Buligi ang Iban nga Mabatas ang Mabudlay nga mga Sitwasyon

1. Ano sa masami ang paagi ni Jehova sa pagsabat sa hanuot nga pangamuyo sang iya alagad?

KABALO ka bala nga puede ka gamiton ni Jehova para sabton ang hanuot nga pangamuyo sang iya alagad? Puede niya gamiton ang isa ka gulang, ministeryal nga alagad, payunir, manugbantala, pamatan-on, tigulang, brother, ukon sister. Kon nagapangabay sang bulig kay Jehova ang isa niya ka alagad, masami nga ginagamit sang aton Dios ang mga gulang kag ang iban pa nga matutom niya nga mga alagad para ‘maghatag sing daku nga lugpay.’ (Col. 4:11) Nalipay gid kita nga maalagad si Jehova kag ang aton mga kauturan sa sini nga paagi. Mabuligan naton ang aton mga kauturan kon may nagalapta nga balatian, kalamidad, ukon paghingabot.

BULIGI ANG IBAN KON MAY NAGALAPTA NGA BALATIAN

2. Ngaa posible nga mabudlay ang pagbulig sa iban kon may nagalapta nga balatian?

² Kon may nagalapta nga balatian, posible nga mabudlay ang pagbulig sa iban. Halimbawa, basi gusto naton bisitahan ang aton mga abyan, pero posible nga delikado ini himuon. Basi gusto naton agdahon nga magkaon sa aton balay ang mga nagapamigado, pero posible nga delikado man ini. Basi gusto naton buligan ang iban, pero posible nga nabudlayan kita kay may miembro sang aton pamilya nga nagamasakit ukon kinahanglan man buligan. Gusto gid naton buligan ang aton mga kauturan, kag nalipay si Jehova kon ginahimo naton ang aton bug-os nga masarangan para buligan sila. (Hulu. 3:27; 19:17) Ano ang puede naton himuon?

3. Ano ang matun-an naton sa halimbawa sang mga gulang sa kongregasyon nanday Desi? (Jeremias 23:4)

³ Ang puede himuon sang mga gulang. Kon isa ikaw ka gulang, kilalaha sing maayo ang mga kauturan. (Basaha ang Jeremias 23:4.) Ang isa ka sister nga si Desi, nga ginsambit sa nagligad nga artikulo, nagsiling, “Ang mga gulang sa amon grupo sa pag-alagad pirme nagaupod sa amon sa pagbantala kag sa paglingawlingaw.”b Bangod sa mga panikasog sang sini nga mga gulang, nangin mahapos para sa ila nga buligan si Desi sang napatay sa COVID-19 ang pila ka miembro sang iya pamilya.

4. Ngaa nangin mahapos para sa mga gulang nga buligan si Desi, kag ano ang matun-an sang mga gulang sa sini?

⁴ Si Desi nagsiling, “Bangod abyan ko ang mga gulang, mahapos para sa akon nga isugid sa ila ang akon ginabatyag kag mga ginakabalak-an.” Ano ang matun-an sang mga gulang sa sini? Panikasugi nga i-shepherding ang mga kauturan antes pa mag-abot ang mga kabudlayan. Makig-abyan sa ila. Kon indi mo sila mabisitahan bangod may nagalapta nga balatian, kontaka sila sa iban nga paagi. “May mga adlaw nga lainlain nga mga gulang ang nagatawag sa akon ukon nagapadala sang mga mensahe,” siling ni Desi. “Napalig-on gid ako sa mga teksto nga gina-share nila sa akon, bisan pa nga pamilyar man ako sa sini nga mga teksto.”

