nian, ang luyag niya ipahangop? Ang isa ka posibilidad amo nga kon mapatay gid man sia, indi na sia makita sang iya mga katubotubo. Kag para sa ila, indi na sia magabalik sa iya balay ukon pagakilalahon pa tubtob sa gintalana nga tion sang Dios. Mahimo man ipahangop ni Job nga wala sing bisan sin-o ang makahalin sa Sheol sa iya lamang kaugalingon. Nagapati gid si Job nga pagabanhawon sia sa palaabuton kag mabasa ini sa Job 14:13-15.
NOBIEMBRE 20-26
MGA BAHANDI SA PULONG SANG DIOS | JOB 18-19
“Indi Pagbiyai ang Imo mga Kauturan”
Ang Matun-an Naton sa Paghibi ni Jesus
9 Buligi ang mga nagapangasubo. Magluwas nga gin-updan ni Jesus sa paghibi sanday Marta kag Maria, ginpamatian man niya sila kag ginpaumpawan. Puede man naton ini himuon sa mga nagapangasubo. Si Dan, nga isa ka gulang sa Australia, nagsiling: “Sang napatay ang akon asawa, kinahanglan ko ang bulig. Madamo nga mag-asawa ang handa sa pagpamati sa akon bisan ano nga oras. Wala sila nasaw-ahan nga nagahibi ako, kag wala nila ako ginapunggan. Ginabuligan man nila ako sa mga tion nga indi ko mahimo ang pila ka hilikuton, pareho sang pagtinlo sang akon salakyan, pagpanindahan, kag pagluto. Kag pirme sila nagapangamuyo upod sa akon. Matuod gid sila nga mga abyan kag mga utod nga ‘masaligan sa tion sang kalisdanan.’”—Hulu. 17:17.
Kon ang Aton Pinalangga Nagbiya kay Jehova
16 Padayon nga buligi ang pamilya sang na-disfellowship. Kinahanglan gid nila subong ang imo pagpalangga kag pagpalig-on. (Heb. 10:24, 25) Kon kaisa, nagasiling ang pamilya sang na-disfellowship nga wala na sila ginaistorya sang pila ka kauturan, kag pamatyag nila daw gin-disfellowship man sila. Indi naton gusto nga amo sini ang ila mabatyagan. Dapat naton palig-unon ilabi na ang mga pamatan-on nga may mga ginikanan nga nag-untat sa pag-alagad kay Jehova. Dapat man naton isiling sa sini nga mga pamatan-on nga ginapabaloran naton ang ila katutom. Sang na-disfellowship ang bana ni Maria kag ginbiyaan ang ila pamilya, nagsiling sia: “Nagkadto sa amon balay ang pila sa akon mga abyan. Nagluto sila sing pagkaon kag ginbuligan nila ako sa pag-study sa akon mga bata. Nasakitan man sila sa natabo sa amon kag naghibi sila. Sang may nagpalapta sang indi matuod nga mga istorya parte sa akon, ginpangapinan nila ako. Napalig-on gid nila ako.”—Roma 12:13, 15.
Nagatinguha Ka Bala?
20 Dapat marealisar sang hubon sang mga gulang nga ang pagpahalin mahimo bangdan sang kahuol sang isa anay ka manugtatap ukon ministeryal nga alagad, bisan pa kon boluntaryo nga ginabiyaan niya ang pribilehiyo. Kon wala sia madisfellowshipped, kag nakita sang mga gulang nga ang utod napung-awan, dapat sila maghatag sing mahigugmaon nga espirituwal nga bulig. (1 Tesalonica 5:14) Dapat nila buligan sia nga mahangpan nga kinahanglan sia sa kongregasyon. Bisan pa kon ginkinahanglan ang paghatag sing laygay, mahimo nga sa indi madugay ang mapainubuson kag mapinasalamaton nga tawo makabaton liwat sing dugang pa nga mga pribilehiyo sang pag-alagad sa kongregasyon.
Espirituwal nga mga Hiyas
Ang Gahom sang Malulo nga Pulong
Apang, sang si Job mismo nagkinahanglan sing pagpalig-on, si Elifaz kag ang iya mga kaupod wala nagbungat sing malulo nga mga pulong. Ginbasol nila si Job sa iya kalalat-an, ginapahangop nga may yara sia pila ka tinago nga sala. (Job 4:8) Ang The Interpreter’s Bible nagkomento: “Ang ginakinahanglan ni Job amo ang kaawa sang tagipusuon sang tawo. Ang iya nakuha amo ang paalagisud sang ‘matuod’ kag matahom nga relihiosong mga wali kag makatalaka nga mga halambalanon sa moral.” Naligban gid si Job sang mabatian ang mga pulong ni Elifaz kag sang iya mga kaupod nga napilitan sia sa pagsinggit: “Tubtob san-o bala ang pagsakit ninyo sa akon kalag kag pagdugmok ninyo sa akon sa mga pulong?”—Job 19:2.
