Karoa 19
Tanobada Taudia Iboudiai be Dirava Do Idia Diba Negana
1, 2. Iehova ia karaia gauna be ta ese edena bamona ia hadikaia?
MANI oi laloa, diba momo tauna ta ese laulau namo hereana ta ia penia ore bena mai ena momokani ida ena lalona ai ia gwau unai be laulau namo hereana. To hanuaboi ai mama tauna ta ese ia hadikaia dainai, ena lalona ia hisihisi bada. Ia ura bada hadikaia tauna do idia guia! Bona ia ura bada unai laulau do ia hanamoa lou ela bona do ia hairai, guna ia hairai hegeregerena.
2 Unai tau hegeregerena, Iehova ese gau hereadaena ta ia karaia—gauna be tanobada mai ena noholaia taudia ida. Tau bona hahine ia karaia murinai, ia gwau ena tanobada gaukarana ibounai be “namo herea.” (Genese 1:31) Adamu bona Heva be Dirava sibona ena natuna taudia, bona ia lalokau henidia. Ia laloa nega vairai do idia noho namo herea mai edia moale ida. Ena be Satani ese ia hakaudia dainai idia gwau-edeede bona Dirava ese ia karaia gauna namo hereana ia hadikaia, to hanamoa lou dalana be ia noho.—Genese 3:23, 24; 6:11, 12.
3. “Mauri korikori” be dahaka?
3 Dirava ese ena lalona ia hadaia vadaeni do ia hanamoa lou. Ia ura bada nega matamana ai ia lalohadailaia dalana ai do ita noho. Iseda mauri kwadogina mai ena hekwarahi be “mauri korikori” lasi, badina be Iehova ese ia palania gauna ese ia hereaia momokani. “Mauri korikori,” Dirava ia ura do ita abia gauna, be “mauri hanaihanai” goevadaena.—1 Timoteo 6:12, 19, NW.
4, 5. (a) Paradaiso helarona ena anina be edena bamona do ita abia? (b) Dahaka dainai iseda helaro vaira negana totona do ita laloa be namo?
4 Dirava ita diba vadaeni neganai, ita be mai eda maduna ia vairanai. (Iamesi 4:17) To mani oi laloa, bema unai diba oi gaukaralaia bona mauri hanaihanai oi tahua, hahenamo momo do oi abia. Iena Hereva, Baibel, lalonai, Iehova Dirava ese kahirakahira do ia vara paradaisona lalonai do ita abia diba maurina ena toana mai hairaina be ia hahedinaraia. To, ita Iehova ena orea taudia ese iena hesiai ita lao henia be davana namona abia urana dainai mo lasi. Dirava ena hesiai ita lao henia badina be ita lalokau henia. (Mareko 12:29, 30) Inai danu, mauri hanaihanai be iseda hesiai gaukarana ena davana lasi. Mauri hanaihanai be Dirava ena harihari gauna. (Roma 6:23) Unai mauri do ita laloa namonamo be namo, badina Paradaiso helarona ese Dirava ena kara ita ia hadibalaia—‘idia tahua taudia ibounai be davana namona do ia henidia’ mai ena lalokau ida. (Heberu 11:6) Bema eda lalona bona eda darana dekenai unai helaro be gau korikorina, ita do ia durua, Satani ena tanobada dekenai hekwarahi do ita haheaukalaidia.—Ieremia 23:20.
5 Vadaeni, mani hari ita ese Baibel ai ia noho helarona, mauri hanaihanai be tanobada Paradaisona lalonai do ita abia helarona, ita laloa namonamo. Dirava diba karana ese tanobada do ia hahonua neganai, mauri be edena bamona?
ARAMAGEDONO MURINAI—PARADAISO TANOBADANA
6. Aramagedono be dahaka, bona ena anina taunimanima dekenai be dahaka?
6 Ita diba vadaeni bamona, kahirakahira Iehova Dirava ese inai tanobada ena oromana dikana do ia hadikaia ore. Baibel ese ia gwauraia gauna, Aramagedono, be kahirakahira momokani. Unai hereva idia kamonai taudia haida idia laloa unai be do idia tuari heheni besedia edia niuklia tuarina ta, to lasi, Aramagedono be idau vaitani. Apokalupo 16:14-16 ese ia hahedinaraia bamona, Aramagedono be “Siahu Ibounai Diravana ena Dina Badana” tuarina. Ia lalonai “tanobada edia king ibounai,” tanobada besedia unai, be do idia tuari. Iehova Dirava ena Natuna, King ai ia halaoa tauna, be kahirakahira do ia lao tuari totona. Do ia kwalimu momokani. Dirava ena Basileia idia inai henia taudia, Satani ena orea taudia, be do ia haorea. Iehova idia badinaia taudia mo be do idia roho mauri.—Apokalupo 7:9, 14; 19:11-21.
