Ia Kara mai Aonega Ida

1-3. (a) Dahaka dainai Abigaila ena ruma bese dekenai dika bada do ia vara? (b) Inai aonega hahine amo dahaka do ita dibaia?

ABIGAILA ese mero matamatana ena gari toana ia itaia. Oibe, unai mero be ia gari dikadika, badina dika bada do ia vara. Tuari taudia 400 bamona be idia mai noho Abigaila ena adavana Nabala, bona ena hesiai tatau ibounai idia hamasea totona. Dahaka dainai?

² Nabala ena kara dainai unai tuari taudia idia mai noho. Nabala be hemataurai lasi bona dagedage tauna. To, hari ia be Davida ia habadua, unai be kerere badana, badina Davida be tuari idia diba taudia edia gunalaia tauna bona idia be mai lalona ibounai ida ia idia badinaia. Vadaeni, Nabala ena hesiai tauna ta, reana ia be mamoe naria tauna, be Abigaila dekenai ia mai badina ia diba Abigaila be palani ta do ia karaia idia ia hamauria totona. To, edena bamona hahine tamona ese unai tuari orea ia koua diba?

³ Ginigunana be, unai aonega hahine ena kara do ita dibaia. Abigaila be daika? Unai dika be edena bamona ia vara? Bona Abigaila ena abidadama karana amo dahaka do ita dibaia?

“Ia be Aonega Bona Hairai Hahinena”

4. Nabala be edena bamona tauna?

⁴ Abigaila bona Nabala edia kara bona lalohadai be ta ta amo ia idau. Abigaila be kara namo hahinena, to ena adavana Nabala be tau dikana. Momokani, Nabala be taga tauna bona ia laloa ia be ma haida ia hereaia, to taunimanima haida ese ia be edena bamona idia laloa? Baibel ese ena kara ia herevalaia neganai, ia hahedinaraia Nabala ena kara be dika momokani. Iena ladana, Nabala, ena anina be “Kavakava Tauna.” Iena tama sina ese ia dekenai unai ladana idia henia, eiava ena kara dainai gabeai taunimanima ese unai ladana idia henia, a? Ita diba lasi, to ia be ena ladana ena anina hegeregerena ia kara. Ia be “kara auka tauna bona iena kara be dika.” Taunimanima ia dagedage henia bona ia inuinu kekero, momo be ia idia gari henia bona idia ura henia lasi.​—1 Sam. 25:2, 3, 17, 21, 25.

5, 6. (a) Abigaila ena kara namodia amo edena kara oi ura henia? (b) Dahaka dainai Abigaila ese unai anina lasi tauna ia adavaia?

⁵ Abigaila ena kara be Nabala ena kara amo ia idau momokani. Abigaila ena ladana ena anina be “Egu Tamana Ena Moale.” Tamadia momo be edia natuna kekeni ena hairai dainai idia heagi, to aonega tamana ta be ena natuna kekeni ena lalohadai bona kara namodia dainai do ia moale bada. Nega momo, mai edia hairai kekeni be kara namodia hegeregere aonega, lalogoada, bona abidadama idia hahedinaraia lasi. To, Abigaila be unai bamona lasi. Baibel ese ena aonega bona hairai dainai ia hanamoa.​—1 Samuel 25:3 duahia.

⁶ Hari inai negai, reana haida do idia laloa Abigaila be aonega hahinena, to dahaka dainai ia ese unai anina lasi tauna ia adavaia? Laloatao, Baibel negadia ai, tama sina ese natudia edia adavana idia abia hidi. Eiava natudia idia ura headava neganai tama sina amo gwaumaoro idia abia be mai anina bada. Abigaila ena tama sina ese Nabala ena taga bona ladana bada dainai, unai headava idia abia dae bona hegaegaelaia, a? Eiava idia ogogami dainai edia natuna idia doria Nabala ia adavaia totona, a? Abigaila ese Nabala ia adavaia ena badina ita diba lasi to Nabala be adavana namona lasi ena be ia be mai ena moni momo.

