Hulata ang Siudad nga Magapabilin

1. Ano ang gintagna ni Jesus nga matabo sa Jerusalem sang unang siglo?

MGA pila ka adlaw antes napatay si Jesucristo, may ginsugid sia nga tagna sa iya mga disipulo. Ini nga tagna una nga natuman sang nalaglag ang Jerusalem kag ang templo sini. Nagpaandam sia nga ang siudad sang Jerusalem ‘palibutan sang kasuldadusan.’ (Luc. 21:20) Nagsiling man sia nga kon makita nila ini nga kasuldadusan, dapat sila maghalin dayon sa Judea. Natuman ang ginsiling ni Jesus sang ginpalibutan sang mga soldado sang Roma ang Jerusalem.​—Luc. 21:​21, 22.

2. Ano ang ginlaygay ni apostol Pablo sa Hebreo nga mga Cristiano sa Judea kag sa Jerusalem?

² Mga pila ka tuig antes ginpalibutan sang mga soldado sang Roma ang Jerusalem, naghimo sang sulat si apostol Pablo kag importante gid ang mensahe sini. Subong, bahin ini sang Biblia kag ginatawag ini nga libro sang Hebreo. Sa sini nga sulat, ginlaygayan ni Pablo ang mga Cristiano sa Judea kag sa Jerusalem para mangin handa sila sa mabudlay nga sitwasyon nga ila maeksperiensiahan. Kay man, pagalaglagon ang Jerusalem. Kon gusto nila maluwas, dapat handa sila nga bayaan ang ila mga balay kag mga negosyo. Gani parte sa siudad sang Jerusalem, nagsulat si Pablo: “Wala kita diri sing nagapabilin nga siudad.” Dayon nagsiling sia: “Kundi hanuot naton nga ginahulat ang isa nga magaabot.”​—Heb. 13:14.

3. Ano “ang siudad nga may matuod nga mga sadsaran,” kag ngaa ginahulat naton ini?

³ Sang naghalin ang mga Cristiano sa Jerusalem kag sa Judea, posible nga ginpakalain sila kag ginyaguta. Pero, naluwas sila bangod naghalin sila. Subong, ginapakalain kita bangod nagapati kita nga indi masolbar sang mga tawo ang mga problema sa kalibutan kag wala kita nagatinguha nga magmanggaranon. Ngaa wala? Kay man, kabalo kita nga malapit na lang laglagon ining malain nga kalibutan. Gani ginahulat naton “ang siudad nga may matuod nga mga sadsaran,” ukon “ang isa nga magaabot,” nga amo ang Ginharian sang Dios.a (Heb. 11:10; Mat. 6:33) Sa sini nga artikulo, ari ang mga binagbinagon sa kada subtitulo: (1) kon paano nakabulig sa mga Cristiano sang unang siglo ang laygay ni Pablo nga padayon nga hulaton “ang [siudad] nga magaabot,” (2) kon paano sila ginbuligan ni Pablo nga mangin handa sa matabo sa palaabuton, kag (3) kon paano makabulig ang iya laygay sa aton subong.

MAGSALIG KAY JEHOVA KAY INDI KA GID NIYA PAGPABAY-AN

4. Ngaa importante para sa mga Cristiano ang Jerusalem?

⁴ Importante para sa mga Cristiano ang Jerusalem. Gintukod sa sini nga siudad ang pinakauna nga Cristianong kongregasyon sang 33 C.E., kag diri man nagaistar ang nagadumala nga hubon. Madamo man nga Cristiano ang may mga balay kag mga pagkabutang sa sini nga siudad. Pero, ginpaandaman ni Jesus ang iya mga disipulo nga dapat sila maghalin sa Jerusalem kag sa Judea.​—Mat. 24:16.

5. Paano ginbuligan ni Pablo ang mga Cristiano nga mangin handa sa matabo sa Jerusalem?

⁵ Para mangin handa ang mga Cristiano nga maghalin sa Jerusalem, ginbuligan sila ni Pablo nga mahangpan sing maayo ang pagtan-aw ni Jehova sa sini nga siudad. Ginpahanumdom niya sa ila nga wala na nalipay si Jehova sa mga saserdote sa templo sa Jerusalem kag wala na Niya ginabaton ang mga ginahalad didto. (Heb. 8:13) Ginsikway man sang kalabanan nga taga-Jerusalem ang Mesias. Gani, ang templo sa Jerusalem indi na amo ang sentro sang matuod nga pagsimba kay Jehova, kag laglagon ini.​—Luc. 13:​34, 35.

