Karoa 18
Dirava Ena Hesiai Lao Henia Hanaihanai Dalana Do Oi Tahua
1, 2. Namona be Dirava ita diba, bona dahaka danu do ita karaia be namo?
MANI inai oi laloa: Daiutu ta lalonai be dava bada kohudia momo. Oi be ena iduara, idia lokaia vadaeni gauna, vairanai oi gini. Biaguna ta ese ki oi ia henia vadaeni, bona oi ia hamaoroa vadaeni unai kohu do oi abia diba. Unai ki ese oi do ia durua dalana tamona be, do oi gaukaralaia. Unai hegeregerena, diba ese oi do ia durua totona, namona be do oi gaukaralaia.
2 Unai be mai anina bada Dirava dibaia karana dekenai. Momokani, Iehova Dirava bona Iesu Keriso dibadia maoromaoro karana ena anina be mauri hanaihanai. (Ioane 17:3) To unai diba oi abia mo dainai, unai do oi abia lasi. Namona be unai diba be emu mauri lalonai do oi gaukaralaia, oi laloa bada ki-na ta oi gaukaralaia hegeregerena. Iesu ia gwau Dirava ena ura idia karaia taudia be “Basileia lalonai do idia raka vareai.” Unai bamona taudia do idia abia hahenamona be, Dirava ena hesiai do idia lao henia ela bona hanaihanai!—Mataio 7:21; 1 Ioane 2:17.
3. Dirava ena ura ita dekenai be dahaka?
3 Dirava ena ura oi diba murinai, do oi karaia be gau badana. Oi laloa Dirava ena ura oi dekenai be dahaka? Gauna be inai: Iesu do oi tohotohoa. Petero Ginigunana 2:21 ia gwau: “Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” Vadaeni, Dirava ena ura karaia totona, namona be Iesu ena kara do oi tohotohoa namonamo. Emu diba Dirava dekenai do oi gaukaralaia dalana be unai.
IESU ESE ENA DIBA DIRAVA DEKENAI IA GAUKARALAIA DALANA
4. Dahaka dainai Iesu be Iehova ia diba goevagoeva, bona unai diba be edena bamona ia gaukaralaia?
4 Iesu be ena Tamana ia diba goevagoeva, ma ta be unai bamona lasi. Tanobada dekenai ia do mai lasi neganai, nega daudau guba dekenai Iehova Dirava ida ia noho bona idia gaukara hebou. (Kolose 1:15, 16) Iesu ese unai diba be edena bamona ia gaukaralaia? Ia laloa lasi ia abia mo be hegeregere, to unai diba hegeregerena ia noho danu. Unai dainai taunimanima ia kara henidia mai ena hebogahisi, mai ena haheauka, bona mai ena lalokau ida danu. Unai dala amo Iesu ese ena Tamana guba dekenai ena kara ia tohotohoa, bona ena diba Iehova ena dala dekenai hegeregerena ia kara.—Ioane 8:23, 28, 29, 38; 1 Ioane 4:8.
5. Dahaka dainai Iesu be bapatiso ia abia, bona ena bapatiso ena anina be edena bamona ia hamomokania?
5 Ena diba dainai Iesu ese kara badana ta ia karaia. Galilea amo ia lao Ioridane Sinavaina, bena Ioane ese ia bapatisoa. (Mataio 3:13-15) Iesu ena bapatiso ese dahaka ia laulaulaia? Ia be Iuda tauna ta, Dirava ia gwauhamata henia vadaeni besena lalonai ia vara. Unai dainai, ia vara neganai ia idia gwauhamatalaia vadaeni. (Esodo 19:5, 6) Bapatiso ia abia neganai, ia be sibona Iehova ia henia, Iena ura ia dekenai do ia karaia totona. (Heberu 10:5, 7) Bena Iesu ese ena bapatiso ena anina ia hamomokania. Iehova ena hesiai lao henia karana dekenai ia gaukara goadagoada, nega iboudiai iena diba Dirava dekenai be taunimanima ia hadibalaidia. Iesu ese Dirava ena ura ia karaia mai ena moale bada ida, ia gwau unai be ena aniani bamona.—Ioane 4:34.
6. Iesu be sibona edena bamona ia dadaraia?
6 Iesu ena lalona ia parara momokani, Iehova ena ura ia karaia dainai dava bada gauna—ia sibona ena mauri unai—do ia haboioa. To, ia be sibona ena namo ia laloa lasi, iena ura gaudia be murinai ia atoa. Nega ibounai Dirava ena ura karaia dalana ia tahua guna. Vadaeni, unai dala dekenai Iesu ena haheitalai goevadaena be edena bamona ita tohotohoa diba?
