July

Iesu ena hereva bona kara ibounai, ena hoa karadia danu, ese ena Tamana ena lalohadai bona hemami idia hahedinaraia. (Ioa. 14:9) Iesu ena hoa karadia amo dahaka ita dibaia? Iesu bona ena Tamana be ita idia lalokau henia bada. Iesu be tanobada ai ia noho neganai, iena siahu ia gaukaralaia hisihisi idia davaria taudia ia durudia badina idia ia lalokau henia bada. Nega ta matakepulu taudia rua be ia dekenai heduru totona idia noinoi. (Mat. 20:​30-34 ) Ita itaia Iesu ese “ia hebogahisi henidia” bona edia gorere ia hanamoa. Iniseniai idia hahanaia Grik herevana, “ia hebogahisi henidia” ena anina be ia hebogahisi bada herea, hegeregere ena bogana lalonai unai hebogahisi ia mamia bamona. Unai dainai Iesu ese taunimanima ia lalokau henidia, bona hitolo taudia ia ubua bona lepera tauna ia hanamoa. (Mat. 15:32; Mar. 1:41) Ita diba momokani Iehova, “hebogahisi bada” Diravana, bona ena Natuna be ita idia lalokau henia bada, bona ita davaria hisihisi dainai, idia hebogahisi bada. (Luka 1:78; 1 Pet. 5:7) Idia ura dikadika taunimanima ese idia davaria hekwakwanai ibounai do idia kokia! w23.04 rau 3 par. 4-5

Baibel ita duahia bona stadilaia karana amo iseda lalohadai be gau namodia amo ita hahonua. Danu, hebou ita lao bona haroro gaukara ita karaia ese iseda lalohadai do ia gimaia. Iehova ia gwauhamata, iseda goada ia hereaia hedibagani ita davaria neganai, ita do ia rakatania lasi, to ita do ia durua. (1 Kor. 10:​12, 13) Inai nega dikadia lalonai, Iehova ita badinaia noho totona, ita ta ta be hanaihanai do ita guriguri. Iehova ia ura guriguri amo ‘ia dekenai ita laloa gaudia ibounai ita gwauraia’ hedinarai. (Sal. 62:8) Iehova ia karaia gaudia dainai ia ita hanamoa bona tanikiu henia. Ita noia ita dekenai goada ia henia haroro gaukara ita karaia totona. Oi noia oi ia durua hekwakwanai oi haheaukalaia bona hedibagani oi dadaraia totona. Namo lasi gau ta eiava tau ta ese hanaihanai Iehova oi guriguri henia karana ia koua. w23.05 rau 7 par. 17-18

Dahaka dainai kongrigeisen heboudia dekenai ita lao? Badina be ita ura Iehova ita hanamoa. (Sal. 26:12; 111:1) Danu, hebou ita lao unai amo inai nega aukadia lalonai ta ta ita hagoadaia diba. (1 Tes. 5:11) Hebou dekenai haere ita henia neganai, unai badina rua ita hagugurua. To haere ita henia totona koua gaudia haida ita davaria. Haere henia totona ita gari, eiava ita ura haere ita henia to nega momo ita idia makaia lasi. Edena dala ai unai koua gaudia ita hanaia diba? Aposetolo Paulo ia gwau “hagoadaia heheni” karana ita laloa bada be namo. Bema ita laloatao iseda haere ese ma haida ia hagoadaia diba, do ita gari lasi haere ita henia totona. Ena be nega momo haere totona ita idia makaia lasi, to ita moale be namo badina haida idia haere diba.—1 Pet. 3:8. w23.04 rau 20 par. 1-3

King ese hadibaia hereva ta ia gwauraia! Babulonia ai lagani 70 idia noho Iuda taudia be edia tano korikorina Israela dekenai do idia giroa lou. (Ese. 1:​2-4) Iehova sibona ese unai do ia hagugurua diba. Vaia, Babulonia taudia be idia guia taudia idia ruhaia diba lasi. (Isa. 14:​4, 17) To Babulonia idia hadikaia dainai, lohia tauna matamata ese Iuda taudia ia hamaoroa unai tano idia rakatania diba. Iuda taudia ibounai, ruma bese kwaradia unai, be disisen badana ta do idia karaia: Babulonia do idia rakatania o do idia noho. Reana haida be buruka dainai idia hegeregere lasi gabu daudau idia lao totona. Bona momo be Babulonia ai idia vara dainai, idia mamia unai be edia hanua. Idia dekenai Israela tanona be edia tubudia edia tano. Babulonia ai Iuda taudia haida be taga taudia ai idia lao. Unai dainai edia ruma namodia bona bisinesi idia rakatania, bona idia diba lasi tanona dekenai idia lao be auka. w23.05 rau 14 par. 1-2

