Ngaa Nagakadula Na ang Respeto sa Kaugalingon?

KON NGAA IMPORTANTE ANG PAGRESPETO SA KAUGALINGON

Ang mga tawo nga may respeto sa ila kaugalingon may kompiansa sa pag-atubang sang mga kabudlayan sa kabuhi. Wala sila dayon nagauntat.

Base sa research, ang mga tawo nga indi maayo ang pagtan-aw sa ila kaugalingon masami nga nagakabalaka, nagaka-depress, kag may eating disorder. May daku man nga posibilidad nga magpahubog sila kag maggamit sang drugs.
Ang mga tawo nga may respeto sa ila kaugalingon wala nagakumparar sang ila kaugalingon sa iban. Gani mas mahapos para sa ila nga makigbagay kag suod nga makig-abyan sa mga tawo. Pero, ang mga wala sing respeto sa ila kaugalingon madali magpakalain sa iban, gani nagakaguba ang ila mga relasyon.
Bisan pa makaatubang sila sang mga problema, ang mga tawo nga may respeto sa kaugalingon mabakod gihapon. Wala nila ginapasugtan ang malain nga mga natabo nga magpugong sa ila nga malab-ot ang ila goal. Pero ang mga tawo naman nga wala sang respeto sa ila kaugalingon, nagalalain dayon kon may problema. Gani, wala na lang nila ginalab-ot ang ila goal.

KON PAANO MO RESPETUHON ANG IMO KAUGALINGON

Magpili sang mga abyan nga makabulig sa imo. Makig-upod sa mga tawo nga nagapakita sang respeto, nga interesado sa imo kaayuhan, kag magapabakod sa imo.

“Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

Buligi ang iban. Kon nagapakita ka sing kaayo kag nagabulig sa iban, bisan pa sa mga tawo nga indi makabalos sa imo, mangin malipayon ka gid bangod nagahatag ka. Mangin malipayon ka bisan pa daw wala natalupangdan sang iban ang ginhimo mo nga maayo.

“Mas malipayon ang nagahatag sangsa nagabaton.”—Binuhatan 20:35.

Buligi ang imo kabataan nga tun-an nga respetuhon ang ila kaugalingon. Mahimo mo ini kon pabay-an mo sila nga solbaron nila ang ila mga problema, asta sa masarangan nila. Mabuligan sini ang imo kabataan nga atubangon ukon solbaron ang ila kabudlayan. Paagi sini, matun-an nila nga respetuhon ang ila kaugalingon subong asta sa ila pagdaku.

“Hanasa ang bata sa husto nga dalanon; bisan magtigulang na sia indi sia magtalikod sa sini.”—Hulubaton 22:6.

Isa ka Saksi ni Jehova nga naga-Bible study sa isa ka babayi sa kapehan.

KON ANO ANG GINAHIMO SANG MGA SAKSI NI JEHOVA

Ang mga miting kag ang programa sa pag-Bible study sang mga Saksi ni Jehova nakabulig sa mga tawo nga mangin maayo ang ila kabuhi kag respetuhon ang ila kaugalingon.

ANG AMON MGA MITING KADA SEMANA

Sa amon mga miting kada semana, nalipay kami nga makapamati sa mga pamulongpulong nga base sa Biblia nga sa masami may mga laygay kon paano respetuhon ang kaugalingon. Ang amon mga miting wala sing bayad kag para gid sa tanan nga tawo. Halimbawa, matun-an mo sa amon mga miting kon . . .

ngaa importante ka sa Dios
ano ang matuod nga katuyuan sang kabuhi
paano mangin mabakod kag magdugay ang pag-abyanay

Makakilala ka man sang matuod nga mga abyan nga “may kabalaka sa isa kag isa.”—1 Corinto 12:25, 26.

Para mahibaluan mo ang parte sa amon mga miting, i-search sa jw.org ang malip-ot nga video nga Ano ang Ginahimo sa Kingdom Hall?

ANG AMON PAGTUON SA BIBLIA

May ara kami sang libre nga interactive nga pagtuon sa Biblia paagi sa libro nga Magkabuhi sing Wala Katapusan! Ini nga libro may mga teksto, maathag nga panudlo, makapahunahuna nga mga pamangkot, makapahulag nga mga video, kag matahom nga mga piktyur. Ang amon pagtuon sa Biblia makabulig sa mga tawo nga respetuhon ang ila kaugalingon kag mangin maayo ang ila kabuhi.

Para mabal-an mo kon paano ka makabenepisyo sa pagtuon sa Biblia upod sa mga Saksi ni Jehova, i-search sa jw.org ang video nga Ngaa Dapat Tun-an ang Biblia?