MAURI HANAIHANAI LAO HENIA DALANA
7. Dahaka ita karaia guna, bena ita hegeregere bapatiso do ita abia?
7 Ita be Iesu hegeregerena lasi. Ita goevadae lasi dainai, namona be kara badadia haida do ita karaia guna, bena do ita hegeregere bapatiso do ita abia. Ginigunana be, Iehova Dirava bona Iesu Keriso be eda lalona ai do ita dibadia maoromaoro. Unai diba ita abia dainai Dirava do ita abidadama henia bona do ita lalokau henia bada. (Mataio 22:37-40; Roma 10:17; Heberu 11:6) Dirava ena taravatu bona ena hakaua herevadia badinaia karana dainai, do ita helalo-kerehai, anina be do ita hahedinaraia iseda kara dikadia gunadia dainai ita lalohisihisi. Unai murinai iseda lalona do ita giroa, bona Dirava ita do diba lasi neganai ita badinaia daladia kereredia be do ita rakatania. (Kara 3:19) To, bema ita kara maoromaoro lasi to kara dika ita karaia hehuni noho, eda lalona ita giroa vadaeni momokani lasi. Unai dala amo Dirava ita koia diba lasi. Iehova be koikoi ibounai ia dibaia.—Luka 12:2, 3.
8. Bema oi ura oi danu be Basileia harorolaia gaukarana do oi karaia neganai, dahaka do oi karaia be namo?
8 Dirava oi dibaia vadaeni dainai, namona be hari oi ese lauma gaudia do oi laloa namonamo, ani? Reana oi ura bada oi dibaia noho gaudia be emu varavara, emu turana, bona ma haida do oi hamaorolaidia. Reana oi be unai bamona oi karaia vadaeni, Iesu ese sivarai namona be nega idauidau ai ia davaria taudia ia hamaorolaidia hegeregerena. (Luka 10:38, 39; Ioane 4:6-15) Reana hari oi ura unai kara do oi habadaia. Bema unai bamona, Keristani elda taudia be oi ida do idia hereva hebou mai edia moale ida, unai amo do idia diba oi be hegeregere Basileia harorolaia gaukarana be Iehova ena Witness taudia ida do oi karaia, eiava lasi. Bema oi hegeregere, elda taudia ese dala do idia karaia, haroro gaukarana lalonai Witness tauna ta do oi bamoa. Iesu ena hahediba taudia be iena hadibaia herevadia idia badinaia, edia gaukara idia karaia namonamo totona. (Mareko 6:7, 30; Luka 10:1) Unai bamona heduruna amo namo do oi davaria, Basileia sivaraina be ruma ta ruma ta ai bona dala idaudia ai do oi harorolaia negadiai.—Kara 20:20, 21.
9. Ta ese Dirava be edena bamona ia gwauhamata henia, bona ena gwauhamata ena anina ia sibona ena mauri lalonai be dahaka?
9 Kongregesen ena teritori dekenai sivarai namona taunimanima idauidau iboudiai dekenai harorolaia be lalo-maoro taudia davaria dalana, bona unai gaukara namona bona ma haida amo do oi hamomokania oi be mai emu abidadama. (Kara 10:34, 35; Iamesi 2:17, 18, 26) Bema Keristani heboudia oi lao henidia loulou bona haroro gaukarana oi karaia momokani, unai dala amo do oi hahedinaraia oi helalo-kerehai vadaeni bona emu lalona oi hadaia vadaeni, Dirava ena amo oi abia dibana hegeregerena do oi noho. Unai murinai dahaka do oi karaia be namo? Namona be Iehova Dirava do oi gwauhamata henia, do oi hamaoroa emu mauri oi henia mai emu ura bona mai emu lalona ibounai ida, iena ura do oi karaia totona. Unai dala amo Iehova do oi gwauhamata henia neganai, Iesu ena huaia auna haragana do oi abia dae danu.—Mataio 11:29, 30.
BAPATISO ENA ANINA OI DEKENAI
10. Dirava do oi gwauhamata henia murinai, dahaka dainai bapatiso do oi abia be namo?
10 Iesu ena hereva hegeregerena, iena hahediba taudia ai idia lao taudia iboudiai be bapatiso idia abia be namo. (Mataio 28:19, 20) Badina be dahaka Dirava oi gwauhamata henia murinai, unai bamona do oi kara be namo? Iehova oi gwauhamata henia vadaeni dainai, ia diba oi lalokau henia. To, momokani, do oi ura ma kara ta do oi karaia, emu lalokau Dirava dekenai be ma haida danu do idia diba totona. Vadaeni, bapatiso amo taunimanima vairadiai do oi hahedinaraia diba Iehova Dirava oi gwauhamata henia vadaeni.—Roma 10:9, 10.