5. Paano mabal-an sang mga gulang ang kinahanglan sang mga kauturan, kag paano nila sila mabuligan?

⁵ Ang isa ka paagi para mabal-an mo kon ano ang kinahanglan sang imo mga kauturan amo ang pagpamangkot sa ila. (Hulu. 20:5) Bastante bala ang ila pagkaon, bulong, kag iban pa nga mga kinahanglanon? May posibilidad bala nga madulaan sila sang obra? May inugbayad pa bala sila sa arkila sa balay? Kinahanglan bala nila ang bulig para makakuha sila sang ayuda sa gobierno? Ginhatagan si Desi sang mga kauturan sang iya mga kinahanglanon. Pero ang pagpalangga nga ginpakita sa iya sang mga gulang kag ang ila pagpalig-on nga ginagamit ang Biblia amo gid ang nakabulig sa iya. Nagsiling sia: “Nagapangamuyo ang mga gulang upod sa akon. Indi ko na madumduman kon ano ang ila ginsiling, pero madumduman ko ang akon nabatyagan. Pamatyag ko daw ginasilingan ako ni Jehova, ‘Kaupod mo ako kag buligan ko ikaw.’”—Isa. 41:10, 13.

6. Ano ang puede himuon sang mga kauturan para buligan ang iban? (Tan-awa ang piktyur.)

⁶ Ang puede himuon sang iban. Ginapangunahan sang mga gulang ang pagbulig sa iban. Pero gusto ni Jehova nga panikasugan naton tanan nga palig-unon kag buligan ang iban. (Gal. 6:10) Kon may nagamasakit, puede naton sia buligan. Bisan pa gamay lang ang aton mabulig, daku ang epekto sini kay mapakita naton sa iya nga palangga naton sia. Puede makahimo sang card ukon maka-drawing ang isa ka bata para palig-unon ang isa ka brother. Kon may kinahanglan himuon ukon baklon ang isa ka sister, puede sia buligan sang isa ka pamatan-on. Puede man makaluto ang iban nga kauturan, pero dapat sila maghalong kon dalhon nila ini sa balay sang nagamasakit. Kon may nagalapta nga balatian, kinahanglan gid naton tanan ang pagpalig-on. Gani basi puede nga indi kita anay magpuli dayon pagkatapos sang miting sa Kingdom Hall, ukon indi kita mag-leave dayon kon naga-attend kita paagi sa videoconference para maistorya naton ang mga kauturan. Kinahanglan man sang mga gulang ang pagpalig-on. Madamo gid sila sang ginahimo kon may nagalapta nga balatian. Gani may pila ka utod nga nagahimo sang sulat para pasalamatan sila. Maayo gid kon sundon naton ang laygay nga “padayon nga palig-una kag pabaskuga ang isa kag isa.”—1 Tes. 5:11.

BULIGI ANG IBAN KON MAY KALAMIDAD

7. Ano ang posible nga mga resulta sang kalamidad?

⁷ Kon may kalamidad, posible nga gulpi lang magbag-o ang kabuhi sang isa ka tawo. Posible nga madulaan sia sang balay kag mga pagkabutang, ukon posible nga mapatyan sia sang pinalangga. Nagakatabo man ini sa aton mga kauturan. Paano naton sila mabuligan?

8. Ano ang puede himuon sang mga gulang kag sang mga ulo sang pamilya antes matabo ang kalamidad?

⁸ Ang puede himuon sang mga gulang. Mga gulang, buligi ang inyo mga kauturan nga handaan ang kalamidad antes pa ini matabo. Siguraduha nga nabal-an sang tanan nga kauturan sa kongregasyon kon ano ang ila himuon para maamligan sila kag kon paano nila kamo makontak. Si Margaret, nga ginsambit sa nagligad nga artikulo, nagsiling: “Sa bahin nga lokal nga mga kinahanglanon, ginpaathag sang mga gulang nga ara gihapon ang peligro sang pagkasunog sang kagulangan sa amon lugar. Nagsiling sila nga kon magsiling ang mga opisyal nga dapat kami magbakwit ukon delikado na ang sitwasyon, dapat kami maghalin dayon.” Tayming gid ang instruksion nga ginhatag sa ila. Pagligad sang lima ka semana, nasunog ang kagulangan malapit sa ila kag delikado gid ang ila sitwasyon. Sa tion sang family worship, puede binagbinagon sang mga ulo sang pamilya kon ano ang dapat himuon sang kada isa kon may kalamidad. Kon nakahanda kamo pati ang inyo kabataan, mangin kalmado kamo kon may kalamidad.