7. Keriso ena Lagani 1,000 Lohia Negana lalonai Satani bona ena lauma dikadia be edeseniai do idia noho, bona unai ena namo taunimanima dekenai be dahaka?
7 Mani oi laloa—bema oi be unai hisihisi badana amo oi roho mauri, edena bamona maurina be Dirava ese ia gwauhamatalaia tanobadana matamatana dekenai do oi davaria? (2 Petero 3:13) Unai do ita laloa davari toho be anina lasi, badina be Baibel ese hoa herevadia amo ita ia hadibalaia. Ia gwau Iesu Keriso ena Lagani 1,000 Lohia Negana lalonai Satani bona ena demoni be guri dobu masemasena lalonai do idia koudia. Unai lauma dikadia ese dika do idia havaraia hehuni diba lasi, bona ita do idia dibagania diba lasi, Dirava do ita kara dika henia totona. Unai be namo herea!—Apokalupo 20:1-3.
8, 9. Tanobada matamatana ai, dahaka do ia vara hisihisi, gorere, bona buruka dekenai?
8 Gorere iboudiai dohore idia ore. (Isaia 33:24) Aena dika taudia edia aedia do idia goada dainai, do idia gini, raka, heau, bona mavaru danu. Taia kudima taudia, nega daudau rege ta idia kamonai lasi, be moale regedia do idia kamonai. Matakepulu taudia do idia hoa bada, gau idauidau edia kala bona edia oromadia do idia itaia neganai. (Isaia 35:5, 6) Edia lalokau taudia edia vairadia do idia itaia diba! Do idia moale hisidae dainai, reana nega sisina mo do idia tai bena edia mata ranuna dainai do idia itaia namonamo diba lasi.
9 Mani oi laloa! Mata-galasi, raka audia, gorere hanamoa muramuradia, ise hanamoa klinikidia, bona hospital be lasi! Lalohisihisi bona lalo-metau ese taunimanima edia moale do idia haorea lou lasi. Gorere ese maragidia do ia hadikaia lasi. Burukadia do idia matamata lou. (Iobu 33:25) Iseda tauanina do idia goada idia lao. Daba daba iboudiai do ita toreisi negadiai, ita mahuta namonamo vadaeni dainai, goada amo do ita honu bona do ita ura bada unai dina matamatana lalonai iseda gaukara namodia do ita karaia.
10. Aramagedono amo do idia roho mauri taudia ese dahaka gaukara do idia karaia?
10 Aramagedono amo do idia roho mauri taudia ese gaukara momo do idia karaia mai edia moale ida. Tanobada be paradaiso ai do idia halaoa. Nega gunana ena miro ibounai do idia kokia. Ruma dikadia do idia kokia bona tano do idia hanamoa, bena imea bona uma do idia karaia. Iboudiai ese ruma namodia do idia noholaia. (Isaia 65:21) Paradaiso bamona gabudia do idia habadaia, ela bona tanobada ibounai ena hairai be Dirava ese Eden umana ai ia havaraia hairaina hegeregerena. Tanobada hanamoa lou gaukarana do idia moalelaia bada!
11. Nega vaira ai taunimanima ese tanobada bona animal be edena bamona do idia kara henidia?
11 Unai ibounai lalonai Dirava ese do ia hakaudia dainai, tanobada do idia hadikaia lasi. Taunimanima be animal ida do idia maino. Do idia aladia mase kava lasi, to tanobada naria namonamo dalana do idia badinaia lou dainai, do idia naridia namonamo. Emu lalona ena matana amo mani inai oi itaia: Uda sisiadia bona mamoe natudia, bona laiona bona boromakau natudia danu, be do idia aniani hebou—bona ubu-ubu gaudia be dika do idia davaria lasi. Mero maragina danu be uda boromadia do ia gari henia lasi, bona tanobada matamatana ena maino be dagedage taudia ese do idia hadikaia lasi. (Isaia 11:6-8) Unai be maino tanobadana matamatana momokani!
