ZAJ KAWM 21
ZAJ NKAUJ 21 Xub Nrhiav Vajtswv Lub Nceeg Vaj
Tos Ntsoov Lub Nroog Uas Yuav Nyob Mus Ib Txhis
“Peb tabtom tos lub nroog uas Vajtswv ua rau peb nyob yav tom ntej no.”—HENPLAIS 13:14.
LUB NTSIAB RAU ZAJ NO
Peb yuav kawm Henplais tshooj 13 seb ho pab tau peb niaj hnub nim no thiab yav tom ntej li cas.
1. Yexus hais tias yuav muaj dab tsi tshwm sim rau lub nroog Yeluxalees?
UA NTEJ Yexus Khetos tuag, nws qhia ib zaj faj lem rau nws cov thwj tim paub. Zaj faj lem no twb muaj tshwm sim ib zaug rau thaum lub nroog Yeluxalees thiab lub tuam tsev raug puas tsuaj. Yexus ceeb toom tias ib hnub lawv yuav “pom yeeb ncuab tuaj ua yeej vij nkaus Yeluxalees.” (Lukas 21:20) Yexus qhia rau nws cov thwj tim tias thaum twg lawv pom tub rog, lawv yuav tau khiav tawm hauv Yudias thiab Yeluxalees tam sim ntawd. Yexus cov lus no yeej muaj tseeb tiag. Tom qab no Loos cov tub rog txawm tuaj vij lub nroog Yeluxalees tag.—Lukas 21:21, 22.
2. Tus tub txib Povlauj hais li cas rau cov ntseeg nyob hauv Yudias thiab Yeluxalees?
2 Ob peb xyoos ua ntej cov tub rog Loos tuaj vij lub nroog Yeluxalees, tus tub txib Povlauj sau ib tsab ntawv rau cov ntseeg nyob hauv Yudias thiab Yeluxalees. Tsab ntawv nws sau yog phau Henplais. Nws cov lus hauv tsab ntawv yog los mus txhawb kom lawv npaj rau tej yam tseem yuav muaj tuaj yav tom ntej. Tej yam uas yuav los raug lawv ntawd yog lub nroog Yeluxalees yuav raug puas tsuaj. Yuav kom cov ntseeg dim, lawv yuav tau tso lawv tej tsev thiab tej lag luam pov tseg rau tom qab. Povlauj sau li no txog lub nroog Yeluxalees tias: “Yeej tsis muaj ib lub nroog uas yuav nyob mus ibtxhis rau peb nyob.” Ces nws txhab lus ntxiv tias: “Tiamsis peb tabtom tos lub nroog uas Vajtswv ua rau peb nyob yav tom ntej no.”—Henplais 13:14.
3. “Lub nroog uas nyob mus ibtxhis” yog dab tsi, thiab vim li cas peb ho yuav tau tos rawv?
3 Thaum cov Khixatias txiav txim siab tawm hauv lub nroog Yeluxalees thiab Yudias, tej zaud muaj coob leej ntau tus kuj thuam thiab luag lawv. Tiam sis lawv qhov kev txiav txim siab no cawm tau lawv dim. Niaj hnub nim no peb kuj raug thuam vim peb tsis tso siab rau tib neeg los sis nrhiav lub neej kom zoo ua nyob rau hauv lub qab ntuj no. Tos peb txiav txim siab li no los vim peb paub tias lub sim ceeb no tsuas nyob ib vuag dua xwb. Peb tos ntsoov “lub nroog uas nyob mus ibtxhis” uas tab tom yuav los “yav tom ntej no.” Lub nroog ntawd yog Vajtswv lub Nceeg Vaj.a (Henplais 11:10; Mathais 6:33) Txhua lub ntsiab nyob hauv zaj kawm no yuav tham tias: (1) Povlauj cov lus pab kom cov Khixatias nyob thawj 100 xyoo tos ntsoov Vajtswv lub Nceeg Vaj li cas, (2) Povlauj npaj lawv lub siab rau tej yam yuav muaj los yav tom ntej li cas, thiab (3) Povlauj cov lus pab tau peb niaj hnub nim no li cas.
