Cia Yehauvas Ua Tus Nplig Koj

1. Cov Yudais lub neej hauv Npanpiloos zoo li cas?

TAU ntau ntau xyoo cov Yudais pheej tsis mloog Yehauvas lus tas zaj tas zog. Yog li ntawd, Yehauvas thiaj li cia cov Npanpiloos tuaj muab lawv coj mus ua cev qhev thiab cia lawv lub teb chaws nyob qhuav nquas cia. (2 Xwmtxheej Vajntxwv 36:15, 16, 20, 21) Nyob hauv teb chaws Npanpiloos, lawv txoj kev noj nyob kuj tsis txawv ua luaj twg. (Yelemis 29:4-7) Txawm li ntawd los lawv lub neej tsis yooj yim, thiab kuj tsis yog ib lub neej uas lawv ntshaw kom zoo li ntawd. Muaj ib tug uas tau poob mus ua cev qhev nyob rau ntawd hais tias: “Peb zaum ntawm tej ntug dej hauv tebchaws Npanpiloos, thaum peb nco dheev txog lub nroog Xi-oos mas peb tsa suab hlo quaj.” (Phau Ntawv Nkauj 137:1) Cov Yudais puas siab puas ntsws tag. Ua li leej twg thiaj yuav nplig tau lawv siab?

2-3. (1) Yehauvas tau ua dab tsi rau cov Yudais uas poob cev qhev? (2) Nyob hauv zaj kawm no yuav tham txog dab tsi?

² Yehauvas yog “tus Vajtswv uas nplig tau txhua yam kev nyuaj siab.” (2 Kauleethaus 1:3) Yehauvas hlub nws cov tib neeg thiab nws xav nplig lawv txhua tus. Yehauvas paub tias cov uas tau mus ua cev qhev lawd, ib txhia yuav tig rov qab los cuag nws thiab mloog nws lus. (Yaxayas 59:20) Yog li ntawd, tshaj li 100 xyoo ua ntej lawv poob cev qhev, Yehauvas twb hais kom Yaxayas sau tseg tej lus uas yuav nplig nws cov tib neeg. Yaxayas hais tias: “Vajtswv hais tias, ‘Nplig kuv haivneeg lub siab, nplig lawv siab.’”​—Yaxayas 40:1.

³ Zoo ib yam li cov Yudais uas poob cev qhev, peb kuj yuav tsum tau kev nplig siab qho lub sij hawm thiab. Nyob rau hauv zaj kawm no yuav tham txog peb txoj hau kev uas Yehauvas tau nplig cov Yudais siab: (1) Nws cog lus tias nws yuav zam cov uas hloov dua siab tshiab lub txim, (2) nws pub lawv muaj kev vam kev cia siab, thiab (3) nws pab kom lawv tsis txhob ntshai. Thaum peb kawm txog peb yam no saib seb ho nplig tau peb li cas rau li cas.

YEHAUVAS ZAM TAG NRHO PEB LUB TXIM

4. Yehauvas tau ua qhia li cas tias nws yog ib tug Vajtswv uas muaj kev khuv leej? (Yaxayas 55:7)

⁴ Yehauvas yog “Leej Txiv uas muaj kev khuv leej.” (2 Kauleethaus 1:3) Nws txoj kev khuv leej no muaj rau thaum nws cog lus tias nws yuav zam cov uas raug mus ua cev qhev lub txim yog tias lawv hloov dua siab tshiab. (Nyeem Yaxayas 55:7.) Yehauvas hais tias: “Vim yog muaj txojkev hlub ib txhis kuv yuav khuvleej koj.” (Yaxayas 54:8) Txawm tias cov Yudais yuav tau nyob tim Npanpiloos ntau lub xyoos vim lawv tsis mloog lus los Yehauvas cog lus rau lawv tias lawv yuav tsis tau nyob tid mus ib txhis. (Yaxayas 40:2) Tej zaud cov lus no yuav nplig tau cov uas hloov dua siab tshiab lub siab!

