August

Ataiai siri ai mai anina bada gaudia rua mani ita laloa: (1) Kara maoromaoro taudia danu be hekwakwanai idia davaria. (2) Hekwakwanai negadiai Iehova ese ita ia durua. Edena dala ai Iehova ese ita do ia durua? Dala ta be, ita ia durua inai nega oromana ai mauri dekenai lalohadai maorona ita abia totona. Iehova ia gwauhamata iena hesiai gaukara ita karaia neganai do ita lalohisihisi lasi, to ia gwau lasi hekwakwanai do ita davaria lasi. (Isa. 66:14) Ita ia hagoadaia vaira nega sibona ita laloa—unai nega ai mauri do ita moalelaia ela bona hanaihanai. (2 Kor. 4:​16-18) To hari ita ia durua ia ita hesiai henia noho totona. (Lal. 3:​22-24) Baibel negadiai bona hari Iehova idia tomadiho henia taudia edia sivarai amo dahaka ita dibaia? Ita dekenai hekwakwanai do idia vara kava. To Iehova dekenai ita tabekau neganai, nega ibounai ita do ia durua.—Sal. 55:22. w23.04 rau 14-15 par. 3-4

Iosepa bona Maria be haheitalai namodia. Ena be ia auka, to idia noho hegaegae siahu taudia edia hereva idia badinaia totona. (Luka 2:​1-6) Maria be mai ena bogana bona hua 9 bamona neganai, ia bona Iosepa edia badinaia karana ia tohoa gauna ta ia vara. Roma ena lohia tauna, Augusto be oda ia henia taunimanima ese edia ladana idia rejista totona. Betelehema dekenai do idia lao ena daudau be kilomita 150 bamona bona ororo momo do idia hanaia. Maria dekenai unai laolao be mai ena hekwarahi. Ia bona beibi ena seifti totona idia laloa momo. Unai laolao lalonai Maria ia mara be edena bamona? Maria ena bogana lalonai ia noho beibi be vaira neganai Mesia ai do ia lao. Unai dainai, gavamani ena oda do idia badinaia lasi, a? Ena be Iosepa bona Maria idia lalohekwarahi, to taravatu idia badinaia. Iehova ese edia badinaia karana ia hanamoa. Maria be Betelehema ai ia ginidae namonamo, beibi namona ia havaraia, bona Baibel ena peroveta herevana idia hagugurua!—Mika 5:2. w23.10 rau 8 par. 9; rau 9 par. 11-12

Dahaka oi karaia diba bema hebou dekenai haere henia totona oi gari? Oi hegaegae namonamo be namo. (Aon. 21:5) Oi hegaegae namonamo neganai do oi gari lasi haere oi henia totona. Danu, emu haere oi hakwadogia be namo. (Aon. 15:23; 17:27) Bema emu haere ia kwadogi do oi gari lasi. Sibona emu hereva dalana amo haere kwadogina oi henia neganai, oi hahedinaraia oi hegaegae namonamo bona stadi ena anina oi lalopararalaia. To edena bamona bema unai dala haida oi tohoa, to nega ta o rua haere oi henia totona oi do gari noho? Namona be oi diba Iehova ese emu goada hegeregerena oi karaia gauna ia abia dae. (Luka 21:​1-4) Iehova be ita ia doria lasi ita karaia diba lasi gaudia ita karaia totona. (Fili. 4:5) Oi karaia diba gauna oi laloa, tahua gauna oi atoa unai oi karaia totona, bona lalomaino totona oi guriguri. Matamanai, reana emu tahua gauna be haere kwadogina ta do oi henia. w23.04 rau 21 par. 6-8

Aposetolo Paulo ese ita be tuari totona ia gima noho bona tuari dabua ia karaia tauna ida ia hahegeregerea. Tuari tauna be nega ibounai tuari totona ia noho hegaegae. Ita danu be unai bamona. Ita noho hegaegae Iehova ena dina totona, namona be abidadama bona lalokau be iseda kemena ena auri dabua bona iseda helaro be kwara gauna bamona ita atoa. Kemena ena auri dabua ese tuari tauna ena kudouna ia gimaia. Abidadama bona lalokau ese iseda kudouna ia gimaia. Unai karadia ese ita do ia durua Dirava ita hesiai henia noho bona Iesu ita badinaia totona. Ita abidadama, mai kudouna ibounai ida Iehova ita tahua dainai, ita dekenai davana namona do ia henia. (Heb. 11:6) Unai ese ita do ia hagoadaia ena be hekwakwanai ita davaria, to iseda Gunalaia Tauna, Iesu, ita badinaia noho. Hari, dagedage bona moni ena hekwakwanai idia davaria taudia edia haheitalai amo, ita dibaia gaudia ese iseda abidadama ia hagoadaia bona mauri ena hekwakwanai ita haheaukalaia totona. Basileia idia atoa guna bona edia noho dalana idia haidaua taudia edia haheitalai ita tohotohoa karana ese ita do ia durua kohu momo tahua karana ita dadaraia totona. w23.06 rau 10 par. 8-9