7. (a) Hari bema tama sina idia ura natudia dekenai headava ena lalohadai maorona idia hadibaia, dahaka idia dadaraia be namo? (b) Abigaila be ena lalona ia hadaia dahaka ia karaia totona?

⁷ Aonega tama sina ese natudia dekenai headava ena lalohadai maorona idia hadibaia. Idia ese natudia idia doria lasi moni momo tauna idia adavaia totona, eiava bema natudia be idia hegeregere lasi headava ena maduna idia huaia, do idia doria lasi ta ia tura henia totona. (1 Kor. 7:36) To, Abigaila be nega lasi unai gaudia ia laloa totona  badina Nabala ia adavaia vadaeni. Herevana ia adavaia ena badina be dahaka, to ia ese ena lalona ia hadaia ena headava maurina ia hanamoa totona.

“Idia Ia Gwau Henia”

8. Nabala ese daika ia gwau henia, bona dahaka dainai unai be aonega lasi karana?

⁸ Nabala ese Abigaila dekenai hekwakwanai ia habadaia. Davida ia gwau henia. Davida be Iehova ena hesiai tauna namona, bona peroveta tauna Samuela ese ia horoa vadaeni. Unai ese ia hamomokania Dirava be Davida ia abia hidi vadaeni, ia ese Saulo ena king dagina do ia abia. (1 Sam. 16:1, 2, 11-13) King Saulo be Davida dekenai ia mama bona ia hamasea totona ia tahua noho, unai dainai Davida bona ia idia badinaia tuari taudia 600 be taunimanima lasi tanona ai idia noho loaloa.

9, 10. (a) Davida bona ena tuari tatau edia noho dalana be edena bamona? (b) Dahaka dainai Nabala be Davida bona ena tatau dekenai ia moale be namo? (Paragraf 10 ena futnout itaia danu.)

⁹ Nabala be Maono ai ia noho, to Karamele taonia kahirakahira ai ia gaukara bona reana unuseniai ia be mai ena tano. Unai taoni rua be rei idia tubu namonamo gabudia ai idia noho bona mamoe naria gabu namodia, bona Nabala be mai ena mamoe 3,000. Bona unai gabu be uda badadia ese ia hagegea. Saut kahana dekenai be Parana, unai be taunimanima lasi tanona. Ist kahana amo ia lao Damena Davara dekenai be, taunimanima lasi tanona, koura bona kohua momo idia noho. Unai bamona gabu ai Davida bona ena tatau idia noho bona dina ta ta ai idia hekwarahi bada, aniani abia totona idia labana bona dika momo idia haheaukalaia. Nega momo idia ese taga tauna Nabala ena mamoe idia naria tatau matamatadia ida idia hedavari.

¹⁰ Unai gaukara goadagoada tuari taudia be edena bamona mamoe naria taudia idia kara henidia? Mamoe idia henaoa diba, to unai idia karaia lasi. Danu idia ese Nabala ena mamoe serina bona ena hesiai taudia idia gimaia. (1 Samuela 25:15, 16 duahia.) Mamoe naria taudia bona mamoe be dika momo idia davaria. Dagedage animal be momo, bona Israela ena saut kahana ena hetoana be kahirakahira dainai, henaohenao taudia ese hanaihanai idia dagedage henidia.b

11, 12. (a) Edena dala ai Davida ese Nabala dekenai aonega bona hemataurai karana ia hahedinaraia? (b) Dahaka dainai Nabala ese Davida ia haere henia dalana be kerere?

¹¹ Taunimanima lasi tanona ai, Davida ese ena tatau ibounai dekenai aniani ia henia be mai ena hekwarahi bada. Unai dainai dina ta, Davida ese gwaukau taudia 10 ia siaia lao Nabala idia noia totona. Davida be nega namona ia abia hidi. Badina unai nega ai, mamoe edia huina idia utua noho, bona vaia unai be moale, hariharibada bona aria karaia negana. Danu, Davida ese hereva maorodia ia abia hidi, Nabala ia matauraia bona hanamoa totona. Ia gwau: Lau be “emu natuna Davida,” unai bamona ia hereva badina Nabala ena mauri lagani be bada. Nabala ena haere be dahaka?​—1 Sam. 25:5-8.

