Duahiduahi ese Oiemu Aonega Ia Habadaia

OI URA oi loaloa gabu daudau dekenai bona taunimanima idauidau oi davaria bona edia mauri dalana oi itaia, a? Eiava oi ura sinavai badadia, ororo badadia, mauri gaudia, hegeregere manu bona tubutubu gaudia oi dibaia, a? O oi ura davara ena dobu masemase lalonai oi paudobi, a? Reana oi ura oi lao hua bona hisiu dekenai, a? Eiava oi ura harana, matana, bona kudouna edia gaukara dalana oi dibaia o natudia edia vara dalana oi itaia, a? O reana oi ura oi giroa lou bona gunaguna sene taudia edia kara bona mauri dalana oi dibaia totona, a?

Unai hoa sivaraidia idauidau be buka momo lalodiai oi duahidia diba. Bema oi duahiduahi diba neganai, unai sivarai iboudiai oi duahidia diba to oiemu ruma do oi rakatania lasi unai gau idauidau dibaia totona. Buka Helaga ia hereva hegeregerena: “Buka momo torea gaukara ia ore diba lasi.” (Kohelete 12:12) Buka duahiduahi namonamo karana ese oiemu aonega bona diba ia habadaia, bona sivarai idauidau momo do oi diba.

Inai Hekwakwanai Oi Hanamoa be Namo

To madi, tanobada hegegemadai lalonai taunimanima 800 milion bamona, edia mauri lagani 15 amo ia daekau be idia duahiduahi bona toretore diba lasi. Unai ese edia diba bona aonega ia habadaia lasi. Danu, sibodia idia lalohadai namonamo diba lasi dainai, duahiduahi taudia dekenai idia lao heduru abia totona, bona nega momo duahiduahi diba taudia ese duahiduahi diba lasi taudia idia koidia.

Danu, emu gaukara ibounai lalonai do oi hekwarahi diba bema duahiduahi dalana oi diba lasi neganai. Hegeregere, bema oi be tano haida dekenai oi loaloa neganai, dala ena ladana, basi bona train abia gabudia bona peleini ena diho gabudia do oi diba lasi. Bema duahiduahi bona toretore oi diba lasi, nega momo ma taunimanima haida do oi nanadaia oiemu pepa idia duahidia eiava idia toredia totona. Duahiduahi idia diba lasi sinadia ese muramura eiava aniani kereredia edia natudia dekenai idia henidia diba bona unai ese gorere dika eiava mase ia havaraia diba.

Momokani, bema duahiduahi bona toretore oi diba lasi neganai, unai ese hekwakwanai bada ia havaraia diba. To, bema heduru oi abia neganai unai hekwakwanai oi hanamoa diba. Hegeregere, hahine buruka ta ena ladana be Mareta. Ena lagani be 70, to ia matakepulu lagani 20 bamona bona tanobada ena diari bona hairai gaudia idauidau ia laloatao namonamo diba lasi. Bena doketa ta ese ena matana ia gaukaralaia bona ia hanamoa. Unai ese Mareta ena matana ia kehoa bona gau idauidau mai edia hairai ia itaia diba bona danu ia duahiduahi lou diba. Ma sivarai ta be tau burukana ta ladana Kalu, ena lagani be 70. Kalu be tau matamata neganai ia be duahiduahi bona toretore ia diba lasi. Unai dainai ia lao duahiduahi bona toretore sikuli dekenai, bona hari ia be gado toi dekenai ia duahiduahi bona ia toretore diba.

Taunimanima momo lasi be Mareta bamona, to momo herea be Kalu bamona. Guna, idia diba lasi duahiduahi bona toretore ena kara dekenai, to hari idia diba vadaeni. Momokani, unai bamona kara be do ia vara haraga lasi, to oi be nega sisina bada lalonai do oi hekwarahi bona gau badana momokani be hagoadaia hereva bona heduru oi abia. Ta oi durua diba, a? Tanobada idauidau lalonai Iehova ena Witness taudia be duahiduahi bona toretore sikuli idia karaia edia orea taudia durudia totona, hegeregere Kalu bamona. Unai dainai Iehova ena Witness taudia momo be idia duahiduahi bona idia toretore diba. Hegeregere, Nigeria ena tano lalonai, Iehova ena Witness taudia momo herea ese ma taunimanima haida idia hereadia duahiduahi bona toretore amo.