TAUNIMANIMA DO IA HAIDAUDIA
12. Isaia 11:9 ena anina be edena bamona ia vara hari inai negai, bona Paradaiso lalonai edena bamona do ia vara?
12 Isaia 11:9 (NW) ese ita ia hamaoroa dahaka dainai tanobada ibounai lalonai gau ta do idia hadikaia lasi. Ia gwau: “Tanobada be Iehova dibaia karana amo do ia honu, davara be ranu amo ia honuhonudae bamona.” Unai be taunimanima ia herevalaia, badina be animal ese ‘Iehova idia dibaia’ bena edia kara idia haidaua dalana be lasi. To taunimanima be ia karadia Diravana idia diba neganai, unai ese momokani ia haidaudia. Momokani, emu diba Dirava dekenai be oi badinaia dainai, emu kara haida oi haidaua vadaeni. Taunimanima milioni momo be unai bamona idia karaia vadaeni. Unai dainai, inai peroveta herevana ena anina be Iehova ena hesiai taudia dekenai ia vara vadaeni. To, nega gabena ia perovetalaia danu, unai neganai tanobada hegegemadai taunimanima ese edia dagedage do idia negea, bena do idia maino ela bona hanaihanai.
13. Dahaka hadibaia gaukarana be tanobada ai do idia karaia?
13 Tanobada be Dirava diba karana amo do ia honu negana do ia namo herea! Taunimanima hadibadia gaukarana badana be King Iesu Keriso bona ia ida do idia lohia taudia 144,000 ese do idia biagua. “Buka” matamatadia do idia gaukaralaia. Toana be idia lalodiai be Dirava ena hahediba herevadia, tanobada noholaia taudia do idia hadibalaidia herevadia unai. (Apokalupo 20:12) Tuari do idia dibaia lasi, to maino. Tuari gaudia iboudiai do idia haorea ela bona hanaihanai. (Salamo 46:9) Taunimanima kara henidia mai lalokau bona mai hemataurai ida daladia be tanobada matamatana noholaia taudia do idia hadibadia.
14. Taunimanima be bese tamona lalonai do idia lalo-tamona neganai, tanobada be edena bamona do ia idau?
14 Taunimanima be bese tamona ai do idia lao. Gau ta ese edia lalo-tamona bona edia lalokau do ia koua lasi. (Salamo 133:1-3) Ruma ta lasi do idia lokaia, henaohenao taudia koua totona. Kudou iboudiai lalodiai, ruma iboudiai lalodiai, bona tanobada ena kahana iboudiai dekenai, maino do ia lohia.—Mika 4:4.
TOREISI LOU NEGANA ENA MOALE
15. Edena orea rua be tanobada dekenai do idia toreisi lou?
15 Unai Lagani 1,000 Negana lalonai, mase taudia do idia toreisi lou. To Dirava ena lauma helaga ena toana o ena hahekau idia dadaraia bena idia helalo-kerehai lasi taudia ese unai amo unai lauma idia kara dika henia mai edia ura ida dainai, do idia toreisi lou lasi. (Mataio 23:15, 33; Heberu 6:4-6) To, momokani, unai bamona idia kara dika taudia be Dirava ese do ia gwauraia hidi. Orea rua do ia hatorea isi lou—“kara maoromaoro taudia, bona kara maoromaoro lasi taudia.” (Kara 24:15) Dala maorona ai do ia karaia dainai, ita laloa kara maoromaoro taudia, guna Iehova idia badinaia taudia, be do idia toreisi guna.—Heberu 11:35-39.
16. (a) “Kara maoromaoro taudia” haida, tanobada ai do idia toreisi lou, be daika daika? (b) Unai idaunegai taudia mai edia kamonai ihuanai, oi ura daika daika do oi hedavari henidia, bona badina be dahaka?
16 Unai neganai Iehova ena hesiai taudia ese tuari, hisihisi, bona mase sivaraidia do idia kamonai lasi, to toreisi lou sivaraidia namodia do idia kamonai. Tatau bona hahine mai edia kamonai, hegeregere Abela, Enoka, Noa, Aberahamo, Sara, Iobu, Mose, Rahaba, Ruta, Davida, Elia, bona Eseta, edia toreisi lou sivaraidia do idia kamonai mai edia moale bada ida. Unai toreisi lou taudia ese hagoadaia herevadia amo Baibel ena sivarai momo do idia habadaia! Idia bona kara maoromaoro taudia ma haida vanegai idia mase be do idia ura bada idia diba Satani ena tanobada ena oromana be edena bamona ia doko, bona edena dala amo Iehova ese ena ladana helagana ia hahelagaia bona ena lohia siahuna ia hamomokania.