¹² Ia badu dikadika! Matamanai ita herevalaia matamata tauna ese Abigaila ia hamaoroa Nabala be idia “ia gwau henia.” Ia maumau, badina ia ura lasi ena paraoa, ranu, bona vamu be idia dekenai ia henia. Ia ese Davida ia kirikirilaia, ia gwau Davida be iena biaguna amo ia heau boio anina lasi hesiai tauna bamona. Reana Nabala ena lalohadai be Saulo hegeregerena, Saulo ese Davida ia inai henia. Unai tatau rua be Iehova ena lalohadai idia abia lasi. Dirava ese Davida ia lalokau henia, bona ia diba ia be gwau-edeede hesiai tauna lasi, bona ia be gabeai Israela ena king ai do ia lao.​—1 Sam. 25:10, 11, 14.

13. (a) Davida ese Nabala ena badu herevana ia kamonai neganai, dahaka ia karaia? (b) Iamesi 1:20 ena hakaua herevana ese Davida ena kara dekenai dahaka ia hahedinaraia?

¹³ Davida ese gwaukau taudia edia ripoti ia kamonai neganai, ia badu dikadika. Ena tatau ia oda henidia: “Umui ibounai emui tuari kaia umui abia hegaegae!” Davida danu be ena tuari kaia ia abia bona tatau 400 ida idia lao tuari totona. Gwauhamata ia karaia Nabala ena ruma bese lalonai tatau ibounai do ia hamasea. (1 Sam. 25:12, 13, 21, 22) Davida ia badu be mai ena badina maorona, to ena badu be dala kererena ai ia hahedinaraia. Baibel ia gwau: “Tau ta ena badu ese Dirava ena kara maoromaoro ia havaraia diba lasi.” (Iam. 1:20) To, Abigaila be edena dala ai ena ruma bese taudia ia hamauria diba?

“Emu Laloa Namonamo Karana Dainai, Namona be Dirava ese Oi Ia Hanamoa!”

14. (a) Abigaila ese Nabala ena kerere ia hamaoromaoroa totona, dahaka ia karaia? (b) Nabala bona Abigaila edia kara amo dahaka leseni ita dibaia? (Futnout itaia danu.)

¹⁴ Ita itaia vadaeni, Abigaila be unai kerere badana ia hamaoromaoroa totona, kara ta ia karaia haraga. Ia be mai ura ida kamonai karana ia hahedinaraia, to ena adavana Nabala be unai bamona lasi. Hesiai matamata tauna be Nabala dekenai ia lao lasi, badina ia gwau: “Biaguna be kara auka tauna bona ai be hegeregere lasi ia ai hereva henia.”c (1 Sam. 25:17) Nabala be sibona ia laloa bada dainai, ia ura lasi ta ena hereva ia kamonai. Hari inai negai danu, hekokoroku karana be ia bada. To, unai hesiai matamata tauna be Abigaila ena kara ia diba, unai dainai ia vara hekwakwanai be ia dekenai ia gwauraia.

15, 16. (a) Edena dala ai Abigaila ena kara be Aonega Herevadia bukana ese ia herevalaia hahinena hegeregerena? (b) Dahaka dainai Abigaila be kara maorona ia karaia, bona ena adavana ena kwara dagina dekenai ia gwau-edeede lasi?

¹⁵ Abigaila ia laloa namonamo bona kara ta ia karaia haraga. Baibel ia gwau: “Karaharaga Abigaila” ese palani ia karaia. Unai sivarai lalonai ita itaia Abigaila be karaharaga Davida bona ena tatau totona harihari gaudia momo hegeregere, paraoa, wain, mamoe, idia gabua bali, greips huahua keke, bona fig kaukau keke ia hegaegaelaia. Oibe, Abigaila ia diba ena ruma ai dahaka aniani idia noho bona ena ruma ena gaukara ia naria, ia be Aonega Herevadia bukana ese ia herevalaia hahine namona hegeregerena. (Aon. 31:10-31) Abigaila ese harihari gaudia be hesiai taudia haida ida ia siaia guna bena ia be edia murinai ia lao. Baibel ia gwau: “To ena adavana Nabala dekenai hereva ta ia gwauraia lasi.”​—1 Sam. 25:18, 19.