5. Vim li cas peb ho tso siab tshaj li cov Yudais tias Yehauvas yuav zam peb lub txim?

⁵ Peb khaws tau dab tsi? Yehauvas yeej txaus siab hlo zam tag nrho nws cov tib neeg lub txim. Niaj hnub nim no peb yeej tso siab tshaj li cov Yudais vim peb paub qhov uas Yehauvas tau ua los zam peb lub txim. Kwv lam li 700 xyoo tom qab Yaxayas faj lem tag ces Yehauvas mam li tso nws tus Tub los tuag theej peb lub txhoj. Qhov uas Yexus theej txhoj no yuav npog tag nrho tej kev txhaum huv tib si mus. (Tes Hauj Lwm 3:19; Yaxayas 1:18; Efexus 1:7) Yog ib qho txiaj ntsig zoo kawg li uas peb tau los teev tiam ib tug Vajtswv uas muaj kev khuv leej tag npaum li no!

6. Ua cas ho raug peb siab ua luaj thaum xav txog Yehauvas txoj kev zam txim? (Saib daim duab.)

⁶ Yehauvas cov lus uas nws hais rau cov Yudais hauv Yaxayas 55:7 kuj pab tau peb lub siab kom tsis txhob rov qab nkaug peb rau tej yam uas peb tau ua yav thaum ub tab txawm peb twb hloov dua siab tshiab lawm. Muaj tej zaud peb haj tseem ris quj qees lub nra uas peb tau ua txhaum yav tag los lawm, ces peb lub siab thiaj pheej rov nkaug peb. Tiam sis nco ntsoov tias Yehauvas twb zam peb lub txim lawm yog peb twb lees peb lub txim txhaum thiab tseg tsis mus ua txhaum ntxiv. Thaum Yehauvas zam ib tug twg lawm, nws yuav tsis cim ntsoov tus ntawd tej kev txhaum. (Muab piv rau Yelemis 31:34.) Yog Yehauvas twb tsis cim peb tej kev txhaum ces peb yuav tau tseg tsis txhob xav ntev xav ntau txog. Yehauvas tsuas saib tej yam uas peb ua tam sim no xwb, tsis yog yav tag los lawm. (Exekees 33:14-16) Tsis ntev tom ntej no thaum nyob hauv lub qab ntuj tshiab, peb Leej Txiv Yehauvas uas muaj kev khuv leej yuav muab txhua yam kev txom nyem siab ntsws tshem huv tib si mus.

7. Yog tias peb tau ua ib qho txhaum loj zais ntshis, dab tsi thiaj yuav pab kom peb mus cuag cov txwj laus?

⁷ Yog tias peb lub siab pheej rov nkaug peb vim peb tau ua ib qho txhaum loj zais ntshis, peb yuav tau ua li cas? Nyob hauv phau Vajlugkub txhawb kom peb mus nrhiav kev pab ntawm cov txwj laus. (Yakaunpaus 5:14, 15) Tej zaud yuav tsis yooj yim rau peb lees tej yam peb tau ua tiam sis yog peb hloov dua siab tshiab thiab nco ntsoov tias Yehauvas thiab cov txiv neej uas nws tsa los pab peb yuav muaj kev khuv leej ces yuav rub tau peb lub siab kom mus cuag cov txwj laus. Cia peb mus tham txog ib tug kwv tij npe hu ua Txama seb Yehauvas tau khuv leej nws li cas thaum nws lub siab pheej rov nkaug nws. Txam hais tias: “Muaj ib zaug kuv saib duab liab qab yuav luag tau ib xyoos. Tiam sis thaum kuv hnov ib zaj lus qhuab qhia txog lub siab uas paub qhov zoo qhov phem ces kuv txawm mus lees kuv lub txim txhaum rau kuv tus poj niam thiab cov txwj laus. Tom qab kuv qhia lawv tag, kuv lub siab txawm nqig hlo tiam sis kuv yeej tu siab kawg li uas kuv tau ua tej no. Cov txwj laus thiaj hais kom kuv nco ntsoov tias Yehauvas tsis tau muab kuv tso tseg thiab Yehauvas tsuas ntuas tus uas nws hlub xwb. Lawv cov lus no raug kuv siab kawg li thiab pab kom kuv hloov kuv txoj kev xav.” Niaj hnub nim no Txam kuj yog ib tug thov kev thiab yog ib tug tub leg num. Zaj no qhia tau tias Yehauvas yeej zam peb lub txim yog peb hloov duab siab tshiab!