Dili gid naton pagpasinggiton sa kasakit ang aton masigkaalagad ni Jehova bangod sang aton walay pasunaid, dimalulo nga mga pulong. (Ipaanggid ang Deuteronomio 24:15.) Ang isa ka hulubaton sa Biblia nagapaandam: “Ang imo ginahambal magaamlig sang kabuhi ukon magalaglag sini; gani dapat mo batunon ang mga resulta sang imo mga pulong.”—Hulubaton 18:21, TEV.
NOBIEMBRE 27–DISIEMBRE 3
MGA BAHANDI SA PULONG SANG DIOS | JOB 20-21
“Wala Nagadepende sa Manggad ang Pagkamatarong”
Ikaw Bala “Manggaranon sa Dios”?
12 Sa sini nga parabola, ginpatuhay ni Jesus ang isa nga manggaranon sa Dios sa isa nga nagatipon sing materyal nga manggad para sa kaugalingon. Busa si Jesus nagsiling nga ang aton prioridad sa kabuhi indi dapat ang pagtipon sing materyal nga manggad ukon kaayawan sa aton materyal nga ginpanag-iyahan. Sa baylo, dapat gamiton naton ang aton pagkabutang agod pauswagon ukon palig-unon ang aton kaangtanan kay Jehova. Kon amo sini ang aton himuon sigurado gid nga manggaranon kita sa Dios. Ngaa? Bangod amo ini ang paagi nga matigayon naton ang bugana niya nga pagpakamaayo. Ang Biblia nagasiling: “Ang pagpakamaayo sang GINOO nagapamanggad, kag wala sia nagadugang sing kasubo sa sini.”—Hulubaton 10:22.
Espirituwal nga mga Hiyas
Pagdaug kay Satanas kag sa Iya mga Binuhatan
19 Talalupangdon nga ang alagad sang Dios nga si Job nakig-away batok sa “makatulublag nga mga panghunahuna” nga ginpaalinton ni Satanas paagi kay Elifaz kag kay Zofar. (Job 4:13-18; 20:2, 3) Sa amo si Job nag-antos sing “kasakit,” nga nagresulta sa iya “pahinali nga mga pulong” nahanungod sa “mga kakugmat” nga nagapaantos sa iya hunahuna. (Job 6:2-4; 30:15, 16) Mahipos nga namati si Elihu kay Job kag sinsero nga ginbuligan sia nga mahangpan ang labing maalamon nga pagtamod ni Jehova sa mga butang. Amo man sa karon, ginapakita sang mahinangpanon nga mga gulang nga nagaulikid sila sa mga nagaantos paagi sa indi pagdugang sing mga “pag-ipit” sa ila. Sa baylo, kaangay ni Elihu, mapailubon nga nagapamati sila kag dayon ginaaplikar nila ang makapaumpaw nga lana sang Pulong sang Dios. (Job 33:1-3, 7; Santiago 5:13-15) Sa amo ang bisan sin-o nga ginatublag ang ila emosyon sang masakit nga inagihan, matuod man ukon handurawan lamang, ukon “ginapahadlok . . . sang mga damgo, kag sang mga palanan-awon” subong sang natabo kay Job, mahimo nga makasapo sing makapaumpaw nga Makasulatanhon nga paglipay sa sulod sang kongregasyon.—Job 7:14; Santiago 4:7.
DISIEMBRE 4-10
MGA BAHANDI SA PULONG SANG DIOS | JOB 22-24
“Mapuslanon Bala ang Tawo sa Dios?”
Batui ang Sayop nga Panghunahuna!