9. Ano ang himuon sang mga gulang para mangin organisado ang ila pagbulig antes kag pagkatapos sang kalamidad?

⁹ Kon isa ikaw ka manugtatap sang grupo sa pag-alagad, siguraduha nga may ara ka sang insakto nga contact number sang tanan sa inyo grupo. Indi na paghulata ang kalamidad antes mo ini himuon. Ilista ini kag siguraduha pirme nga amo ini ang ila pinakabag-o nga contact number. Kon may kalamidad, makabulig ini sa imo nga makontak ang kada manugbantala para mabal-an mo kon ano ang ila mga kinahanglanon. Ipabalo dayon sa koordenitor sang hubon sang mga gulang ang sitwasyon sang mga kauturan, kag kontakon naman niya ang manugtatap sang sirkito. Paagi sa pagbuligay, maatipan gid sing maayo ang mga kauturan. Pagkatapos sang sunog, 36 ka oras nga wala nakatulog ang manugtatap sang sirkito nanday Margaret. Masako sia sa pag-organisar sa ginahimo sang mga gulang para kontakon kag atipanon ang 450 ka kauturan nga nagbakwit. (2 Cor. 11:27) Bangod sang ila ginhimo, napangitaan nila sang maistaran ang tanan nga nagakinahanglan sini.

10. Ngaa importante para sa mga gulang ang pag-shepherding? (Juan 21:15)

¹⁰ Responsibilidad sang mga gulang nga palig-unon ang mga kauturan paagi sa paggamit sang Biblia kag buligan ang mga nasubuan. (1 Ped. 5:2) Kon may kalamidad, ang una nga dapat himuon sang mga gulang amo ang paghibalo kon bala maayo ang kahimtangan sang kada manugbantala kag kon bala may pagkaon sila, bayo, kag maistaran. Pero pagligad sang madamo nga binulan pagkatapos sang kalamidad, posible gid nga kinahanglan gihapon nila ang pagpalig-on halin sa Biblia kag ang pagpaumpaw sang ila mga abyan. (Basaha ang Juan 21:15.) “Kinahanglan ang tion para makabalik sa normal ang ila kabuhi,” siling ni Harold, nga miembro sang Branch Committee kag madamo na sang naistorya nga mga kauturan nga nahalitan sang mga kalamidad. “Posible nga malipatan nila ang ila mga pagkabutang nga nadula, pero indi nila malipatan ang ila pinalangga nga napatay, ang isa ka importante nga butang sang ila pamilya, kag ang ila eksperiensia nga mahimo diutayan lang sila mapatay. Sa kada tion nga madumduman nila ini, makabatyag sila liwat sang kasubo. Pero indi buot silingon sini nga maluya ang ila pagtuo, kundi normal lang ini nga reaksion.”

11. Ano nga bulig ang posible kinahanglan sang mga pamilya?

¹¹ Ginaaplikar sang mga gulang ang laygay nga “maghibi upod sa mga tawo nga nagahibi.” (Roma 12:15) Dapat buligan sang mga gulang ang mga nahalitan sang kalamidad nga mabatyagan nga palangga sila gihapon ni Jehova kag sang mga kauturan. Dapat nila buligan ang mga pamilya nga padayon nga himuon ang mga hilikuton sa pag-alagad pareho sang pagpangamuyo, pagtuon, pag-attend sa mga miting, kag pagbantala. Puede man palig-unon sang mga gulang ang mga ginikanan nga buligan nila ang ila kabataan nga magpokus sa mga butang nga indi maguba sang bisan ano nga kalamidad. Mga ginikanan, ipahanumdom sa inyo kabataan nga indi gid sila pagbiyaan sang ila Abyan nga si Jehova kag pirme niya sila buligan. Kag ipaathag sa ila nga may mga kauturan sila sa bilog nga kalibutan nga handa pirme sa pagbulig sa ila.—1 Ped. 2:17.

