June

Iehova ese Keristani taudia ginigunadia ia hanamoa badina ena be edia noho dalana ia auka, to unai idia abia dae. Idia be nega momo dagedage idia davaria. Nega haida idia laloa lasi negadia ai unai ia vara. Banaba bona aposetolo Paulo be Lusitera ai idia haroro noho lalonai, ia vara gauna mani ita laloa. Matamanai, taunimanima ese idia abidia dae bona idia kamonai henidia. To gabeai, inai taudia ese “hutuma edia lalona idia veria,” bona idia ese nadi amo Paulo idia hodoa bona idia rakatania ia mase totona. (Kara 14:19) To Banaba bona Paulo be haroro gaukara idia karaia totona, gabu ma ta dekenai idia lao. Dahaka namo idia vara? Idia ese “haida be hahediba taudia ai idia halaoa,” bona edia hereva bona kara ese edia tadikaka taihu ia hagoadaia bada. (Kara 14:​21, 22) Ena be Paulo bona Banaba be dagedage idia davaria, to edia haroro gaukara idia hadokoa lasi. Iehova ese ita dekenai ia henia gaukarana ita hadokoa lasi neganai, Ia ese ita do ia hanamoa. w23.04 rau 16-17 par. 13-14

King Davida be ena mauri lalonai ena inai taudia momo idia ura ia idia hamasea neganai, nega momo ia be Iehova ena heduru totona ia guriguri. Davida ia abia dae momokani Iehova be ena guriguri ia kamonai bona haerelaidia. Oi danu be unai oi abia dae diba. Baibel ese ita ia hadibaia Iehova ese ita dekenai aonega bona goada ia henia diba ita haheauka totona. Ia ese iseda tadikaka taihu eiava Witnes lasi taudia ia gaukaralaia diba ita idia durua totona. Ita diba Iehova be iseda guriguri do ia haerelaia, to ita laloa lasi dalana ai do ia haerelaia. Bona ia ese nega maorona ai iseda dabu gaudia do ia henia. Unai dainai mai abidadama ida oi guriguri noho, badina oi diba momokani Iehova be hari oi do ia naria, bona tanobada matamatana ai ia ese ‘mauri gaudia ibounai edia ura gaudia do ia henia.’—Sal. 145:16. w23.05 rau 8 par. 4; rau 13 par. 17-18

Namona be emu tahua gauna oi hagugurua ena hahenamo oi laloa. Dahaka hahenamo do oi laloa? Bema emu tahua gauna be, oi ura emu Baibel duahiduahi o guriguri karana oi hanamoa, unai ese emu hetura karana Iehova ida do ia hagoadaia dalana oi laloa. (Sal. 145:​18, 19) Bema emu tahua gauna be emu Keristani kara namona ta oi hagoadaia, unai ese emu hetura karana ma haida ida do ia hanamoa dalana oi laloa. (Kol. 3:14) Oi ura hagugurua tahua gaudia ta ta ena badina oi torea be namo. Bona hanaihanai emu lista oi sekea. Danu, oi do ia hagoadaia taudia oi bamoa. (Aon. 13:20) Momokani, nega haida ita ibounai iseda ura do ia goada lasi. Unai ena anina be iseda tahua gauna do ita hagugurua lasi, a? Lasi. Ita danu iseda tahua gauna ita hagugurua diba, ena be unai ura be ia goada lasi. Momokani, unai be mai ena hekwarahi, to emu tahua gauna oi hagugurua neganai do oi moale. w23.05 rau 27-28 par. 5-8

Bema ita diba ita karaia abia hidi dainai idia vara hekwakwanai be iseda maduna, iseda kara dika do ita gwauraia hedinarai, iseda kerere do ita hamaoromaoroa, bona do ita hekwarahi ita karaia lou lasi totona. Unai ita karaia neganai, mauri ena heau helulu ai do ita heau noho. Bema oi karaia abia hidi kererena oi hanamoa diba lasi, dahaka do oi karaia? Namo lasi emu nega bona goada bada oi haorea badina oi ura ma haida oi hadibaia oi be kerere lasi, eiava emu kerere be ma haida dekenai oi atoa. To, namona be emu kerere oi gwauraia hedinarai bona oi gaukara goada kara maorona oi karaia totona. Bema oi karaia kara dika ta dainai emu lalomamina ia dika, mai manau ida Iehova oi guriguri henia, emu kerere oi gwauraia hedinarai, bona oi noia emu dika ia gwauatao totona. (Sal. 25:11; 51:​3, 4) Oi hahisia taudia dekenai sori herevana oi gwauraia, bona bema hegeregere, elda taudia edia heduru oi tahua. (Iam. 5:​14, 15) Emu kerere amo gau haida oi dibaia bona oi hekwarahi oi karaia lou lasi totona. Unai bamona oi karaia neganai, do oi abia dae Iehova ese oi dekenai hebogahisi do ia hahedinaraia bona oi do ia durua.—Sal. 103:​8-13. w23.08 rau 28-29 par. 8-9