11. Bapatiso ena anina be dahaka?
11 Bapatiso be toa ta mai anina bada. Ta ese ranu lalonai oi ia hadihoa, o “guria” neganai, unai be hegeregere emu mauri dalana gunana oi masetania bamona. Ranu amo do oi dae neganai, unai be hegeregere mauri matamata oi abia bamona; sibomu emu ura ese ia biagua maurina lasi, to Dirava ena ura ese ia biagua maurina. To, momokani, do oi kara kerere lou, badina be ita ibounai ita goevadae lasi, bona unai dainai dina iboudiai ita kara dika. Gau tamona, Dirava oi gwauhamata henia bona bapatiso oi abia neganai, oi do ia abia dae, iena hesiai tauna korikorina ta. Oi helalo-kerehai bona bapatiso oi abia mai emu lalo-manau ida dainai, Iehova ena lalona do ia hegeregere, Iesu ena boubou gauna dainai emu dika do ia gwauatao. Unai hegeregerena, bapatiso dainai emu lalona do ia goeva Dirava vairanai.—1 Petero 3:21.
12. Ta be (a) ‘Tamana ena ladanai’ bapatiso ia abia, anina be dahaka? (b) ‘Natuna ena ladanai’ ia abia, anina be dahaka? (c) “Lauma Helaga ena ladanai” ia abia, anina be dahaka?
12 Iesu ese ena orea taudia ia hagania, hahediba taudia matamatadia be “Tamana, Natuna, bona Lauma Helaga ena ladanai” do idia bapatisodia. (Mataio 28:19) Iesu ena hereva ena anina be dahaka? Ta be ‘Tamana ena ladanai’ bapatiso ia abia, ena anina be mai ena lalona ibounai ida ia abia dae Iehova Dirava be gau iboudiai havaraia Diravana bona ia lohiadia be maoro. (Salamo 36:9; 83:18; Hadibaia Tauna 12:1) ‘Natuna ena ladanai’ bapatiso ia abia tauna ese ia hahedinaraia ia abia dae Dirava ese taunimanima ia hamauridia dalana tamona be Iesu Keriso ena amo, bona unai hahemauri lalonai ena boubou gauna be mai anina bada. (Kara 4:12) “Lauma Helaga ena ladanai” bapatiso ia abia tauna ese ia hahedinaraia ia abia dae Iehova ese ena lauma helaga, iena gaukara siahuna unai, amo Iena palani ia hagugurua, bona Iena hesiai taudia ia hagoadaia, ena lauma amo ia hakaua oreana ida Iena ura maoromaorona do idia karaia totona.—Genese 1:2; Salamo 104:30; Ioane 14:26; 2 Petero 1:21.
BAPATISO TOTONA OI HEGAEGAE, A?
13, 14. Dahaka dainai Iehova Dirava ena hesiai lao henia abia hidi karana garina ita gari lasi be namo?
13 Bapatiso be mai anina bada, ia abia tauna ese ia karaia karadia iboudiai ia hereaia. Unai dainai oi garilaia be namo, a? Lasi vaitani! Bona namona be do oi laloa maragi lasi, badina be, bema emu lalona oi hadaia bapatiso do oi abia, momokani unai be aonega bada karana.
14 Bapatiso ese ia hahedinaraia emu lalona oi hadaia Iehova Dirava ena hesiai do oi lao henia. Oi hedavari henidia taudia mani oi laloa. Dala idauidau amo idia ta ta ese biaguna ta ena hesiai idia lao henia, ani? Haida be taga ena hesiai idia lao henia. (Mataio 6:24) Ma haida be edia moni gaukarana idia goadalaia, eiava sibodia edia ura hagugurudia dalana idia tahua guna edia mauri lalonai. Ma haida ese dirava koikoidia edia hesiai idia lao henia. To oi ese Dirava momokanina, Iehova, ena hesiai lao henia dalana oi abia hidi vadaeni. Iena hebogahisi bona ena lalokau hegeregeredia be ma ta ese ia hahedinaraia lasi. Dirava ese taunimanima be gaukara mai anina ia henidia, hahemauri dekenai ia hakaudia lao gaukarana unai. Iena hesiai taudia be davana namona, mauri hanaihanai, do ia henidia. Momokani, Iesu hegeregerena emu mauri be Iehova do oi henia be gari gauna lasi. Unai be Dirava hamoalea dalana bona aonega dalana.—1 King Taudia 18:21.