Duahiduahi Tauna Namona ai Oi Lao

To, sedira oi be duahiduahi ena dala oi diba. To, oi be duahiduahi tauna namona, a? Reana nega momo oi duahiduahi neganai oi hekwarahi bada bona sivarai oi duahia ore lasi, to huanai oi hadokoa bona oi giroa lou matamaia gabuna dekenai. O sedira nega haida oi be hereva haida oi gwauraia namonamo diba lasi eiava edia anina oi lalo-pararalaia namonamo lasi. Unai bamona hekwakwanaidia oi hanamodia diba, a?

Kekeni matamata ladana Beatrice ena lagani be 13 bona ia be hereva idauidau ia hakapudia diba lalohadai idauidaudia danu. To, ia be unai herevadia ia gwauraia namonamo diba lasi. Hegeregere, bema ia be inai hereva “tau” ia itaia neganai, ia gwau “tau ta” eiava “ruma” be ia gwau “daiutu.” Bena tau ta ese ia hadibaia hereva ta ta ia duahiduahi namonamo totona. Hegeregere, hereva ta ta ena rege bona ena toana ia itaia namonamo guna bena gabeai ia duahia. Danu, unai tauna be Beatrice ia hagoadaia Lauegu Bible Sivarai Buka ena teipi ia kamonai henia bona buka ia duahia danu.a Unai kara ia karaia dainai, iena duahiduahi be ia namo ia lao bona hereva idauidau dekenai ia lalo-parara. Danu, ia be hereva ta ta ia gwauraia namonamo bona hari ia be duahiduahi dekenai moale bada ia davaria.

Sedira, oi danu oiemu duahiduahi dalana oi ura oi hanamoa. Oi be inai sivarai oi duahia noho dainai oi diba vadaeni dahaka gau ai herevalaia noho. Namona be unai aonega kara oi gaukaralaia. Hegeregere, inai hereva bamona: “Hereva,” oi itaia neganai, oi hamakohia sisina inai bamona (he-re-va), bena gabeai oi hakapua nega tamona bona oi gwauraia. Namona be unai bamona oi karaia ma hereva haida dekenai bona oi karaia loulou. Danu hereva latadia edia toana oi laloatao badina oi itadia neganai do oi diba maoromaoro unai hereva be dahaka bona do oi daradara lasi, to do oi gwauraia sibona.

Duahiduahi taudia namodia be hereva ta ta idia duahia metairametaira lasi, to idia be unai hereva ta ta idia hakapua nega tamona bona idia duahidia. Unai dainai, namona be hereva tamona tamona ita itaia lasi. To, iseda matana amo unai hereva ta ta ita itaia neganai ita diba vadaeni unai hereva iboudiai be dahaka bona ita duahidia diba. Bema unai kara oi karaia loulou, oiemu duahiduahi dala do ia namo ia lao. To, oi naria namonamo, badina namo lasi nega haida oiemu duahiduahi oi hadokoa huana dekenai bona oi giroa lou matamaia gabuna dekenai. Unai ese oiemu duahiduahi dala bona oiemu lalo-parara duahiduahi dekenai ia hadikaia. Unai dainai, namona be oi duahia ore herevadia oi itadia lou lasi, to oiemu vairanai idia noho herevadia oi itadia bona oi duahidia sibona.

