Yehauvas Lub Npe Tseem Ceeb Heev Rau Yexus

1-2. (1) Hmo a ntej Yexus tuag, nws ua dab tsi? (2) Nyob rau zaj kawm no peb yuav tham txog ob lo lus nug twg?

HMO Nixam 14 xyoo 33 tom qab Yexus, Yexus noj ib pluag hmo uas tseem ceeb heev nrog nws cov tub txib. Nws paub hais tias tsis ntev Yudas yuav ntxeev siab rau nws, nws yuav raug tsim txom, thiab nws cov yeeb ncuab yuav muab nws tua. Tom qab lawv noj pluas hmo tag, nws thiaj hais lus los txhawb cov tub txib lub zog. Ua ntej lawv yuav tawm mus, Yexus thiab lawv thov Vajtswv ua ke. Tus tub txib Yauhas tau muab zaj lus thov no sau tseg cia. Peb kuj mus nyeem tau zaj lus thov ntawd nyob rau hauv Yauhas tshooj 17.

² Nyob hauv zaj kawm no peb yuav mus tham txog qho yam uas peb kawm tau ntawm Yexus zaj lus thov. Xws li nws txhawj xeeb txog dab tsi ua ntej nws tuag? Thaum nws tseem nyob hauv ntiaj teb no dab tsi thiaj tseem ceeb rau nws? Cia peb ua zoo kawm seb yog li cas rau li cas.

“KUV TWB QHIA KOJ LUB NPE RAU LAWV PAUB LAWM”

3. Yexus hais li cas txog Yehauvas lub npe, thiab nws tus nru lus yog li cas tiag? (Yauhas 17:6, 26)

³ Nyob rau hauv Yexus zaj lus thov, nws hais tias: “Kuv twb qhia koj lub npe rau lawv paub lawm.” Qhov no tseem ceeb heev rau Yexus vim nws hais ob zaug rau nws cov thwj tim diam. (Nyeem Yauhas 17:6, 26.) Puas yog nws qhia rau nws cov thwj tim tias Vajtswv lub npe hu ua Yehauvas? Tsis yog li ntawd vim cov thwj tim puav leej yog neeg Yudais ces lawv yeej paub Vajtswv lub npe. Tsis tas li ntawd, Vajtswv lub npe yeej tshwm ntau zaus rau hauv Cov Nqe Lus Henplais. Ces thaum Yexus hais li no yog nws qhia rau lawv tias Yehauvas yog ib tug Vajtswv coj li cas rau li cas. Nws tsuas pab kom nws cov thwj tim paub Yehauvas tshaj qhov qub, xws li nws qhia kom lawv paub Yehauvas lub ntsiab rau lub ntiaj teb thiab tib neeg, Yehauvas tau ua dab tsi, Yehauvas tseem yuav ua dab tsi, thiab Yehauvas tus xeeb ceem zoo li cas. Tos Yexus txawj piav txog Yehauvas los twb yog vim nws paub Yehauvas zoo heev.

4-5. (1) Ua li cas ib tug twg lub npe ho tseem ceeb rau peb? (2) Ua li cas Yexus cov thwj tim thiaj paub Yehauvas tshaj qhov qub?

⁴ Cia peb muab xav li no tias muaj ib tug txwj laus nyob hauv koj lub koom txoos npe hu ua Laj. Nws kuj yog ib tug kws tshuaj thiab. Koj yeej paub nws tau ntau ntau xyoo los lawm. Tiam sis muaj ib hnub koj txawm muaj mob, koj thiaj tau mus rau tim tsev kho mob uas tus txwj laus ua hauj lwm. Nws siv tag nrho nws rab peev xwm uas txawj kho mob los cawm koj txoj sia. Tom qab no thaum koj hnov nws lub npe, nws tsis yog ib tug txwj laus uas koj paub tau ntau ntau xyoo lawm xwb tiam sis nws kuj yog ib tug uas cawm tau koj txoj sia thiab!

⁵ Zoo ib yam li ntawd, Yexus cov thwj tim twb paub Yehauvas lub npe lawm thiab, tiam sis Yexus pab kom lawv nkag siab zoo zoo txog Yehauvas ces lawv kuj saib Yehauvas lub npe tseem ceeb heev tuaj. Yexus yoog tau nws Txiv rau txhua fab, tsis hais tej uas nws Txiv hais los sis ua. Yog li ntawd, thaum cov tub txib mloog tej uas Yexus qhia thiab pom tej yam nws ua rau lwm tus, lawv thiaj li huab yam “paub” Yehauvas ntxiv.​—Yauhas 14:9; 17:3.

