Nco Ntsoov Yehauvas Hlub Koj

1. Vim li cas koj thiaj muab koj tus kheej cob rau Yehauvas? (Saib daim duab.)

KOJ puas nco qab hnub koj muab koj lub neej cob rau Yehauvas? Tos koj ua li no los twb yog koj kawm, koj thiaj tau los paub nws. Ntxiv ntawd, koj txoj kev hlub rau nws thiaj li tawg paj txi txiv. Koj cog lus rau nws tias koj yuav muab nws tso ua ntej txhua yam koj ua thiab koj yuav hlub nws kawg siab kawg ntsws, kawg koj txoj sia thiab kawg laj lim tswv yim. (Malakaus 12:30) Txij hnub ntawd los koj txoj kev hlub rau nws thiaj loj ntxiv zuj zus tuaj. Thaum ib tug nug koj tias, “Koj puas hlub Yehauvas?” Koj yeej tsis ua xyem xyav hlo li. Koj yeej yuav teb ntua tias: “Kuv hlub nws tshaj ib puas tsav yam!”

2-3. Yehauvas xav kom peb paub tseeb tseeb li cas, thiab peb yuav tham txog dab tsi nyob rau hauv zaj kawm no? (Yelemis 31:3)

² Koj yuav teb li cas yog muaj ib tug nug koj tias, “Koj puas paub tseeb tseeb tias Yehauvas hlub koj tiag tiag?” Koj puas ua xyem xyav thiab xav twj ywm tias ua li koj puas tsim nyog Yehauvas hlub tiag? Muaj ib tug muam lub neej nyuaj heev thaum nws loj hlob tuaj tau hais tias: “Nyob hauv kuv lub siab kuv paub hais tias kuv yeej hlub Yehauvas. Tiam sis tej thaud kuv tsis paub tseeb tseeb xyov Yehauvas puas hlub kuv tag tag.” Ua li Yehauvas puas hlub koj tiag tiag?

³ Yehauvas xav kom koj paub tseeb tseeb tias nws hlub koj tag siab nrho. (Nyeem Yelemis 31:3.a) Nws thiaj li rub kom koj los kawm txog nws thiab nrog nws sib raug zoo. Thaum koj muab koj tus kheej cob rau nws thiab ua kev cai raus dej, nws cog lus tias nws yuav hlub koj thiab tsis ncaim tsis nrug koj li. Nws suav tias koj thiab cov uas teev tiam nws yog nws teej nws tug thiab nws saib muaj nuj nqis heev. (Malakis 3:17) Yehauvas xav kom koj xav ib yam li tus tub txib Povlauj xav txog nws txoj kev hlub. Povlauj thiaj li sau tias: “Kuv ntseeg ruaj nreeg tias tsis muaj ib yam dab tsi yuav cais tau peb ntawm Vajtswv txoj kev hlub. Tsis hais ciaj los tuag, cov tub txib saum ntuj, tej tseem fwv, tej uas muaj nim no, tej uas tseem yuav muaj los, tej hwj chim, tsis hais qhov siab, qhov tob, los sis ib yam dab tsi uas Vajtswv tau tsim.” (Loos 8:38, 39) Nyob rau hauv zaj kawm no yuav tham tias vim li cas peb yuav tau tso siab tias Yehauvas yeej hlub peb tiag thiab dab tsi thiaj li pab tau kom peb xav li ntawd.

TSO SIAB TIAS YEHAUVAS HLUB KOJ

4. Yuav ua li cas peb thiaj kov yeej qhov uas Xatas haub ntxias peb?

⁴ Thaum koj tso siab tias Yehauvas hlub koj ces koj yuav kov yeej Xatas tej tswv yim dag. (Efexus 6:11) Xatas yuav ua txhua yam los tav koj txoj hau kev kom txhob teev tiam Yehauvas. Ib qho uas Xatas siv los dag koj yog nws xav kom koj xav tias Yehauvas tsis hlub koj. Nco ntsoov Xatas yuav siv tej lub sij hawm thaum koj qaug lawm los dag ntxias koj. Xws li tej yam koj tau ua yav tas los, tej yam koj tab tom raug los sis qhov uas koj tsis paub lub neej yav tom ntej. (Pajlug 24:10) Xatas zoo yam nkaus li tus tsov ntxhuav uas tos nrhw yuav tom tsiaj. Nws tos thaum peb qaug qaug zog ces nws mam li tshum kom peb tso Yehauvas tseg. Tiam sis yog peb nco ntsoov ua tej yam los pab kom peb ntseeg tias Yehauvas yeej hlub peb tiag ces peb yuav npaj txhij zog tawm tsam kom yeej Xatas tej lus haub ntxias.​—1 Petus 5:8, 9; Yakaunpaus 4:7.