Sibona biagua karana ena anina be iseda hemami bona kara ita naria namonamo. To, bema ia auka iseda tahua gauna ita hagugurua, eiava iseda ura ia goada lasi, sibona biagua karana ese ita ia durua danu iseda tahua gaudia ita hagugurua totona. Laloatao, sibona biagua karana be lauma helaga ena huahua ta, unai dainai Iehova ena lauma helaga totona oi noinoi, unai amo oi ia durua unai mai anina bada karana oi hagoadaia totona. (Luka 11:13; Gal. 5:​22, 23) Nega namona totona oi naria lasi. Inai tanobada ai nega namona be lasi. Bema nega namona ita naria noho reana iseda tahua gauna do ita hagugurua lasi. Bema iseda tahua gauna hagugurua totona be ia auka, iseda ura be do ia maragi diba. Bema oi dekenai unai ia vara, tahua gaudia maragidia oi atoa be namo. Bema emu tahua gauna be Keristani kara namona ta do oi hagoadaia, namona be dala maragidia ai oi hahedinaraia guna. Bema emu tahua gauna be oi ura Baibel ibounai oi duahia haorea, namona be emu sediual ai nega kwadogina oi abia hidi Baibel oi duahia totona. w23.05 rau 29 par. 11-13

Inai nega dokona lalonai, Iehova ese ena orea ia gaukaralaia noho Dirava ena hereva ia halasia, unai amo ita ibounai ia durua “Helaga Dalana” ai ita raka noho. (Isa. 35:8; 48:17; 60:17) Ta be Baibel stadi ia abia dae neganai, unai be nega namona ia be “Helaga Dalana” ai ia raka totona. Haida be nega kwadogina sibona idia raka bena idia ese haiwei dalana idia rakatania. To, haida idia ura unai dala ai do idia raka noho ela bona edia ginidae gabuna dekenai. Edia ginidae gabuna be edeseniai? Guba helarona idia abia taudia edia “Helaga Dalana,” be “Dirava ena paradaiso” guba dekenai ia lao. (Apok. 2:7) Tanobada helarona idia abia taudia edia haiwei ese idia ia hakaua lao, lagani 1,000 ena dokonai, unai be mauri goevadaena. Bema oi be unai haiwei dekenai oi raka noho, namo lasi oi rakatania gaudia oi laloa. Unai dala ai umui raka noho ela bona tanobada matamatana ai umui ginidae! w23.05 rau 17 par. 15; rau 19 par. 16-18

Iehova ese oi totona ia karaia gaudia ibounai oi laloa neganai, do oi ura emu tanikiu karana oi hahedinaraia bona ia dekenai emu mauri oi gwauhamatalaia. (Sal. 116:​12-14) Baibel ese Iehova ia gwauraia, “harihari gaudia namodia ibounai bona harihari gaudia goevadia ibounai” ia Henia Tauna. (Iam. 1:17) Ia henia harihari gauna hereadaena be iena Natuna, Iesu ena boubou gauna. Mani oi laloa, mauri davana ese dala ia kehoa Iehova oi tura henia totona. Bona ia ese oi dekenai mauri hanaihanai ena helaro ia henia. (1 Ioa. 4:​9, 10) Iehova ese oi totona ia hahedinaraia lalokauna bona ia henia hahenamo idauidau dainai, emu tanikiu karana oi hahedinaraia totona emu mauri oi gwauhamatalaia. w24.03 rau 5 par. 8

Hari taunimanima ese idia hahedinaraia taravatu utua karadia ita itaia neganai, Lota ia abia hemami do ita lalopararalaia. Ia diba iseda guba Tamana be kara dikadia ia inai henia, unai dainai “taravatu utua taudia edia gwau-edeede hemarai karadia dainai ia lalometau bada.” (2 Pet. 2:​7, 8) Dirava gari henia bona lalokau henia karana ese Lota ia durua dainai, taunimanima edia kara dikadia ia dadaraia. Ita danu be, Iehova ena taravatu idia matauraia lasi taudia huanai ita noho. To Dirava ita lalokau henia bona gari henia neganai, iena kara maoromaoro taravatudia do ita badinaia. Unai ita karaia totona, Iehova ese mai lalokau ida Aonega Herevadia bukana amo ita ia hagoadaia. Keristani taudia ibounai, tatau bona hahine, matamata bona buruka be inai aonega sisibana amo heduru namona do idia abia. Iehova ita gari henia neganai, kerere idia karaia taudia do ita tura henia lasi. w23.06 rau 20 par. 1-2; rau 21 par. 5