¹⁶ Anina be Abigaila ese Nabala ena kwara dagina ia matauraia lasi, a? Laloatao, Nabala be Iehova ena horoa hesiai tauna ia gwauraia dika, unai kara dainai Nabala ena ruma ai idia noho kerere lasi tatau ibounai idia mase diba. Unai dainai Abigaila be kara ta ia karaia haraga, bema lasi, reana ia ese adavana ena kerere do ia durua, ani? To, Abigaila be ena Dirava badinaia karana ia atoa guna, ena adavana lasi.

17, 18. Abigaila be Davida ida ia hedavari neganai, dahaka ia karaia? Dahaka hereva ia gwauraia? Bona ena hereva ese dahaka namo ia havaraia?

¹⁷ Daudau lasi murinai, Abigaila be Davida bona ena tatau ida ia hedavari. Bena doniki amo ia diho haraga bona mai hemataurai ida Davida vairanai ia tui diho. (1 Sam. 25:20, 23) Bena ia mamia gaudia ibounai be Davida dekenai ia gwauraia, bona ia noia ena adavana bona ruma bese do ia hebogahisi henia. Abigaila ena hereva dalana ese dahaka namo ia havaraia?

¹⁸ Abigaila ese Davida ia hamaoroa unai hekwakwanai be iena kerere bona ia noia ena dika do ia gwauatao. Danu, ia gwau ena adavana be kavakava tauna ena ladana hegeregerena, bona namo lasi Davida ese ena nega ia haorea unai bamona tauna ia panisia totona. Abigaila ia abia dae Davida be Iehova ena gwaukau tauna, bona ia laloparara Davida be “Iehova totona ia tuari noho.” Danu Iehova ena gwauhamata ia diba, Davida be king dagina do ia abia, badina ia gwau: “Iehova ese . . . oi be Israela ena lohia ai do ia halaoa.” Danu, Davida ia hamaoroa namo lasi kara ta ia karaia bena rara dekenai do ia kerere eiava gabeai ena “lalomamina [ia] hadikaia.” (1 Samuela 25:24-31 duahia.) Ena hereva namodia ese Davida ia hagoadaia!

19. Davida be edena bamona ia haere, bona dahaka dainai Abigaila ia hanamoa?

¹⁹ Davida be dahaka ia karaia? Abigaila ese ia mailaia gaudia ia abia dae bona ia gwau: “Iehova, Israela ena Dirava hanamoa, ia ese hari dina oi ia siaia lau oi hedavari henia totona! Bona emu laloa namonamo karana dainai, namona be Dirava ese oi ia hanamoa! Bona hari dina oi ese lau oi koua dainai, rara dekenai lau kerere lasi.” Davida ese Abigaila ia hanamoa, badina mai gari lasi ida ia lao haraga ia hedavari henia totona, bona ia gwau Abigaila ese ia koua dainai rara dekenai ia kerere lasi. Davida be mai manau ida Abigaila ia hamaoroa: ‘Mai maino ida emu ruma dekenai oi daekau lao. Lau ese emu hereva lau kamonai vadaeni.’​—1 Sam. 25:32-35.

“Lau Noho Hegaegae Emu Hesiai Hahinena”

20, 21. (a) Abigaila be mai ura ida ena adavana dekenai ia giroa lou karana amo dahaka ita dibaia? (b) Abigaila be nega maorona ia abia hidi Nabala ia hereva henia totona, edena dala ai unai be aonega karana?