“KOJ LUB NPE UAS KOJ MUAB RAU KUV”

6. Yexus hais li cas tiag thaum nws hais tias Yehauvas muab Yehauvas lub npe rau nws? (Yauhas 17:11, 12)

⁶ Yexus thov rau nws cov thwj tim li no tias: “Thov tsom kwm lawv vim koj lub npe uas koj muab rau kuv.” (Nyeem Yauhas 17:11, 12.) Puas yog Yexus kom tib neeg hu nws ua Yehauvas thiab? Tsis yog li ntawd vim nyob hauv nws zaj lus thov, nws tsis hais tias kuv lub npe tiam sis nws hais tias “koj lub npe.” Yog li ntawd, Yehauvas lub npe tsis hloov Yexus lub npe. Ua li Yexus tus nru lus yog li cas tiag? Yexus tsuas qhia hais tias nws sawv cev Yehauvas xwb, thiab tej hauj lwm uas Yexus ua nws tuav nws Txiv lub npe ua xwb. (Yauhas 5:43; 10:25) Ntxiv ntawd, Yexus lub npe txhais hais tias “Yehauvas Yog Tus Cawm Dim” ces Yexus lub npe yeej muaj Yehauvas lub nyob rau hauv lawm thiab.

7. Piav seb vim li cas Yexus ho sawv cev tau rau Yehauvas.

⁷ Yuav kom peb nkag siab tias vim li cas Yexus ho sawv cev tau rau Yehauvas, cia peb muab xav li no tias muaj ib tug nom kuj xa tau ib tug tib neeg mus sawv cev nws rau tej pej xeem. Tus sawv cev ntawd yeej muaj xiv ib yam li tus nom. Zoo ib yam li ntawd, Yexus kuj sawv cev Yehauvas hais lus tau rau Yehauvas cov tib neeg.​—Mathais 21:9; Lukas 13:35.

8. Vim li cas Yehauvas ho hais tias Yexus yog tus tuav nws lub npe? (Khiav Dim 23:20, 21)

⁸ Nyob hauv phau Vajlugkub hu Yexus tias “Txoj Lus” vim Yehauvas siv Yexus qhia cov tub txib saum ntuj thiab tib neeg txog tej yam Yehauvas xav kom lawv paub thiab ua. (Yauhas 1:1-3) Tej zaud Yexus kuj yog tus tub txib saum ntuj uas Yehauvas xa los saib xyuas cov neeg Ixayees thaum lawv nyob tom roob moj sab qhua. Yehauvas xav kom cov Ixayees mloog tus tub txib saum ntuj ntawd lus, Yehauvas thiaj li hais rau lawv tias: “Rau qhov nws tuav kuv lub npe.”a (Nyeem Khiav Dim 23:20, 21.b) Yehauvas hais li no vim Yexus sawv cev hais nws cov lus, Yexus yog tus ua kom tsis muaj chaw thuam Yehauvas lub npe thiab qhia tias Yehauvas yeej dawb huv.

“THOV KOM KOJ LUB NPE TAU KOOB MEEJ”

9. Piav seb Yehauvas lub npe tseem ceeb npaum li cas rau Yexus.

⁹ Raws li peb nyuam qhuav tham tag, ua ntej Yexus los hauv ntiaj teb no Yehauvas lub npe yeej tseem ceeb heev rau nws. Thaum Yexus nyob hauv ntiaj teb, txhua yam nws ua yeej qhia li ntawd tiag. Lub caij ua ntej Yexus yuav tuag, nws hais rau Yehauvas tias: “Kuv Txiv, thov kom koj lub npe tau koob meej.” Tam sim ntawd Yehauvas txawm teb nrov nroo ntws saum ntuj tuaj tias: “Kuv twb tau koob meej lawm thiab kuv tseem yuav ua kom tau koob meej ntxiv.”​—Yauhas 12:28.

10-11. (1) Yexus ua rau Yehauvas tau koob meej li cas? (Saib daim duab.) (2) Ua li cas ho yuav tau daws Yehauvas lub npe kom dawb huv thiab yuav tau qhia kom tib neeg hwm nws?

¹⁰ Yexus ua rau nws Txiv lub npe tau koob meej li cas? Yexus qhia rau tib neeg paub tias Yehauvas zoo npaum li cas thiab tej yam uas Yehauvas tau ua zoo tshaj plaws. Tiam sis nws tsis yog qhuas Yehauvas rau ub rau no xwb, nws yuav tau qhia kom tib neeg hwm Yehauvas lub npe thiab nws yuav tau daws Yehauvas lub npe kom dawb huv. Yexus xav kom nws cov thwj tim nkag siab tias tseem ceeb npaum li cas, nws thiaj ua yam ntxwv qhia kom lawv thov Vajtswv tias: “Peb Leej Txiv tus uas nyob saum ntuj ceeb tsheej, thov kom sawv daws hwm koj lub npe.”​—Mathais 6:9.