Ang ideya nga ang Dios wala sing kaluoy kaanggid gid sa pagtamod nga ginakabig niya ang tawo nga walay pulos. Ang ikatlo nga pamulongpulong ni Elifaz may pamangkot: “May pulos bala ang mapagros nga tawo sa Dios, nga ang sin-o man nga maalam mapuslanon sa iya?” (Job 22:2) Luyag ipahangop ni Elifaz nga ang tawo wala sing pulos sa Dios. Sing kaanggid, si Bildad nangatarungan man: “Gani paano ang mamalatyon nga tawo mangin husto sa atubangan sang Dios, ukon paano mangin matinlo ang isa nga ginpanganak sang isa ka babayi?” (Job 25:4) Pasad sa sina nga pangatarungan, paano ang isa lamang ka mamalatyon nga tawo kaangay kay Job, makapangangkon nga may yara sia sing matarong nga tindog sa atubangan sang Dios?
Ang pila ka tawo sa karon ginatublag sang negatibo nga mga balatyagon tuhoy sa ila kaugalingon. Ayhan bangod ini sang ila gindak-an nga pamilya, mga pag-ipit sa kabuhi, ukon nangin biktima sila sang pagdumot sa rasa ukon etniko nga grupo. Kag nalipay man si Satanas kag ang iya mga demonyo nga magluya ang buot sang isa ka tawo. Kon mapapati nila ang isa nga bisan ano pa ang iya himuon, indi gid niya mapahamut-an ang Labing Gamhanan nga Dios, mas madali sia nga maluyahan sing buot. Sa ulihi magapalayo sia, kag mahimo pa gani sia magbiya sa buhi nga Dios.—Hebreo 2:1; 3:12.
Ang katigulangon kag mga balatian nagaupang sa aton. Mahimo daw diutay na lang ang maamot naton karon sa pag-alagad sa Ginharian kon ikumparar sa nahimo naton sang mas hoben, mas mapagros, kag mas mabaskog pa kita. Gani daw ano gid ka importante nga mahibaluan naton nga luyag ni Satanas kag sang iya mga demonyo nga magbatyag kita nga indi gid naton mapahamut-an ang Dios! Dapat naton batuan ini nga panghunahuna.
Isa ka Leksion kon Paano Lubaron ang mga Problema
Dugang pa nga ginpahanusbo si Job sang iya tatlo ka abyan bangod sang pagpabutyag nila sang ila personal nga mga ideya sa baylo sang diosnon nga kaalam. Nagsiling pa gani si Elifaz nga ‘ang Dios wala nagasalig sa iya alagad’ kag indi importante kay Jehova kon bala si Job matarong ukon indi. (Job 4:18; 22:2, 3) Mabudlay hunahunaon ang mas makapaluya sing buot—ukon mas binutig—nga komento sangsa sina! Dimakapakibot nga ginsaway sang ulihi ni Jehova si Elifaz kag ang iya mga kaupdanan tungod sini nga pasipala. “Wala kamo makapamulong nahanungod sa akon sang butang nga matarong,” siling niya. (Job 42:7) Apang ang labing makahalalit nga pinamulong magaabot pa.
Mga Pamatan-on nga Nagapahalipay sa Tagipusuon ni Jehova
10 Subong sang ginpakita sa rekord sang Biblia, ginduhaduhaan ni Satanas indi lamang ang katutom ni Job kundi ang katutom man sang tanan nga iban pa nga nagaalagad sa Dios—lakip ikaw. Sa katunayan, nagapatuhoy sa katawhan sa kabilugan, si Satanas nagsiling kay Jehova: “Ang tanan nga iya sang tawo [indi lamang si Job kundi ang bisan sin-o] ihatag niya tungod sa iya kalag.” (Job 2:4) Makita mo bala ang imo papel sa sining importante nga hulusayon? Subong sang ginapakita sa Hulubaton 27:11, si Jehova nagasiling nga may mahatag ka sa iya—isa ka sadsaran nga magamit niya agod sabton ang nagayaguta sa iya, si Satanas. Hamak mo—ang Bug-os Uniberso nga Soberano nagapangabay sa imo nga sabton ang pinakadaku nga hulusayon. Daw ano ini ka daku nga responsabilidad kag pribilehiyo para sa imo! Mahimo mo bala ang ginapangabay sa imo ni Jehova? Nahimo ini ni Job. (Job 2:9, 10) Nahimo man ini ni Jesus kag sang di-maisip nga iban pa sa bug-os nga maragtas, lakip ang madamo nga mga pamatan-on. (Filipos 2:8; Bugna 6:9) Mahimo mo man ini. Apang, tandai, wala sing neutral nga bahin sa sini nga hulusayon. Paagi sa imo himuon, mapakita mo nga ginasakdag mo ang pagyaguta ni Satanas ukon ang sabat ni Jehova. Sin-o ang sakdagon mo?