5. Vim li cas ho tseem ceeb rau peb paub tias Yehauvas hlub thiab saib peb rau nqi?

⁵ Thaum koj tso siab tias Yehauvas hlub koj ces koj yuav yim huab nrog nws sib raug zoo. Ua li cas peb ho hais li ntawd? Tos peb hais li no los yog Yehauvas tsim kom peb muaj lub siab ntshaw kev hlub thiab kom lwm tus hlub peb. Thaum muaj ib tug twg hlub peb ces peb kuj hlub nws rov qab. Yog peb paub tias Yehauvas hlub thiab saib peb rau nqi heev ces peb yuav hlub nws rov qab. (1 Yauhas 4:19) Thaum peb txoj kev hlub tawg paj txi txiv zuj zus rau nws ces nws yuav hlub peb rov qab. Nyob hauv phau Vajlugkub thiaj li hais tias: “Nej cia li los nyob ze Vajtswv, Vajtswv thiaj yuav los nyob ze nej.” (Yakaunpaus 4:8) Ua li peb yuav ua tej yam twg los pab kom peb ntseeg tias Yehauvas yeej hlub peb tiag?

TEJ YAM PAB KOM PEB TSO SIAB TIAS YEHAUVAS HLUB PEB

6. Yog koj tsis paub tseeb tias Yehauvas hlub koj, koj yuav tau ua dab tsi?

⁶ Thov Yehauvas tawm plaws hauv nruab siab tuaj thiab thov tsis tseg tsis tu. (Lukas 18:1; Loos 12:12) Thov Yehauvas txhua txhua hnub, pes tsawg zaus los xij peem kom nws pab koj pom koj tus kheej ib yam li Yehauvas pom. Yog koj lub siab pheej rov qab nkaug koj tias Yehauvas tsis hlub koj ces koj yuav tau nco ntsoov tias Yehauvas paub koj lub siab dua. (1 Yauhas 3:19, 20) Nws yeej paub koj zoo dua tiag thiab nws yeej pom tej yam zoo hauv koj nruab siab. (1 Xamuyees 16:7; 2 Xwmtxheej Vajntxwv 6:30) Yog li ntawd, cia li “qhia [koj] lub siab rau nws” thiab thov kom nws pab koj ntseeg tias nws hlub koj tiag. (Phau Ntawv Nkauj 62:8) Tom qab koj thov nws tag lawm, koj yuav tau ua li hais no.

7-8. Ua cas peb ho paub tias Yehauvas hlub peb thaum peb nyeem Phau Ntawv Nkauj?

⁷ Mloog Yehauvas hais vim nws tej lus puav leej tseeb. Yehauvas tshoov ib co txiv neej los sau nws Txoj Lus. Txhua yam lawv piav puav leej thooj nkaus nws. Xws li Daviv piav tias Yehauvas hmov tshua nws cov tib neeg heev. Daviv hais tias: “[Yehauvas] nyob ze cov neeg uas tas kev cia siab, nws cawm cov neeg uas tsis muaj chaw vamkhom.” (Phau Ntawv Nkauj 34:18) Thaum koj nyob mluas mlob, tej zaud koj yuav xav tias muaj koj ib leeg xwb. Tiam sis Yehauvas cog lus tias lub sij hawm ntawd ntag, yog lub sij hawm uas nws saib ntsoov koj vim koj vam khom nws rau lub sij hawm ntawd. Daviv kuj sau li no ntxiv tias: “Koj yeej paub kuv raug kev txomnyem npaum li cas, koj yeej teev kuv tej kua muag tseg huv tibsi lawm.” (Phau Ntawv Nkauj 56:8) Yehauvas yeej pom thaum koj nyuaj siab. Nws yeej hlub koj heev vim nws pom tej uas koj raug. Cuag li nws muab koj txhua teev kua muag ntim tseg cia huv tib si vim muaj nuj nqis heev rau nws. Nyob hauv Phau Ntawv Nkauj 139:3 hais tias: “Koj paub tej uas kuv ua huv tibsi.” Yog li ntawd, Yehauvas pom txhua yam koj ua tiam sis nws tsuas saib tej zoo uas koj ua xwb. (Henplais 6:10) Tos nws ua li no los nws saib txhua yam koj ua rau nws muaj nuj nqis heev.b