YEHAUVAS PUB PEB MUAJ KEV VAM KEV CIA SIAB

8. (1) Yehauvas muab txoj kev vam kev cia siab twg rau cov Yudais? (2) Raws li Yaxayas 40:29-31, qhov uas cov Yudais muaj kev vam kev cia siab pab tau lawv li cas?

⁸ Tej zaud cov Yudais yeej xav tias tsis muaj hnub lawv yuav tau rov qab mus nyob lawv teb lawv chaw. Cov neeg Npanpiloos tau ntes leej twg lawm, lawv yeej tsis tso yooj yim. (Yaxayas 14:17) Tiam sis Yehauvas cog lus tias nws yuav tso nws cov tib neeg kom dim thiab yuav tsis muaj leej twg txwv tau kiag li. Qhov no thiaj ua rau nws cov tib neeg muaj kev vam kev cia siab. (Yaxayas 44:26; 55:12) Yehauvas saib cov tib neeg Npanpiloos zoo yam li cov pluas plav uas ib nyuag tshuab xwb ces twb ya tas lawm. (Yaxayas 40:15) Qhov kev vam kev cia siab no nplig tau cov Yudais heev thiab tseem yuav ntxiv dag ntxiv zog rau lawv kom “ya ib yam li tus dav.” Yaxayas sau tias: “Cov neeg uas cia siab ntsoov rau [Yehauvas] yuav muaj zog.”​—Nyeem Yaxayas 40:29-31.

9. Ua cas cov Yudais ho paub tseeb tias Yehauvas yuav cawm lawv dim?

⁹ Muaj tej yam qhia tau rau cov Yudais tias Yehauvas tej lus cog tseg yeej yuav xaus xwb xwb li. Xws li twb muaj tej faj lem tshwm sim raws li Yehauvas tau hais lawm. Zoo li thaum cov Axilias tuaj ntaus yeej kaum xeem Ixayees thiab muab lawv coj mus ua cev qhev. (Yaxayas 8:4) Lawv kuj pom cov Npanpiloos muab lub nroog Yeluxalees ua puas tsuaj tag thiab muab cov tib neeg coj mus ua qhev tib yam nkaus. (Yaxayas 39:5-7) Lawv pom thaum Npanpiloos tus vaj ntxwv muab Vaj Ntxwv Xedekiyas ob lub qhov muag kaus pov tseg thiab muab nws khi coj mus kaw. (Yelemis 39:7; Exekees 12:12, 13) Txhua yam uas Yehauvas tau hais lawm yeej muaj tseeb. (Yaxayas 42:9; 46:10) Thaum lawv xav txog tej no tej zaud yeej txhawb tau lawv txoj kev ntseeg heev tias Yehauvas yeej yuav ua raws li nws cog lus tseg tias nws yuav tso lawv dim!

10. Dab tsi thiaj pab kom peb txoj kev vam kev siab nyob ruaj nyob khov rau tiam kawg no?

¹⁰ Peb khaws tau dab tsi? Thaum peb nyob mluas mlob, qhov uas peb muaj kev vam kev cia siab rau yav tom ntej yuav nplig peb lub siab thiab yuav pab kom peb rov muaj zog npho tuaj. Lub sim ceeb no tsuas yuav phem zuj zus ntxiv thiab Vajtswv cov yeeb ncuab yuav tawm tsam peb. Txawm li ntawd los tsis txhob tag kev cia siab vim Yehauvas twb cog lus tseg tias peb yuav tau nyob hauv lub Vaj Kaj Siab mus ib txhis thiab thaum ntawd peb yuav tsis txhawj ntshai thiab nyob kaj siab lug tso siab plhuav. Yog li ntawd, txoj kev vam kev cia siab yuav tsum sawv nraim hauv peb nruab siab. Yuav kom sawv tau hauv peb nruab siab, peb yuav tau lauj sij hawm los xav txog seb lub qab ntuj tshiab yuav zoo npaum li cas. Peb yuav tau nyeem tej ntaub ntawv, saib tej yeeb yaj kiab thiab mloog tej nkauj uas Yehauvas lub koom haum luam thiab tso tawm uas hais txog peb txoj kev vam kev cia siab. Tsis tas li ntawd, peb kuj thov Yehauvas txog tej yam uas peb tos ntsoov yuav pom yav tom ntej.