Reana emu ruma bese taudia ese oi idia dagedage henia, eiava moni momo tahua karana bona gau ma haida oi dadaraia Dirava ena Basileia oi atoa guna totona. (Mat. 6:33) Bema unai oi karaia, namona be oi abia dae Iehova totona oi karaia gaudia ia itaia. (Heb. 6:10) Reana emu mauri ai Iesu ena hereva ia guguru, ia gwau: “Egu ladana bona sivarai namona dainai edia ruma, tadikaka, taihu, sinana, tamana, natudia, bona tano idia rakatania taudia be hari inai negai unai gaudia be nega 100 amo do idia abia, ruma, tadikaka, taihu, sinana, natudia bona tano. Bona dagedage danu do idia davaria. Bona do ia mai nega oromana ai mauri hanaihanai do idia abia.” (Mar. 10:​29, 30) Momokani, oi abia hahenamo ese oi dadaraia gaudia ia hereaia.—Sal. 37:4. w24.03 rau 9 par. 5

Iudea ai Keristani taudia dekenai hitolo bada ia vara neganai tadikaka taihu Antioka kongrigeisen ai be “edia lalona idia hadaia, idia ta ta dekenai ia noho gauna hegeregerena, heduru gaudia be Iudea ai idia noho tadikaka dekenai do idia siaia.” (Kara 11:​27-30) Ena be hitolo bada idia davaria tadikaka taihu be gabu daudau ai idia noho, to Antioka ai tadikaka taihu be edia lalona idia hadaia heduru do idia siaia. (1 Ioa. 3:​17, 18) Hari bema ita kamonai iseda tadikaka taihu be disasta ta dainai hisihisi idia davaria, hebogahisi ita hahedinaraia be namo. Elda taudia ita noia projek ta ai ita heduru, tanobada hegegemadai ena gaukara durua totona kontribiusen ita henia, eiava disasta idia davaria tadikaka taihu totona ita guriguri. Danu, iseda tadikaka bona taihu idia mauri totona, edia dabu gaudia do ita henia. Iseda King, Keriso Iesu be taunimanima ia hahemaoro henia totona ia mai neganai, ita ura do ia itaia ma haida dekenai hebogahisi ita hahedinaraia noho, bona ita do ia boiria iena ‘Basileia do ita abia.’—Mat. 25:​34-40. w23.07 rau 4 par. 9-10; rau 6 par. 12

Iesu ese Iehova ena laloa maoromaoro karana ia tohotohoa. Tanobada dekenai Iehova ese ia siaia “Israela besena ena boio mamoe” ia haroro henia totona. To taunimanima ia haroro henia neganai, laloa maoromaoro karana ia hahedinaraia. Nega ta, idau bese hahinena ta ena natuna kekeni be “demoni ese ia biagua” dainai, Iesu ia noia ena natuna ia hanamoa totona. Iesu be mai hebogahisi ida ena noinoi ia kamonai bona ena natuna kekeni ia hanamoa. (Mat. 15:​21-28) Mani haheitalai ma ta ita laloa. Iesu ena haroro gaukara ia matamaia neganai, ia gwau: “Taunimanima vairanai lau ia gwauraia hedinarai lasi tauna, be . . . , do lau gwauraia hedinarai lasi.” (Mat. 10:33) Ena be Petero be nega toi Iesu ia gorea, to Iesu be Petero ia dadaraia lasi. Iesu ia diba Petero be abidadama tauna bona ia karaia karana dainai ia lalohisihisi bada. Iesu ia toreisi lou murinai, Petero dekenai ia hamomokania iena dika ia gwauatao bona ia lalokau henia. (Luka 24:​33, 34) Iehova Dirava bona Iesu Keriso be laloa maoromaoro taudia. To ita be edena bamona? Iehova ia ura taunimanima ese iseda laloa maoromaoro karana do idia itaia. w23.07 rau 21 par. 6-7

Edena dala ai daradara taudia dekenai do ita hahedinaraia unai do ia vara momokani? Gau ginigunana be, Iehova sibona ese unai gwauhamata ia gwauraia. Apokalupo bukana ia gwau: “Terona latanai ia helai Diravana ia gwau: ‘Itaia! Lau ese gau ibounai lau hamatamataia noho.’” Ia be mai ena aonega, siahu, bona ia ura iena gwauhamata ia hagugurua. Iharuana be, Iehova ia diba ia gwauhamatalaia gauna be do ia vara momokani. Unai dainai ia gwau: “Unai hereva oi torea, badina idia be taunimanima ese idia abia dae diba bona idia be momokani. . . Unai hereva be idia guguru vadaeni!” Ihatoina be, Iehova be gau ta ia hamatamaia neganai, unai gauna do ia hagugurua momokani. Inai hereva ese unai ia hamomokania, ia gwau: “Lau be Alepa bona Omega.” (Apok. 21:6) Iehova ese do ia hamomokania Satani be koikoi tauna bona ena ura hagugurua dalana do ia koua lasi. Unai dainai bema ta ia gwau: “Unai be do ia vara momokani lasi,” namona be Apokalupo 21:​5, 6 oi duahia bona edia anina oi gwauraia hedinarai. Oi hadibaia Iehova be unai gwauhamata ia sainia vadaeni, unai dainai do ia guguru momokani.—Isa. 65:16. w23.11 rau 7 par. 18-19