May Pag-ulikid si Jehova sa Imo!
11 Importante gid bala kay Jehova kon ano ang pilion mo? Indi bala bastante na ang mga tawo nga nagpabilin nga matutom agod makahatag sia sing nagakaigo nga sabat kay Satanas? Matuod, nagsiling ang Yawa nga wala sing bisan sin-o ang nagaalagad kay Jehova bangod sa gugma, isa ka panumbungon nga napamatud-an na nga butig. Sa gihapon, luyag ni Jehova nga magdampig ka sa iya sa hulusayon sang pagkasoberano bangod may pag-ulikid sia sa imo subong isa ka indibiduwal. Si Jesus nagsiling: “Indi halandumon nga butang sa akon Amay nga yara sa langit nga ang isa sining mga magamay mawala.”—Mateo 18:14.
12 Maathag nga interesado si Jehova sa dalanon nga imo pilion. Mas importante sa sini, apektado sia sini. Maathag nga ginapakita sang Biblia nga si Jehova may tudok nga balatyagon nga maapektuhan sang maayo ukon malain nga mga buhat sang mga tawo. Halimbawa, sang ang mga Israelinhon sulit-sulit nga nagrebelde, nagbatyag si Jehova sing ‘kasakit.’ (Salmo 78:40, 41) Antes sang Anaw sang panahon ni Noe, sang “ang kalainan sang tawo bugana,” ‘nasaklaw ang tagipusuon ni Jehova.’ (Genesis 6:5, 6) Hunahunaa kon ano ang buot silingon sini. Kon maghimo ka sing malain, mahimo nga masaklaw mo ang imo Manunuga. Wala ini nagakahulugan nga maluya ukon emosyonal ang Dios. Sa baylo, ginahigugma ka niya kag nagaulikid sa imo kaayuhan. Sa pihak nga bahin, kon himuon mo ang maayo, nagakalipay ang tagipusuon ni Jehova. Malipayon sia indi lamang bangod may dugang sia nga isabat kay Satanas kundi bangod mapadyaan ka man niya. Kag butang ini nga luyag niya himuon. (Hebreo 11:6) Daw ano gid ka mahigugmaon nga Amay si Jehova nga Dios!
Espirituwal nga mga Hiyas
Gamita ang Espirituwal nga mga Tulumuron Agod Himayaon ang Imo Manunuga
Binagbinaga kon paano natapos ni Jehova ang pagtuga sa uniberso. Sa mga pulong nga, “may kagab-ihon kag may kaagahon,” gintandaan ni Jehova ang alagisod nga hut-ong sang pagpanuga. (Genesis 1:5, 8, 13, 19, 23, 31) Sa ginsuguran sang tagsa ka hut-ong sang pagpanuga, nahibaluan gid niya sing maayo kon ano ang iya katuyuan ukon tulumuron, sa sina nga adlaw. Kag gintuman sang Dios ang iya katuyuan sa pagtuga sing mga butang. (Bugna 4:11) “Ang iya [Jehova] kalag nagahandum sini, kag himuon niya ini,” siling sang patriarka nga si Job. (Job 23:13) Mahimo gid nga nalipay si Jehova nga makita “ang tanan nga butang nga ginhimo niya” kag magsiling “tama gid [ini] kaayo”!—Genesis 1:31.
Agod matuman ang aton mga tulumuron, dapat may mabaskog man kita nga handum nga himuon ini. Ano ang magabulig sa aton agod mapalambo ining mabaskog nga handum? Bisan sang ang duta wala pa sing porma kag wala sing sulod, nakita na ni Jehova ang mangin resulta—isa ka matahom nga hiyas sa kahawaan, nga nagahimaya kag nagapadungog sa iya. Sing kaanggid, ang aton handum nga tapuson ang aton ginabuko mapalambo man paagi sa pagpamalandong sa mga resulta kag mga benepisyo sang paglab-ot sa tulumuron. Amo sini ang naeksperiensiahan sang 19-anyos nga si Tony. Indi gid niya malipatan ang iya una nga impresyon sang pagbisita niya sa isa ka sanga talatapan sang mga Saksi ni Jehova sa Nakatundan nga Europa. Sugod sadto, ang pamangkot nga pirme ginahunahuna ni Tony amo, ‘Ano ayhan ang pagkabuhi kag pag-alagad sa isa ka duog kaangay sini?’ Wala gid madula sa hunahuna ni Tony ini nga posibilidad, kag padayon niya nga gintinguhaan ini nga tulumuron. Malipayon gid sia nga sang pila ka tuig sang ulihi naaprobahan sia nga mag-alagad sa sanga talatapan!