17. Unai taunimanima mai edia kamonai ese toreisi lou taudia ma haida be edena bamona do idia durudia?
17 Unai murinai, unai taunimanima mai edia kamonai do idia heduru bada, toreisi lou ena kahana gabena dekenai Keriso ese “kara maoromaoro lasi taudia” be mase ena igui amo do ia ruhadia neganai! Guna idia momo herea ese Iehova dibaia dalana idia davaria lasi, badina be Satani ese “edia lalona ia koua.” (2 Korinto 4:4) To Keriso ese Diabolo ena gaukara ena anina do ia haorea. Unai kara maoromaoro lasi taudia do idia lou mai neganai, tanobada be mai hairaina bona mai mainona. Do idia abidia dae taudia be idia hegaegae namonamo, Iehova bona ena Natuna, ia lohia noho tauna, Iesu Keriso, do idia hadibalaidia totona. Toreisi lou taudia bilioni momo be ia karadia Diravana do idia dibaia bona lalokau henia neganai, tanobada be Iehova diba karana amo do ia honu, nega gunana ta be unai bamona lasi.
18. Emu lalokau taudia be mase amo do idia toreisi lou bena oi hedavari henidia lou neganai, emu mamina be edena bamona?
18 Toreisi lou ese iseda lalona do ia hamoalea bada! Ita daika be iseda inai tauna mase ese ia hahisia vadaeni lasi? Daika ia dara-doko lasi, bema ena varavara ta o ena turana ta be gorere, o buruka, o aksiden, o ala-ala dainai ia mase bena edia lalokau heheni karana o edia hetura ia doko neganai? Vadaeni, Paradaiso lalonai do idia hedavari heheni lou taudia edia moale mani oi laloa. Tama sina be edia natudia ida bona tura bona varavara be do idia rosia heheni, bona do idia moale bada dainai do idia kiri bona edia mata ranuna do ia diho.
MAURI GOEVADAENA!
19. Dahaka hoa karana be Lagani 1,000 Negana lalonai do ia vara?
19 Keriso ena Lagani 1,000 Lohia Negana lalonai, hoa karana badana do ia vara; taunimanima ese unai nega lalonai do idia moalelaia bada herea karana unai. Iehova ese ena Natuna do ia hagania, ena boubou gauna ena hahenamo be kamonai taudia ta ta iboudiai, tatau bona hahine, dekenai do ia gaukaralaia. Unai dala amo edia dika ibounai do ia kokia bona do ia hanamodia lou ela bona do idia goevadae.—1 Ioane 2:2; Apokalupo 21:1-4.
20. (a) Ta ia goevadae, anina be dahaka? (b) Aramagedono amo do idia roho mauri taudia bona do idia toreisi lou taudia be edena negai do idia mauri momokani matamaia?
20 Goevadae! Anina be dahaka? Anina be mauri do idia abia, Adamu bona Heva ese Iehova Dirava idia do kara dika henia lasi neganai idia moalelaia maurina hegeregerena. Taunimanima goevadaedia edia tauanina, edia lalona, edia kara, bona edia abidadama—edia gau iboudiai—be do idia hegeregere Dirava ena matana ai. Anina be ta ena kara be ma ta ena amo do ia idau lasi, a? Lasi vaitani! Iehova ese ia karaia gaudia—au, palauapalaua, bona animal—amo ita diba edia toana idauidau ia moalelaia. Taunimanima goevadaedia ta ta edia kara bona edia diba do idia idauidau. Mauri do idia moalelaia, Dirava ena ura hegeregerena. Apokalupo 20:5 ia gwau: “Mase taudia oredia do idia mauri lou lasi ela bona lagani 1000 idia ore.” Aramagedono amo do idia roho mauri taudia hutuma hegeregeredia, toreisi lou taudia edia dika do ia ore bona do idia goevadae neganai, do idia mauri momokani unai.
21. (a) Keriso ena Lagani 1,000 Lohia Negana ena dokona ai, dahaka do ia vara? (b) Bena dahaka be Satani bona ia idia durua taudia iboudiai dekenai do ia vara?