TSO SIAB RAU YEHAUVAS VIM NWS YUAV TSIS TSO KOJ TSEG
4. Vim li cas lub nroog Yeluxalees ho tseem ceeb ua luaj rau cov Khixatias?
4 Lub nroog Yeluxalees yeej tseem ceeb heev rau cov Khixatias. Thawj lub koom txoos yog pib ntawm lub nroog ntawd los txij xyoo 33 tom qab Yexus. Pab uas ntaus thawj kuj nyob rau hauv thiab. Muaj coob tus Khixatias kuj muaj vaj muaj tsev thiab muaj ub muaj no ntau heev. Txawm li ntawd los Yexus ceeb toom tias lawv yuav tau tawm hauv lub nroog Yeluxalees thiab Yudias mus.—Mathais 24:16.
5. Povlauj npaj cov Khixatias li cas rau tej yam yuav muaj yav tom ntej?
5 Povlauj xav pab cov Khixatias kom lawv thiaj txaus siab tawm ntawm lub nroog Yeluxalees mus. Nws thiaj pab kom lawv nkag siab tias Yehauvas xav li cas txog lub nroog ntawd. Povlauj qhia rau lawv tias Yehauvas tsis yuav cov pov thawj ntawm lub tuam tsev thiab tsis txais yuav tej khoom lawv muab fij rau nws lawm. (Henplais 8:13) Cov tib neeg feem coob hauv lub nroog tsis kam lees paub tus Mexiyas. Ntxiv ntawd, tib neeg kuj tsis mus pe hawm Yehauvas ntawm lub tuam tsev lawm ces yuav raug muab rhuav.—Lukas 13:34, 35.
6. Vim li cas cov Khixatias yuav tau nco ntsoov Povlauj cov lus hauv Henplais 13:5, 6?
6 Thaum Povlauj sau tsab ntawv no mus rau cov ntseeg uas hais lus Henplais, lub nroog Yeluxalees haj tseem vam meej ntxhias. Muaj ib tug neeg Loos uas sau keeb kwm tau hais tias “lub nroog Yeluxalees nto moo tshaj plaws rau sab hnub tuaj.” Cov Yudais uas nyob qhov txhia qhov chaw tuaj ua koob tsheej nyob rau ntawd txhua xyoo. Thaum lawv tuaj mas lawv siv nyiaj txiag ntau heev thiaj ua rau lub nroog ntawd vam meej. Vim muaj li no tej zaum cov Khixatias ib txhia kuj khwv tau nyiaj ntau heev thiab. Yog li ntawd, Povlauj thiaj li hais rau lawv tias: “Nej tsis txhob qaug rau nyiaj rau kub, nej muaj npaum li cas nej cia li zoo siab rau tej uas nej muaj.” Nws thiaj li hais kom lawv nco ntsoov Yehauvas cov lus tias: “Kuv yuav tsis tso koj tseg lossis kuv yuav tsis muab koj povtseg ib zaug li.” (Nyeem Henplais 13:5, 6; 2 Kevcai 31:6; Phau Ntawv Nkauj 118:6) Cov Khixatias uas nyob hauv Yeluxalees thiab Yudias yuav tau nco ntsoov Yehauvas cov lus no vim tsis ntev tom qab lawv txais Povlauj tsab ntawv tag, lawv yuav tau tso vaj tso tsev, lag luam, thiab lawv tej txhiam laj txhiam tam rau tom qab es mus pib dua ib lub neej tshiab rau lwm qhov.
