Guna Idia Gwauraia Soviet Union Tanodia ai Baibel Bukadia Idia Laloa Bada

Noga! toretore tauna Russia ai ese ia torea

LAGANI 1991 ena matamana ai, Soviet Union lalonai be Russia bona ma ripablik 14. Unai murinai unai ripablik be independens idia abia. To Russia ena bada bona ena taunimanima edia momo ese idia iboudiai edia ia hanaia. September 1994 ai, Russia bona unai tano oredia ai, Iehova ena Witness taudia 117,276 ese Baibel ena hereva momokanidia be edia dekena taudia dekenai idia harorolaia.

Hari inai negai, hua ta ta iboudiai Gima Kohorona bona Noga! magasin momo herea be Russia gado ai idia printaia, unai tano iboudiai ai do idia iusilaia totona. Inai danu, pepapepa bona buka momo herea be unuseniai idia hariharilaia. Russia ai, Iehova ena Witness taudia edia opesi be St. Petersburg kahirakahira ai. Unuseniai idia abia revarevadia ese idia hahedinaraia taunimanima ese unai Baibel gwauraia gaudia idia laloa bada.

Magasin mai Edia Kala Idia Laloa Bada

Tau ta ese Siberia amo ia tore henidia, ia gwau: “Gaukara gabuna ai Gima Kohorona be egu bamona ena imana ai lau itaia. Lau noia lau dekenai do ia hahedinaraia. Ena laulau mai edia kala lau itaia guna. Bena lau duahia . . . ela bona ena hereva iboudiai lau duahia ore. Henanadai ia gwauraidia dalana be namo herea.”

Siberia ai ia noho tauna ma ta ia gwau: “Emui magasin ta lau davaria. Lau ura lasi umui lau hanamoa koikoi, to inai abidadama herevadia ese lau duahia vadaeni herevadia iboudiai idia hereaia.”

Sista ta, Russia ena siti badana ta, St. Petersburg ai, be ia gwau: “Tanikiu bada herea, hesiku sisibalaia herevadia namodia January 8, 1995, Awake! lalonai dainai. Unai hereva ese egu hekwakwanai idia kokidia lasi, to guna lau naria bona lau tahua heduruna be idia ese lau idia henia.”

Lagani 17 sikuli kekenina ta ia gwau: “Inai magasin namodia idia halasia taudia iboudiai lau tanikiu henia. Lau bona egu turana be piksa rumana amo ai raka lasi neganai, magasin haida ai itaia, helai gauna ta latanai. Ai abidia. . . . Gima Kohorona lau duahia neganai, lau hoa bada. Nega vaira be momokani unai bamona, a? Hari lau ese Evanelia Bukadia lau duahia bona lau lalo-pararalaia toho. Emui magasin ese Baibel ena hereva edia anina idia gwauraia goevagoeva.”

Lagani 26 tauna ta ia gwau: “Umui lau tanikiu henia bada, April 8, 1994, Awake! ena hereva ladana ‘Lau be Sibogu Do Lau Hamasea be Namo, A?’ dainai. Egu lalona ia metau bona sibogu egu tauanina lau gadaralaia loulou dainai, nega momo lau laloa lau be sibogu do lau hamasea be namo. To Dirava ena Hereva dainai bona Iehova lau guriguri henia dainai, egu mauri lau hadokoa lasi. Unai hereva ese egu abidadama Iehova ena hebogahisi bona ena heduru dekenai ia hagoadaia. Egu helalo-kerehai ia itaia. Ia ura do lau mauri. Unai hereva amo lau ia durua dainai, lau tanikiu henia.”

Lagani 15 kekenina ta ese unai Awake! ena hereva inai bamona ia gwauraia: “Unai magasin be mai anina bada egu mauri ai. Egu lagani be 8 neganai, mamina lau abia ta ese lau ia ura henia lasi. Egu tamana bona sinana idia bisi dainai lau idia hereva henia lasi, bona lau sibogu ese egu hekwakwanai lau haoredia toho. Taunimanima lau bamodia lasi. Egu varavara lau heai henidia loulou. Bena lau laloa lau be sibogu do lau hamasea be namo. Iehova ena Witness taudia lau davaria neganai, lau moale bada!”

Hahine ta Russia ena kahana ta ai be ia gwau: “Basi naria gabuna ta ai tatau matamatadia rua ese Baibel idia herevalaia hebou lau kamonaia. Unai hereva lau ura henia dainai, lau hereva henidia. Idia ese Gima Kohorona ta lau idia henia. Lau duahia mai egu ura bona mai egu moale ida, bona hari lau ura egu diba Baibel dekenai do lau habadaia. Lau ura emui magasin do lau abidia, bona lau ura Baibel do lau stadilaia loulou.”

Buka Ma Haida Idia Lalodia Bada

Hahine matamatana ta Caucasus ai be ia gwau: “Hahine ta be emai opesi dekenai ia mai, hebouhebou ta be ai ia hamaorolaia. Ena moale ena toana lau itaia dainai, lau kamonai henia. Kerukeru ia ese buka ladana Mauri Hanaihanai Paradaiso Lalonai be lau ia henia. Lau duahia ore haraga. Ia be hoa gauna. Lau laloa, dibura ai lau loaloa murinai, diari lao henia dalana lau davaria vadaeni. Egu henanadai edia haere be nega daudau lau tahua murinai, buka tamona lalonai lau davaridia. Egu moale lau gwauraia diba lasi.”

Tau ta Central Asia ai be ia gwau: “Lau be Sivarai Namona Dubu Oreana ena memba ta. Ai be lauma herevadia bukadia dekenai ai dabu momokani. Umui ai noia, buka bona buklet do umui siaia ai dekenai, do ai stadilaidia bona hariharilaidia totona.”

Tau ta Armenia ai, Black Sea badinai, be ia gwau: “Buklet ladana Dirava ese Ita Ia Laloa Eiava? lau duahia, bona ena mamina be lai namona hegeregerena. Baibel stadilaia karana ai lau do idia durua bukadia abia dalana lau davaria inai. Mani unai buka be lau dekenai umui siaidia, unai bamona do lau stadi totona.”

Hahine ta Siberia ai be ia gwau: “Iehova ena Witness tauna ta be emai ruma ai ia vadivadi bona buka ladana Tau Hereadaena ia rakatania. Ena be egu sikuli negana amo lau laloa Dirava be lasi, to lau duahia herevadia dainai lau laloa dobu bona Baibel lau stadilaia matamaia.”

Hahine ta, natu rua edia sinana, ese unai Iesu Keriso sivaraina bukana dainai tanikiu herevana ia siaia, ia gwau: “Memero kekeni ese idia lalo-pararalaia bona idia ura henia. Ia dainai idia ura Baibel do idia stadilaia bona Baibel bukadia ma haida do idia duahia. Buka ena toana be namo herea.”

Lagani gunanai, guna idia gwauraia Soviet Union tanodia ai, taunimanima 34,608 be bapatiso idia abia; unai amo idia hahedinaraia idia dibaia herevadia idia laloa bada. Namona be Iehova ena Witness taudia ese Baibel ena hereva momokani gwauraia bukadia be unai tano ai do idia hariharilaia badabada, bona ma taunimanima tausen momo ese unai hereva do idia abia dae!