⁸ Yehauvas siv cov nqe Vajlugkub los qhia peb tias nws hlub peb tshaj plaws li. Tiam sis raws li peb kawm tag lawd, Xatas xav kom peb ntseeg tias Yehauvas tsis hlub peb. Yog muaj tej thaum peb lub siab pheej nkaug peb tias Yehauvas tsis hlub peb ces peb yuav tau tsum kiag tam sim ntawd thiab nug peb tus kheej tias, ‘Kuv yuav ntseeg leej twg? Kuv yuav ntseeg “txhua tus uas dag leej txiv” los sis “tus Vajtswv tseeb uas tso siab tau”?’​—Yauhas 8:44; Phau Ntawv Nkauj 31:5.

9. Yehauvas tau cog lus li cas rau cov uas hlub nws? (Khiav Dim 20:5, 6)

⁹ Peb yuav tau lauj sij hawm los xav txog seb Yehauvas ho xav li cas txog cov uas hlub nws. Cia peb mus tham txog seb Yehauvas tau hais li cas rau Mauxes thiab cov Ixayees. (Nyeem Khiav Dim 20:5, 6.) Yehauvas cog lus tias nws yuav hlub cov uas hlub nws tsis tseg tsis tu. Cov lus no qhia tseeb tseeb tias yog muaj leej twg hlub Yehauvas lawm, nws yeej yuav hlub tus ntawd rov qab. (Nehemis 1:5) Yog muaj tej lub sij hawm koj ho xav paub seb Yehauvas puas hlub koj ces koj yuav tau rov nug koj tus kheej li no tias, ‘Kuv puas hlub Yehauvas?’ Yog tias koj teb tau tias koj hlub nws thiab koj yeej ua npaum li koj ua tau kom haum nws siab ces nws yeej hlub koj tib yam nkaus. (Daniyees 9:4; 1 Kauleethaus 8:3) Yog tias koj twb tsis ua ob siab tias koj hlub Yehauvas ces koj yuav tau tsis txhob ua ob lub siab tias xyov nws puas hlub koj. Koj yuav tau nco ntsoov tias nws yuav tsis tso koj tseg thiab yuav hlub koj mus li.

10-11. Yehauvas xav kom koj saib tus nqi txhiv zoo li cas? (Kalatias 2:20)

¹⁰ Koj yuav tau xav txog tus nqi theej txhoj. Thaum Yexus Khetos los tuag theej tib neeg lub txhoj hauv ntiaj teb no ces twb yog qhov khoom zoo tshaj plaws uas Yehauvas muab pub rau noob neej. (Yauhas 3:16) Tiam sis puas yog Yehauvas muab rau koj tus kheej kiag? Nws muab. Cia peb mam li mus tham txog tus tub txib Povlauj. Nws tau ua ntau yam txhaum loj heev ua ntej nws los ua ib tug Khixatias. Thiab tom qab nws los ntseeg lawm los nws haj tseem tau tiv ntau yam kev uas txo tau nws lub zog. (Loos 7:24, 25; 1 Timautes 1:12-14) Txawm li ntawd los nws xam pom tias tus nqi txhiv yog Yehauvas muab los pab nws. (Nyeem Kalatias 2:20.) Peb yuav tau nco ntsoov tias Yehauvas tshoov kom Povlauj muab tej no sau tseg rau peb tau kawm. (Loos 15:4) Povlauj cov lus no qhia tias Yehauvas xav kom koj saib tus nqi txhiv tam li Yehauvas muab kiag ntawm nws ntiag tug los rau koj. Yog koj xam pom tus nqi txhiv li no ces yuav tsav tau koj txoj kev cia siab tias Yehauvas hlub koj heev.