7. Vim li cas peb yuav tau tso siab plhuav rau Yehauvas tam sim no?
7 Peb khaws tau li no: Tsis ntev tom ntej no txoj “kev txom nyem loj kawg nkaus” yuav los thiab lub sim ceeb no yuav kawg. (Mathais 24:21) Zoo ib yam li cov ntseeg hauv Yeluxalees, peb yuav tau tuav rawv peb txoj kev ntseeg tam sim no thiab npaj rau tej yam yuav muaj yav tom hauv ntej. (Lukas 21:34-36) Lub sij hawm thaum muaj txoj kev txom nyem loj kawg nkaus, tej zaud peb yuav tau tso ib txhia los sis tag nrho tej uas peb muaj pov tseg, thiab tso siab plhuav tias Yehauvas yeej yuav tsis tso peb tseg. Ua ntej hnub ntawd los txog, peb yuav tau coj lub neej uas qhia tias peb tso siab rau Yehauvas. Rov tshuaj koj tus kheej li no tias, ‘Kuv tej kev txiav txim siab thiab tej yam kuv ua rau yav tom ntej puas qhia tias kuv tsis tso siab rau nyiaj txiag tiam sis tso siab rau Yehauvas?’ (1 Timautes 6:17) Txawm tias cov ntseeg nyob txheej thaum ub tso tau yam ntxwv rau peb xyaum los txoj kev txom nyem loj kawg nkaus tom ntej no tseem yuav nyuaj tshaj li peb xav tau. Yog li ntawd, yuav ua li cas peb thiaj paub seb yuav coj li cas rau li cas thaum txoj kev txom nyem loj kawg nkaus pib?
MLOOG COV UAS COJ LUS
8. Yexus qhia li cas rau nws cov thwj tim?
8 Ob peb xyoos tom qab cov ntseeg txais tau Povlauj tsab ntawv, lawv txawm pom cov tub rog Loos tuaj vij lub nroog Yeluxalees. Thaum muaj li no ces cov ntseeg paub hais tias lawv yuav tau khiav tawm vim lub nroog Yeluxalees yuav raug puas tsuaj. (Mathais 24:3; Lukas 21:20, 24) Ua li lawv yuav khiav mus rau qhov twg thiaj zoo? Yexus hais tias: “Cov nyob hauv Yudias yuav tsum khiav tawm mus rau pem tej roob.” (Lukas 21:21) Tej roob ntau li ntau, ua li lawv yuav khiav mus rau lub roob twg?
9. Vim li cas cov Khixatias pheej xav seb lub roob twg zoo khiav rau? (Saib daim duab qhia teb chaws.)
9 Muaj roob ntau heev rau cov ntseeg khiav mus nyob. Xws li tej roob Xamalis, tej roob Kalilais, Roob Helemoos, tej roob Lenpanoos los sis tej roob nyob rau ntawm tus Dej Yaladees sab tid. (Saib daim duab qhia teb chaws.) Nyob rau cov roob no, kuj muaj zej zog ntxim li kuj tsis phom sij dab tsi. Hos lub nroog Kalas nyob siab siab puag saum ncov roob thiab tsis yooj yim mus rau ntawd. Muaj ib txhia kuj xav tias zoo rau lawv mus nyob rau ntawd. Tiam sis tom qab no cov Loos tuaj muab lub nroog ntawd ntaus thiab muab ua puas tsuaj tag. Tsis tas li ntawd, tib neeg los tuag coob heev.b
Muaj roob ntau heev rau cov ntseeg khiav mus nyob. Tiam sis tsis yog txhua lub roob yuav zoo rau lawv mus nyob (Saib nqe 9)
10-11. (1) Tej zaud Yehauvas coj cov ntseeg kev li cas? (Henplais 13:7, 17) (2) Qhov uas cov ntseeg mloog cov uas coj lus pab tau lawv li cas? (Saib daim duab.)
10 Yehauvas siv cov uas coj hauv lub koom txoos los coj cov ntseeg kev. Tom qab no ib tug neeg tshawb keeb kwm npe hu ua Uxenpias (Eusebius) sau hais tias: “Vajtswv qhia rau ib co kwv tij nyob hauv Yeluxalees kom coj cov ntseeg tawm hauv lub nroog Yeluxalees mus rau lub nroog Pelas uas nyob hauv Pelia. Zoo rau lawv mus rau lub nroog Pelas vim nyob tsis deb lub nroog Yeluxalees thiab cov tib neeg uas nyob ntawd feem coob tsis yog neeg Yudais ces lawv tsis tawm tsam cov Loos.—Saib daim duab qhia teb chaws.