¹¹ Vim li cas yuav tau qhia kom tib neeg hwm Yehauvas lub npe thiab yuav tau daws Yehauvas lub npe kom dawb huv? Puag thaum ub nyob hauv lub vaj Edees, Xatas uas yog Dab Ntxwg Nyoog tau dag txog Vajtswv Yehauvas. Xatas hais tias Yehauvas dag thiab zais tsis pub Adas thiab Evas nkawd tau tej yam zoo. (Chivkeeb 3:1-5) Tsis tas li ntawd, Xatas haj tseem hais ntxiv tias Yehauvas ua ntau yam tsis yog. Xatas tej lus dag no ua puas tsuas rau Yehauvas lub koob lub npe. Tom qab no thaum nyob rau Yauj lub caij, Xatas hais tias cov uas teev tiam Yehauvas lam teev tiam kom tau ub tau no xwb. Cov lus dag no kuj hais tias tib neeg yeem tso Yehauvas tseg thaum lawv muaj kev nyuaj siab ntxhov plawv vim lawv twb tsis hlub Yehauvas tiag tiag. (Yauj 1:9-11; 2:4) Vim muaj li no thiaj yuav tau ncua lub sij hawm tseg seb Yehauvas los sis Xatas yog tug dag.

“KUV YEEM TSO KUV TXOJ SIA TSEG”

12. Yexus yeem ua dab tsi vim nws hwm Yehauvas lub npe?

¹² Yexus hlub Yehauvas heev, nws yuav ua txhua yam los hwm thiab daws Yehauvas lub npe kom dawb huv. Yexus hais tias: “Kuv yeem tso kuv txoj sia tseg.” (Yauhas 10:17, 18)c Thawj nkawm niam txiv uas yog Adas thiab Evas rov taw tuam ntuj rau Yehauvas thiaj mus tuaj Xatas tog. Tiam sis Yexus hlub Yehauvas heev nws thiaj txaus siab hlo los rau hauv ntiaj teb los ua lub neej mloog Yehauvas lus rau txhua fab. (Henplais 4:15; 5:7-10) Nws yeej ntseeg Yehauvas ruaj nreeg mus txog ntua thaum nws luag muab nws tua tuag txom nyem ntsuav saum tus ncej ntoo. (Henplais 12:2) Tej no qhia tau tias Yexus yeej hlub Yehauvas thiab txhawb nqa Nws lub npe.

13. Vim li cas Yexus thiaj yog tus tsim nyog qhia tau tias Xatas yog tus dag? (Saib daim duab.)

¹³ Txhua yam Yexus ua hauv nws lub neej qhia tau tias Xatas yog tus dag, tsis yog Yehauvas! (Yauhas 8:44) Yexus paub Yehauvas zoo dua txhua leej txhua tus uas tau tshwm sim ua neej nyob. Tej uas Xatas iab liam Yehauvas, yog muaj tiag Yexus yeej paub. Yexus yeej tiv txheem Yehauvas lub koob lub npe. Txawm zoo yam li Yehauvas tso Yexus tseg lawm los Yexus yeem tuag es tsis yeem ntxeev siab rau nws Txiv.​—Mathais 27:46.d

“KUV TWB UA TES HAUJ LWM UAS KOJ MUAB COB RAU KUV TIAV LAWM”

14. Yehauvas muab nqi zog li cas rau Yexus vim Yexus tsis tso nws tseg?

¹⁴ Yexus zaj lus thov hmo ua ntej nws tuag, nws thiaj hais tau tias: “Kuv twb ua tes hauj lwm uas koj muab cob rau kuv tiav lawm.” Nws tso siab tias Yehauvas yeej yuav muab nqi zog rau nws xwb vim nws tsis tso Yehauvas tseg. (Yauhas 17:4, 5) Yexus tsis yog tso siab rau Yehauvas tas dawb tas do xwb vim Yehauvas tsis cia nws nyob hauv lub qhov ntxa mus li. (Tes Hauj Lwm 2:23, 24) Yehauvas tsa Yexus sawv rov los thiab nws muab lub meej mom uas siab tshaj rau Yexus saum ntuj ceeb tsheej. (Filipis 2:8, 9) Ntev mus ntev tuaj, Yexus txawm sawv ua tus Vaj Ntxwv kav Vajtswv lub Nceeg Vaj. Lub Nceeg Vaj ntawd yuav ua dab tsi? Nyob hauv Yexus zaj lus thov nws hais ntxiv tias: “Thov koj lub Nceeg Vaj los kav. Thov kom txhua yam hauv ntiaj teb muaj tiav raws li koj lub siab nyiam ib yam li saum ntuj.”​—Mathais 6:10.