Aberahamo ena mauri lagani be 75 bona natuna ta ia do havaraia lasi neganai, Iehova ese ia dekenai unai gwauhamata ia karaia. Aberahamo be unai gwauhamata ibounai ia guguru karana ia itaia lasi. Aberahamo be Euperate Sinavaina ia hanaia bona lagani 25 murinai, Isako ia vara ia itaia bena lagani 60 murinai iena tubudia memero Esau bona Iakobo idia vara ia itaia. (Heb. 6:15) To, ena natudia be bese badana ai idia lao bona Gwauhamata Tanona idia abia be ia itaia lasi. To, unai abidadama tauna be iena Havaraia tauna ia tura henia namonamo. (Iam. 2:23) Bona Aberahamo ia toreisi lou neganai, do ia moale bada badina do ia itaia iena abidadama bona haheauka karana dainai, tanobada besedia ibounai be hahenamo idia davaria! (Gen. 22:18) Ita dibaia gauna be dahaka? Reana, ita be Iehova ena gwauhamata herevadia ibounai idia guguru do ita itaia lasi. To, bema Aberahamo bamona ita haheauka, ita abia dae momokani Iehova ese hari bona ia gwauhamatalaia tanobada matamatana ai ita do ia hanamoa.—Mar. 10:​29, 30. w23.08 rau 24 par. 14

King Usaia be ia matamata neganai ia manau. “Dirava momokanina gari henia karana” ia dibaia. Ena mauri lagani ibounai 68 lalodiai, Iehova ese ia hanamoa. (2 Siv. 26:​1-4) Usaia be ena bese idia inai henia taudia momo ia halusia bona Ierusalema ia gimaia namonamo. (2 Siv. 26:​6-15) Oibe, Usaia be Iehova ena heduru dainai ia moale bada. (Had. 3:​12, 13) King Usaia be haida dekenai hakaua hereva henia karana dekenai ia manada. Unai dainai ia laloa ia ura karaia gaudia be do ia karaia diba, a? Dina ta Usaia be mai hekokoroku ida, Iehova ena dubu helaga lalonai ia vareai, boubou patana latanai bonana namo muramura ia gabua totona, to unai be king edia gaukara lasi. (2 Siv. 26:​16-18) Hahelaga Tauna Badana Asaraia ia ura Usaia ia hamaoromaoroa neganai, Usaia ia badu dikadika. Madi, Usaia be ena abidadama karana ia hadikaia bona lepera gorerena ia abia. (2 Siv. 26:​19-21) Bema ia manau, unai dika be ia dekenai do ia vara lasi! w23.09 rau 10 par. 9-10

Aposetolo Petero be horoa Keristani tauna ai ia lao murinai, iena manoka gaudia dainai ia do hekwarahi noho. Lagani 36 C.E ai, Iuda lasi tauna Korenelio be lauma helaga ese ia horoa neganai Petero be ia noho, unai ese ia hahedinaraia “Dirava be taunimanima edia toana ia laloa lasi” bona Iuda lasi taudia be Keristani kongrigeisen idia bamoa diba. (Kara 10:​34, 44, 45) Unai murinai Petero be Iuda lasi taudia ida ia aniani hebou, herevana guna unai ia karaia lasi. To Iuda Keristani taudia ma haida idia laloa, namo lasi Iuda taudia bona Iuda lasi taudia idia aniani hebou. Unai lalohadai idia abia taudia be Antioka dekenai idia mai neganai, Petero be Iuda lasi taudia ida ia aniani hebou karana ia hadokoa, toana be ia gari badina Iuda Keristani taudia do idia badu. Aposetolo Paulo ese unai ia itaia bona taunimanima vairanai Petero ia gwau henia. (Gal. 2:​13, 14) Ena be Petero ia kerere, to iena hesiai gaukara ia rakatania lasi. w23.09 rau 22 par. 8

Dahaka gaudia do umui hanamoa be umui sibona umui diba, to namo lasi umui lalomanoka. “Lohiabada be namo,” bona ita do ia durua. (1 Pet. 2:3) Aposetolo Petero be ita ia hagoadaia: “Dirava ese emui treinini do ia hagugurua. . . . Bona ia ese umui do ia hagoadaia.” Nega ta Petero ia mamia ia be hegeregere lasi Dirava ena Natuna ida ia noho totona. (Luka 5:8) To Iehova bona Iesu edia heduru dainai, Petero ia gaukara goada Keriso murinai ia raka totona. Unai dainai Petero be ia hegeregere “iseda Lohiabada bona Hamauria Tauna, Iesu Keriso, ena noho hanaihanai Basileia lalonai” ia vareai totona. (2 Pet. 1:11) Unai be ahuna hereana! Bema Petero bamona oi gaukara goada bona Iehova ese oi ia treinia karana oi abia dae, oi danu be mauri hanaihanai ena ahuna do oi abia. Emu ‘abidadama dainai mai moale ida hahemauri do oi abia.’—1 Pet. 1:9. w23.09 rau 31 par. 16-17