Iehoiada ese King Iehoasa ia durua tau namona ai ia lao totona. King Iehoasa ia matamata neganai, ia ura Iehova ia hamoalea. To Iehoiada ia mase murinai, Iehoasa be aposteit lohia taudia ia kamonai henia. (2 Siv. 24:​4, 17, 18) Ena be Iehova ia lalohisihisi, to “idia dekenai peroveta taudia ia siaia bona idia hadibadia loulou, to idia ura lasi kamonai.” Danu, Iehoiada ena natuna Sekaraia idia kamonai henia lasi, ia be Iehova ena peroveta tauna sibona lasi, to ia be hahelaga tauna bona Iehoasa ena kasin. To, Iehoasa be Sekaraia ia hamasea. (2 Siv. 22:11; 24:​19-22) Iehoasa be Iehova gari henia karana ia hahedinaraia lasi. Iehova be ia gwau: “Lau idia dadaraia taudia be do lau matauraidia lasi.” (1 Sam. 2:30) Gabeai, ena be Suria tuari taudia be momo lasi, to Iehoasa ena “tuari taudia momo herea” idia halusia bona Iehoasa be “bero badana ia davaria.” (2 Siv. 24:24, 25) Iehoasa ena hesiai taudia ese idia hamasea badina ia ese Sekaraia ia alaia. w23.06 rau 18-19 par. 16-17

Paulo be Efeso dekenai ia noho sisina bona sivarai namona ia harorolaia bona hadibaia. (Kara 19:​1, 8-10; 20:​20, 21) Ena tadikaka taihu ia lalokau henia bona ia ura idia ia durua Iehova idia abidadama henia noho totona. Paulo ese ia tore henia Efeso taudia be guna hereva momokani idia do diba lasi neganai, tomadiho koikoi edia hahediba herevadia idia abia dae bona meamea karadia idia karaia. Efeso ai taunimanima edia kara be bodaga bona edia kara dainai idia hemarai lasi. Siti ena moale gabudia bona tomadiho edia moale karadia lalonai, matabodaga karadia idia herevalaia. (Efe. 5:3) Bona idia momo be “idia hemarai lasi,” unai hereva ena anina be, “hisihisi idia mamia lasi.” (Efe. 4:​17-19) Efeso taudia be Iehova ena taravatu maoro bona kerere idia do diba lasi neganai, kerere idia karaia to edia lalomamina ese idia ia kota henia lasi. Unai dainai Paulo ia gwau, “edia lalona be ia dibura, bona Dirava ena amo ia mai mauri amo idia daudau.” To, Efeso taudia haida be dibura amo idia raka siri. w24.03 rau 20 par. 2, 4; rau 21 par. 5-6

Gideona be hahemaoro tauna dainai, ia gaukara goada be namo. Hanuaboi ai Midiana taudia be tuari amo idia heau neganai, Gideona be idia murinai idia ia lulua lao Ieserele ena koura amo ela bona Ioridane Sinavai. (Hah. 7:22) Gideona be Ioridane dekenai ia stopu, a? Lasi! Ena be idia hesiku, to ia bona ena tatau 300 be Ioridane idia hanaia bona Midiana taudia idia lulua noho. Bena dokonai, Midiana taudia idia dogoatao bona halusidia. (Hah. 8:​4-12) Gideona ia abia dae Iehova ese ia do ia hagoadaia, unai dainai ia lalohisihisi lasi. (Hah. 6:​14, 34) Gideona bona ena tatau be kamelo amo idia guia Midiana edia king rua idia lulua noho. (Hah. 8:​12, 21) To, Dirava ese idia ia durua dainai, unai Midiana taudia idia dogoatao, bona tuari dekenai idia kwalimu. Unai hegeregerena, elda taudia ese “ia hesiku diba lasi eiava ia manoka diba lasi” Diravana, Iehova dekenai idia tabekau diba. Idia dekenai goada do ia henia.—Isaia 40:​28, 29. w23.06 rau 6 par. 14, 16