¹¹ Peb ua Yehauvas tsaug uas nws tseem xa Yexus los rau hauv ntiaj teb no los tuag this peb. Tiam sis ib qho ntxiv uas Yexus los rau hauv ntiaj teb no yog los qhia tib neeg kom paub qhov tseeb txog Vajtswv. (Yauhas 18:37) Yam li Yexus qhia tias Yehauvas yeej hlub Nws cov me nyuam heev.

YEXUS QHIA TIAS YEHAUVAS HLUB PEB

12. Ua li cas peb ho tso siab tau rau tej lus uas Yexus piav txog Yehauvas?

¹² Thaum Yexus tseem nyob hauv ntiaj teb no nws nyiam nyiam qhia tib neeg tias Yehauvas zoo li cas rau li cas. (Lukas 10:22) Tsis txhob ua siab deb, cia li tso siab plhuav rau Yexus tej lus uas nws qhia peb txog Yehauvas vim nws nrog Yehauvas nyob tau qas txhiab qas vam xyoo ua ntej nws los hauv ntiaj teb. (Kaulauxais 1:15) Yexus pom kiag lawm tias Yehauvas hlub cov tub txib saum ntuj thiab hlub cov uas teev tiam Nws hauv ntiaj teb no heev. Yexus pab kom lwm tus paub tias Vajtswv hlub lawv npaum li cas?

13. Yexus xav kom peb saib Yehauvas li cas?

¹³ Yexus xav kom peb xam pom Yehauvas ib yam li nws pom. Nyob rau hauv phau Mathais, Malakaus, Lukas thiab Yauhas, Yexus hu Yehauvas tias “Leej Txiv” ntau tshaj li 160 zaug. Thaum nws qhia nws cov thwj tim, nws kheev hais tias “nej Leej Txiv” los sis “nej Leej Txiv uas nyob saum ntuj ceeb tsheej.” (Mathais 5:16; 6:26) Ua ntej Yexus los rau hauv ntiaj teb, cov tib neeg uas teev tiam Yehauvas txheej thaum ub hu Yehauvas tias ‘tus uas muaj hwj chim loj kawg nkaus,’ ‘tus muaj hwj chim loj dua ntais,’ ‘tus kws tsim,’ thiab muaj lwm lub npe uas hais tsis txhij tsis txhua. Tiam sis feem ntau Yexus hu Yehauvas tias peb ‘Leej Txiv.’ Cov lus Yexus hais no qhia tau tias Yehauvas xav kom nws cov tib neeg nrog nws sib raug zoo ib yam li ib tug me nyuam nrog nws txiv sib raug zoo. Yexus xav kom peb pom Yehauvas ib yam li nws pom. Cia peb mus tham txog ob zaug uas Yexus hais lo lus “Leej Txiv.”

14. Yexus piav li cas kom peb thiaj paub tias peb Leej Txiv saib peb muaj nuj nqis? (Mathais 10:29-31) (Saib daim duab.)

¹⁴ Thawj qhov, cia peb mus tham txog Yexus cov lus nyob rau hauv Mathais 10:29-31. (Nyeem.) Cov noog tsev yog ib co me nyuam noog me me uas tsis txawj hlub Yehauvas rov qab thiab tsis txawj teev tiam nws. Txawm li ntawd los Yehauvas yeej saib txhua tus noog tsev muaj nqis heev. Nws yeej paub thaum lawv ya los mus tsaws hauv pem teb huv tib si. Yog tias Yehauvas twb saib tej noog me me no muaj nqis ces nws yuav yim huab saib peb muaj nuj nqis tshaj vim peb txawj hlub nws rov qab thiab teev tiam nws! Yexus kuj hais ntxiv tias peb Leej Txiv kuj paub txhua txoj plaub hau uas nyob saum peb taub hau huv tib si. Yog tias Yehauvas twb paub tej yam no txog peb ces nws yeej hlub peb kawg li. Yog li ntawd, Yexus xav kom peb paub tseeb tseeb tias peb ib leeg tus twg los puav leej muaj nuj nqis heev rau ntawm peb Leej Txiv tus uas nyob saum ntuj lub zeem muag.