Dirava ena Hereva ese ita ia durua haheauka, hebogahisi bona lalokau ita habadaia noho. Luka 21:19 ia gwau: “Emui haheauka karana dainai emui mauri do umui dogoatao.” Kolose 3:12 ia gwau: “Inai bamona kara be dabua bamona do umui atoa, hebogahisi.” Bona 1 Tesalonika 4:​9, 10 ia gwau: “Dirava ese umui ia hadibaia umui lalokau heheni totona. . . . To tadikaka e, umui ai noia, unai do umui karaia noho bona do umui habadaia.” Unai siri be hahediba taudia dekenai idia torea, ena be idia ese haheauka, hebogahisi bona lalokau idia hahedinaraia vadaeni. To, namona be unai kara do idia habadaia noho. Unai ita karaia danu be namo. Oi ia durua totona, mani Keristani taudia ginigunadia ese unai kara idia hahedinaraia daladia oi lalohadailaia. Bena do oi itaia edena dala ai unai hahediba taudia oi tohotohoa diba, bona oi hamomokania hisihisi badana totona oi hegaegae. Bena hisihisi badana ia matamaia neganai, haheauka dalana oi diba vadaeni bona do oi haheauka noho. w23.07 rau 3 par. 4, 8

Herevana, ita be horoa taudia o “mamoe ma haida,” “Helaga Dalana” dekenai ita raka noho be namo. Unai ese ita do ia durua Iehova ita tomadiho henia noho ela bona nega vaira ai iena Basileia ese tanobada ai mauri namona ia mailaia. (Ioa. 10:16) Lagani 1919 C.E. amo, tatau, hahine bona natudia milioni momo be Babulonia Badana, tomadiho koikoi ibounai edia orea unai, ena igui amo idia roho mauri, bona Isaia ese laulau dalanai ia herevalaia dalana dekenai idia raka matamaia. Iuda taudia be Babulonia idia rakatania neganai, Iehova ese edia dala ia koua gaudia ia kokia. (Isa. 57:14) Hari, “Helaga Dalana” be edena bamona? Lagani momo gunanai ema bona lagani 1919 ai, Iehova ese ia idia matauraia tatau haida ia gaukaralaia, taunimanima idia durua Babulonia Badana idia rakatania totona. (Isaia 40:3 hahegeregerea.) Idia ese dala hegaegaelaia gaukarana idia karaia. Unai amo gabeai kudou-maoro taudia do ia durua tomadiho koikoina idia rakatania bona Iehova ena taunimanima ida, ia do idia tomadiho henia. w23.05 rau 15-16 par. 8-9

Iehova ia ura ia ita hesiai henia, mai moale bona ura ida. (2 Kor. 9:7) Bema iseda ura be ia goada lasi iseda tahua gauna hagugurua totona, ita hekwarahi be namo, a? Aposetolo Paulo ena haheitalai mani ita laloa. Ia gwau: “Egu tauanina lau panisia bona igui hesiai bamona lau hakaua.” (1 Kor. 9:​25-27, ftn) Paulo be sibona ia doria Iehova ena ura ia karaia totona. Iehova ese Paulo ena hesiai gaukara ia abia dae, a? Oibe! Bona Iehova ese ena hekwarahi ia hanamoa. (2 Tim. 4:​7, 8) Unai hegeregerena, ena be iseda ura ia goada lasi, to Iehova be ia moale bema ita hekwarahi iseda tahua gauna ita hagugurua totona. Iehova ia moale badina ia diba ia ita lalokau henia dainai ita gaukara noho. Ena be nega haida unai gaukara dekenai ita hesiku. Iehova ese Paulo ia hanamoa hegeregerena, iseda hekwarahi do ia hanamoa danu. (Sal. 126:5) Iehova ena hahenamo ita itaia neganai, unai ese iseda ura do ia hagoadaia. w23.05 rau 29 par. 9-10

Aposetolo Paulo ese Iehova ena dina ai do idia roho mauri lasi taudia be idia mahuta taudia ida ia hahegeregerea. Edia badinai dahaka gaudia idia vara noho o nega ia hanaia be idia diba lasi. Unai dainai, mai anina bada gaudia idia vara neganai, do idia diba lasi bona kara ta do idia karaia lasi. Hari inai negai, taunimanima momo be idia mahuta taudia bamona. (Roma 11:8) Idia vara toa idauidau ese ia hahedinaraia ita be “dina gabedia ai” ita noho, bona hisihisi badana be kahirakahira do ia mai idia abia dae lasi. (2 Pet. 3:​3, 4) To, Paulo ena sisiba ita lalopararalaia, dina ta ta lalonai ita noga noho be mai anina bada. (1 Tes. 5:6) Unai dainai, ita laloa maoromaoro bona ita daradara lasi be namo. Dahaka dainai? Unai amo hari politikol bona komiuniti lalonai idia vara hekwakwanai lalonai do ita vareai lasi. Iehova ena dina ia kahirakahira neganai, unai bamona hekwakwanai be do idia bada ia lao. To edena bamona unai do ita hanaia ita lalohekwarahilaia lasi. Dirava ena lauma helaga ese ita ia durua diba mai laloa maoromaoro ida abia hidi maorodia do ita karaia.—Luka 12:​11, 12. w23.06 rau 10 par. 6-7