Palai dubuna ena ariara gabuna be tamona, ia be magu ese ia hagegea gabu badana. Unuseniai hahelaga taudia ese edia gaukara idia karaia. Unai ariara ai kopa boubou patana ia noho bona boubou gaudia be unuseniai idia gabua. Ma danu kopa disi mai ena ranu ia noho, unuseniai hahelaga taudia be sibona idia hagoevaia bena edia gaukara idia karaia. (Eso. 30:​17-20; 40:​6-8) Hari, Keriso ena horoa orena tadikaka be tanobada ai lauma dubuna ena lalona ariara gabuna dekenai hesiai gaukara idia karaia. Ranu disi badana ese idia bona Keristani taudia ibounai dekenai mai anina bada gauna ia hadibaia: Namona be kara mirodia idia dadaraia bona Iehova sibona idia tomadiho henia. Vadaeni, “hutuma bada” taudia be edeseniai Dirava idia tomadiho henia? Aposetolo Ioane ia itaia “idia be terona vairanai idia gini, bona . . . dina bona hanuaboi [Dirava ena] hesiai gaukara helagana idia karaia.” Hutuma bada be tanobada ai lauma dubuna ena murimuri ariara gabuna dekenai edia gaukara idia karaia noho. (Apok. 7:​9, 13-15) Ita moale badina Iehova ena tomadiho goevana lalonai ia ita hesiai henia diba! w23.10 rau 28 par. 15-16

Iehova ese ita dekenai goada ia henia dalana ta be elda taudia amo. (Isa. 32:​1, 2) Unai dainai, emu lalohekwarahi gaudia be elda taudia dekenai oi gwauraia diba. Bona mai moale ida edia heduru oi abia dae. Idia amo Iehova ese oi do ia hagoadaia. Baibel ena gwauhamata herevadia guba Basileiana ai mauri hanaihanai do ita abia, eiava tanobada paradaisona ai do ita mauri hanaihanai ese ita ia hagoadaia diba. (Roma 4:​3, 18, 19) Iseda helaro dainai hekwakwanai ita haheaukalaia, sivarai namona ita harorolaia bona kongrigeisen lalonai asainmen idauidau ita karaia. (1 Tes. 1:3) Unai helaro ese aposetolo Paulo ia hagoadaia danu. Ia be ‘metau idauidau ese idia koua,’ ia “laloa daradara,” idia “dagedage” henia, bona ‘hisihisi idauidau ese idia hametaua.’ Bona kahirakahira iena mauri ia haboioa. (2 Kor. 4:​8-10) Paulo be ena helaro ia laloa dainai goada ia abia ia haheauka totona. (2 Kor. 4:​16-18) Paulo be vaira nega ai guba dekenai mauri hanaihanai do ia abia helarona ia laloa. Unai helaro ia laloa dobu dainai, “dina ibounai goada matamata ia abia noho.” w23.10 rau 15-16 par. 14-17

Oi guriguri neganai, mani oi laloa inai be nega maorona Iehova ese emu noinoi gauna ia karaia totona, a? Reana ita ura iseda guriguri ena haere ita abia haraga be namo. To momokani, Iehova ia diba edena nega be nega maorona ita ia durua totona. (Heb. 4:16) Ita gurigurilaia gauna ena haere ita abia haraga lasi neganai, reana do ita laloa Iehova ena haere be ‘Lasi.’ Momokani do ia haerelaia, to unai be nega maorona lasi. Hegeregere, tadikaka ta ia guriguri iena gorere amo do ia namo totona. To unai ia vara lasi. Bema Iehova ese hoa dalanai ia hanamoa, reana Satani do ia gwau unai tadikaka be Iehova ia hesiai henia noho, badina ena gorere ia hanamoa. (Iobu 1:​9-11; 2:4) Ma danu, Iehova ese gorere ibounai do ia hanamoa negana ia makaia vadaeni. (Isa. 33:24; Apok. 21:​3, 4) To hari, hoa dalanai gorere do ia hanamoa lasi. Unai dainai, tadikaka be Iehova do ia noia ia dekenai goada bona lalomaino ia henia, unai amo ia haheauka bona mai abidadama ida Dirava do ia hesiai henia noho. w23. 11 rau 24 par. 13