6. Ngaa suno gid sa tion ang ginlaygay ni Pablo sa mga Cristiano nga mabasa sa Hebreo 13:​5, 6?

⁶ Sang ginsulatan ni Pablo ang mga Hebreo, isa ka manggaranon nga siudad ang Jerusalem. Ang isa ka Romano nga manunulat sadto nga tion nagsiling nga ang Jerusalem amo “ang pinakabantog nga siudad sa Sidlangan.” Tatlo ka beses kada tuig, nagakadto sa sini nga siudad ang mga Judiyo halin sa lainlain nga mga lugar para saulugon ang ila mga kapiestahan. Bangod sini, nag-uswag pa gid ang ekonomiya sang siudad, kag posible nakabenepisyo sa sini ang pila ka Cristiano. Mahimo nga amo ini ang rason kon ngaa ginsilingan sila ni Pablo: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo.” Dayon ginkutlo niya ang ginsiling sang Kasulatan parte sa masaligan nga promisa ni Jehova: “Indi ko gid kamo pagbayaan, kag indi ko gid kamo pagpabay-an.” (Basaha ang Hebreo 13:​5, 6; Deut. 31:6; Sal. 118:6) Kinahanglan gid sang mga Cristiano sa Jerusalem kag sa Judea ini nga pasalig. Ngaa? Bangod sa indi madugay pagkatapos nila mabaton ini nga sulat, dapat nila bayaan ang ila mga balay, mga negosyo, kag ang kalabanan nila nga pagkabutang. Dapat sila mag-istar sa lain nga lugar, kag indi gid ini mahapos.

7. Ngaa dapat naton pabakuron subong ang aton pagsalig kay Jehova?

⁷ Ang matun-an naton: Ano ang matabo sa indi na lang gid madugay? Magaumpisa ang “dakung kapipit-an” kag laglagon ining malain nga kalibutan. (Mat. 24:21) Pareho sa mga Cristiano sang unang siglo, dapat mangin handa kita kag padayon nga nagamata. (Luc. 21:​34-36) Sa tion sang dakung kapipit-an, posible nga dapat naton bayaan ang aton mga balay kag ang tanan naton nga pagkabutang. Sa sina nga tion, dapat bug-os ang aton pagsalig nga indi gid kita pagpabay-an ni Jehova. Pero antes mag-umpisa ang dakung kapipit-an, ipakita na naton subong nga nagasalig gid kita kay Jehova. Pamangkuta ang imo kaugalingon, ‘Makita bala sa akon mga ginahimo kag mga ginaplano nga kay Jehova ako nagasalig kag indi sa kuarta?’ (1 Tim. 6:17) Ang halimbawa sang mga Cristiano sang una makabulig sa aton nga magpabilin nga matutom sa tion sang “dakung kapipit-an.” Pero, mas mabudlay ang “dakung kapipit-an” sangsa naeksperiensiahan sini nga mga Cristiano. Ti, paano naton mabal-an kon ano ang dapat naton himuon kon mag-umpisa na ini nga kapipit-an?

TUMANA ANG MGA NAGAPANGUNA

8. Ano ang ginsiling ni Jesus sa iya mga disipulo nga dapat nila himuon?

⁸ Pagligad sang pila lang ka tuig pagkatapos mabaton sang mga Hebreo ang sulat ni Pablo, ginpalibutan sang mga soldado sang Roma ang siudad sang Jerusalem. Sang nakita ini sang mga Cristiano, kabalo sila nga dapat na sila malagyo kay malapit na lang laglagon ang Jerusalem. (Mat. 24:3; Luc. 21:​20, 24) Pero diin sila makadto? Ang ginsiling lang sa ila ni Jesus amo nga “ang mga yara sa Judea dapat magpalagyo sa mga bukid.” (Luc. 21:21) Pero madamo sing bukid nga puede nila palagyuhan. Paano nila mabal-an kon diin nga bukid sila malagyo?