Inai ladana Samson oi kamonai neganai, dahaka oi laloa? Reana iena goada bada oi laloa. Unai be momokani. To Samson be abia hidi kererena ia karaia dainai dika bada ia davaria. Ena be unai ia vara, to Iehova ese Samson ia karaia hesiai gaukara ia laloa bada, bona ita durua totona Baibel lalonai ena sivarai ia torea. Iehova ese Samson ia abia hidi hoa karadia do ia karaia, iena taunimanima, Israela besena ia durua totona. Samson ia mase bena lagani handred momo murinai, Iehova ena siahu amo Paulo ese abidadama tatau edia ladana be lista ai ia torea neganai, Samson ena ladana ia torea danu. (Heb. 11:​32-34) Samson ena haheitalai ese ita ia hagoadaia nega aukadia ai, Iehova do ita tabekau henia. Samson ena haheitalai ese ita ia hagoadaia bona ia amo gau ma haida do ita dibaia. w23.09 rau 2 par. 1-2

Hanaihanai Iehova dekenai iseda lalohekwarahi ibounai ita gwauraia neganai, iseda haheauka karana do ia goada. (1 Tes. 5:17) Reana hari, hekwakwanai badana ta oi davaria lasi. To, oi lalohisihisi, daradara eiava oi diba lasi dahaka do oi karaia neganai, Iehova ena heduru totona oi guriguri, a? Bema dina ta ta ena hekwakwanai maragidia dainai hanaihanai Dirava oi guriguri henia, vaira nega ai hekwakwanai badadia idia vara neganai, do ia auka lasi iena heduru oi tahua totona. Unai amo do oi abia dae momokani, Iehova ia diba edena nega ai bona edena dala ai oi do ia durua. (Sal. 27:​1, 3) Bema hari iseda hekwakwanai ita haheaukalaia, vaira nega ai hisihisi badana do ita haheaukalaia diba. (Roma 5:3) Dahaka dainai unai bamona ita hereva? Tadikaka bona taihu momo idia davaria hekwakwanai ta idia haheaukalaia neganai, idia ia durua gabeai hekwakwanai idia haheaukalaia totona. Haheauka karana ese idia ia hagoadaia, bona idia abidadama Iehova ia noho hegaegae bona ia ura idia do ia durua. Oibe, edia abidadama ese idia ia durua gabeai hekwakwanai idia haheaukalaia totona.—Iam. 1:​2-4. w23.07 rau 3 par. 7-8

Iehova be manau bona hebogahisi tauna dainai, laloa maoromaoro karana ia hahedinaraia. Hegeregere, Iehova be Sodoma ai kara dika taudia ia hadikaia gwauraia neganai, manau karana ia hahedinaraia. Iehova be ena aneru rua amo kara maoromaoro tauna, Lota ia hamaoroa ororo gabudia dekenai do ia heau lao totona. Lota be ia gari unuseniai ia lao totona. Unai dainai, Iehova ia noia bema ia bona ena famili be do Ia hadikaia taoni maragina, Soara tanona dekenai do idia lao. Reana, Iehova ia gwau diba, Lota ese ena hadibaia herevana do ia badinaia sibona. To unai ia karaia lasi. Iehova be Lota ena noinoi ia kamonai bona Soara tanona ia hadikaia lasi. (Gen. 19:​18-22) Lagani momo murinai, Iehova ese Nineva taudia dekenai hebogahisi ia hahedinaraia. Ia ese peroveta tauna Iona ia siaia Nineva taudia bona edia siti do ia hadikaia ena hadibaia herevana ia harorolaia totona. To Nineva taudia idia helalo-kerehai neganai, Iehova be idia ia hebogahisi henia bona siti ia hadikaia lasi.—Iona 3:​1, 10; 4:​10, 11. w23.07 rau 21 par. 5

Iehoasa ena haheitalai amo dahaka ita dibaia? Ia be au ta bamona. Unai au ena ramuna be ia goada lasi dainai au ma ta dekenai ia tabekau. Unai au, Iehoiada, ia mase murinai, Iehoasa be aposteit taudia edia hereva ia kamonai bona Iehova ia badinaia lasi. Unai haheitalai ese ia hahedinaraia, namo lasi iseda famili bona kongrigeisen ai idia noho taudia haida edia haheitalai namona ita itaia dainai, Dirava ita ura badinaia. Lauma dalanai ita goada noho totona, namona be Dirava badinaia karadia ita goadalaia, hegeregere, hanaihanai Baibel ita stadilaia, laloa dobu bona guriguri. (Ier. 17:​7, 8; Kol. 2:​6, 7) Iehova be ita ia noia lasi gau momo ita karaia totona. Ia ura ita karaia gauna be Hadibaia Tauna 12:13 dekenai ia noho, ia gwau: “Dirava momokanina do oi gari henia bona ena oda herevadia do oi badinaia, badina taunimanima edia mauri lalonai unai be mai anina bada.” Dirava ita gari henia neganai, vaira nega ai hahetoho ita haheaukalaia diba bona do ita gari lasi. Gau ta ese Iehova ida iseda hetura karana do ia hadikaia lasi. w23.06 rau 19 par. 17-19