Samson be kerere badana ia karaia, to Iehova ia do hesiai henia noho. Iehova ena ura dainai, dala ia tahua Filistia taudia ia tuari henia totona. (Hah. 16:​28-30) Samson ese Iehova ia noia: “Filistia taudia . . . edia davana do lau henia.” Iehova ese Samson ena noinoi ia kamonai bona goada bada ia henia. Unai dainai, Samson ese Filistia taudia momo herea be unai nega ai ia hamasedia. Samson be ia karaia kerere dainai hisihisi momo ia davaria, to Iehova ena ura ia do karaia noho. Ena be kerere ta ita karaia dainai sisiba aukana ita abia o iseda hahenamo ita haboioa, to namona be Iehova ena ura ita karaia noho. Laloatao, Iehova be ia noho hegaegae ita ia gwauatao totona. (Sal. 103:​8, 9) Ena be kerere ita karaia, to Samson dekenai ia karaia bamona, Iehova ese ita dekenai goada do ia henia iena ura ita karaia totona. w23.09 rau 6 par. 15-16

Emu haheauka karana dainai Iehova be oi ia lalonamo henia. Unai ese ia hahedinaraia lasi Iehova ia moale badina hekwakwanai oi davaria. To, Dirava ia moale badina mai abidadama ida oi haheauka noho. Hekwakwanai ita haheaukalaia neganai, Iehova ia moale bona unai ita diba dainai goada ita abia. (Sal. 5:12) Laloatao, Aberahamo be hahetoho ia davaria bona ia haheauka neganai, Iehova ese ia lalonamo henia. Iehova ese ia be iena turana bamona ia laloa bona ia gwauraia maoromaoro. (Gen. 15:6; Roma 4:​13, 22) Iehova ese ita be unai bamona ia kara henia diba. Namo lasi ita laloa Iehova ena hesiai gaukara lalonai gaukara momo ita karaia eiava ita be mai iseda maduna dainai, Dirava ese ita do ia lalonamo henia. Lasi, to ia ese ita ia lalonamo henia badina mai abidadama ida ita haheauka noho. Herevana, iseda mauri lagani, noho dalana eiava aonega be idauidau, to ita ibounai ese haheauka karana ita hahedinaraia diba. Hari oi be hahetoho ta oi haheaukalaia noho, a? Bema oibe, namona be oi laloatao, oi ese Iehova ena lalona oi hamoalea. Ita laloparara Dirava be ita ia lalonamo henia neganai, iseda helaro Iehova ena gwauhamata dekenai ia goada. w23.12 rau 11 par. 13-14

Keristani tauna be herevahereva namonamo karana ia diba be namo. Ia ese ma haida edia hereva ia kamonai bona edia lalohadai bona hemami ia abia dae. (Aon. 20:5) Ia ese ma ta ena gado regena, ena vairana toana bona ena kara amo ta ena hemami do ia diba. Unai do oi karaia bema haida oi bamoa. Bema haida oi hereva henia totona elektronik gaudia, hegeregere e-mail bona teks mesiji oi gaukaralaia momo, unai ese taunimanima ida oi herevahereva karana do ia hadikaia diba. Unai dainai, namona be nega oi atoa taunimanima ida oi herevahereva totona. (2 Ioa. 12) Lo Keristani tauna be ia sibona bona ena ruma bese do ia naria danu be namo. (1 Tim. 5:8) Bona gaukara ta oi dibaia be namo, badina gabeai unai ese oi do ia durua moni gaukara ta oi davaria totona. (Kara 18:​2, 3; 20:34; Efe. 4:28) Namona be oi gaukara goadagoada bona oi hamatamaia gauna oi haorea. Haida be unai do idia itaia bona emu gaukara do idia hanamoa. Unai bamona oi karaia neganai, oi be gaukara ta do oi davaria bona do idia ura oi gaukara noho. w23.12 rau 27 par. 12-13

Baibel ese “Iehova ena dina” ia herevalaia neganai, ia be Iehova ese ena inai taudia do ia hahemaoro henia bona ena taunimanima do ia hamauria negana ia herevalaia. Idaunegai, nega haida Iehova ese taunimanima ia hahemaoro henidia. (Isa. 13:​1, 6; Ese. 13:5; Sef. 1:8) Iseda nega ai, “Iehova ena dina” be do ia matamaia negana be, politikol oreadia ese Babulonia Badana do idia tuari henia, bona Aramagedono tuarina ai do ia ore. Unai “dina” ai ita roho mauri totona, hari ita hegaegae be namo. Iesu ese ita ia hadibaia unai “hisihisi badana” totona ita naria sibona lasi, to danu ita “noho hegaegae” be namo. (Mat. 24:21; Luka 12:40) Aposetolo Paulo ese Tesalonika taudia dekenai ia torea revareva ginigunana lalonai, haheitalai haida ia gaukaralaia Keristani taudia ia durua Iehova ena hahemaoro dinana totona do idia hegaegae. Paulo ia diba Iehova ena dina be unai nega ai do ia ginidae lasi. (2 Tes. 2:​1-3) To, unai dina do ia ginidae haraga dainai, iena tadikaka ia hagoadaia do idia hegaegae be namo, bona ita danu be unai sisiba ita badinaia diba. w23.06 rau 8 par. 1-2