Herevana dahaka hekwakwanai ita davaria, ita gini goada diba. Unai dainai Iehova oi abidadama henia. Mani Baraki ese Iehova ena hakaua herevana ia badinaia bona ia kwalimu sivaraina ita laloa. Ena be Israela taudia be tuari kohudia lasi, to Iehova ese Baraki ia hamaoroa Kanana ena tuari biaguna Sisera, bona ena tuari oreana mai edia tuari kohudia momo do ia tuari henia. (Hah. 5:8) Peroveta hahinena Debora ese Baraki ia hamaoroa ororo amo tano palakana dekenai do idia diho lao, Sisera mai ena kariota 900 idia tuari henia totona. Tano palakana ai Israela taudia be do idia hegeregere lasi unai tuari taudia mai edia kariota idia tuari henia totona. Baraki be unai ia diba, to Debora ena hereva ia badinaia sibona. Baraki mai ena tuari taudia be Taboro Ororona amo idia diho lao neganai, Iehova ese medu badana ia siaia. Sisera ena kariota be kopukopu lalonai idia hepuni, bona Iehova ese Baraki dekenai kwalimu ia henia. (Hah. 4:1-7, 10, 13-16) Unai hegeregerena, Iehova ese ita dekenai kwalimu do ia henia, bema ita abidadama henia bona ena orea amo ita abia hakaua herevadia ita badinaia. w23.07 rau 19 par. 17-18

Mauri hanaihanai ita abia totona haheauka karana be mai anina bada. Idaunega abidadama taudia bamona, namona be mai haheauka ida ita naria noho Dirava ese ena gwauhamata ia hagugurua totona. (Heb. 6:​11, 12) Baibel ese biru tauna ida ita ia hahegeregerea. (Iam. 5:​7, 8) Biru tauna be ia gaukara goada hadoa gaudia ia hadoa bona dairia totona, to do ia tubu negana be ia diba lasi. Unai dainai, biru tauna be mai haheauka ida ia naria, badina ia diba nega korikori ai uma ena anina do ia gogoa. Unai hegeregerena, hesiai gaukara lalonai ita bisi, ena be ita “diba lasi edena dina ai [iseda] Lohiabada do ia mai.” (Mat. 24:42) Mai haheauka ida ita naria noho, bona ita abia dae Iehova be ena nega korikori ai ia gwauhamatalaia gaudia ibounai do ia hagugurua. Bema ita haheauka lasi, do ita hesiku bona metairametaira hereva momokani ita rakatania. Bona, hari inai negai do ita moalelaia gaudia do ita tahua goadagoada. To bema ita haheauka ela bona dokona, mauri do ita abia.—Mika 7:7. w23.08 rau 22 par. 7

Daniela 2:​41-43 ena peroveta herevana be Daniela bona Apokalupo ena peroveta herevadia ma haida ida ita hahegeregerea neganai, ita gwau diba aena be idia gaukara hebou Anglo-America Basileia Badana ia laulaulaia. Ia be hari tanobada ia lohiaia noho. Unai basileia badana ia herevalaia neganai, Daniela ia gwau ia be “mai ena goada bona mai ena manoka.” Dahaka dainai ia manoka? Badina ena taunimanima, raro manokana ese ia laulaulaidia, be edia gwau-edeede karana dainai unai basileia be auri bamona ia goada lasi. Daniela ese ia herevalaia kaivakuku amo mai anina bada hereva momokani haida ita dibaia. Gau ginigunana be Anglo-America Basileia Badana ese dala haida ai iena goada ia hahedinaraia. Hegeregere, Tanobada Tuarina Ginigunana bona Iharuana ai idia kwalimu. To, unai basileia badana be ia manoka bona do ia manoka ia lao noho, badina iena taunimanima idia heai heheni bona gavamani idia gwau-edeede henia. Iharuana be unai basileia badana be tanobada do ia lohiaia basileia ginigabena, bena Dirava ena Basileia ese tanobada taudia edia gavamani ibounai do ia hadikaia ore. w23.08 rau 10-11 par. 12-13

Nega haida Davida ia lalohekwarahi badina hekwakwanai bona hahetoho momo ia davaria. (Sal. 18:​4, 5) To, Iehova ese ia lalokau henia bona ia naria dainai, unai ese ia hagoadaia. Iehova ese ena turana namona Davida be “rei gabuna namona” bona “laga-ani gabu namodia mai edia ranu dekenai . . . ia hakaua lao.” Unai dainai, Davida ia goada bona mai moale ida Iehova ia hesiai henia noho. (Sal. 18:​28-32; 23:2) Hari danu, hekwakwanai bona hahetoho ita davaria neganai, “Iehova ena noho hanaihanai lalokauna dainai ita be ita mase lasi.” (Lal. 3:​22, ftn; Kol. 1:11) Davida ena inai taudia be momo bona nega momo kahirakahira ena mauri ia haboioa. To Iehova ese ia lalokau henia dainai, ia gimaia bona naria. Davida ia mamia Iehova be hanaihanai ia ida ia noho bona unai ese ia hagoadaia. Unai dainai, iena ane lalonai ia gwau: “Lau gari henia gaudia ibounai amo [Iehova ese] lau ia hamauria.” (Sal. 34:4) Ena be nega haida Davida ia gari, to unai ia hanaia badina ia diba Iehova ese ia lalokau henia. w24.01 rau 30 par. 15-17