Dirava ena hereva be inai bamona ia hamatamaia: “Terona latanai ia helai Diravana ia gwau.” (Apok. 21:5a) Unai hereva amo aneru ese ia hahedinaraia Iehova be nega ginigunana do ia hereva. Apokalupo bukana lalonai Iehova be nega toi sibona ia hereva. Unai ese ia hamomokania aneru goadana ta eiava ia toreisi lou vadaeni tauna Iesu ese unai hereva idia gwauraia lasi, to unai be Iehova sibona ese ia gwauraia! Unai dainai, gabeai ia gwauraia herevadia ita abidadama henia diba. Dahaka dainai? Badina Iehova “be ia koikoi diba lasi.” (Tito 1:2) Unai hereva dainai Apokalupo 21:​5, 6 ai idia noho herevadia be do idia vara momokani. Mani inai hereva “Itaia!” ita laloa. Grik gado ai idia hahanaia neganai, hereva ta idia atoa guna, unai be “Itaia!” o “Kamonai!” Unai hereva be Apokalupo bukana lalonai idia gaukaralaia momo. Gabeai Dirava be dahaka ia hereva? Ia gwau: “Lau ese gau ibounai lau hamatamataia noho.” Momokani, Iehova ese vaira nega ai unai gaudia do ia karaia. To ia diba iena gwauhamata be do ia hagugurua momokani dainai, iena hereva dalana amo ia hahedinaraia ia be unai gaudia ia karaia noho.—Isa. 46:10. w23.11 rau 3-4 par. 7-8

Aposetolo Petero be iena manoka gaudia dainai ia hekwarahi. Haheitalai haida mani ita laloa. Baibel ena peroveta herevadia hegeregerena, Iesu be hisihisi do ia abia bona do ia mase dalana ia herevalaia neganai, Petero ese ia gwau henia. (Mar. 8:​31-33) Petero bona aposetolo taudia ma haida be daika ia bada idia hepapahuahulaia loulou. (Mar. 9:​33, 34) Iesu idia do hamasea lasi hanuaboi ginigabena ai, Petero ese tau ta ena taiana ia utua oho. (Ioa. 18:10) Unai hanuaboi tamona lalonai, Petero ia gari matamaia bona nega toi ia gwau iena turana Iesu ia diba lasi. (Mar. 14:​66-72) Petero be unai dainai ia tai dikadika. Iesu be Petero dekenai ia hesiku lasi. Ia be mase amo ia toreisi lou murinai, ia ura Petero be ia dekenai ena lalokau do ia hamomokania. Iesu ese Petero ia hamaoroa mai manau ida iena mamoe do ia naria. (Ioa. 21:​15-17) Petero be mai moale ida unai gaukara ia abia dae. Pentekoste dinana ai, ia be Ierusalema ai ia noho bona ia danu be lauma helaga ese ia horoa taudia ginigunadia. w23.09 rau 22 par. 6-7

Aposetolo Petero ese ia ida idia gaukara hebou elda taudia ia hagoadaia ia gwau: “Dirava ena mamoe oreana do umui . . . naria.” (1 Pet. 5:​1-4) Bema oi be elda ta, ai diba emu tadikaka bona taihu oi lalokau henidia bona oi ura idia do oi naridia. To, reana nega haida oi mamia oi bisi bada eiava emu goada ia ore dainai, emu asainmen oi hagugurua lasi. Dahaka oi karaia be namo? Iehova dekenai emu lalohekwarahi oi gwauraia hedinarai. Petero ia gwau: “Bema ta be hesiai gaukara ia karaia diba, namona be Dirava ese ia henia goadana dekenai ia tabekau, unai hesiai gaukara ia karaia totona.” (1 Pet. 4:11) Emu tadikaka bona taihu ese idia davaria hekwakwanai idauidau be inai nega ai do idia ore lasi. To laloatao, “mamoe naria tauna badana” Iesu Keriso ese idia karaia diba lasi gaudia dekenai idia ia durua diba. Hari bona tanobada matamata ai danu unai ia karaia diba. Dirava ese elda taudia ia noia edia tadikaka idia lalokau henia, naridia, bona “mamoe oreana dekenai haheitalai namona” do idia hahedinaraia. w23.09 rau 29-30 par. 13-14