11. Muaj dab tsi ho pab tau ib tug muam thev dhau nws tus mob?

¹¹ Cia peb mus tham txog ib tug muam npe hu ua Lug seb txoj kev vam kev cia siab ho nplig thiab txhawb tau nws li cas vim nws muaj ib tug mob hnyav heev. Nws hais tias: “Thaum kuv ntxhov siab hnyo, kuv muab txhua yam qhia rau Yehauvas paub vim kuv paub tias nws thiaj li nkag siab kuv txoj kev ntxhov siab. Qhov uas Yehauvas teb kuv tej lus thov yog nws pub ‘lub dag lub zog loj kawg nkaus’ rau kuv.” (2 Kauleethaus 4:7) Lug kuj xav txog lub caij uas nws nyob hauv lub qab ntuj tshiab uas “tsis muaj leejtwg nroo hais tias, ‘Kuv muaj mob.’” (Yaxayas 33:24) Zoo ib yam li Lug, yog peb qhib siab hlo rau Yehauvas thiab xav txog txoj kev vam kev cia siab ces peb yuav muaj dag muaj zog tiv dhau peb tej kev nyuaj siab.

12. Muaj dab tsi pab kom peb tso siab rau tej Yehauvas cog tseg? (Saib daim duab.)

¹² Zoo ib yam li Yehauvas tau ua kom tej faj lem muaj tshwm sim xwv cov neeg Yudais thiaj tso siab rau Yehauvas tej lus cog tseg, nws kuj tau ua ntau yam faj lem kom muaj tshwm sim rau peb pom thiab. Xws li peb pom tias Askiv thiab Yunaithim Xatej (United States) sib koom tes tiam sis “ib txhia muaj zog thiab ib txhia tsis muaj zog.” (Daniyees 2:42, 43) Peb kuj hnov “av qeeg ib qho rau ib qho,” thiab peb kuj tshaj tawm txoj xov zoo rau “txhua haiv neeg.” (Mathais 24:7, 14) Tej faj lem no thiab lwm yam uas hais tsis txhij tsis txhua txhawb tau peb txoj kev ntseeg tias tej uas Yehauvas tau cog lus lawm yeej yuav muaj tshwm sim.

YEHAUVAS PAB KOM PEB TSIS TXHOB NTSHAI

13. (1) Ua ntej cov Yudais yuav dim, lawv muaj kev nyuaj siab li cas? (2) Raws li hais hauv Yaxayas 41:10-13, Yehauvas nplig cov Yudais uas poob cev qhev siab li cas?

¹³ Yehauvas qhia rau cov Yudais nyob rau tim Npanpiloos tias nws yuav tso lawv dim tiam sis nws paub tias yeej yuav nyuaj rau lawv heev thaum lub sij hawm ntawd los ze zuj zus. Nws faj lem tias ib tug vaj ntxwv uas muaj zog heev yuav tuaj ntaus tej teb chaws uas nyob ib ncig Npanpiloos tag ces nws mam li los ntaus Npanpiloos. (Yaxayas 41:2-5) Ua li puas tsim nyog rau cov Yudais ntshai? Yehauvas nplig nws cov tib neeg ua ntej lawm tias: “Nej tsis txhob ntshai, rau qhov kuv nrog nraim nej, kuv yog nej tus Vajtswv, nej tsis txhob poob siab.” (Nyeem Yaxayas 41:10-13.) Thaum Yehauvas hais tias “kuv yog nej tus Vajtswv,” yog nws hais li cas tiag? Qhov no tsis yog qhia tias kom cov Yudais nco ntsoov teev tiam Yehauvas tiam sis yog qhia rau lawv paub tias nws haj tseem nyob lawv sab thiab yuav pab lawv.​—Phau Ntawv Nkauj 118:6.