Lagani 1978 ai, Japan dekenai 60 stori rumana ta idia haginia. Taunimanima idia laloa unai siti dekenai tano mareremarere ia vara momo dainai, edena bamona unai ruma do ia gini noho. Ensinia taudia be dahaka idia karaia? Palani idia karaia ia be do ia gini goada to tano mareremarere lalonai do ia davea sisina bona ia moru lasi. Keristani taudia be unai ruma bamona. Edena dala ai? Keristani tauna be taravatu badinaia karana bona ena lalohadai ia haidaua karana dekenai lalohadai maorona ia abia be namo. Namona be mai ena lalona ibounai ida Iehova ena taravatu bona hakaua herevadia ia badinaia. Ia be “hereva ia badinaia haraga” bona ia lalomanoka lasi. To danu, bema kara ta be Dirava ena taravatu ia utua lasi, “ia laloa maoromaoro” bona ena lalohadai ia haidaua diba. (Iam. 3:17) Unai bamona Keristani tauna be taravatu aukana do ia atoa lasi, bona do ia kara kava lasi. w23.07 rau 14 par. 1-2

Iesu be Satani ese ia tohoa do ia kara dika bona Iehova do ia badinaia lasi, to unai ia dadaraia. (Mat. 4:​1-11) Satani ia ura Iesu do ia kara dika, unai amo mauri davana do ia henia lasi. Iesu be tanobada ai ena haroro gaukara ia karaia lalonai, hahetoho ma haida ia haheaukalaia. Ena inai taudia be ia idia dagedage henia bona idia ura ia idia hamasea. (Luka 4:​28, 29; 13:31) Bona ia murinai idia raka taudia edia manoka gaudia ia haheaukalaia. (Mar. 9:​33, 34) Iesu be kota dekenai ia gini neganai, idia hahisia bona kirikirilaia. Bena hisihisi bada ia davaria bona kara dika tauna bamona idia hamasea. (Heb. 12:​1-3) Ena hahetoho ginigabena ai Iehova ese ia gimaia lasi, to ia sibona ese ia haheaukalaia. (Mat. 27:46) Momokani, Iesu be mauri davana ia henia totona, hisihisi bada ia abia. Iesu be mai ura bada ida ita totona ia karaia gaudia ita laloa neganai, ia ita lalokau henia bada. w24.01 rau 10-11 par. 7-9

Ma haida ita tura henidia namonamo totona, ita haheauka be gau badana. Haheauka karana ese ita ia durua ma haida idia hereva neganai, ita kamonai namonamo. (Iam. 1:19) Danu, haheauka karana ese maino ia havaraia. Hekwakwanai ta ia vara neganai, haheauka karana ese ita ia gimaia dainai, mai badu ida kara ta ita karaia haraga lasi eiava ta ita hereva dika henia lasi. Do ita badu haraga lasi, bona ta ena dika davana ita haloua lasi, to ‘ta ta ena kara do ita haheaukalaia noho bona mai kudouna ibounai ida do ita gwauatao heheni.’ (Kol. 3:​12, 13) Haheauka karana ese ita ia durua abia hidi maorodia ita karaia totona. Namo lasi ita kara haragaharaga, to namona be nega ita atoa tahua gaukara ita karaia bena abia hidi maorodia do ita karaia. Hegeregere, bema moni gaukara ta ita tahua, reana ita davaria gaukara ginigunana do ita abia dae. To, bema ita haheauka, nega do ita atoa unai gaukara ese iseda famili bona hetura karana Iehova ida ia haidaua dalana do ita laloa. Ita haheauka neganai, abia hidi maorodia do ita karaia. w23.08 rau 22 par. 8-9

Lalohadai dikadia oi abia dainai do oi lalomanoka neganai, Iehova dekenai emu mauri oi gwauhamatalaia karana oi laloa, unai ese oi do ia hagoadaia hahetoho oi dadaraia totona. Edena dala ai? Iehova dekenai emu mauri oi gwauhamatalaia neganai, ia dekenai sibona oi henia. Unai ena anina be Iehova ese ia moalelaia lasi tahua gaudia bona sibona emu ura oi dadaraia. (Mat. 16:24) Unai dainai hahetoho eiava hekwakwanai ta oi davaria neganai, do oi karaia gauna dekenai oi daradara lasi. Iehova oi badinaia totona do oi karaia gauna oi abia hidi vadaeni. Emu lalona oi hadaia Iehova oi hamoalea totona. Unai oi karaia neganai, oi be Iobu oi tohotohoa. Ena be hekwakwanai badadia ia davaria, to mai ura ida ia gwau: “Lau ese egu Dirava do lau badinaia noho ela bona lau mase!”—Iobu 27:5. w24.03 rau 9 par. 6-7