Iehoasa ena abia hidi kereredia amo diba abia. Hahelaga Tauna Iehoiada ia mase murinai, Iehoasa ese hebamo dikadia ia abia hidi. (2 Siv. 24:​17, 18) Ia be Iehova idia lalokau henia lasi Iuda lohia taudia ia kamonai henidia. Iehoasa ese idia ia bamoa lasi be namo, ani? To unai tura dikadia edia sisiba ia kamonai henia. Bona Iehoasa ena kasin Sekaraia be ia hamaoromaoroa totona sisiba ia henia neganai, Iehoasa ese ia hamasea. (2 Siv. 24:​20, 21; Mat. 23:35) Unai be kerere badana bona kavakava karana! Matamanai Iehoasa be abia hidi maorodia ia karaia, to gabeai aposteit bona ala-ala tauna ai ia lao. Bena iena hesiai taudia ese idia alaia. (2 Siv. 24:​22-25) Bema Iehova bona ia idia lalokau henia taudia ia kamonai henia, dika do ia davaria lasi. w23.09 rau 9 par. 6

Iesu ia diba aposetolo Petero be do ia gini goada noho. Unai dainai, mai hebogahisi ida Iesu be Petero ia hamaoroa do ia “gari lasi.” Iesu ena hereva ese Petero ena mauri ia haidaua momokani. Gabeai, Petero bona ena tadikaka Andrea be edia haoda gaukarana idia rakatania, bona edia mauri ibounai lalonai Mesia murinai idia raka. Unai abia hidi dainai hahenamo idauidau idia davaria. (Mar. 1:​16-18) Petero be Keriso murinai ia raka neganai, gau namodia momo ia itaia. Ia itaia Iesu ese gorere ia hanamoa, demoni ia luludia bona mase taudia ia hatoreaisi lou. (Mat. 8:​14-17; Mar. 5:​37, 41, 42) Danu, Petero be matahanai ta lalonai ia itaia, vaira nega ai Iesu be Dirava ena Basileia lalonai King bamona do ia lohia. Unai matahanai ia laloaboio lasi. (Mar. 9:​1-8; 2 Pet. 1:​16-18) Oibe, bema Petero be Iesu ia bamoa lasi, unai gaudia do ia itaia lasi. Reana ia moale bada badina ena lalohadai kereredia ese ia idia koua lasi dainai unai hahenamo ia itaia! w23.09 rau 21 par. 4-5

Aposetolo Petero be ena revareva ginigunana lalonai, inai hereva “lalokau henia bada” ia gaukaralaia. Unai bamona lalokau karana ese kara dika haida sibona ia gwauatao lasi, to “kara dika momo ia gwauatao.” (1 Pet. 4:8) Reana Petero ia laloatao, lagani momo gunanai Iesu be ia dekenai gwauatao karana ia hadibaia. Unai negai, Petero be ena tadikaka ena dika be “nega 7” do ia gwauatao ia herevalaia neganai, ia laloa unai be hebogahisi karana. To Iesu ese ia, bona ita ia hadibaia dika gwauatao karana be “nega 77,” anina be hetoana lasi. (Mat. 18:21) Bema unai sisiba badinaia totona be auka, oi lalohisihisi lasi! Iehova ena hesiai taudia ibounai be goevadae lasi, nega haida ia auka dika idia gwauatao totona. Mai anina bada gauna be hari kara haida oi karaia, emu tadikaka ena dika oi gwauatao bona maino umui karaia. w23.09 rau 29 par. 12

Iona be gwarume ena bogana lalonai ia noho neganai, ia helalo-kerehai bona ia abia dae Iehova be ena guriguri do ia kamonai bona do ia durua. Iehova ese Iona ia hamauria, bona gabeai ia hegeregere ena asainmen ia karaia totona. (Iona 2:10–3:4) Hekwakwanai ta oi davaria bona oi lalohekwarahi bada dainai, Iehova oi guriguri henia diba lasi, a? Eiava tauanina ia hesiku dainai oi stadi lasi, a? Namona be oi laloatao, Iehova be emu hekwakwanai ibounai ia lalopararalaia. Unai dainai, ena be guriguri kwadogina oi gwauraia, oi daradara lasi Iehova ese emu dabu gaudia do ia henia. (Ef 3:20) Bema oi gorere, hesiku, eiava oi lalohekwarahi dainai oi stadi diba lasi, Baibel eiava pablikeisen ta ena rekodin oi kamonai diba. Danu jw.org amo, iseda ane oi kamonai eiava vidio ta oi itaia diba. Iehova oi guriguri henia bona Baibel bona pablikeisen ma haida amo heduru oi tahua neganai, dala oi kehoa Iehova ese oi ia hagoadaia totona. w23.10 rau 13 par. 6; rau 14 par. 9

