Lalokau Ia Vara—Bena Ia Ore Lasi!

“BEIBI ta ia vara neganai, ia noga momokani bona ia dekenai idia vara gaudia edia mamina ia abia. Ena sinana ena kara dainai kara haida ia karaia. . . . Ena sinana ena vairana ia raraia.” Doketa Cecilia McCarton ena hereva be unai. Hahine be ena beibi ida idia itaia heheni negana ginigunana ai, idia lalokau heheni matamaia!

Bema hahine be hekodo ia abia guna lasi o hamahutaia muramurana ia inua guna lasi, ia mara neganai ia bona ena natuna edia lalodia idia noga, bena unai nega amo ruaosi idia hegui hebou. Beibi ena taitai dainai ena sinana ese rata ia karaia. Ena kopina ia dauatao neganai, unai ese ena rara aru ia hamaragia. Beibi ia vara neganai, kara haida ia karaia diba, ena sinana ena lalokau ia dekenai havaraia totona​—⁠ia taitai, ia topoa, regerege idauidau ia halasia, ia kiri, bona ena aena ia negea mai ena moale bada ida. Beibi be ena sinana dekenai ia tabekau dainai, lalokau bona abidadama edia mamina ia manadalaia. Bena ena be ia ese ena tamana ia lalokau henia lasi ena sinana ia lalokau henia hegeregerena, to ia dekenai danu ia tabekau haraga, bona ena tamana ena kara ia dekenai be mai anina bada. Ia gilia bona ia gadara henia negadiai, ia kiri bona ia marere momo.

Doketa Richard Restak ia gwau, hahine ese ena vara matamata natuna ia rosia bona ena kopina ia dauatao karana be ubua bona hatubua muramurana bamona. Beibi be rata ia inua bona hodahoda ia abia be namo; unai hegeregerena, ena sinana ese ia dauatao be namo. Ia rosia neganai, unai ese dala idauidau momo amo ena lalona bona ena tauanina ia hanamoa. Unai kara dainai beibi ena kwara harana ena toana ia idau ia lao.

Naria, Ena Lalona Do Ia Dika Garina

Hahine ia mara murinai, pura momo lalodiai ia be ena beibi ida nega momo idia kara heheni diba mai edia lalokau ida; unai kara ese idia guidia hebou momokani. To bema nega daudau lalonai hahine ta ese ena beibi ia dadaraia, dika do ia vara diba. Doketa Restak ia gwau: “Ena be iseda mauri negana ibounai lalonai haida edia hebamo ita abia be namo, to ta ena mauri laganina ginigunana lalonai unai be mai anina bada. Bema beibi ta oi dadaraia dainai diari ia abia lasi, taunimanima ta ena vairana ia raraia diba lasi, bona ta ese ia abia isi, ia rosia, ia hereva henia, ia gadara henia, bona ia dauatao karadia edia moale bema ia abia diba lasi, unai hedadarai karana ia haheaukalaia diba lasi.”

Nega momo beibi ia tai, badina be ia ura ta ese do ia hereva henia o do ia kara henia. Bema unai ia vara lasi, reana ena tai do ia hadokoa. Ia laloa ia naria tauna ese ia kamonai henia lasi. Bena ia tai lou. Bema ia mai lasi, ia lalohisihisi. Bena ena tai ia habadaia. Bema gau ta ia vara lasi, ia lalohisihisi, badina be ia laloa ia ese ia dadaraia. Matamanai ia badu, bena dokonai ia lalo-hesiku. Lalokau ia abia lasi dainai, taunimanima lalokau henidia dalana ia dibalaia lasi. Ena lalona ia tubu lasi. Ta ia abidadama henia lasi bona ta ena namo ia tahua lasi. Gabeai, ia be mero o kekeni dikana ai ia lao, eiava iena lalona ia dika momokani dainai raskol karadia ia karaia murinai ia sori diba lasi.

Namona be emu natudia oi lalokau henidia, oi itadia negana ginigunana amo ela bona hanaihanai, hereva amo sibona lasi to kara amo danu. “Namo ita lalokau henia, hereva sibona dekena amo lasi, to mai kara bona mai momokani danu.” (1 Ioane 3:18) Oi rosidia momo bona oi kisi henidia momo. Idia do maragi neganai, Dirava ena Hereva, Baibel, oi hadibalaidia. Bena emu natudia be Timoteo hegeregerena ai do idia lao: “Oi be mero maragi neganai Buka Helagadia dekenai oi manada vadaeni. Inai Buka Helagadia ese oi dekenai aonega idia henia diba.” (2 Timoteo 3:15) Dina dina iboudiai oi bamodia, idia maragi negana amo ela bona idia bada. “Inai hereva, hari dina ai oi lau haganilaia herevadia, be oiemu lalona ai do idia noho be namo; bona oiemu natuna danu oi hadibalaia mai emu goada ida; ruma ai oi helai negadiai, bona dala ai oi raka negadiai, bona oi hekure negadiai, bona oi toreisi negadiai, oi herevalaidia.”​—⁠Deuteronomi 6:​6, 7.

‘Reana Do Ai Tai, to Unai be Namo’

Tama sina ese edia natudia idia lalokau henidia dainai, idia matahakani henidia maoromaoro be namo. Kekeni maragina ta be unai ia lalo-pararalaia dainai, kadi ta ia karaia iena sinana ena, bona inai hereva ia torea: “Sinagu Enai, Hahine Namona Enai.” Dina, manu, bona palaoapalaoa edia laulau amo kadi ia hahairaia, bona inai hereva be ia latanai ia torea: “Inai ai torea, badina be ai ibounai ese oi ai lalokau henia dainai. . . . Ai kara dika neganai ai oi dadabaia. Reana ai tai, to ai diba unai ese namo do ia havaraia. . . . Oi lau lalokau henia bada. Tanikiu, lau oi durua momo dainai. Lalokau bona kisi. [Ia sainia] Michele.”