14. Yehauvas tau ua dab tsi ntxiv los pab kom cov Yudais tsis txhob ntshai?

¹⁴ Yehauvas pab kom cov uas poob mus ua cev qhev nco ntsoov tias nws muaj hwj chim npaum li cas thiab nws paub txhua yam xwv lawv lub siab thiaj tus. Nws hais kom lawv ntsia saum nruab ntug uas muaj tej hnub qub ya ua nrw niab. Nws qhia rau lawv tias nws yog tus tsim thiab tis npe rau txhua lub hnub qub. (Yaxayas 40:25-28) Yog Yehauvas twb paub tej hnub qub ces nws yeej yuav tsum paub txhua tus uas teev tiam nws lub npe! Tsis tas li ntawd, yog Yehauvas twb muaj hwj chim tsim tau tej hnub qub ces nws yeej muaj hwj chim pab tau nws cov tib neeg. Yog li ntawd, cov Yudais tsis tas txhawj thiab ntshai.

15. Yehauvas tau npaj cov Yudais li cas?

¹⁵ Yehauvas kuj npaj nws cov tib neeg rau tej yam uas yuav muaj tshwm sim rau yav tom ntej. Vajtswv hais rau nws cov tib neeg tias: “Nej cia li khiav rov qab mus rau hauv nej tej tsev thiab kaw qhovrooj rau. Nkaum tos kom Vajtswv txojkev chim dhau tso.” (Yaxayas 26:20) Tej zaum kuj muaj li no thaum Vaj Ntxwv Xailas tuaj ntaus Npanpiloos. Ib tug neeg Kilis uas tshawb keeb kwm hais tias thaum Xailas tuaj rau hauv Npanpiloos, nws “sam hwm kom nws cov tub rog muab txhua tus uas tsis nyob hauv lawv vaj lawv tsev tua huv tib si.” Ntshe thaum ntawd cov tib neeg Npanpiloos ntshai tshee hnyo! Tiam sis tej zaum cov Yudais dim vim lawv mloog Yehauvas tej lus qhia.

16. Vim li cas peb yuav tau tsis txhob txhawj ntshai txog tej yam uas yuav muaj tshwm sim yav tom ntej? (Saib daim duab.)

¹⁶ Peb khaws tau dab tsi? Tsis ntev tom ntej no yuav muaj kev txom nyem loj kawg nkaus uas tsis tau los raug tib neeg ib zaug li. Thaum tej no pib tshwm sim, tej tib neeg hauv lub qab ntuj no yuav yoob tas thiab ntshai kawg nkaus. Tiam sis Yehauvas cov tib neeg yuav tsis ntshai vim peb paub tias Yehauvas yog peb tus Vajtswv. Peb yuav tso siab plhuav tias “twb yuav txog lub sij hawm uas Vajtswv cawm [peb] dim.” (Lukas 21:28) Txawm ib tsoom teb chaws yuav sawv tawm tsam peb los, peb yuav sawv khov kho. Yehauvas yuav tso cov tub txib saum ntuj los tiv thaiv peb thiab nws yuav qhia seb peb yuav tsum tau ua li cas rau li cas peb thiaj dim. Nws ho qhia tau rau peb li cas? Peb yuav tau tos txog thaum ntawd. Tej zaud peb lub koom txoos mam li qhia seb peb yuav tau ua li cas thiab tej zaud qhov no yuav piv txwv txog qhov uas “mus rau hauv nej tej tsev.” Yuav kom peb npaj txhij rau yav tom ntej, peb yuav tau nrog cov kwv tij nkauj muam sib raug zoo kam tiag, mloog tej lus uas Yehauvas lub koom haum qhia, thiab ntseeg hais tias Yehauvas yog tus coj nws lub koom haum.​—Henplais 10:24, 25; 13:17.

17. Koj yuav cia Yehauvas nplig koj li cas?

¹⁷ Txawm tias lub neej nyob hauv Npanpiloos tsis yooj yim rau cov Yudais uas poob ua cev qhev los Yehauvas kuj nplig lawv txhua tus lub siab. Zoo ib yam li ntawd, Yehauvas kuj yuav nplig peb thiab. Txawm tag kis yuav muaj li cas los nco ntsoov Yehauvas thiab cia nws ua tus nplig koj. Tsis tas li ntawd, tso siab tias Yehauvas khuv leej koj heev, thiab tuav rawv koj txoj kev vam kev cia siab. Nco ntsoov tias Yehauvas yog koj tus Vajtswv ces koj tsis tas yuav txhawj ntshai ib yam dab tsi.