15. Yexus yuav ua dab tsi ntxiv thiab?

¹⁵ Tsis ntev tom ntej no Yexus yuav los ua rog rau Vajtswv cov yeeb ncuab thiab muab cov neeg phem rhuav tshem rau thaum Amankedoos. (Tshwmsim 16:14, 16; 19:11-16) Tsis ntev tom qab ntawd, nws yuav muab Xatas pov rau hauv “lub qhov tob tob” kom Xatas ua tsis tau dab tsi ntxiv li lawm. (Tshwmsim 20:1-3) Ces thaum ntawd, Yexus yuav kav 1,000 xyoo. Nws yuav txhim kho kom muaj kev thaj yeeb rau hauv ntiaj teb, tib neeg yuav tsis muaj kev txaug kev txhaum lawm, nws yuav tsa cov tuag sawv rov qab los, thiab nws yuav muab lub ntiaj teb no ua ib lub vaj kaj siab. Thaum ntawd, txhua yam yuav muaj raws li Yehauvas lub ntsiab!​—Tshwmsim 21:1-4.

16. Lub neej tom qab Yexus kav 1,000 xyoo yuav zoo li cas?

¹⁶ Yuav muaj dab tsi tshwm sim tom qab Yexus kav 1,000 xyoo? Thaum ntawd tib neeg yuav tsis muaj kev txaug kev txhaum, tib neeg yuav tsis thov kom zam lawv tej txim los ntawm tus nqi txhiv, tsis tas lawv yuav muaj cov 144,000 leej los ua cov pov thawj thiab Yexus ua tus Pov Thawj Hlob. Ntxiv ntawd, “tus yeeb ncuab kawg uas yog txoj kev tuag yuav raug rhuav tshem.” Tej qhov ntxa yuav khoob du lug vim cov tuag rov qab ciaj sia ua neej tag lawm. Txhua tus nyob hauv ntiaj teb no yuav tsis muaj kev txaug kev txhaum.​—1 Kauleethaus 15:25, 26.

17-18. (1) Tom qab 1,000 xyoo, yuav muaj dab tsi tshwm sim? (2) Yexus yuav ua dab tsi tom qab nws txoj kev kav yuav kawg? (1 Kauleethaus 15:24, 28) (Saib daim duab.)

¹⁷ Yuav muaj dab tsi tshwm sim ntxiv tom qab 1,000 xyoo? Thaum ntawd txhua tus yuav hwm Yehauvas lub npe. Thaum nyob hauv lub vaj Edees, Xatas hais tias Yehauvas dag thiab tsis hlub tib neeg. Txij thaum ntawd los cov uas teev tiam Yehauvas yuav tau ua tas zaj tas zog qhia tias Yehauvas txoj kev kav thiaj yog txoj zoo. Yog li ntawd tom qab 1,000 xyoo, yuav daws tau tag nrho Yehauvas lub koob lub npe. Yehauvas yeej ncua sij hawm txaus los mus qhia tias nws yog ib Leej Txiv uas muaj kev hlub heev.

¹⁸ Thaum ntawd txhua tus yuav paub tias tej uas Xatas dag txog Yehauvas tsis muaj tseeb. Yexus yuav ua dab tsi xwb tom qab nws txoj kev kav yuav kawg? Nws puas yuav coj yam nkaus li Xatas es sawv tawm tsam Yehauvas? Nws yuav tsis coj li ntawd! (Nyeem 1 Kauleethaus 15:24, 28.) Yexus yuav cob lub Nceeg Vaj rov qab rau nws Txiv. Nws yuav zwm rau Yehauvas txoj kev tswj hwm. Nws txaus siab hlo muab nws lub hwj chim vaj ntxwv rau Yehauvas vim nws hlub Yehauvas.

19. Yehauvas lub npe tseem ceeb npaum li cas rau Yexus?

¹⁹ Yexus sawv tau Yehauvas cev zoo kawg nkaus li. Yeej tsim nyog lawm rau Yexus tuav Yehauvas lub npe! Yexus saib Yehauvas lub npe zoo li cas tiag? Yexus yeej saib tseem ceeb tshaj txhua yam huv tib si. Yexus thiaj yeem tuag rau lub npe ntawd, thiab nws txaus siab hlo muab txhua yam rov qab rau Yehauvas tom qab 1,000 xyoo. Yuav ua li cas peb thiaj raws tau Yexus tus hneev tus lw? Nyob rau zaj txuas ntxiv tom ntej no peb mam li tham txog.