12. Ano ang puede himuon sang iban para buligan ang mga nahalitan sang kalamidad? (Tan-awa ang piktyur.)

¹² Ang puede himuon sang iban. Kon may kalamidad malapit sa inyo lugar, pamangkuta ang mga gulang kon paano ka makabulig. Basi puede mo paistaron anay sa inyo balay ang mga nagbakwit ukon ang mga boluntaryo sa konstruksion. Ukon basi puede ka makaboluntaryo sa pagdul-ong sang pagkaon kag mga kinahanglanon sang mga kauturan. Kon malayo sa inyo ang kalamidad, puede ka gihapon makabulig. Paano? Paagi sa pagpangamuyo para sa mga nahalitan. (2 Cor. 1:8-11) Puede mo suportahan ang pagbulig sa mga nahalitan sang kalamidad paagi sa paghatag sang donasyon sa bug-os kalibutan nga hilikuton. (2 Cor. 8:2-5) Kon puede ka makakadto sa lugar nga nahalitan sang kalamidad, pamangkuta ang mga gulang kon paano ka makabulig. Kon kontakon ka para magbulig sa mga nahalitan sang kalamidad, posible gid nga hanason ka anay para magamit ang imo ikasarang sa pinakamaayo nga paagi.

BULIGI ANG MGA KAUTURAN NGA MABATAS ANG PAGHINGABOT

13. Ano nga mga kabudlayan ang naeksperiensiahan sang aton mga kauturan nga ara sa mga pungsod nga ginadumilian ang aton hilikuton?

¹³ Sa mga pungsod nga ginadumilian ang aton hilikuton, nagabudlay pa gid ang sitwasyon sang aton mga kauturan bangod sa paghingabot. Ang mga kauturan sa sini nga mga pungsod may mga kabudlayan man pareho sang problema sa kuarta, pagmasakit, kag pagkapatay sang pinalangga. Pero bangod sang pagdumili, posible nga mabudlay para sa mga gulang ang pagbisita kag pagkontak sa mga kauturan nga nagakinahanglan sang pagpalig-on. Natabo ini sa isa ka gulang nga si Andrei nga ginsambit sa nagligad nga artikulo. Namigado ang isa ka sister nga kaupod niya sa grupo sa pag-alagad. Dayon naaksidente ang sister. Madamo nga operasyon ang dapat himuon sa iya kag indi sia makaobra. Bisan pa sang pagdumili kag sang pandemic, ginhimo sang mga kauturan ang ila bug-os nga masarangan para buligan sia, kag kabalo si Jehova kon ano ang iya mga kinahanglanon.

14. Paano mapakita sang mga gulang nga nagasalig sila kay Jehova?

¹⁴ Ang puede himuon sang mga gulang. Ginpangamuyo ni Andrei ang parte sa sitwasyon sang sister kag ginhimo niya ang iya bug-os nga masarangan. Paano ini ginsabat ni Jehova? Gingamit niya ang mga kauturan nga mas makabulig sa sister. May pila ka kauturan nga nagasugat kag nagadul-ong sa sister kon magpadoktor sia. Ang iban naman naghatag sang kuarta sa iya. Ginbuligan ni Jehova ini nga mga kauturan nga mahimo ang ila bug-os nga masarangan. Ginpakamaayo niya ang ila mga pagpanikasog para mahatag sa sister ang iya mga kinahanglanon. (Heb. 13:16) Mga gulang, kon ginadumilian ang aton hilikuton sa inyo lugar, magpabulig sa iban. (Jer. 36:5, 6) Labaw sa tanan, magsalig kay Jehova. Buligan niya kamo para maatipan ninyo ang aton mga kauturan.

