Puripuri—Dahaka Dainai Taunimanima Momo ese Idia Laloa?
TAU ta ladana Frans be ena hanua dekenai ena Protestant tomadiho oreana durua gaukaradia ia gunalaia hanaihanai. Hahine ta ladana Wilhelmina danu ese Dirava garina ia gari. Ia gwau, “Dubu dekenai ita lao be gau badana,” bona dubu dekenai ia lao. Hahine ta ladana Esther danu be nega ibounai dubu dekenai ia lao bona dina iboudiai ia guriguri. Inai taudia toiosi be dala tamona ai idia hegeregere: Idia toiosi be puripuri taudia.
Unai Suriname taudia toiosi sibodia lasi, to tanobada hegegemadai taunimanima momo danu ese puripuri idia laloa bada. Inai mani oi laloa: United States lalonai puripuri karadia idauidau be magasin idauidau 30 ai idia herevalaidia, unai magasin 10,000,000 idia hoihoilaidia. England dekenai taunimanima 2,000,000 bamona be unai bamona kara idia laloa bada. Netherlands dekenai idia gwau, lauma ese idia karaia karadia sivaraidia idia abia dae taudia be siti badadia ai idia noho taudia, sikuli bada idia abia taudia, bona matamata taudia. Africa, Asia, Latin America, bona Papua New Guinea lalonai idia noho taudia momo ese dina dina iboudiai puripuri idia laloa bada. Buka ta, ladana Occult Shock and Psychic Forces lalonai, torea taudia John Weldon bona Clifford Wilson idia gwau: “Inai kara idia torelaia taudia idauidau idia laloa, hari inai nega lalonai taunimanima ese puripuri idia goadalaia lou, guna idia karaia karadia idia hanaidia.”
Oibe, taunimanima idauidau ese puripuri, babalau, hisiu toadia dibaia karana, majik, bona nihi edia anina gwauraia hedinarai karana idia ura henia. Dahaka dainai?
Badina ta be inai: Kerisendom ena tomadiho oreadia haida ese puripuri idia abia dae. Idia gwau lauma hereva henidia karana be Dirava kahirakahira dekenai raka lao dalana ta.
Suriname tauna burukana ta ladana Izaak Amelo ena sivarai mani oi laloa. Lagani 7 lalodiai dubu ena kaunsolo dagina ia dogoatao bona taunimanima ese idia matauraia. To unai nega lalonai ia be puripuri tauna ta mai ena ladana gwau: “Saturday iboudiai, ai dubu ena kaunsolo taudia iboudiai be hanua murimurinai ai hebou, lauma ai hereva henidia totona. Unai bamona ai karaia ela bona Sunday dabai. Daba matanai, diakono ese ena dina gauna ia raraia, bena 5 okaloka ia ginidae neganai ai ia hadokoa. Ai lao digudigu, dabua idaudia ai karaia, bena Sunday ena guriguri totona ai lao dubu. Unai lagani iboudiai lalodiai pasto ese aiemai kara ia gwauraia dika lasi.”
Netherlands ena profesa ta, ladana R. van Lier ese tomadiho oreadia bona puripuri Suriname lalonai ia tahua namonamo, bena ia gwau taunimanima momo idia laloa puripuri be edia “tomadiho durua gauna.” Ma ia gwau idia laloa puripuri be “tomadiho karana ta, Keristen tomadiho karana hegeregerena.”
To reana oi be emu lalona dekenai oi henanadai, oi gwau, ‘Kerisendom ena tomadiho oreadia ese puripuri idia abia dae, anina be Dirava ese ia abia dae a? Bema lauma oi hereva henidia, unai dala amo Dirava kahirakahira dekenai oi lao diba a? Bible ese puripuri o babalau edena bamona ia herevalaia?’
[Picture on page 3]
Izaak Amelo ia gwau dubu ta ena kaunsolo taudia iboudiai be lauma ida idia herevahereva