21 Taunimanima goevadaedia ese hahetoho ginigabena do idia davaria. Lagani 1,000 Negana ena dokona ai, Iehova ese Satani bona ena lauma dikadia be guri amo do ia ruhaia, bena nega sisina do ia henidia, taunimanima be Ia ena amo do idia veridia oho toho lou. Haida ese edia ura kereredia do idia laloa bada bona Dirava do idia lalokau henia maragi, to Iehova ese edia gwau-edeede do ia hadokoa haraga. Do ia aladia mase, bona Satani mai ena lauma dikadia iboudiai danu. Kara dika taudia do idia ore ela bona hanaihanai.—Apokalupo 20:7-10.
EDENA BAMONA DO OI KARA?
22. Emu helaro be Paradaiso lalonai dahaka do oi karaia?
22 Iehova Dirava idia lalokau henia bona Paradaiso tanobadana idia noholaia taudia vairadiai dokona lasi negana be do ia hure. Edia moale do ia bada herea, bona oi be unai ibounai lalonai do oi moale diba. Taunimanima goevadaedia edia miusiki bona edia ima-karakara gaudia idauidau ese tanobada gunana ena diba herea taudia edia do idia hereaia! Badina be do idia goevadae bona do idia mauri hanaihanai dainai. Oi be taunimanima goevadaena ai bema oi lao neganai do oi karaia diba karadia, be mani oi laloa. Mani inai oi laloa danu: Oi bona taunimanima oredia ese Iehova ia karaia gaudia—hisiu oreadia bilioni bilioni amo ela bona gau maragimaragidia—do umui dibaia. Taunimanima ese do idia kwalimulaia karadia iboudiai ese Iehova, iseda Tamana lalokauna guba dekenai, ena lalona do idia hamoalea.—Salamo 150:1-6.
23. Dahaka dainai Paradaiso lalonai mauri do ita hesikulaia lasi?
23 Unai neganai iseda mauri do ita hesikulaia lasi, to iseda moale mauri dekenai do ia bada ia lao. Badina be Dirava dibaia karana be dokona lasi. (Roma 11:33) Ela bona hanaihanai, ita do dibaia lasi gaudia momo do idia noho. (Hadibaia Tauna 3:11) Bona Iehova Dirava do oi dibaia noho lalonai, do oi mauri noho—lagani haida mo lasi to ela bona hanaihanai!—Salamo 22:26.
24, 25. Dahaka dainai Dirava dekenai oi abia dibana hegeregerena do oi noho be namo?
24 Unai paradaiso tanobadana ena moale abia totona oi hekwarahilaia hekwarahina o oi dadaraia gaudia edia davana be unai hahenamo ese ia hereaia, ani? Momokani ia hereaia! Vadaeni, Iehova ese unai vaira negana namo hereana ena ki be oi ia henia—Dirava dibaia karana unai. Do oi gaukaralaia a?
25 Bema Iehova oi lalokau henia, iena ura do oi karaia mai emu moale ida. (1 Ioane 5:3) Unai dala do oi badinaia lalonai, hahenamo badadia do oi abia! Dirava dekenai oi abia dibana bema oi badinaia, unai ese emu moale do ia habadaia, hari inai hekwarahi momo tanobadana dekenai danu. Bona gabeai davana namo hereadia do oi abia, badina be unai diba ese mauri hanaihanai dekenai oi do ia hakaua lao! Hari be kara ta do oi karaia negana namona. Emu lalona oi hadaia, Dirava dekenai oi dibaia gaudia hegeregeredia do oi noho. Emu kara amo oi hahedinaraia Iehova oi lalokau henia. Ena ladana helagana oi hanamoa, bona Satani ena hereva oi hakoikoia. Bena Iehova Dirava, aonega momokani bona diba edia Badina, ese oi do ia moale henia. (Ieremia 31:3; Sepanaia 3:17) Bona oi do ia lalokau henia ela bona hanaihanai!
EMU DIBA OI TOHOA
“Mauri korikori” be dahaka?
Aramagedono murinai, dahaka be tanobada dekenai do ia vara?
Daidia be tanobada dekenai do idia toreisi lou?
Edena dala amo taunimanima do idia goevadae bena dokona ai Satani ese do ia tohodia?
Oiemu helaro Paradaiso dekenai be dahaka?
[Picture on page 188, 189]
Emu helaro be Paradaiso do oi noholaia, tanobada be Dirava diba karana amo do ia honu neganai, a?