Michele ese Hereva Lada-isidia 13:24 ia hamomokania: “Ena kwadia auna ia gaukaralaia lasi tauna ese ena natuna ia inai henia, to ena natuna ia lalokau henia tauna ese ia matahakani henia.” Au be tama ena siahu toana; ia gaukaralaia, anina ta be ena natuna ia dadabaia, to nega momo ena anina be unai lasi. Ena natuna bona edia kerere be idauidau, unai dainai dala idauidau amo ia matahakani henidia be namo. Reana ta ia gwau henia mai ena hebogahisi ida be hegeregere; ma ta ia panisia bada be namo, ia gwau-edeede noho dainai: “Sisiba herevana aukana tamona ese lalo-parara tauna ena lalona ia gwadaia dobu, to hekwadi 100 ese kavakava tauna idia haberoa lasi.” Ma danu: “Hesiai tauna [eiava, mero] be hereva amo mo ena matana do oi hakania diba lasi, badina be ena lalona ia parara, to ia kamonai lasi.”​—⁠Hereva Lada-isidia 17:10; 29:19.

Baibel lalonai, inai hereva “matahakani” anina be hadibaia, gwau henia​—⁠reana dadabaia danu, kara hamaoromaoroa totona. Heberu 12:11 ese ena badina ia hahedinaraia: “Gabeai, inai matakani ese idia ia hamaoromaoroa vadaeni taudia ese kara maoromaoro ena davana namona mai maino danu do idia davaria.” Namona be tama sina idia dagedage lasi. “Tamana bona sinana, emui natudia do umui habadua kava lasi, do idia hesiku garina.” (Kolose 3:21) To namona be idia kahudia nege lasi, sibodia edia ura do idia karaia totona. “Idia biagua lasi merona ese ena sinana do ia hahemaraia.”​—⁠Hereva Lada-isidia 29:15.

U.S.News & World Report, August 7, 1989, ena hereva maorona be inai: “Tama sina, edia natudia idia panisidia auka lasi to taravatu na idia dekediai idia atodia bena idia badinadia taudia, edia natudia momo idia kwalimu momokani bona taunimanima ese idia lalo-namo henidia.” Ma ia gwau: ‘Ia hedinarai goevagoeva gauna be inai: Ruma bese ta ta lalodiai lalokau bona abidadama bona taravatu maorodia idia haginidia be mai anina bada. . . . Matahakani ena anina korikori be, gwau-edeede memero kekenidia panisidia totona lasi, to hadibadia bona hakaudia bona durudia, sibodia edia lalodia do idia biagudia totona.’

Emu Hereva Idia Kamonai, Emu Kara Idia Tohotohoa

The Atlantic Monthly lalonai idia gwau: “Tama sina ese edia natuna idia henia taravatudia bema idia ruaosi danu ese idia badinadia neganai sibona, ita gwau diba ia be kara maoromaoro do ia karaia reana.” Ma idia hahedinaraia ta ese ena lalona ia biagua be namo; idia gwau: “Memero bona kekeni badadia, kara maoromaoro taudia, momo edia tamadia sinadia be lalo-goada taudia, kara maoromaoro taudia, sibodia edia lalodia idia biagudia taudia​—⁠idia abia dae taravatudia idia badinadia, bona edia natudia idia hagoadadia, idia danu be unai bamona do idia karaia totona. . . . Unai memero kekeni namodia be memero kekeni dikadia edia hebamo ese ia hakereredia daudau lasi, badina be edia tamadia sinadia edia lalohadai be edia lalodia ai idia abidia dae vaitani dainai.” Unai ese hereva lada-isina ta ia hamomokania: “Mero ena raka dalana oi hadibalaia, bena ia buruka neganai do ia rakatania lasi.”​—⁠Hereva Lada-isidia 22:⁠6.

Tama sina haida, taravatu maorodia na edia natudia idia hadibalaidia toho to unai taravatu be idia sibodia ese idia badinadia lasi taudia, be idia kwalimu lasi, badina be edia natudia ese unai taravatu idia abidia dae momokani diba lasi.

Unai ese toretore tauna James Baldwin ena hereva ia hamomokania: “Memero kekeni ese taunimanima badadia idia kamonai henidia namonamo lasi, to nega ibounai idia tohotohodia.” Bema emu natudia oi lalokau henidia bona oi ura taravatu maorodia do oi hadibalaidia, namona be sibomu emu kara amo oi haheitalaidia. Farisea taudia bamona oi karaia lasi; Iesu ese ia gwauraidia dika, ia gwau: “Do idia hereva henia gaudia be do umui badinaia bona do umui karaia. To idia karaia bamona do umui karaia lasi. Badina be idia hereva, to idia karaia lasi.” (Mataio 23:⁠3) Eiava aposetolo Paulo ese ia gwau henidia taudia bamona; ia gwau: “Taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, ‘Henaoa lasi,’ to umui be umui henaoa, a?”​—⁠Roma 2:21.

Hari inai negai taunimanima momo ese Baibel bona ena sisiba herevadia idia dadaraidia. To Iesu ese edia lalohadai be inai hereva amo ia hakoikoia: “Dirava ena aonega idia abia dae taudia ese Dirava ena aonega idia hamomokania vadaeni.” (Luka 7:35) Inai hereva murinai ai torea sivaraidia ese ena hereva idia hamomokania.

[Picture on page 7]

Ena sinana ena hebamo dainai beibi ena lalona ia goada ia lao

[Picture on page 8]

Tamana ena hebamo danu be mai anina bada