²⁰ Abigaila ese Davida ia rakatania murinai, reana idia ida ia hedavari karana ia laloa bona unai abidadama tauna ena kara namo bona ena adavana ena kara edia idau ia itaia. To, unai ia lalohadailaia momo lasi. Baibel ia gwau: “Gabeai Abigaila be Nabala dekenai ia giroa lou.” Oibe, ena adavana dekenai ia giroa badina ia ura iena headava ena maduna ia huaia namonamo. Abigaila ese Davida bona ena tatau dekenai ia henia harihari gaudia be Nabala ia hadibaia be namo. Ia be mai ena maoro unai ia diba totona. Danu, unai dika ia koua sivaraina be Nabala ia hadibaia be namo, bema ma haida amo ia kamonai, do ia hemarai bada. To unai gaudia do ia herevalaia haraga lasi, badina Nabala be king ta bamona ia aniani bona ia kekero momokani.​—1 Sam. 25:36.

²¹ Abigaila be lalogoada bona aonega karana ia hahedinaraia lou, ia naria ela bona daba ia rere. Nabala ese Abigaila ena hereva ia lalopararalaia totona, ena kekero ia ore be namo, badina ia be badu tauna. Bona Abigaila ese Nabala dekenai sivarai ibounai ia gwauraia. Ia laloa Nabala be do ia badu dikadika bona boiboi badabada, reana mai dagedage ida. To, Nabala be ia helai sibona.​—1 Sam. 25:37.

22. Nabala dekenai dahaka ia vara, bona ruma bese taudia dagedage henia bona hahisia karadia dekenai dahaka ita dibaia?

²² Nabala dekenai dahaka ia vara? Baibel ia gwau: “Ena kudouna be mase tauna ena bamona ia lao, bona ia hekure marere lasi, nadi bamona.” Reana strouk bamona gorerena ia abia. Bona dina 10 bamona murinai ia mase, to ena gorere sibona dainai ia mase lasi. Baibel ia gwau: “Iehova ese Nabala ia hamasea.” (1 Sam. 25:38) Unai dala ai, Abigaila ese ia haheaukalaia headava mauri dikana be ia ore. Ena be hari inai negai, Iehova ese hoa dalana ai taunimanima dikadia ia hamasea lasi, to unai sivarai ese ia hahedinaraia ruma bese taudia dagedage henia bona hahisia karadia ibounai Ia itaia noho. Bona iena nega korikorina ai, do ia hahemaoro henidia.​—Luka 8:17 duahia.

23. Abigaila be dahaka hahenamo ia abia, bona Davida ena adavana ai ia lao dainai unai ese ena kara ia senisia, a?

²³ Abigaila ena headava mauri dikana ia ore bona gabeai hahenamo ta do ia abia. Davida ia kamonai Nabala ia mase neganai, ia ese hereva ia siaia Abigaila ia adavaia totona. Abigaila ia gwau: “Lau noho hegaegae emu hesiai hahinena ai lau lao, bona egu lohia ena hesiai taudia edia aena lau huria totona.” Abigaila be Davida ena adavana ai ia lao, to ena kara namodia ia hahedinaraia noho, bona ia gwau Davida ena hesiai taudia edia hesiai hahinena ai do ia lao! Baibel ese Abigaila ena kara ia herevalaia lou, ia be kara haraga ia hegaegae Davida dekenai ia lao totona.​—1 Sam. 25:39-42.

24. Abigaila ena headava mauri matamatana lalonai, dahaka hekwakwanai idia vara, to iena adavana bona iena Dirava be edena dala ai ia idia laloa?

²⁴ Abigaila ena mauri ai hekwakwanai do idia vara; nega haida ena mauri Davida ida do ia auka. Davida be Ahinoama ia adavaia vadaeni, bona unai nega ai tau ta ese hahine momo ia adavaia karana be Dirava ese ia taravatua lasi, bona abidadama hahine dekenai unai be hekwakwanai badana. Davida be king ai ia do lao lasi, bona ia ese hekwakwanai bona dika idauidau do ia hanaia Iehova ia hesiai henia totona. To, hanaihanai Abigaila ese Davida ia durua, gabeai iena natuna mero ta ia havaraia, bona ia diba ena adavana ese ia laloa bada bona gimaia. Nega ta Davida ese edia inai taudia amo Abigaila ia hamauria! (1 Sam. 30:1-19) Iehova Dirava ese aonega, lalogoada, bona abidadama hahine ia lalodia bada bona lalokau henidia hegeregerena Davida danu be unai bamona ia karaia.