DISIEMBRE 11-17
MGA BAHANDI SA PULONG SANG DIOS | JOB 25-27
“Indi Kinahanglan nga Perpekto Kita Para Mapakita Naton ang Integridad”
it-1-E 1210 ¶4
Integridad
Si Job. Si Job maathag nga nagkabuhi sa mga tion halin sang napatay si Jose asta sang mga tion ni Moises. Ginlaragway sia nga ‘matarong [sa Heb., tam] kag may integridad nga tawo. Nagakahadlok sia sa Dios kag nagalikaw sa malain.’ (Job 1:1; tan-awa ang JOB.) Nadalahig sa isyu sa tunga ni Jehova nga Dios kag ni Satanas ang katutom sang mga tawo. Maathag nga makita ini sang ginpamangkot sang Dios ang iya Kaaway parte kay Job sang nag-abot si Satanas sa isa ka pagtilipon sang mga anghel sa mga korte sa langit. Ginbutangbutangan ni Satanas sang sala nga motibo ang pagsimba ni Job sa Dios, amo nga nagsiling sia nga nagaalagad si Job indi bangod sa putli nga debosyon kundi bangod lang sa iya personal nga mga handum. Ginduhaduhaan ni Satanas ang integridad ni Job sa Dios. Sang gintugutan sia nga kuhaon niya ang madamo nga pagkabutang ni Job kag pahanabuon nga mapatay ang iya mga anak, napaslawan si Satanas nga gub-on ang integridad ni Job. (Job 1:6–2:3) Nagsiling pa sia nga handa si Job nga batason nga may kakagod nga madula ang iya mga pagkabutang kag mga anak para lang maluwas ang iya kaugalingon. (Job 2:4, 5) Pagkatapos sini, ginhalitan ni Satanas si Job paagi sa malubha nga balatian nga amat-amat nga nagaut-ot sang iya unod kag ginaipit sia sang iya asawa nga talikdan ang Dios. Dugang pa, ginapakamalaut man sia sang iya indi matuod nga mga abyan paagi sa ila indi insakto nga aplikasyon sang mga talaksan kag katuyuan sang Dios. (Job 2:6-13; 22:1, 5-11) Pero, ginpakita sang sabat ni Job nga indi gid niya pag-isikway ang iya integridad. “Tubtob mapatay ako, indi ko pag-isikway ang akon integridad! Huptan ko ang akon pagkamatarong kag indi gid pagbuy-an ini; indi ako pagsuknaan sang akon tagipusuon tubtob buhi ako.” (Job 27:5, 6) Bangod nahuptan ni Job ang iya integridad, napamatud-an nga butigon ang Kaaway sang Dios.
Mangin Malig-on sa Imo Integridad!
3 Paano mapakita sang mga alagad sang Dios ang integridad? Mapakita nila ini paagi sa ila bug-os tagipusuon nga gugma kag debosyon kay Jehova, amo nga pirme nila ginauna ang iya kabubut-on kon nagadesisyon sila. Binagbinagon naton kon paano gingamit ang tinaga nga “integridad” sa Biblia. Nagakahulugan ini sing kompleto, wala sing diperensia, ukon bug-os. Halimbawa, naghalad kay Jehova ang mga Israelinhon sang mga sapat, kag dapat wala ini sing diperensia suno sa Kasuguan. (Lev. 22:21, 22) Indi dapat maghalad ang katawhan sang Dios sang sapat nga kulang sang tiil, dulunggan, ukon mata, ukon sang sapat nga masakiton. Importante kay Jehova nga ang sapat kompleto ukon wala sing diperensia. (Mal. 1:6-9) Mahangpan naton kon ngaa amo sini ang pagtamod ni Jehova. Kon magbakal gani kita sang isa ka prutas, libro, ukon gamit, indi naton gusto nga may buhin ini ukon may parte ini nga kulang. Gusto naton nga kompleto ini ukon wala sing diperensia. Gusto man ni Jehova nga bug-os ang aton gugma kag katutom sa iya.