15. Dahaka dahaka ese momo edia bapatiso idia koua?
15 To namo lasi oi idia doria dainai bapatiso oi abia. Ia be oi bona Iehova sibona emui padanai. (Galatia 6:4) Lauma dalana ai oi goada oi lao lalonai, reana oi henanadai vadaeni, oi gwau: “Dahaka ese egu bapatiso ia koua?” (Kara 8:35, 36) Reana namona be emu lalona ai do oi henanadai, do oi gwau, ‘Egu ruma bese edia badu ese lau ia koua, a? Egu noho be Baibel ena taravatu hegeregerena lasi, o kara dikana ta lau karaia loulou, a? Taunimanima ese lau do idia lalo-namo henia lasi garina lau gari, a?’ Namona be unai gau do oi lalodia mai emu lalo-parara ida.
16. Bema Dirava ena hesiai oi lao henia, unai dainai dahaka hahenamo do oi abia?
16 To namo lasi unai gau sibodia mo do oi laloa. Iehova ena hesiai lao henia karana ena hahenamo danu do oi laloa be namo. Hegeregere, famili edia badu mani oi laloa. Iesu ese ena hahediba taudia ia gwauhamata henia, ena be edia varavara ese do idia dadaraidia ia idia badinaia dainai, to lauma dalanai ruma bese badana do idia abia. (Mareko 10:29, 30) Unai bese taudia be tadikaka bamona oi do idia durua mai edia lalokau ida, dagedage do oi haheaukalaia bona mauri lao henia dalana do oi rakalaia totona. (1 Petero 5:9) Kongregesen ena elda taudia ese oi idia durua bada diba, hekwakwanai bona hekwarahi lalodiai do oi haheauka totona. (Iamesi 5:14-16) Tanobada taudia edia badu do oi laloa neganai, namona be emu lalona ai do oi henanadai, do oi gwau, ‘Guba bona tanobada ia havaraia Diravana ese lau ia lalo-namo henia bona lau abia hidi dalana ia moalelaia—vadaeni, unai ida lau hahegeregerea diba gauna be dahaka?’—Aonega Herevadia 27:11.
EMU GWAUHAMATA BONA EMU BAPATISO DO OI HAMOMOKANIDIA DALANA
17. Dahaka dainai namona be oi laloa bapatiso be dokona lasi to ia be matamana?
17 Gau badana be do oi laloatao bapatiso be lauma dalanai oi tubu dalana ena dokona lasi. Bapatiso neganai, Dirava ena hesiai tauna bona Iehova ena Witness tauna ai oi lao, bona unai be emu mauri negana ibounai lalonai ena hesiai do oi lao henia ena matamana. Ena be bapatiso be mai anina bada, to ia be hahemauri hamomokania gauna lasi. Iesu ia gwau lasi: ‘Bapatiso taudia iboudiai do idia mauri.’ Lasi, ia gwau: “Iena lalona do ia goada noho ela bona dokona, unai tauna be do ia mauri.” (Mataio 24:13) Unai dainai, gau badana be Dirava ena Basileia be emu mauri lalonai do oi laloa bada, unai amo do oi hahedinaraia oi tahua guna.—Mataio 6:25-34.
18. Bapatiso murinai, dahaka dahaka do oi tahua be namo?
18 Iehova ena hesiai lao henia lalonai do oi haheauka totona, emu abidadama hagoadaia daladia haida do oi tahua be namo. Dala namona ta be, Dirava ena Hereva do oi stadilaia loulou, emu diba Ia dekenai habadaia totona. Baibel be dina iboudiai do oi duahia dalana do oi palania. (Salamo 1:1, 2) Keristani heboudia do oi lao henidia loulou, badina be hebou taudia edia hebamo ese emu abidadama do ia hagoadaia. Kongregesen heboudia dekenai haere henia be emu tahua gauna ai oi halaoa, bena unai amo Iehova do oi hanamoa bona haida do oi hagoadaia diba, ani? (Roma 1:11, 12) Do oi tahua diba dalana ma ta be, emu guriguri do oi hanamodia.—Luka 11:2-4.