9. Ngaa posible nagpalibog ang mga Cristiano kon diin nga bukid sila malagyo? (Tan-awa man ang mapa.)

⁹ Ari ang pila ka bukid nga puede palagyuhan sang mga Cristiano: ang kabukiran sang Samaria, ang kabukiran sang Galilea, ang Bukid Hermon kag ang kabukiran sang Lebanon, kag ang kabukiran sa tabok sang Jordan. (Tan-awa ang mapa.) May pila ka siudad sa sini nga kabukiran nga daw malayo sa peligro. Ang halimbawa sa sini amo ang siudad sang Gamla. Ara ini sa mataas nga bukid kag mabudlay ini kadtuan. Gani, nahunahuna sang pila ka Judiyo nga maayo gid kon didto sila malagyo kag maistar. Pero, ginsalakay sang mga Romano ang Gamla. Ginlaglag nila ini nga siudad kag madamo sila sang ginpamatay didto.b

10-11. (a) Paano posible gingiyahan ni Jehova ang mga Cristiano sadto? (Hebreo 13:​7, 17) (b) Ano ang maayo nga resulta bangod gintuman sang mga Cristiano ang mga nagapanguna sa ila? (Tan-awa man ang piktyur.)

¹⁰ Posible gid nga gingiyahan ni Jehova ang mga Cristiano paagi sa mga nagapanguna sa kongregasyon. May ginsulat sang ulihi ang isa ka historian nga si Eusebius parte sa natabo sadto nga tion. Nagsiling sia nga ginpahayag sang Dios sa pila ka gintangdo nga mga lalaki nga dapat maghalin ang mga Cristiano sa Jerusalem, kag dapat sila malagyo sa isa ka siudad sa Perea nga ginatawag Pella. Maayo gid nga didto sila malagyo sa Pella. Kay man, indi ini tama kalayo sa Jerusalem kag indi man tama kabudlay ang pagkadto didto. Isa pa, indi mga Judiyo ang kalabanan nga tawo didto, gani wala sila nagapakig-away sa mga Romano.​—Tan-awa ang mapa.

¹¹ Ginsunod sang mga Cristiano nga nagpalagyo sa kabukiran sang Pella ang laygay ni Pablo nga “mangin matinumanon sa mga nagapanguna” sa kongregasyon. (Basaha ang Hebreo 13:​7, 17.) Gani naluwas sila bangod nagtuman sila. Ginapakita sini nga wala gid ginapabay-an sang Dios ang mga padayon nga ‘nagahulat sa siudad nga may matuod nga mga sadsaran,’ nga amo ang Ginharian sang Dios.​—Heb. 11:10.

12-13. Paano gingiyahan ni Jehova ang iya katawhan sa mabudlay gid nga mga sitwasyon?

¹² Ang matun-an naton: Ginagamit ni Jehova ang mga nagapanguna sa iya katawhan para maghatag sing instruksion. Madamo sing halimbawa sa Biblia nga nagapakita kon paano gingamit ni Jehova ang matutom nga mga lalaki para giyahan ang iya katawhan sa mabudlay gid nga mga sitwasyon. (Deut. 31:23; Sal. 77:20) Subong, makita man naton ang madamo nga pamatuod nga padayon nga ginagamit ni Jehova ang mga nagapanguna sa aton.

¹³ Ari ang isa ka halimbawa. Sang nag-umpisa ang COVID-19 nga pandemic, naghatag sing instruksion “ang mga nagapanguna.” Ginhatagan nila sing instruksion ang mga gulang kon paano hiwaton ang mga miting para padayon naton nga masimba si Jehova. Wala madugay pagkatapos mag-umpisa ang pandemic, naghiwat kita sing kombension sa sobra 500 ka lenguahe. Natan-aw ini paagi sa Internet kag sa TV, kag napamatian ini paagi sa radyo. Subong pa lang gid natabo ini nga klase sang kombension. Wala gid nag-untat ang pagbaton naton sang espirituwal nga pagkaon, gani pareho nga instruksion ang aton nabaton sa bilog nga kalibutan. Makasalig kita nga bisan ano man nga pagtilaw ang maeksperiensiahan naton sa ulihi, padayon gid nga giyahan ni Jehova ang mga nagapanguna para makahimo sila sang maayo nga mga desisyon. Magluwas sa pagsalig kay Jehova kag pagtuman sa iya mga sugo, ano pa nga mga kinaiya ang makabulig sa aton para mangin handa kita sa dakung kapipit-an kag makahimo kita sang maayo nga mga desisyon sa sina nga tion?