4 Dapat bala nga perpekto gid kita para mapakita naton ang integridad? Mahimo nga nagabatyag kita nga madamo kita sing sala kag diperensia. Binagbinaga ang duha ka rason nga puede kita makapakita sing integridad bisan pa indi kita perpekto. Una, wala nagapokus si Jehova sa aton mga sala. Ang iya Pulong nagasiling: “Kon mga sala lang ang ginatan-aw mo, O Jah, O Jehova, sin-o bala ang makatindog sa atubangan mo?” (Sal. 130:3) Kabalo sia nga makasasala kita kag indi perpekto, kag handa sia magpatawad. (Sal. 86:5) Ikaduha, kabalo si Jehova nga may mga limitasyon kita, kag wala niya ginapaabot nga himuon naton ang indi naton masarangan. (Basaha ang Salmo 103:12-14.) Gani paano kita mangin bug-os kag wala sing diperensia sa iya?
5 Mapakita sang mga alagad ni Jehova ang integridad paagi sa ila gugma. Dapat bug-os gid ang aton gugma sa Dios kag ang aton debosyon sa aton Amay sa langit. May integridad kita kon bug-os ang aton gugma bisan pa ginatilawan kita. (1 Cron. 28:9; Mat. 22:37) Binagbinagon naton liwat ang tatlo ka Saksi nga ginsambit sa umpisa. Ngaa amo sini ang ila ginhimo? Gusto bala sang pamatan-on nga babayi nga masubuan sia sa eskwelahan, ukon gusto bala sang pamatan-on nga lalaki nga pakahuy-an sia sang iya bantalaan, ukon gusto bala sang amay nga madulaan sia sang trabaho? Indi gid. Pero nabal-an nila ang matarong nga mga talaksan ni Jehova kag gusto gid nila nga pahamut-an ang ila Amay sa langit. Bangod sang ila gugma sa iya, gin-una nila sia sang nagdesisyon sila. Paagi sa sini, ginpakita nila nga may integridad sila.
Espirituwal nga mga Hiyas
Organisado Nahisuno sa Libro Halin sa Dios
3 Ginapamatud-an sang pagpanuga nga ang Dios ang pinakamaayo nga Organisador. “Paagi sa kaalam ginpasad ni Jehova ang duta,” siling sang Biblia. “Paagi sa paghantop ginpalig-on niya ang kalangitan.” (Hulu. 3:19) “Diutay lamang . . . nga bahin sang [binuhatan sang Dios]” ang nahibaluan naton, kag “daw hutik lamang ang nabatian naton tuhoy sa iya.” (Job 26:14) Pero, ang diutay nga nahibaluan naton parte sa mga planeta, bituon, kag galaksiya nagakumbinsi sa aton nga ining mga tinuga sa langit organisado gid. (Sal. 8:3, 4) Ang minilyon nga bituon sa mga galaksiya mahim-ong nga nagalibot sa kahawaan. Ang mga planeta sa aton solar system nagaagi sa ila orbit sa paglibot sa adlaw nga daw may ginasunod nga kasuguan sa trapiko! Ang makatilingala nga kahim-ong sa uniberso nagapahulag sa aton nga dayawon, unungan, kag simbahon si Jehova, kay “paagi sa iya kaalam, ginhimo niya ang kalangitan” kag ang duta.—Sal. 136:1, 5-9.
DISIEMBRE 18-24
MGA BAHANDI SA PULONG SANG DIOS | JOB 28-29
“Ang Imo Bala Reputasyon Pareho kay Job?”
Magpakita sing Mahigugmaon nga Kaayo sa mga Nagakinahanglan
19 Ginapadaku man sang mga kasaysayan sa Biblia nga ginbinagbinag naton ang katunayan nga ang mahigugmaon nga kaayo dapat ipakita sa mga may pagkinahanglan nga indi nila mismo mapun-an. Agod mapadayon ang linya sang iya kaliwat, kinahanglan ni Abraham ang kooperasyon ni Betuel. Agod madala ang iya bangkay sa Canaan, kinahanglan ni Jacob ang bulig ni Jose. Kag agod makabun-ag sing manunubli, kinahanglan ni Noemi ang bulig ni Rut. Indi mapun-an nanday Abraham, Jacob, ukon Noemi yadtong mga kinahanglanon nga wala sing bulig. Sa karon man, ang mahigugmaon nga kaayo dapat ipakita ilabi na sa mga nagakinahanglan. (Hulubaton 19:17) Dapat naton ilugon ang patriarka nga si Job, nga nagtalupangod sa ‘nasit-an nga nagapangayo sing bulig, kag sa bata nga lalaki nga ilo sa amay kag si bisan sin-o nga wala sing kabulig’ kag ‘sa isa nga buot na mapatay.’ ‘Ginpahalipay [man ni Job] ang tagipusuon sang balo’ kag nangin ‘mga mata sia para sa bulag kag mga tiil para sa mga piang.’—Job 29:12-15.