Gabeai Ierusalema ai idia haginidia dubu helaga edia lalona be palai dubuna ena lalona hegeregerena. Lalona ai be daiutu rua, “Helaga Gabuna” bona “Helaga Herea Gabuna” bona idia huanai be keten ta ia noho. (Heb. 9:​2-5; Eso. 26:​31-33) Helaga Gabuna ai golo lamepa atoa gauna, bonana namo muramura gabua patana, bona paraoa helagana ena teibolo idia noho. “Hahelaga gaukara karaia totona idia abia hidi” taudia sibona be Helaga Gabuna dekenai idia vareai edia hahelaga gaukara idia karaia totona. (Num. 3:​3, 7, 10) Helaga Herea Gabuna ai golo taravatu mauana ia noho, bona unai ese ia hahedinaraia Iehova be idia ida ia noho. (Eso. 25:​21, 22) Lagani ta ta ai, Kara Dika Davana Karaia Dinana ai, hahelaga tauna badana sibona be unai keten murinai ia lao bona Helaga Herea Gabuna dekenai ia vareai. (Lev. 16:​2, 17) Ia ese animal edia rara ia abia vareai, iena dika bona bese iboudiai edia dika gwauatao totona. Gabeai, Iehova ese palai dubuna ai idia karaia tomadiho karadia edia anina korikorina ia hahedinaraia.—Heb. 9:​6, 7. w23.10 rau 27 par. 12

Baibel ai, do ita “lalokau heheni” ena oda herevana ita kamonai loulou. (Ioa. 15:12; Roma 13:8; 1 Tes. 4:9; 1 Pet. 1:22; 1 Ioa. 4:11) To lalokau be iseda kudouna amo ia mai hemamina, bona ta ese ia itaia diba lasi. Unai dainai, edena dala ai, ta ta ita lalokau henia karana ita hahedinaraia diba? Iseda hereva bona kara amo. Dala idauidau ai iseda tadikaka taihu dekenai lalokau ita hahedinaraia diba. Dala haida be inai: “Umui ta ta dekenai hereva momokani umui gwauraia.” (Sek. 8:16) “Umui ta ta huanai maino do ia noho.” (Mar. 9:50) “Umui ta ta dekenai hemataurai hahedinaraia karana do umui gunalaia.” (Roma 12:10) “Umui ese ta ta do umui abia dae.” (Roma 15:7) Ta ta do umui “gwauatao.” (Kol. 3:13) “Ta ta umui durua noho emui metau umui huaia totona.” (Gal. 6:2) “Do umui hagoadaia heheni noho.” (1 Tes. 4:18) Ta ta do umui durua noho. (1 Tes. 5:11) “Ta ta totona do umui guriguri.”—Iam. 5:16. w23.11 rau 9 par. 7-8

Dina ta ta ai, abia hidi idauidau ita karaia dainai, iseda abidadama ia goada be gau badana. Hegeregere, iseda turadia, moale karadia, edukeisen, headava, natudia, bona moni gaukara dekenai abia hidi ita karaia. Sibona do ita nanadaia, ‘Egu abia hidi amo lau hahedinaraia inai tanobada dikana be do ia ore bona kahirakahira Dirava ese tanobada matamatana do ia mailaia, a? Eiava egu abia hidi ia hahedinaraia egu lalohadai be mauri hanaihanai do idia abia lasi taudia edia hegeregerena?’ (Mat. 6:​19, 20; Luka 12:​16-21) Tanobada matamatana be ia kahirakahira vadaeni ita abidadama henia neganai, abia hidi namodia do ita karaia. Danu, hekwakwanai ita davaria neganai iseda abidadama ia goada be namo. Reana dagedage, gorere badana eiava gau ma haida ita davaria bona unai ese iseda lalona ia hamanokaia diba. Matamanai, reana hekwakwanai ita haheaukalaia diba. To bema hekwakwanai ia noho daudau—namona be iseda abidadama ia goada, unai amo do ita haheauka bona mai moale ida Iehova ita hesiai henia diba.—1 Pet. 1:​6, 7. w23.04 rau 27 par. 4-5

Iehova ia ura iseda guriguri hegeregerena kara ta ita karaia. Hegeregere, tadikaka ta be rijinol hebouhebou do ia lao totona, Iehova ia noia do ia durua unai dina toi ai moni gaukara do ia karaia lasi. Iehova ese edena bamona unai guriguri do ia haerelaia? Reana ia ese tadikaka dekenai lalogoada do ia henia ena bosi ia hereva henia totona. To unai tadikaka be ena bosi dekenai do ia lao ia noinoi totona, bona reana unai do ia karaia loulou. Eiava reana do ia noinoi iena gaukara dinana do ia haidaua eiava ena pei do idia utua. Iehova ia ura ita laloa bada gaudia totona ita guriguri loulou. Iesu ia hahedinaraia ita gurigurilaia gaudia haida edia haere be do ita abia haraga lasi. (Luka 11:9) Unai dainai do ita hesiku lasi! Hanaihanai do ita guriguri goadagoada. (Luka 18:​1-7) Unai ita karaia neganai, Iehova dekenai ita hahedinaraia unai gauna ita laloa bada. Danu, unai ese ia hahedinaraia ita abia dae momokani ita do ia durua. w23.11 rau 22 par. 10-11