MAGPAKITA SING UTUDNON NGA GUGMA KAG PAGKAMAABIABIHON

14. Suno sa Hebreo 13:​1-3, ano nga mga kinaiya ang dapat ipakita sang mga Cristiano antes ginlaglag ang Jerusalem?

¹⁴ Kon mag-umpisa ang dakung kapipit-an, kinahanglan gid naton magpakita sing gugma sa isa kag isa. Dapat naton ilugon ang halimbawa sang mga Cristiano sa Jerusalem kag sa Judea. Madugay na sila nga nagapakita sing gugma sa isa kag isa. (Heb. 10:​32-34) Pero mga pila ka tuig antes ginlaglag ang Jerusalem, dapat pa gid nila dugangan ang ila ginapakita nga “utudnon nga gugma” kag “pagkamaabiabihon.”c (Basaha ang Hebreo 13:​1-3.) Amo man sina ang dapat naton himuon samtang nagahilapit ang katapusan sini nga sistema.

15. Ngaa dapat magpakita sing gugma kag pagkamaabiabihon ang Hebreo nga mga Cristiano pagkatapos nila malagyo?

¹⁵ Ginpalibutan sang mga soldado sang Roma ang Jerusalem, pero hinali lang nga nag-isol sila. Bangod sini, puede na makapalagyo ang mga Cristiano. Pero, diutay lang gid ang nadala nila nga pagkabutang. (Mat. 24:​17, 18) Gani, kinahanglan nila magbuligay samtang nagalakbay sila sa mga kabukiran. Kag sang ara na sila sa Pella, kinahanglan nga padayon sila nga magbuligay para makaumpisa sila liwat sa sining bag-o nga lugar. Sigurado nga may mga ‘tion nga daku ang ila panginahanglan.’ Paagi sa pagbuligay kag paghatag sa iban sang ila mga kinahanglanon, mapakita sang mga Cristiano ang ila matuod nga utudnon nga gugma kag pagkamaabiabihon.​—Tito 3:14.

16. Paano naton mapakita ang aton gugma sa aton mga kauturan nga nagakinahanglan sang aton bulig? (Tan-awa man ang piktyur.)

¹⁶ Ang matun-an naton: Palangga naton ang aton mga kauturan, gani handa kita nga buligan sila. Madamo sa aton mga kauturan ang handa gid nga magbulig sa aton mga utod nga nagsaylo sa iban nga lugar bangod sa inaway kag kalamidad. Ginahatagan nila sila sang ila espirituwal kag materyal nga mga kinahanglanon. Ang isa ka sister nga taga-Ukraine nga naghalin sa ila pungsod bangod sa inaway nagsiling: “Nabatyagan gid namon ang paggiya kag pagbulig ni Jehova paagi sa aton mga kauturan. Gin-abiabi gid nila kami kag ginbuligan sa Ukraine, sa Hungary, kag subong diri sa Germany.” Kon ginaabiabi naton ang aton mga kauturan kag ginahatagan naton sila sang ila mga kinahanglanon, nagapagamit kita kay Jehova.​—Hulu. 19:17; 2 Cor. 1:​3, 4.

17. Ngaa importante gid nga ipakita naton subong ang utudnon nga gugma kag pagkamaabiabihon?

¹⁷ Sa tion sang dakung kapipit-an, mas kinahanglan pa gid naton nga magbuligay. (Hab. 3:​16-18) Gani, ginahanas kita subong ni Jehova kon paano ipakita ang utudnon nga gugma kag pagkamaabiabihon kay kinahanglan gid naton ini sa sina nga tion.

ANO ANG MATABO SA PALAABUTON?

18. Paano naton mailog ang Hebreo nga mga Cristiano sang unang siglo?

¹⁸ Sang ginlaglag ang Jerusalem, nakaluwas ang mga Cristiano nga nagtuman kag nagpalagyo sa mga bukid. Ginbayaan nila ang siudad, pero wala gid sila ginbayaan ni Jehova. Ano ang matun-an naton sa sini? Wala kita kabalo sang tanan nga matabo sa palaabuton. Pero ginpaandaman kita ni Jesus nga dapat handa kita magtuman. (Luc. 12:40) Pamalandungan man naton ang laygay ni Pablo nga mabasa sa iya sulat para sa mga Hebreo, kag iaplikar naton ini. Kag nagpromisa si Jehova nga indi gid niya kita pagbayaan ukon pagpabay-an. (Heb. 13:​5, 6) Kabay nga padayon naton nga hulaton ang siudad nga magapabilin, nga amo ang Ginharian sang Dios, kay hatagan kita sini sing dalayawon nga mga pagpakamaayo asta sa wala sing katapusan.​—Mat. 25:34.