it-1-E 655 ¶10
Bayo
Madamo pa sing simbuliko nga kahulugan ang bayo nga ginsambit sa Biblia. Pareho sa isa ka uniporme ukon isa ka pinasahi nga bayo nga nagapakilala kon ano nga organisasyon nagaentra ukon nagasuporta ang isa ka tawo, amo man ang bayo suno sa simbuliko nga paggamit sini sa Biblia. Mahimo man ini magpakilala sa isa ka tawo kon ano ang iya mga pagpati kag kon ano ang iya mga ginahimo para suportahan ini, pareho sa ilustrasyon ni Jesus parte sa bayo para sa kasal. (Mat 22:11, 12; tan-awa ang TURBANTE, PANDONG; SANDALYAS.) Sa Bugna 16:14, 15, nagpaandam si Ginuong Jesucristo sa katalagman nga matulugan ang isa sa espirituwal nga paagi kag madula ang iya identidad bilang isa ka matutom nga saksi sang matuod nga Dios. Mahimo delikado gid ini kon mag-abot na ang “inaway nga mahanabo sa daku nga adlaw sang Dios nga Labing Gamhanan.”
Ano ang Kahulugan sang Imo Ngalan?
Sang natawo kita, indi kita ang nagpili sang aton ngalan. Apang, makapili kita kon ano ang aton mangin reputasyon. (Hulubaton 20:11) Gani, maayo nga pamangkuton mo ang imo kaugalingon: ‘Kon si Jesus kag ang iya mga apostoles magahatag sa akon sing ngalan, ano ayhan nga ngalan ang ila ihatag sa akon? Ano ayhan nga ngalan ang bagay sa akon kinaiya ukon reputasyon?’
Ini nga pamangkot maayo gid nga binagbinagon. Ngaa? “Mas maayo nga pilion ang maayo nga reputasyon sang sa madamo nga manggad,” sulat ni Hari Solomon. (Hulubaton 22:1, APD) Pat-od nga isa gid ka bilidhon nga butang kon nagaangkon kita sing isa ka maayo nga ngalan, ukon reputasyon sa komunidad. Apang mas importante pa gid, kon maghimo kita sing maayo nga ngalan sa Dios kay kaangay ini sing bahandi nga nagapabilin sing dayon. Paano? Nangako ang Dios nga isulat niya sa iya “tolon-an nga handumanan” ang mga ngalan sadtong nagakahadlok sa iya, kag hatagan niya sila sing paglaum nga kabuhi nga wala sing katapusan.—Malaquias 3:16; Bugna 3:5; 20:12-15.
Espirituwal nga mga Hiyas
Yuhum—Maayo Ini sa Imo!
May epekto gid bala ang yuhum? Ti, madumduman mo bala sang ang yuhum sang isa nakahatag sa imo sing paumpaw ukon nagpabatyag sa imo nga relaks? Ukon sang ang indi pagyuhum nagpakulba sa imo ukon nagpabatyag pa gani sa imo nga ginsikway? Huo, ang yuhum may daku nga epekto. Nagaapektar ini sa isa nga nagayuhum kag sa isa nga ginayuhuman. Ang karakter sa Biblia nga si Job nagsiling tuhoy sa iya mga kaaway: “Nagayuhum ako sa ila—indi sila magpati sa sini—kag ang kasanag sa akon nawong wala nila ginasikway.” (Job 29:24) “Ang kasanag” sa nawong ni Job mahimo nga nagapatimaan sang iya kalipay ukon kasadya.
DISIEMBRE 25-31
MGA BAHANDI SA PULONG SANG DIOS | JOB 30-31
“Kon Paano si Job Nakapabilin nga Matinlo sa Moral”
Ilikaw ang Imo mga Mata sa Walay Pulos nga mga Butang
8 Ang matuod nga mga Cristiano mahimo man maimpluwensiahan sang kailigbon sang mga mata kag sang kailigbon sang unod. Gani, ginapalig-on kita sang Pulong sang Dios nga disiplinahon ang aton kaugalingon sa kon ano ang aton ginatan-aw kag ginahandum. (1 Cor. 9:25, 27; basaha ang 1 Juan 2:15-17.) Nahibaluan sang matarong nga tawo nga si Job nga ang makita sang isa may daku nga epekto sa iya handum. Nagsiling sia: “Nagapakigkatipan ako sa akon mga mata; paano bala niyan ang pagtolok ko sa ulay?” (Job 31:1) Wala lamang ginlikawan ni Job ang aktual nga pagpakighilawas kundi ginlikawan niya bisan ang paghunahuna lamang sini. Ginpadaku ni Jesus ang pagsikway sa imoral nga panghunahuna sang nagsiling sia: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.”—Mat. 5:28.