Iehova be ena turana Aberahamo dekenai ia gwauhamata iena bese amo tanobada taudia ibounai be hahenamo do idia abia. (Gen. 15:5; 22:18) Ena be Aberahamo ena mauri lagani be 100 bona adavana ena mauri lagani be 90, idia ese natuna ta idia do havaraia lasi. To, Aberahamo be Dirava ia abidadama henia dainai, ia abia dae momokani Dirava ena gwauhamata be do ia guguru. (Gen. 21:​1-7) Baibel ia gwau: “Aberahamo be mai ena helaro bona ia diba momokani ia be bese momo edia tamana ai do ia lao, bona herevana toana be unai do ia vara lasi, to ia ese guna idia gwauraia herevana ia abidadama henia.” (Roma 4:18) Oi diba Aberahamo ese ia abidadama henia gauna be ia guguru bona ena natuna Isako ia vara. Dahaka dainai Aberahamo ia abia dae, Dirava be ena gwauhamata do ia hagugurua? Aberahamo ena hetura karana Iehova ida ia goada dainai, ia “diba momokani, Dirava ese ia gwauhamatalaia gauna” be do ia hagugurua. (Roma 4:21) Ena abidadama dainai Iehova ese ia lalonamo henia bona ia gwauraia maoromaoro.—Iam. 2:23. w23.12 rau 8 par. 1-2

Tau matamata be iena maduna ibounai ia huaia namonamo neganai, haida ese do idia abidadama henia. Mani Iesu ena haheitalai goevadaena ita laloa. Ia be ena gaukara ia karaia kava lasi eiava ia hadikaia lasi. To, Iehova ese ia henia asainmen idauidau ia hagugurua, ena be idia auka. Iesu be taunimanima ia lalokau henia bona iena aposetolo taudia danu, unai dainai mai lalona ibounai ida idia totona ena mauri ia bouboulaia. (Ioa. 13:1) Namona be Iesu oi tohotohoa bona oi gaukara goada oi abia asainmen idauidau oi hagugurua totona. Bema gaukara ta karaia dalana dekenai oi daradara, namona be oi manau bona lo tadikaka edia heduru oi tahua. Namo lasi oi lahedo bona gaukara oi karaia namonamo lasi. (Roma 12:11) To, namona be emu asainmen idauidau oi hagugurua, “Iehova totona [oi] karaia bona taunimanima totona lasi.” (Kol. 3:23) Momokani, oi be goevadae lasi dainai, gaukara dekenai kerere haida do oi karaia, to namona be oi gwauraia hedinarai, unai be manau karana.—Aon. 11:2. w23.12 rau 26 par. 8

Ta ia bapatiso bona Iehova ena ruma bese lalonai ia vareai neganai ita moale bada. Bapatiso idia abia taudia be salamo torea tauna, Davida ena hereva dekenai idia lalotamona, ia gwau: “Oi [Iehova] abia hidi bona hakaua mai tauna be ia moale, emu dubu helaga ena ariara lalonai ia noho totona.” (Sal. 65:4) Iehova ese ena ruma bese lalonai taunimanima ibounai ia hakaua mai lasi. Iehova be ia idia ura tura henia taudia ia abia hidi ia kahirakahira idia lao totona. (Iam. 4:8) Iehova dekenai oi gwauhamata bona bapatiso oi abia murinai, ia ese ‘hahenamo be medu bamona do ia bubua diho ela bona emui dabu gaudia ibounai do ia hagugurua momokani.’ (Mal. 3:10; Ier. 17:8) Bapatiso, be Iehova hesiai henia karana ena matamana sibona. Do oi ura oi gaukara goada emu gwauhamata oi badinaia totona, ena be hahetoho eiava hekwakwanai idauidau do oi davaria. (Had. 5:​4, 5) Oi be Iesu ena hahediba tauna dainai, ena hahegani bona haheitalai do oi badinaia.—Mat. 28:​19, 20; 1 Pet. 2:21. w24.03 rau 8 par. 1-3