‘Lalokau Diravana’ Iehova be ita ida ia noho! (2 Kor. 13:11) Ia be ita ta ta ia laloa bada. Bona ita diba ita dekenai iena “noho hanaihanai lalokauna ia hahedinaraia noho.” (Sal. 32:​10, ftn) Iena lalokau karana ita laloa dobu neganai, do ita abia dae Iehova be ia noho momokani bona ia kahirakahira do ita noho. Mai gari lasi ida ia do ita guriguri henia bona do ita hamaoroa iena lalokau karana ita laloa bada. Iseda hekwakwanai ibounai be ia dekenai ita gwauraia, badina ita diba iseda hemami ia lalopararalaia bona ia ura ita ia durua. (Sal. 145:19) Keru negana ai, lahi badinai ita noho hegeregerena, hekwakwanai ita davaria neganai, Iehova ena lalokau ese ita do ia hagoadaia. Unai dainai, Iehova ena lalokau oi abia dae unai ese oi do ia hagoadaia bona lalomaino do ia henia. Bona ita ibounai be iena lalokau dainai, do ita gwau: “Iehova lau lalokau henia”!—Sal. 116:1. w24.01 rau 31 par. 19-20

Iesu ese taunimanima dekenai Dirava ena ladana, Iehova ia hadibaia bona gau ma haida ia karaia danu. Bona ia hadibaia Iuda taudia be Dirava ena ladana idia diba vadaeni. To Iesu “sibona ese Dirava ia gwauraia hedinarai.” (Ioa. 1:​17, 18) Hegeregere, Heberu Toretoredia ese idia hahedinaraia Iehova be hebogahisi Diravana. (Eso. 34:​5-7) Iesu ese unai ia hahedinaraia namonamo totona, boio natuna bona ena tamana edia parabole ia gaukaralaia. Siri ese ia hahedinaraia ia helalo-kerehai natuna be “daudau amo ia mai noho lalonai,” ena tamana ese ia itaia, bena ia heau lao, ia rosia bona mai kudouna ibounai ida ena dika ia gwauatao. Unai ese Iehova ena hebogahisi karana ia hahedinaraia goevagoeva. (Luka 15:​11-32) Oibe, Iesu ese ena Tamana ia herevalaia namonamo. w24.02 rau 10 par. 8-9

Iehova ese lalohisihisi tauna dekenai goada matamata ia henia. Edena dala ai, Iehova ita tohotohoa bona ma haida ita hebogahisi henidia bona hagoadaia diba? Unai ita karaia dalana ta be iseda kudouna ai ma haida ita hebogahisi henia bona idia hagoadaia karadia do ita habadaia. Unai karadia haida be dahaka? Dahaka ese iseda lalokau karana do ia hagoadaia, unai amo dina ta ta ai ‘do ita hagoadaia heheni noho’? (1 Tes. 4:18) Namona be ma haida laloa bada karana, tadikaka lalokau henia karana, bona hariharibada karana do ita habadaia. (Kol. 3:12; 1 Pet. 3:8) Edena dala ai unai kara ese ita do idia durua? Ma haida hebogahisi henia karana bona unai bamona kara namodia be iseda kara ai ita halaodia neganai, do ita ura hisihisi idia davaria taudia ita hagoadaia. Iesu ena hereva bamona, ia gwau: “Kudouna ai idia honu gaudia be uduna ese ia gwauraia. Tau namona ese ia haboua gau namodia amo gau namodia ia mailaia.” (Mat. 12:​34, 35) Nega aukadia ai iseda tadikaka taihu ita hagoadaia karana, be iseda lalokau ita hahedinaraia dalana badana. w23.11 rau 10 par. 10-11

Peroveta herevadia ita lalopararalaia totona, namona be heduru ita tahua. Mani inai haheitalai ita laloa. Mani oi laloa, oi be oi diba lasi gabuna ta dekenai oi loaloa, to oi ia bamoa turana ta be unai gabu ia diba namonamo. Umui loaloa gabuna ia diba bona dala ta ta idia lao gabudia ia diba. Reana oi moale bada badina emu turana be oi ia bamoa, ani? Unai hegeregerena, Iehova be hari ita noho negana bona iseda vaira negana ia diba namonamo. Unai dainai, Baibel ena peroveta herevadia ita lalopararalaia totona, mai manau ida Iehova ena heduru ita tahua be namo. (Dan. 2:28; 2 Pet. 1:​19, 20) Tama sina namodia bamona, Iehova ia ura iena natudia be vaira nega ai mauri namona do idia noholaia. (Ier. 29:11) To Iehova be iseda tama sina amo ia idau, ia ese vaira negana ia perovetalaia bona ia gwauraia maoromaoro. Iehova ese Baibel lalonai peroveta herevadia ia torea, unai amo vaira nega ai do idia vara mai anina bada gaudia do ita diba.—Isa. 46:10. w23.08 rau 8 par. 3-4