Namona be taunimanima edia lalohadai ita badinaia lasi. Bema Iehova ena taravatu idia dadaraia taudia edia lalohadai ita badinaia, Iehova ena taravatu ita dadaraia diba. (1 Kor. 3:19) “Tanobada ena aonega” ese taunimanima edia lalona ia veria Dirava idia gwau-edeede henia totona. Keristani taudia haida be Peregamo bona Tuatira siti taudia edia matabodaga bona kaivakuku tomadiho henia karana idia karaia. Iesu ese unai matabodaga karadia idia abia dae kongrigeisen rua dekenai sisiba aukana ia siaia. (Apok. 2:​14, 20) Hari, taunimanima ese ita do idia doria lalohadai kereredia ita abia dae totona. Famili bona turadia do idia gwau ita be Dirava ena taravatu ita badinaia auka, bona iseda lalonai do idia veria unai taravatu ita utua totona. Hegeregere, do idia gwau matabodaga karadia ita karaia be kerere lasi, bona Baibel ena taravatu be hereva gunana. Nega haida ita laloa Iehova ese ia henia hakaua herevadia be idia hedinarai namonamo lasi. Reana ita ura sibona iseda lalohadai ita badinaia, to “Toretore Helagadia lalonai idia torea gaudia” ita dadaraia.—1 Kor. 4:6. w23.07 rau 16 par. 10-11

Maria, Iesu ena sinana, ia goada be namo. Ia headava lasi to ia be do ia rogorogo. Ia be natudia naria gaukarana ia diba lasi, to Mesia ai do ia lao merona do ia naria. Bona ia be tau ta ida ia mahuta hebou lasi dainai, edena bamona iena maoheni tauna Iosepa dekenai unai sivarai do ia gwauraia? (Luka 1:​26-33) Edena dala ai Maria ese goada ia abia unai asainmen aukana ia hagugurua totona? Haida amo heduru ia tahua. Hegeregere, unai asainmen ia diba namonamo totona Gabriela ia nanadaia. (Luka 1:34) Unai murinai, Iuda ena “ororo momo gabuna ai” ia lao ena varavara Elisabeta ia vadivadi henia totona. Elisabeta be Maria ia hanamoa bona Iehova ena siahu amo Maria ena bogana lalonai ia noho beibi ia perovetalaia. (Luka 1:​39-45) Maria ia gwau, Iehova be iena “imana amo siahu karadia ia karaia.” (Luka 1:​46-51) Iehova ese Gabriela bona Elisabeta amo Maria ia hagoadaia. w23.10 rau 14-15 par. 10-12

Keriso ena hahediba taudia haida be lauma helaga ese ia horodia bona Iehova ena turana namodia ai idia lao. Unai 144,000 taudia be guba ai Iesu ida hahelaga gaukara do idia karaia. (Apok. 14:1) Tanobada ai idia do noho lalonai Dirava ese idia ia horoa bona ena natudia ai ia halaodia. Palai dubuna ena Helaga Gabuna ese edia hetura karana namona Dirava ida ia laulaulaia. (Roma 8:​15-17) Palai dubuna ena Helaga Herea Gabuna be Iehova ia noho gabuna, guba ia laulaulaia. Helaga Gabuna bona Helaga Herea Gabuna ia hapararaia “keten” be Iesu ena tanobada tauanina ia laulaulaia. Ia be tanobada tauanina ai ia do noho dainai, Hahelaga Tauna Badana hereadaena bamona lauma dubuna lalonai ia vareai diba lasi. Taunimanima totona iena tauanina ia bouboulaia neganai, Iesu ese horoa Keristani taudia iboudiai edia dala ia kehoa guba maurina idia abia totona. Idia danu be guba ai edia ahuna idia abia totona, edia tanobada tauanina do idia rakatania.—Heb. 10:​19, 20; 1 Kor. 15:50. w23.10 rau 28 par. 13

Eparaima taudia ese Gideona idia gwauraia dika neganai, ia manau sibona. (Hah. 8:​1-3) Ia be mai badu ida ia haere henidia lasi. Idia maumauraia gauna ia kamonai namonamo bona mai manau ida idia ia haere henidia bona edia lalona ia namo. Mai edia laloparara elda taudia be Gideona idia tohotohoa totona, namona be haida ese idia gwauraia dika neganai idia badu lasi, to edia hereva idia kamonai namonamo bona mai manau ida idia haere henia. (Iam. 3:13) Unai ese kongrigeisen lalonai maino do ia havaraia. Gideona be Midiana taudia ia halusia bona haida ese idia hanamoa neganai, hanamoa ibounai be Iehova dekenai ia henia. (Hah. 8:​22, 23) Edena dala ai elda taudia ese Gideona idia tohotohoa diba? Idia hagugurua gaukarana dainai Iehova idia hanamoa diba. (1 Kor. 4:​6, 7) Hegeregere, elda tauna ta be ena hadibaia dalana dainai idia hanamoa neganai, namona be ia hahedinaraia unai hadibaia dalana be Dirava ena Hereva bona ita ibounai be iena orea amo diba ita abia noho. Namona be elda taudia idia itaia bema edia hadibaia dalana ese Iehova ia hanamoa, eiava idia ura taunimanima idia hamoalea sibona. w23.06 rau 4 par. 7-8