15. Yexus cov lus nyob hauv Yauhas 6:44 qhia koj li cas txog koj Leej Txiv saum ntuj ceeb tsheej?

¹⁵ Cia peb mus tham txog yam ob uas thaum Yexus siv lo lus “Leej Txiv.” (Nyeem Yauhas 6:44.) Yexus hais tias koj Leej Txiv tus uas nyob saum ntuj yog tus uas pab kom koj tig los cuag thiab hlub nws. Tos nws pab kom koj los paub nws los vim nws pom nyob hauv koj nruab siab, koj muaj lub siab xib nrhiav nws. (Tes Hauj Lwm 13:48) Thaum Yexus hais cov lus nyob hauv Yauhas 6:44 ces tej zaum yog nws hais txog Yehauvas cov lus uas Yehauvas hais rau nws cov tib neeg tias: “Kuv yeej ib txwm hlub koj thiab yuav hlub koj tsis muaj hnub kawg. Vim kuv txoj kev hlub no kuv thiaj rub koj lus cuag kuv.” (Yelemis 31:3; muab piv rau Hauxeyas 11:4.) Qhov no qhia tias koj Leej Txiv tus uas nyob saum ntuj yeej pom tej yam zoo uas nyob hauv koj nruab siab uas tej zaum koj twb xav tsis txog tias koj muaj.

16. (1) Yexus qhia dab tsi rau peb thiab vim li cas peb ho ntseeg nws tej lus? (2) Koj yuav tau ua li cas koj thiaj paub tias Yehauvas yog ib Leej Txiv zoo rau koj? (Saib lub ntsiab “Leej Txiv Uas Peb Txhua Tus Xav Tau.”)

¹⁶ Yexus qhia rau koj paub tias Yehauvas tsis yog nws Leej Txiv xwb tiam sis kuj yog koj Leej Txiv thiab. Yexus xav kom koj paub tseeb tseeb tias Yehauvas hlub koj thiab txhawj xeeb txog koj heev. Muaj tej thaud yog koj tsis paub tseeb seb Yehauvas hlub koj los tsis hlub ces koj yuav tau ua tib zoo xav li no tias, ‘Tsim nyog rau kuv mloog Yexus cov lus vim nws paub Leej Txiv zoo tshaj txhua tus thiab nws ib txwm hais lus tseeb xwb.’​—1 Petus 2:22.

TSO SIAB KAM TIAG TIAS YEHAUVAS HLUB KOJ

17. Vim li cas peb yuav tau tso siab kam tiag tias Yehauvas yeej hlub peb?

¹⁷ Peb yuav tau tso siab tiag tias Yehauvas yeej hlub peb. Raws li peb tau kawm, Xatas yeej yuav tsis tso peb tseg yooj yooj yim. Nws yeej yuav sim tav peb txhua lub sij hawm kom peb xav hais tias Vajtswv tsis hlub peb ces kom peb tso Vajtswv tseg. Tsis txhob cia Xatas kov yeej peb!​—Yauj 27:5.

18. Koj yuav tau ua dab tsi koj thiaj yuav tso siab plhuav tias Yehauvas hlub koj?

¹⁸ Yuav kom koj tso siab plhuav tias Yehauvas hlub koj, koj yuav tau thov kom nws pab koj pom koj tus kheej ib yam nws pom. Muab tej nqe Vajlugkub xav mus xav los seb cov sau phau Vajlugkub piav txog Yehauvas txoj kev hlub li cas. Nco ntsoov tias Yehauvas yeej ib txwm hlub tus uas hlub nws rov qab. Ua zoo xav txog tus nqi txhiv uas yog Yehauvas ntiag tug es nws muab pub rau koj. Tso siab rau Yexus cov lus tias Yehauvas yog koj Leej Txiv tus uas nyob saum ntuj ceeb tsheej. Thaum muaj ib tug twg nug koj tias: “Koj puas paub tseeb tseeb tias Yehauvas hlub koj tiag tiag?” koj yuav teb ntua tias: “Kuv paub! Thiab txhua hnub kuv yeej ua li kuv ua tau los qhia tias kuv hlub nws rov qab.”