Ena be oi be duahiduahi tauna namona, to ma kara haida idia noho heduru oi abia totona, unai amo duahiduahi tauna namo hereana ai oi lao diba. Unai gaudia be, hereva ta ta gwauraia namonamo bona sivarai oi duahia bona oi laloatao diba. Danu oi manada lasi herevadia edia anidia oi tahua bona oi lalo-pararalaia. Unai bamona karadia oi karaia be mai anina bada. Maua lalonai idia noho herevadia ma haida ese oi idia durua diba. Namona be sibona oi hahegeregerea inai herevadia amo.

Mai Ena Anina Bukadia Oi Abidia Hidi

Duahiduahi ena dala oi diba namonamo neganai, oiemu aonega do ia habadaia bona tanobada ena sivarai idauidau bona ma gau idauidau momo do oi diba. Unai sivarai ibounai do oi abidia diba badina idia be buka lalodiai. Momokani, oi be sivarai idauidau oi abidia diba televisen bona video amo, to duahiduahi ese oiemu harana bona lalona ia hagaukaraia. Danu, sibona oi lalohadailaia namonamo diba bona oiemu lalona ena hereva oi gwauraia namonamo diba. Unai sibona lasi, to unai sivarai ibounai oi lalodia tao bona hereva idauidau oi toredia diba bona unai amo ma taunimanima haida ese oi do idia ura henia badina oi be mai anina sivaraidia oi diba bona oi kikilaia diba.

To, sivarai momo herea idia noho dainai, edeseni ita matamaia diba? Kohelete 12:12 lalonai ia gwau: “Buka momo toredia be dokona lasi,” bona ena dokona kahana ia gwau: “Duahidia momo karana ese hesiku ia havaraia.” Oi be buka iboudiai oi duahidia diba lasi bona buka haida be mai anina bada lasi bona momokani lasi. Unai dainai, duahiduahi gaudia oi tahudia neganai, namona be buka mai anina bona heduru gaudia sibona oi abidia hidi. Buka namodia sibona oi duahia, hegeregere, oiemu kara do ia hanamoa eiava oiemu moni gaukara durua dalana, o sikuli lalonai eiava oiemu ruma bese durua dalana. Oiemu aonega oi habadaia diba bema tanobada ena sivarai idauidau oi duahidia neganai, hegeregere Noga! magasin bamona. Unai magasin ese tanobada ena sivarai idauidau ia herevalaia.

Bema aonega dalana dekenai oiemu duahiduahi bukadia oi abia hidi neganai, anina bada gaudia do oi davaria diba. Hegeregere, aonega habadaia gaudia, tauanina durua gaudia bona gau badana be lauma gaudia amo do oi goada diba. Unai dainai, gau badana be oiemu duahiduahi gaudia oi abia hidi namonamo bona nega oi atoa unai bukadia oi duahidia totona. Oiemu ruma dekenai oi duahiduahi diba eiava oi sipeli neganai, eiava bema basi oi naria neganai. Namona be oi duahiduahi badina unai ese oiemu aonega do ia habadaia.

[Footnotes]

[Box on page 27]

Oiemu Lalo-Parara Hanamoa Dalana

● Bema oi duahiduahi neganai, oi duahia noho gaudia oi lalohadailaia namonamo bona oi duahia herevana ena anina oi tahua danu.

● Oi duahia bukana ena sinado oi laloa bona dahaka ia herevalaia oi laloatao.

● Paragraf idauidau oi duahia neganai, oi hahegeregerea buka ena sinado danu.

● Oi diba vadaeni herevadia be oi duahia bukana danu oi hatamonaia.

● Oi duahia gaudia oi gaukaralaia oiemu mauri lalonai.

Oi Manada Lasi Herevadia Dekenai Oiemu Diba Oi Habadaia

● Maka oi atoa oi manada lasi herevadia dekenai.

● Duahiduahi lalonai oi manada lasi herevadia edia gaukara dalana oi tahua.

● Unai hereva edia anina oi tahua dikseneri lalonai.

● Hereva ta ta oi gwauraia maoromaoro.

● Unai hereva idauidau oi herevalaia ma taunimanima haida danu oi kiki neganai.