Bema ita gurigurilaia gaudia edia haere ita abia lasi, reana sibona ita nanadaia, ‘Lau be gau maorona totona lau guriguri, a?’ Nega momo ita laloa, ita diba dahaka be namo ita totona. To ita gurigurilaia gaudia be reana nega daudau lalonai ita dekenai namo ta do ia havaraia lasi. Bema Iehova dekenai hekwakwanai hamaoromaoroa dalana ta ita gurigurilaia, reana ita laloa dalana be maoro lasi, to dala namona ma ta ia noho. Bona reana ita noia gaudia haida be Iehova ena ura hegeregerena lasi. (1 Ioa. 5:14) Hegeregere, tama sina mani ita laloa,idia be Iehova idia noia edia natuna be hereva momokani lalonai do ia noho. Toana be unai be guriguri namona. To, Iehova be ta ia doria lasi ia do ia hesiai henia totona. Ia ura ita ibounai, iseda natudia danu, be abia hidi do ita karaia ia ita tomadiho henia totona. (Deu. 10:​12, 13; 30:​19, 20) Unai dainai, namona be tama sina ese Iehova idia noia idia do ia durua edia natuna do idia hagoadaia ena kudouna amo Iehova ia lalokau henia bona ena turana ai ia lao totona.—Aon. 22:6; Efe. 6:4 w23.11 rau 21 par. 5; rau 23 par. 12

Dahaka dainai ma haida ita hagoadaia karana amo ita hahedinaraia idia ita lalokau henia? Buka ta ia gwau, Paulo ese ia gaukaralaia Grik herevana idia hahanaia “hagoadaia” ena anina be, “ta be hahetoho badana ia davaria neganai, ta be ia badinai ia gini, do ia hagoadaia totona.” Unai dainai, hekwakwanai ia davaria tadikaka ta ita hagoadaia neganai, ia ita durua, ia toreisi bona mauri ena dala dekenai ia raka noho totona. Iseda tadikaka o taihu ita hagoadaia negadia ai, ia dekenai ita hahedinaraia ia ita lalokau henia. (2 Kor. 7:​6, 7, 13) Dahaka dainai, ma haida hagoadaia karana dekenai hebogahisi be mai anina bada. Hebogahisi tauna be ia ura hisihisi ia davaria tauna ia hagoadaia bona ia durua. Ta ita hebogahisi henia neganai, unai ese ita ia durua ia ita hagoadaia totona. Paulo ia hahedinaraia, Iehova be taunimanima ia hebogahisi henia dainai ia ura idia ia hagoadaia. Paulo ia gwau, Iehova be “hebogahisi Tamana bona lalogoada ibounai ia henia Diravana.”—2 Kor. 1:3. w23.11 rau 9-10 par. 8-10

Keriso ena murinai idia raka taudia ibounai be hisihisi do idia davaria. Mani aposetolo Paulo ena haheitalai ita laloa. Tesalonika tadikaka dekenai ia gwau: “Umui ida ai noho neganai, umui ai hamaoroa ita be hisihisi do ita davaria, bona umui diba, unai gaudia be ita dekenai idia vara vadaeni.” (1 Tes. 3:4) Bona Korinto tadikaka dekenai ia gwau: “Tadikaka e, ai ura . . . ai davaria hisihisi umui diba. . . . Ai laloa emai mauri do ai haboioa.” (2 Kor. 1:8; 11:​23-27) Hari inai negai Keristani taudia idia diba dagedage do idia davaria. (2 Tim. 3:12) Iesu oi abidadama henia bona oi badinaia dainai, reana emu turadia bona varavara ese oi idia dagedage henia. Emu gaukara gabunai oi kara momokani dainai dagedage oi davaria, a? (Heb. 13:18) Ma haida oi haroro henia dainai gavamani ese oi idia dagedage henia, a? Herevana dahaka hisihisi ita davaria, to Paulo ia gwau ita moale be namo. w23.12 rau 10-11 par. 9-10

Iakobo be hekwakwanai momo ia haheaukalaia. Iakobo ena natuna memero rua, Simeona bona Levi, ese edia famili dekenai hemarai idia havaraia bona Iehova ena ladana idia hadikaia. Danu, Iakobo ena adavana Rahela, be edia natuna iharuana ia havaraia neganai ia mase. Bona hitolo bada ia vara dainai, ena be Iakobo ia buruka to ena tano ia rakatania bona Aigupito dekenai ia lao. (Gen. 35:​16-19; 37:28; 45:​9-11, 28) Herevana Iakobo ena mauri lalonai hekwakwanai momo ia davaria, to Iehova bona ena gwauhamata ia laloaboio lasi. Unai dainai Iehova ese ia hahedinaraia Iakobo ia lalonamo henia. Hegeregere, Iehova ese Iakobo dekenai kohu momo ia henia. Bona danu mani oi laloa, Iakobo be Iehova dekenai ia moale bada, badina ena natuna Iosepa ida ia hedavari henia lou, ena be ia laloa ia mase vadaeni! Iakobo be Iehova ia tura henia dainai, unai ese ia hagoadaia hekwakwanai idauidau ia haheaukalaia. (Gen. 30:43; 32:​9, 10; 46:​28-30) Bema Iehova ida iseda hetura karana ia goada, ita dekenai idia vara kava hahetoho idauidau ita haheaukalaia diba. w23.04 rau 15 par. 6-7