11 Cov ntseeg uas khiav mus rau saum roob rau lub nroog Pelas mloog Povlauj cov lus uas nws hais rau lawv tias: “Nej yuav tsum mloog cov thawj uas saib xyuas nej tej lus.” (Nyeem Henplais 13:7, 17.) Vim lawv mloog cov uas coj hais, lawv thiaj dim. Qhov no qhia tias Yehauvas yeej tsis tso cov uas tos ntsoov “lub nroog uas nyob mus ibtxhis” uas yog Vajtswv lub Nceeg Vaj tseg.—Henplais 11:10.
Pelas yog ib qho chaw zoo rau cov Khixatias mus nyob (Saib nqe 10-11)
12-13. Yehauvas coj nws cov tib neeg kev li cas thaum muaj kev nyuaj siab?
12 Peb khaws tau li no: Yehauvas qhia ntxaws ntxaws rau cov uas coj nws cov tib neeg kev kom ua li cas rau li cas. Muaj ntau zaus hauv phau Vajlugkub qhia tias Yehauvas siv cov txiv neej uas muaj kev ntseeg los coj nws cov tib neeg rau thaum muaj kev nyuaj siab. (2 Kevcai 31:23; Phau Ntawv Nkauj 77:20) Niaj hnub nim no los peb yeej haj tseem pom quj qees tias Yehauvas siv cov uas coj los coj nws cov tib neeg kev.
13 Xws li thaum muaj tus kab mob Khaus Viv-19 (COVID-19), cov kwv tij uas coj yeej qhia tej koom txoos seb yuav ua li cas rau li cas. Cov kwv tij no qhia rau cov txwj laus seb yuav sib txoos li cas thiaj teev tiam tau Yehauvas. Ob peb lub hlis tom qab ntawd, peb muaj rooj sib txoos ua 500 tawm yam lus. Cov kwv tij nkauj muam yeej pom los sis mloog tau lub rooj sib txoos saum huab saum cua, this vis (TV) los sis hauv xov tooj cua. Yehauvas yeej pub kom peb muaj txaus nkaus los mus tsav peb txoj kev ntseeg. Qhov no pab tau kom sawv daws sib koom siab. Yog li ntawd, peb tso siab plhuav tias txawm yuav muaj dab tsi los raug peb yav tom ntej los Yehauvas yeej yuav siv cov coj los qhia peb seb yuav ua li cas. Peb yuav tau muaj tej cwj pwm twg ntxiv xwv thiaj pab tau peb thaum muaj txoj kev txom nyem loj kawg nkaus?
MUAJ KEV HLUB THIAB TOS TXAIS QHUA
14. Raws li Henplais 13:1-3, cov Khixatias yuav tau coj li cas ua ntej lub nroog Yeluxalees raug puas tsuaj?
14 Thaum txoj kev txom nyem loj kawg nkaus pib, peb ib leeg yuav tsum hlub ib leeg tshaj qhov qub. Peb yuav tau xyaum cov Khixatias uas nyob rau hauv Yeluxalees thiab Yudias. Cov ntseeg ntawd yeej ib txwm sib hlub. (Henplais 10:32-34) Tiam sis ob peb xyoos ua ntej lub nroog Yeluxalees raug puas tsuaj, cov ntseeg “ib tug yuav tsum hlub ib tug ib yam li kwvtij sib hlub” thiab txawj “hu tej qhua” tshaj dua qub.c (Nyeem Henplais 13:1-3.) Thaum lub sim ceeb no yuav xaus zuj zus, peb yuav tau huab yam hlub cov kwv tij nkauj muam tshaj qhov qub.
15. Vim li cas cov Khixatias yuav tau txawj sib hlub thiab txawj tos txais qhua thaum lawv khiav tawm?
15 Thaum cov tub rog Loos tuaj vij lub nroog Yeluxalees thiab lawv ho rov qab mus lawm, cov Khixatias yaws khaub yaws tsuag, nqa tau ob peb nyuag yam nrog lawv mus xwb. (Mathais 24:17, 18) Lawv ib leeg yeej vam khom ib leeg thaum lawv mus rau puag saum roob thiab mus nyob rau qhov chaw tshiab. Muaj tej tug Khixatias tsis muaj zaub mov noj, khaub ncaws hnav, thiab chaw nyob. Ces cov uas ib leeg nqa tau ib yam kuj muab coj los sib faib kom sawv daws tau noj tau hnav. Tej ntwb ntu zoo li no lawv yuav tsum txawj sib hlub sib pab thiab txawj tos txais qhua.—Titus 3:14.