Hunahunaa ang Imo “Madangatan”
Gani antes ka maglakat sa sining imoral nga sahi sang dalan, pamangkuta ang imo kaugalingon, ‘Diin ako dalhon sini nga dalan?’ Ang pagbinagbinag anay sa imo “madangatan” importante gid agod indi mo paghimuon ang buhat nga may malain nga resulta. Ang AIDS kag ang iban pa nga balatian halin sa pagpakighilawas, subong man ang batok sa buot nga pagbusong, aborsion, naguba nga mga relasyon, kag ginatublag nga mga konsiensia amo ang naghigko sa dalanon sang mga tawo nga wala nagsapak sa paandam sang Dios. Maathag nga ginsambit ni apostol Pablo ang padulungan sang mga nagahimo sing imoral nga buhat. “Indi [sila] makapanubli sang Ginharian sang Dios.”—1 Corinto 6:9, 10.
Mga Pamatan-on—Magpatuytoy sa Pulong sang Dios
15 San-o labi nga matilawan ang imo katutom sa Dios—kon may upod ka ukon nagaisahanon lang? Bueno, kon yara ka sa trabaho ukon sa eskwelahan, mahimo nga nagapangaman ka pirme batok sa mga katalagman sa espirituwal. Apang mas mahapos ka sulayon sa mga tion nga nagarelaks ka.
16 Ngaa luyag mo tumanon si Jehova bisan pa nagaisahanon ka? Dumduma ini: Mahimo mo masaklaw ang balatyagon ni Jehova ukon mapahalipay ang iya tagipusuon. (Gen. 6:5, 6; Hulu. 27:11) Apektado si Jehova sa imo mga ginahimo bangod “nagaulikid sia” sa imo. (1 Ped. 5:7) Luyag niya nga mamati ka sa iya agod makabenepisyo ka. (Isa. 48:17, 18) Sang ginsikway sang pila ka alagad ni Jehova sa dumaan nga Israel ang iya laygay, nasakitan gid sia. (Sal. 78:40, 41) Sa pihak nga bahin, nahamuot gid si Jehova kay manalagna Daniel, amo nga gintawag sia sang anghel subong “lalaki nga hinigugma sing daku.” (Dan. 10:11) Ngaa? Bangod nangin matutom si Daniel sa Dios indi lamang sa publiko kundi bisan pa nagaisahanon lang sia.—Basaha ang Daniel 6:10.
Espirituwal nga mga Hiyas
Ang Arte sang Pagpamati nga May Pag-ulikid
Nabatian sang mga abyan ni Job ang di-magkubos sa napulo niya ka pamulongpulong. Apang, si Job nagtuaw: “O kon may isa kuntani nga magpamati sa akon!” (Job 31:35) Ngaa nasiling niya ini? Bangod ang ila pagpamati wala naglugpay sa iya. Wala sila sing pag-ulikid kag kahanuklog sa balatyagon ni Job. Indi gid sila mapatugsilingon kaangay sang mahinangpanon nga mga manugpalamati. Apang si apostol Pedro naglaygay: “Kamo tanan mag-anggid sa panghunahuna, nga nagapakita sing patugsiling, may utudnon nga gugma, mapinalanggaon nga kaawa, mapainubuson sa hunahuna.” (1 Pedro 3:8) Paano naton mapakita ang patugsiling? Ang isa ka paagi amo ang pag-ulikid kag paghangop sa ginabatyag sang iban. Ang pagsiling sing mahinuklugon kaangay sang “siguro nabudlayan ka gid” ukon “mahimo nagbatyag ka nga wala ka mahangpan” isa ka paagi sa pagpakita nga nagaulikid kita. Ang isa pa ka paagi amo ang pagpabutyag sang ginahambal niya sa aton kaugalingon nga mga tinaga, sa amo ginapakita naton nga nahangpan naton ang iya ginsiling. Ang pagpamati nga may pag-ulikid nagakahulugan sang pagtalupangod indi lamang sang iya mga ginasiling kundi sang ginapahangop man sang iya ginabatyag.