Revareva Ginigunana Tesalonika Taudia Dekenai

5 Tadikaka e, do idia vara gaudia edia nega bona abia hidi dinadia totona umui dekenai revareva ai torea be anina lasi. 2 Badina umui diba goevagoeva, Iehova* ena dina+ be do ia mai, henaohenao tauna be hanuaboi ai ia mai bamona.+ 3 Inai hereva, “Maino bona noho namo!” idia gwauraia neganai, karaharaga dika bada herea be idia latanai do ia ginidae,+ rogorogo hahinena ese mara ena hisihisi ia abia bamona, bona do idia heau mauri diba lasi. 4 To tadikaka e, umui be dibura lalonai umui noho lasi dainai, unai dina dekenai do umui hoa lasi, henaohenao tauna be dina ena diari dekenai ia hoa bamona, 5 badina umui ibounai be diari ena natudia bona dina ena natudia.+ Ita be hanuaboi eiava dibura taudia lasi.+

6 Unai dainai, namo lasi ita mahuta noho, haida idia mahuta bamona,+ to namona be ita noga noho+ bona ita laloa maoromaoro noho.+ 7 Badina mahuta taudia be hanuaboi lalonai idia mahuta, bona inuinu kekero taudia be hanuaboi lalonai idia kekero.+ 8 To ita be dina taudia dainai, namona be ita laloa maoromaoro noho bona abidadama bona lalokau be iseda kemena ena auri dabua bamona ita atoa, bona hahemauri helarona be kwara gauna bamona ita atoa.+ 9 Badina Dirava ese ita ia panisia totona ita ia abia hidi lasi, to iseda Lohiabada Iesu Keriso amo hahemauri ita abia totona ita ia abia hidi.+ 10 Ia be ita dainai ia mase,+ unai dainai herevana ita noga eiava ita mahuta,* ita be ia ida do ita noho hebou.+ 11 Unai dainai ta ta do umui durua bona ta ta do umui hagoadaia noho,+ hari umui karaia noho bamona.

12 Tadikaka e, hari umui ai noia umui huanai idia gaukara goada bona Lohiabada ena gaukara lalonai umui idia naria bona sisiba henia noho taudia do umui matauraia. 13 Bona edia gaukara dainai, idia do umui lalokau henia bona do umui lalodia bada.+ Ta ta ida maino ai do umui noho.+ 14 To tadikaka bona taihu e, umui ai hagoadaia, gwau-edeede taudia do umui sisiba henia,+ lalometau* taudia do umui hagoadaia, manoka taudia do umui durua bona ibounai dekenai do umui haheauka.+ 15 Bona umui naria namonamo, namo lasi umui ta ese ma ta ena dika davana ia henia,+ to nega ibounai umui ta ta dekenai bona taunimanima ibounai dekenai kara namo do umui karaia.+

16 Nega ibounai umui moale noho.+ 17 Nega ibounai umui guriguri.+ 18 Gau ibounai dainai Dirava do umui tanikiu henia.+ Unai be Dirava ena ura Keriso Iesu idia badinaia taudia totona. 19 Lauma helaga ena lahi umui habodoa lasi.+ 20 Namo lasi umui laloa peroveta herevadia be anina lasi.+ 21 Namona be gau ibounai umui tahua namonamo+ bona gau namodia do umui dogoatao auka. 22 Kara dika idauidau do umui dadaraia.+

23 Mani maino Diravana ese ena hesiai gaukara totona umui ia hahelagaia momokani. Bona mani iseda Lohiabada Iesu Keriso ena noho negana ai umui hahedinaraia lalohadai, emui mauri,* bona emui tauanina idia helaga noho.+ 24 Umui ia boiria noho tauna be hanaihanai ena hereva ia badinaia, bona do ia hagugurua momokani.

25 Tadikaka e, ai totona umui guriguri noho.+

26 Tadikaka ibounai do umui hanamoa mai kisi helagana ida.

27 Lohiabada ena ladanai umui dekenai inai maduna badana lau henia, tadikaka ibounai dekenai inai revareva do umui duahia.+

28 Mani iseda Lohiabada Iesu Keriso ena hebogahisi hereadaena be umui latanai ia noho.