Bema oi bona emu adavana emui hebamo karana umui moalelaia lasi be edena bamona? Dahaka do oi karaia? Mani lahi ena haheitalai ita laloa. Lahi oi karaia matamaia neganai, karaharaga do ia hururu lasi. To metairametaira lahi au oi atoa kau neganai, do ia hururu badabada. Unai hegeregerena, namona be dina ta ta ai nega sisina lalonai ta ta umui bamoa diba. Namona be umui moalelaia gauna umui karaia hebou. (Iam. 3:18) Kara maragina amo umui hamatamaia neganai, emui lalokau do umui hagoadaia lou diba. Headava lalonai hemataurai be mai anina bada. Ia be oksijen bamona lahi ia durua ia araia goadagoada totona. Bema oksijen be lasi, lahi do ia bodo. Unai hegeregerena, bema hemataurai be lasi, headava taudia edia lalokau do ia keru. To, idia hekwarahi ta ta dekenai hemataurai idia hahedinaraia headava tau bona hahine edia lalokau be do ia goada noho. To laloatao, namo lasi oi laloa emu adavana dekenai hemataurai oi hahedinaraia, to namona be emu adavana ia mamia ia oi matauraia. w23.05 rau 22 par. 9; rau 24 par. 14-15

Baibel ai, Dirava ena hesiai taudia be edia inai taudia eiava gau ma haida dainai, idia lalohisihisi bona gari karana idia herevalaia. (Sal. 18:4; 55:​1, 5) Unai hegeregerena, ita danu be sikuli, gaukara gabunai, bona iseda famili eiava gavamani amo dagedage ita davaria. Danu, gorere badana ta ita abia dainai ita gari, badina ita ura lasi ita mase. Unai bamona negadiai, natu maragina ta bamona ita ura heduru ita abia. Edena dala ai Iehova ese ita do ia durua? Ita ia hagoadaia bona iseda lalona ia hanamoa. Unai dainai, hanaihanai nega oi atoa Iehova oi guriguri henia bona iena Hereva oi duahia. (Sal. 77:​1, 12-14) Bema unai oi karaia, hekwakwanai negadiai, do oi ura karaia gau ginigunana be emu guba Tamana ena heduru oi tahua. Iehova dekenai emu gari bona lalohekwarahi gaudia oi herevalaia. Bena ena hereva oi duahia karana amo ia oi kamonai henia bona oi do ia durua dalana do oi itaia.—Sal. 119:28. w24.01 rau 24-25 par. 14-16

Tahua gaudia oi hagugurua totona mai ura bada ida oi hekwarahi be mai anina bada. Mai ena ura bada tauna be do ia gaukara goada ena tahua gauna ia hagugurua totona. Bona iseda ura ia goada neganai, iseda tahua gaudia do ita hagugurua diba. Vadaeni, dahaka oi karaia diba emu ura oi habadaia totona? Iehova oi guriguri henia emu ura ia habadaia totona. Iena lauma helaga amo oi ia durua emu tahua gauna oi hagugurua totona. Nega haida tahua gauna ita abia hidi, badina ita diba unai be gau namona. To reana unai ura ia noho lasi iseda tahua gauna ita hagugurua totona. Iehova ese oi totona ia karaia gaudia oi laloa dobu. (Sal. 143:5) Aposetolo Paulo be Iehova ese ia dekenai ia hahedinaraia hebogahisi hereadaena, ia laloa dobu dainai unai ese ia hagoadaia Iehova totona ia gaukara goada. (1 Kor. 15:​9, 10; 1 Tim. 1:​12-14) Unai hegeregerena, Iehova ese oi totona ia karaia gauna oi laloa dobu neganai, emu ura do ia goada emu tahua gauna oi hagugurua diba.—Sal. 116:12. w23.05 rau 27 par. 3-5

Iseda guba Tamana ena ladana ita hanamoa neganai, ia moale. (Sal. 119:108) Goevadae lasi taudia be idia ura ma haida ese do idia hanamoa, unai amo goada do idia abia. To siahu ibounai Diravana be unai bamona lasi. Iseda guba Tamana ita hanamoa neganai, Satani ese ita totona ia gwauraia herevana ita hakoikoia. Satani ia gwau ta be mai abidadama ida Dirava ena ladana do ia gimaia lasi. Bona hahetoho ia davaria neganai Dirava do ia badinaia lasi. Danu ia gwau ita ibounai be iseda namo totona Dirava hesiai henia karana ita hadokoa diba. (Iobu 1:​9-11; 2:4) To abidadama tauna Iobu ese Satani ena hereva ia hakoikoia. Oi danu be unai bamona do oi karaia, a? Ita ta ta be abia hidi ita karaia diba, iseda Tamana ena ladana ita gimaia bona mai abidadama ida ia ita hesiai henia totona. (Aon. 27:11) Unai ita karaia be hahenamo badana. w24.02 rau 8-9 par. 3-5