16. Peb yuav pab cov kwv tij nkauj muam uas xav tau kev pab li cas? (Saib daim duab.)
16 Peb khaws tau li no: Thaum cov kwv tij nkauj muam xav tau kev pab, txoj kev hlub yuav pab kom peb txav nuag mus pab lawv. Xws li muaj coob leej ntau tus yeej txaus siab hlo pab cov kwv tij nkauj muam uas yog neeg thoj nam vim lawv tau khiav tsov khiav rog los sis raug xwm txheej kom muaj txawm peem thiab rau siab ntso teev tiam Yehauvas. Muaj ib tug muam uas yog neeg Yus Khees (Ukrainian) tau khiav tsov rog thiab poob vaj poob tsev tag hais tias: “Peb yeej pom Yehauvas siv cov kwv tij nkauj muam tuaj coj peb txoj hau kev thiab saib xyuas peb. Lawv tos txais peb zoo heev hauv Yus Khees (Ukraine), Hankalis (Hungary), thiab Ntsaws Mes Nis (Germany).” Yog peb tos txais cov kwv tij nkauj muam thiab saib xyuas lawv ces twb yog peb koom tes nrog Yehauvas ua hauj lwm ua ke.—Pajlug 19:17; 2 Kauleethaus 1:3, 4.
Niaj hnub no peb yuav tau cev tes pab cov Khixatias uas yog neeg thoj nam (Saib nqe 16)
17. Vim li cas peb yuav tau xyaum kom txawj sib hlub sib pab thiab txawj tos txais qhua tam sim no?
17 Thaum muaj txoj kev txom nyem loj kawg nkaus, peb ib leeg haj yam yuav vam khom ib leeg heev tshaj qhov qub. (Hanpakus 3:16-18) Niaj hnub nim no Yehauvas tab tom cob qhia kom peb txawj sib hlub sib pab thiab txawj tos txais qhua xwv lwm hnub peb thiaj txawj ua li no yav tom ntej.
YUAV MUAJ DAB TSI TSHWM SIM TOM NTEJ?
18. Peb yuav yoog cov Khixatias uas khiav tawm hauv lub nroog Yeluxalees li cas?
18 Cov Khixatias uas mloog thiab khiav mus rau saum roob puav leej dim thaum lub nroog Yeluxalees raug puas tsuaj. Txawm lawv khiav thiab tsis nyob hauv lub nroog lawm los Yehauvas haj tseem saib xyuas lawv. Peb khaws tau tej no li cas? Peb tsis paub hais tias yuav muaj li cas tshwm sim rau yav tom ntej tiam sis Yexus ceeb toom kom peb yuav tsum zov tos. (Lukas 12:40) Tsis tas li ntawd, peb kuj muaj tsab ntawv uas Povlauj sau rau cov ntseeg uas hais lus Henplais los pab peb. Ntxiv ntawd, Yehauvas cog lus tias nws yuav tsis tso peb tseg thiab tsis muab peb pov tseg. (Henplais 13:5, 6) Cia peb tos ntsoov Vajtswv lub Nceeg Vaj uas yog lub nroog uas yuav nyob mus ib txhis. Yog peb ua li no ces peb yuav tau txais koob hmoov mus ib txhiab ib txhis.—Mathais 25:34.
ZAJ NKAUJ 157 Nyob Thaj Yeeb
a Nyob rau puag txheej thaum ub, tej nroog puav leej muaj ib tug vaj ntxwv kav. Tej lub nroog li no kuj muab suav tias yog ib lub nceeg vaj.—Chivkeeb 14:2.
b Tsis ntev tom qab cov ntseeg khiav tawm hauv Yudias thiab Yeluxalees tag lawm, cov Loos txawm tuaj ntaus lub nroog Kalas rau xyoo 67 tom qab Yexus.
c Thaum Povlauj hais txog “kwvtij sib hlub,” tsis yog nws hais rau tej nruab ze tiam sis yog nws hais txog cov kwv tij nkauj muam hauv lub koom txoos thiab kom sib hlub tam li ib tse neeg.