Salamo 23 ai Davida be Iehova ese ia lalokau henia bona naria karana ia herevalaia. Edia hetura karana ia herevalaia neganai, Iehova ia gwauraia iena Mamoe Naria Tauna bamona. Davida be Iehova ena hakaua dalana ia badinaia bona ia dekenai ia tabekau dainai, Iehova ese ia naria. Bona ia diba nega ibounai Iehova ese do ia lalokau henia. Dahaka dainai unai ia abia dae momokani? Davida ia mamia Iehova ese ia naria namonamo, badina ena dabu gaudia ibounai ia henia. Danu, Iehova ida ena hetura karana ia moalelaia bona ena lalonamo ia abia. Unai dainai ia diba ena be dahaka do ia vara, to Iehova ese do ia naria bona ena dabu gaudia do ia henia. Davida ia abia dae momokani Iehova ese ia lalokau henia, unai dainai ia laloa momo lasi bona ia moale bada.—Sal. 16:11. w24.01 rau 29 par. 12-13

Tanobada Tuarina Iharuana negana amo ema bona hari, tano momo dekenai Iehova ena taunimanima be maino ai sivarai namona idia harorolaia noho. Unai dainai, unai gaukara be ia bada herea bona anina namona ia havaraia. Hari, Hakaua Oreana ena memba taudia be hanaihanai Keriso ena hakaua dalana dekenai idia tabekau. Idia ura tadikaka taihu dekenai idia henia hakaua herevadia ese Iehova ena lalohadai ia hahedinaraia. Bona idia ese sekit naria taudia bona elda taudia idia gaukaralaia kongrigeisen dekenai, unai hakaua herevadia idia henia. Horoa taudia bona kongrigeisen lalonai idia noho elda taudia ibounai be Keriso ena “imana idibana ai” idia noho. (Apok. 2:1) Momokani unai elda taudia be goevadae lasi dainai, kerere idia karaia danu. Mose bona Iosua be nega haida kerere idia karaia, bona aposetolo taudia danu. (Num. 20:12; Ios. 9:​14, 15; Roma 3:23) To, Keriso ese hesiai tauna mai kamonai bona horoa elda taudia ia hakaua namonamo, bona unai bamona do ia karaia noho. Unai dainai, Iesu ese ia abia hidi taudia edia hakaua dalana ita abidadama henia be mai anina bada. w24.02 rau 23-24 par. 13-14

Hari, mai lalokau bona tanikiu ida Iehova ita herevalaia karana amo ia ita hanamoa. Mai haida ita haroro henia neganai, iseda tahua gauna be idia ita durua Iehova kahirakahira idia lao bona iseda lalokau Tamana ita laloa hegeregerena do idia laloa. (Iam. 4:8) Ita moale bada badina Baibel ese Iehova ia herevalaia dalana be taunimanima dekenai ita hahedinaraia, hegeregere iena lalokau, hahemaoro goeva, aonega, siahu, bona ena kara namodia ma haida. Danu ita gaukara goada Iehova ena kara namodia ita tohotohoa neganai ia ita hanamoa. Unai amo, ma haida do idia itaia ita be inai tanobada taudia amo ita idau. (Mat. 5:​14-16) Bena idia ida ita herevahereva neganai, unai bamona ita karaia ena badina ita herevalaia diba. Bona unai ese dala ia kehoa, kudou maoro taudia be Iehova kahirakahira idia lao. Unai bamona dala idauidau ai Iehova ita hanamoa neganai, iena kudouna ita hamoalea.—1 Tim. 2:​3, 4. w24.02 rau 10 par. 7

Lo Keristani tauna ai oi lao totona, gaukara idauidau karaia dalana oi diba be namo. Unai ese oi do idia durua kongrigeisen lalonai maduna idauidau do oi huaia, oi sibona o emu ruma bese durua totona moni gaukara do oi karaia, bona tura namodia do oi davaria. Hegeregere, duahiduahi bona toretore oi diba namonamo. Baibel ia gwau, ia moale bona kwalimu tauna be dina ta ta ai Dirava ena Hereva ia duahia bona ia laloa dobu. (Sal. 1:​1-3) Unai ia karaia neganai, Iehova ena laloa dalana do ia dibaia bona unai ese ia durua siri ia lalopararalaia bona ia badinaia totona. (Aon. 1:​3, 4) Iseda tadikaka taihu be unai bamona tadikaka amo Baibel ena sisiba bona hakaua herevadia edia heduru idia tahua. Bema oi duahiduahi bona toretore namonamo, oi ese ma haida edia abidadama do ia hagoadaia tok bona heduru herevadia oi hegaegaelaia diba. Danu point badadia oi toredia diba, unai ese oi do idia durua emu abidadama oi hagoadaia bona ma haida oi durua totona. w23.12 rau 26-27 par. 9-11