15. Ano ang himuon naton para indi maguba ang aton paghiusa kon may paghingabot?

¹⁵ Ang puede himuon sang iban. Kon ginadumilian ang aton hilikuton, posible nga diutay lang kita sa kada grupo kon magtipon kita upod sa aton mga kauturan. Gani importante gid nga maayo ang aton kaangtanan sa aton mga kauturan. Indi naton sila pagkontrahon kay indi sila ang aton kaaway. Si Satanas ang aton kaaway. Palampason naton ang mga kakulangan sang aton mga kauturan. Kon wala kita nag-intiendihanay sang isa ka utod, solbaron naton ini dayon. (Hulu. 19:11; Efe. 4:26) Mangin handa kita pirme sa pagbulig sa iban. (Tito 3:14) Bangod sa pagbulig sang mga kauturan sa sister nga kagrupo ni Andrei, maayo ang nangin resulta sini sa ila grupo sang pag-alagad. Nangin mas suod pa gid sila sa isa kag isa nga daw isa ka pamilya.—Sal. 133:1.

16. Base sa Colosas 4:3, 18, paano naton mabuligan ang aton mga kauturan nga ginahingabot?

¹⁶ Linibo sa aton mga kauturan ang padayon nga nagaalagad kay Jehova bisan pa ginadumilian sila sang gobierno. Napriso ang iban sa ila bangod sa ila pagtuo. Ipangamuyo naton sila kag ang ila pamilya. Puede man naton ipangamuyo ang mga nagabulig sa aton mga kauturan nga napriso. Maisog gid sila kay ginahimo nila ini bisan pa kabalo sila nga posible man sila dakpon. Ginapalig-on nila ang aton mga kauturan nga napriso nga padayon nga magsalig kay Jehova, ginahatagan nila sila sang ila mga kinahanglanon, kag ginabuligan nila sila sa mga hearing sa korte.c (Basaha ang Colosas 4:3, 18.) Indi pagkalimti nga makabulig gid ang imo mga pangamuyo para sa ila.—2 Tes. 3:1, 2; 1 Tim. 2:1, 2.

17. Paano mo mahandaan subong ang paghingabot?

¹⁷ Handai na subong upod sa imo pamilya ang paghingabot. (Binu. 14:22) Indi pag-imadyina ang tanan nga posible nga paghingabot nga himuon sa imo. Sa baylo, pabakura ang imo kaangtanan kay Jehova kag buligi ang imo kabataan nga himuon man ini. Kon nabalaka ka kon kaisa, isugid sa Dios ang imo ginabatyag. (Sal. 62:7, 8) Binagbinaga upod sa imo pamilya ang tanan nga rason kon ngaa makasalig kita kay Jehova.d Pareho sa paghanda sa kalamidad, makabulig man sa imo kabataan ang paghanda sa paghingabot. Ang imo paghanda kag ang imo pagsalig kay Jehova makabulig sa ila nga mangin maisog kag kalmado.

18. Ano ang maeksperiensiahan naton sa palaabuton?

¹⁸ Bangod sa paghidait sang Dios, mabatyagan naton nga ginaamligan kita. (Fil. 4:6, 7) Paagi sa sini, ginapakalma kita ni Jehova bisan pa may mga balatian, kalamidad, kag paghingabot. Ginagamit niya ang mga gulang nga handa magsakripisyo para buligan kita. Kag ginahatagan niya kita tanan sang kahigayunan nga buligan ang isa kag isa. Samtang may paghidait, handaan naton ang mas mabudlay nga mga pagtilaw pati ang “dakung kapipit-an.” (Mat. 24:21) Sa sina nga tion, dapat naton panikasugan nga indi madula ang aton paghidait kag buligan naton ang iban nga himuon man ini. Pero pagkatapos sang sina nga tion, indi na gid kita makaeksperiensia sang mga problema nga nagapabudlay sa aton. Maeksperiensiahan na naton ang gusto gid ni Jehova nga mabatyagan naton nga amo ang matuod nga paghidait asta sa wala sing katapusan.—Isa. 26:3, 4.