Mose bona Iosua edia nega idia ore murinai, Iehova ese hahemaoro taudia ia abia hidi iena taunimanima idia hakaua totona. Bena, king taudia edia nega lalonai, Iehova ese peroveta taudia ia abia hidi ena taunimanima idia hakaua totona. Idia abidadama king taudia be peroveta taudia edia sisiba idia badinaia. Hegeregere, King Davida be mai manau ida peroveta tauna Natana ena sisiba ia abia dae. (2 Sam. 12:​7, 13; 1 Siv. 17:​3, 4) King Iehosapata be peroveta tauna Iahasiele ena hakaua dalana ia badinaia bona Iuda taudia ia hagoadaia, Dirava ena ‘peroveta taudia idia abidadama henia’ totona. (2 Siv. 20:​14, 15) King Hesekaia be ia lalohisihisi neganai, peroveta tauna Isaia ena heduru ia tahua. (Isa. 37:​1-6) Hanaihanai king taudia be Iehova ena hakaua dalana idia badinaia neganai, Iehova ese idia ia hanamoa bona gimaia. (2 Siv. 20:​29, 30; 32:22) Unai ese ia hahedinaraia, Iehova ese peroveta taudia ia gaukaralaia noho iena taunimanima idia hakaua totona. w24.02 rau 21 par. 8

Satani ia ura Iehova ena taravatu idia badinaia lasi taudia ita bamoa. Namona be ita laloatao ita tura henia taudia be hari ita bamoa turadia sibona lasi, to social media ai danu. Tanobada taudia idia laloa matabodaga karadia be kerere lasi, to namona be ita gaukara goada unai lalohadai ita dadaraia. Ita diba unai be maoro lasi. (Efe. 4:​19, 20) Danu sibona ita nanadaia: ‘Lau gaukara goada Iehova ena kara maoromaoro taravatudia idia badinaia lasi gaukara turadia, sikuli turadia, eiava ma haida lau dadaraia totona, a? Mai gari lasi ida Iehova ena taravatu lau badinaia ena be ma haida ese lau do idia kirikirilaia, a?’ Bona 2 Timoteo 2:​20-22 hegeregerena, Keristani kongrigeisen lalonai iseda turadia ita abia hidi namonamo. Namona be ita laloatao, haida be ita do idia durua lasi mai abidadama ida Iehova ita hesiai henia noho totona. w24.03 rau 22-23 par. 11-12

Nega ta reana oi laloa, Iehova be edena bamona Diravana? Ena be Iehova ita itaia diba lasi, to Baibel ese dala idauidau ai ia herevalaia. Hegeregere, Iehova be “dina bona kesi” bona “gabua ore lahina bamona.” (Sal. 84:11; Heb. 12:29) Esekiela ese Iehova ia gwauraia, ia be sapairo nadi, auri laboralabora, bona kevau mai ena diari badana bamona. (Ese. 1:​26-28) Iehova ita itaia diba lasi dainai, reana do ia auka ita abia dae ita ia lalokau henia. Haida be edia mauri ai dika gaudia idia vara dainai, idia laloa Iehova be idia ia lalokau henia lasi. Iehova be unai bamona hemami ia lalopararalaia bona ia diba dahaka dainai ia auka ia kahirakahira idia lao totona. Unai dainai ita ia durua totona, Baibel ai iena kara namodia ia hahedinaraia. Lalokau be Iehova ena kara badana. (1 Ioa. 4:8) Baibel ia gwau Iehova be lalokau. Bona lalokau dainai gau ibounai ia karaia. Dirava ena lalokau be bada herea dainai, ia idia lalokau henia lasi taudia dekenai ena lalokau ia hahedinaraia danu.—Mat. 5:​44, 45. w24.01 rau 26 par. 1-3

Iehova be Mose ia abia hidi Aigupito amo Israela besena ia hakaua raka lasi totona, bona hamomokania gauna ta ia hahedinaraia unai amo idia diba, dina ai ori amo idia ia hakaua bona hanuaboi ai lahi amo idia ia hakaua. (Eso. 13:21) Mose ese unai gaudia rua ia badinaia, ia bona Israela besena be Davara Kakakana dekenai ia hakaua lao. To Aigupito taudia ese Israela taudia idia lulua, unai dainai idia gari badina idia laloa do idia hamasedia. To unai be abia hidi maorona, badina Iehova ese Mose ia gaukaralaia unuseni ena taunimanima ia hakaua lao totona. (Eso. 14:2) Bena Dirava ese hoa dalanai idia ia hamauria. (Eso. 14:​26-28) Lagani 40 lalonai, Mose ese unai ori ia badinaia taunimanima idia noho lasi gabuna amo Dirava ena taunimanima ia hakaua hanai totona. (Eso. 33:​7, 9, 10) Unai ori amo Iehova ese Mose ia hereva henia, bena ia henia hakaua herevadia be Mose ese Iena taunimanima dekenai ia gwauraia. Israela taudia idia diba Iehova ese Mose ia gaukaralaia noho idia ia hakaua totona. w24.02 rau 21 par. 4-5