Oi gari neganai, vaira nega ai, Iehova ese oi totona do ia karaia gaudia oi laloa dobu, unai negai Satani do ia noho lasi. Lagani 2014 ena rijinol hebouhebou ese tama ta be ena famili ida 2 Timoteo 3:​1-5 ena peroveta herevana ia herevalaia, ia gwau paradaiso ai unai siri ai idia noho herevadia be reana inai bamona do idia torea: “Tanobada matamatana ai moale negadia do idia vara. Badina taunimanima be ma haida do idia laloa bada, Dirava ena hereva do idia ura henia, do idia manau, Dirava do idia hanamoa, tama sina do idia kamonai henia, tanikiu karana do idia diba, ma haida do idia badinaia, famili lalonai lalokau do ia noho, do idia lalotamona, ma haida edia ladana do idia hadikaia lasi, sibona do idia biagua, do idia dagedage lasi, kara namodia do idia ura henia, edia turadia edia mauri hadikaia dalana do idia karaia lasi, do idia kwara auka lasi, do idia heagi lasi, moale karadia do idia ura henia lasi, bona Dirava do idia lalokau henia, edia mauri ai Dirava do idia badinaia, unai bamona taudia oi bamoa.” Emu famili eiava tadikaka taihu ida tanobada matamatana ai do idia vara gaudia umui herevalaia, a? w24.01 rau 6 par. 13-14

Ita moale badina Iehova ese ena taunimanima be orea ta bamona ia lalonamo henia! Baibel ia gwau: “Iehova be ena taunimanima dekenai ia moale.” (Sal. 149:4) To haida idia daradara, bema ‘Iehova be idia dekenai ia moale eiava lasi?’ Baibel ai, Iehova ena abidadama hesiai taudia momo be unai bamona lalohadai idia abia danu. (1 Sam. 1:​6-10; Iobu 29:​2, 4; Sal. 51:11) Baibel ese ia hahedinaraia, goevadae lasi taudia be Iehova ese ia lalonamo henia diba. Edena dala ai? Namona be Iesu Keriso ita abidadama henia bona bapatiso ita abia. (Ioa. 3:16) Unai amo ma haida vairanai ita hahedinaraia, iseda kara dika amo ita helalo-kerehai bona Dirava dekenai ita gwauhamata iena ura do ita karaia. (Kara 2:38; 3:19) Unai gaudia ita karaia bona Iehova ena turana ai ita lao neganai, ia moale bada. Ita gaukara goada iseda gwauhamata ita badinaia neganai, Iehova ena lalonamo ita abia bona iena turana namodia ai ita lao.—Sal. 25:14. w24.03 rau 26 par. 1-2

Gavamani taudia idia ura ita idia koua neganai, hahediba taudia ita tohotohoa diba, bona haroro gaukara ita karaia noho. Ita danu ita diba momokani Iehova ese ita do ia durua iseda haroro gaukara ita hagugurua totona. Unai dainai gari lasi karana bona aonega totona ita guriguri diba, hekwakwanai negadiai ita haheauka totona, Iehova ena heduru ita noia. Ita momo be gorere, lalohisihisi, iseda lalokau tauna ta ia mase, famili ena hekwakwanai, dagedage eiava hekwakwanai ma haida ita haheaukalaia noho. Unai sibona lasi, to daihanai gorere bona tuari dainai, ia auka ita haheauka totona. Emu lalohisihisi gaudia ibounai be Iehova dekenai do oi gwauraia, emu turana namona bamona oi hereva henia. Iehova oi abidadama henia badina ia ese “oi totona kara ta do ia karaia.” (Sal. 37:​3, 5) Guriguri hanaihanai karana ese ita do ia durua “hisihisi ita haheaukalaia” totona. (Roma 12:12) Iehova be ena tomadiho taudia ese idia davaria hekwakwanai ia diba bona heduru totona “ia dekenai idia taitai neganai ia kamonai.”—Sal. 145:​18, 19. w23.05 rau 5-6 par. 12-15

Abia hidi badana ta ita ura karaia neganai, namona be “Iehova ena ura [ita] lalopararalaia” bena unai ita badinaia. (Efe. 5:17) Bema ita davaria Baibel ena hakaua herevadia be iseda hekwakwanai do ia hamaoromaoroa, ita be Dirava ena lalohadai ita tahua noho. Bena unai hakaua herevadia ita badinaia neganai, abia hidi namodia do ita karaia. “Dika Tauna,” Satani ia ura inai tanobada gaudia dekenai ita bisi bada, unai amo ita be nega lasi Dirava ita hesiai henia totona. (1 Ioa. 5:19) Keristani tauna ta ese ena moni, edukeisen bona moni gaukara do ia laloa dainai, ia be nega lasi Iehova ia hesiai henia totona. Bema unai bamona ia karaia, ia hahedinaraia ia be Iehova idia hesiai henia lasi taudia edia lalohadai ia badinaia noho. Momokani, unai bamona gaudia ita karaia be kerere lasi, to namo lasi iseda mauri ai unai gaudia ita atoa guna. w24.03 rau 24 par.16-17