PAGMAHAL SANG MGA BALAKLON—ANO ANG PUEDE MO HIMUON?
Mangin Kontento
Ang mga tawo nga kontento malipayon. Bisan magbag-o ang ila sitwasyon, naga-adjust sila dayon para indi magsobra ang ila gasto sangsa ila masarangan.
KON NGAA IMPORTANTE INI
Ang psychologist nga si Jessica Koehler nagsiling nga ang mga tawo nga kontento, mas may positibo nga pagtan-aw sa ila kabuhi. Nagsiling man sia nga indi sila madali mahisa sa iban. Gani indi katingalahan nga ang mga tawo nga kontento, masami malipayon kag indi dali ma-stress. Ang pila gani sa pinakamalipayon nga tawo, indi gid man madamo sing kuarta. Matuod gid nga malipayon ang mga tawo nga nagapokus sa importante nga mga butang sa kabuhi. Halimbawa, wala gid sing may makalabaw sa kalipay nga imo mabatyagan kon kaupod mo ang imo pamilya kag mga abyan.
ANG PUEDE MO HIMUON
Indi pag-ikumparar ang imo sitwasyon sa iban. Kon ikumparar mo ang imo simple nga pagkabuhi sa iya sang mga manggaranon, mahimo nga indi ka mangin kontento kag mahisa pa gani. Isa pa, ang imo makita kon kaisa indi man matuod. Kay ang iban sa ila nga madamo sing mga pagkabutang, nalubong man gali sa utang. Si Nicole nga taga-Senegal nagsiling: “Indi ko kinahanglan ang madamo nga pagkabutang para mangin malipayon. Kay kon kontento ako, puede ako mangin malipayon bisan diutay lang ang ara sa akon.”
Testingi ini: Likawi ang mga pasayod ukon mga post sa social media nga nagapakita sang manggad ukon malahalon nga pagkabutang sang iban nga tawo.
Mangin mapinasalamaton. Ang mapinasalamaton nga mga tawo masami nga kontento sa ila kabuhi. Wala man sila nagabatyag nga may kulang sa ila kag wala sila nagapensar nga dapat mas madamo ang ila pagkabutang. Si Roberton nga taga-Haiti nagsiling: “Pirme ko gid ginapamensar ang kaayo nga ginpakita sang iban sa akon kag sa akon pamilya. Kag ginahambal ko sa ila nga ginaapresyar ko ang kaayo nila sa amon. Ginatudluan ko man ang akon walo ka tuig nga bata nga lalaki nga magpasalamat sa mga butang nga iya nabaton.”
Testingi ini: Maghimo sang listahan sang mga butang nga ginapasalamatan mo gid. Kada adlaw puede mo isulat ang ginapasalamatan mo pareho sang maayo nga panglawas, maayo nga relasyon sa imo pamilya, matuod nga mga abyan, kag bisan gani ang matahom nga pagtunod sang adlaw.
Kon kaisa, mabudlay gid man nga mangin kontento sa kon ano lang ang ara sa aton. Pero maayo gid ang resulta kon mangin kontento kita. Kay kon kontento kita, mangin malipayon kita kag ina nga kalipay indi gid mabakal sang kuarta.