19. Lauma helaga ese oi ia durua diba, dahaka kara namodia do oi hahedinaraia totona?
19 Emu bapatiso ena anina do oi hamomokania totona, namona be nega ibounai do oi naria namonamo bona Dirava ena lauma helaga do oi abia dae, ia ese lalokau, moale, maino, haheauka, hebogahisi, kara namo, abidadama, lalo-manau, bona tauanina ena ura koua karana be emu lalona ai do ia havaraia totona. (Galatia 5:22, 23; 2 Petero 3:11) Mani inai do oi laloatao: Iehova ese ena lauma helaga be idia noia bona ena hesiai idia lao henia mai edia kamonai ida taudia iboudiai ia henidia. (Luka 11:13; Kara 5:32) Unai dainai namona be Dirava do oi guriguri henia, ena lauma do oi noia, bona do oi noia, oi do ia durua hamoalea karadia do oi karaia totona. Bema Dirava ena lauma helaga ese oi do ia hakaua hegeregerena oi kara, unai kara edia toana be emu hereva bona emu kara lalodiai do idia hedinarai. Momokani, Keristani oreana taudia iboudiai ese “mauri matamata” idia goadalaia toho noho, Keriso bamona ai do idia lao totona. (Kolose 3:9-14) Ita ta ta be dala idauidau ai unai ita hekwarahilaia, badina be ta ena goada lauma dalana ai be ma ta ena amo ia idau. Oi goevadae lasi dainai, namona be Keriso bamona ai do oi lao dalana do oi tahua goadagoada. Namona be unai do oi lalo-hesikulaia lasi, badina be Dirava ena heduru amo do oi kwalimu diba.
20. Haroro gaukarana lalonai oi ese Iesu be edena dala ai do oi tohotohoa diba?
20 Emu abidadama hagoadaia totona, Iesu ena moale do oi tohotohoa goevagoeva danu be namo. (Heberu 12:1-3) Ia ese haroro gaukarana ia ura henia bada. Bema oi be Basileia harorolaia gaukarana do oi karaia, namona be anina maragi gaukarana ai do oi halaoa lasi. Dirava ena Basileia be ma haida hadibalaidia gaukarana moalelaia dalana do oi tahua, Iesu ia kara hegeregerena. Hadibaia tauna namona ai do oi lao totona, kongregesen lalonai oi idia henia sisibadia do oi gaukaralaia. Bona momokani Iehova ese oi ia hagoadaia diba, emu hesiai gaukarana do oi karaia totona.—1 Korinto 9:19-23.
21. (a) Dahaka dainai ita diba Iehova ese bapatiso taudia mai edia kamonai ia laloa bada? (b) Dahaka ese ia hahedinaraia bapatiso do ita abia be gau badana, Dirava ese inai tanobada ena oromana dikana do ia haorea neganai do ita roho mauri totona?
21 Ia gwauhamata bona bapatiso ia abia bena Iesu murinai ia raka mai ena kamonai ida tauna be Dirava ese ia laloa bada. Iehova ese taunimanima bilioni bilioni iboudiai edia lalona ia tahua, bona ia diba unai bamona taudia be momo lasi. Iena matana ai idia be “kohu namodia.” (Hagai 2:7) Baibel ena peroveta herevadia ese idia hahedinaraia Dirava ena matana ai idia be mai edia maka dainai, nega daudau lasi inai tanobada ena oromana dikana do ia haorea neganai, idia be do idia roho mauri. (Esekiela 9:1-6; Malaki 3:16, 18) Vadaeni, oi “ia abia hidi, mauri hanaihanai abia totona,” eiava? (Kara 13:48) Oi ura momokani Dirava ena hesiai tauna ena maka do oi abia, a? Gwauhamata bona bapatiso be unai toa ena kahana ta, bona namona be do oi abia, do oi roho mauri totona.
22. “Hutuma bada herea” edia helaro namona be dahaka?
22 Abata Badana murinai, Noa mai ena bese ida be lagatoi amo idia raka lasi, Dirava ese ia hagoevaia vadaeni tanobadana dekenai. Unai hegeregerena, hari inai negai “hutuma bada herea” be Dirava idia diba bona edia diba hegeregerena idia noho dainai, Iehova ese ia lalo-namo henidia. Edia helaro be inai nega dikana ena dokona amo do idia roho mauri bena tanobada goevana dekenai do idia mauri ela bona hanaihanai. (Apokalupo 7:9, 14, NW) Unai mauri be edena bamona?
EMU DIBA OI TOHOA
Hari oi be Iehova oi diba dainai, ia ura unai diba be edena bamona do oi gaukaralaia?
Bapatiso do oi abia totona, dahaka dahaka do oi karaia guna be namo?
Dahaka dainai bapatiso be dokona lasi to ia be matamana?
Iseda gwauhamata bona iseda bapatiso be edena bamona ita hamomokania diba?
[Picture on page 172]
Guriguri lalonai Dirava oi gwauhamata henia vadaeni, a?
[Picture on page 174]
Dahaka ese oiemu bapatiso ia koua?