Puripuri​—Dirava ese Edena Bamona Ia Laloa?

ROMA tauna ta ladana Sallust ia gwau: “Edia turadia ese idia ura henidia gaudia idia ura henidia bona edia turadia ese idia ura henidia lasi gaudia idia ura henidia lasi taudia be edia turadia ida idia hetura heheni momokani.” Emu turana danu umui lalo-tamona bona ia oi abidadama henia diba. Unai hegeregerena, Dirava ese ia ura henidia gaudia bema ita ura henidia bona ia ura henidia lasi gaudia bema ita ura henidia lasi, Dirava ese ita na iena turadia do ia gwauraia, bona dala do ia kehoa ita be ia kahirakahira dekenai do ita lao totona. Anina be Dirava ena lalokau, maino, hebogahisi, bona kara namo ita ura henidia dainai, ita hekwarahi unai kara be sibona eda mauri lalonai ita tohotohodia totona.​—Galatia 5:​22, 23.

Namona be puripuri ese ia havaraia gaudia ita tahudia, bena do ita diba Dirava ese unai kara ia ura henia eiava lasi. (Mataio 7:​17, 18) Puripuri ese ita ia durua Dirava ia ura henia karadia totona a? Unai ita diba totona, namona be taunimanima haida edia sivarai ita tahua.

Babalau, Dagedage, bona Mase

Suriname hahinena ta, ladana Asamaja Amelia ena lagani be 17 neganai, babalau karadia ia karaia be vaira neganai do idia vara gaudia ia gwauraidia hedinarai maoromaoro dainai bona ena heduru idia tahua taudia ese namo idia davaria dainai, ena hanua dekenai ia be mai ena ladana badana. (Kara 16:16 itaia.) To gau ta ese ena lalona ia hahekwarahia.

Ia gwau: “Lauegu amo idia herevahereva laumadia ese edia heduru idia tahua taudia idia kara namo henidia, to nega tamonai lauegu mauri idia hadikaia. Lauma be lau dekenai idia herevahereva negadia murinai, lauegu tauanina ia hisihisi ta ese lau ia botaia bamona. Hanuaboi ai lau mahuta gwauraia negadiai, unai lauma ese lau idia hereva henia loulou dainai lau mahuta diba lasi. Idia herevalaia gaudia be dika herea!” Unai gau ia lalodia neganai, Asamaja be mai ena lalohisihisi ida ia igo diho. Ma ia gwau: “Idia ese headava karana idia herevalaia mai edia ura bada ida, bona lau idia doria, lau be idia ida do ai mahuta hebou totona. Lau headava vadaeni dainai lau hamaorodia lau ura lasi do lau heudahanai. To idia kamonai lasi. Nega ta lauma ta ese lau ia halusia, lauegu tauanina ia dauatoho bona ia gigia, bona lau ia koria. Lauegu mamina be dika herea!”

Reana oi hoa, oi gwau: ‘Lauma ese heudahanai karana idia karaia lasi.’ Momokani unai lauma be unai bamona idia matabodaga a?

Guna ai herevalaia tauna, Izaak, ia gwau: “Edia kara be dika rohoroho! Hanuaboi ta ai, ta ese ai ia boiria, lauma ese ia boloa hahinena ta mai gorerena do ai durua totona. Aiemai orea ia gunalaia tauna be lauma ta mai ena siahu bada ena gaukara tauna dainai, unai hahine ia boloa laumana ia lulua toho. Dina tamona ibounai lalonai unai tau ena lauma ena heduru ai noia. Ai mavaru bona gaba ai toua, bena metairametaira unai hahine ia namo ia lao. Unai tau ese unai hahine ia boloa laumana ia hagania do ia raka lasi, vadaeni ia raka lasi. Aiemai orea gunalaia tauna ia gwau: ‘ita kwalimu inai.’ Vadaeni ai helai diho bona ai laga-ani.”

Izaak be ma ia gwau: “Ai laloa gau ibounai ia namo vadaeni, to unai neganai boiboi badana ai kamonai. Iena amo ia lasi rumana dekenai ai heau lao bona aiemai gunalaia tauna ena adavana ai davaria, ia taitai dikadika noho. Ruma lalonai ena natuna kekenina maragina ai davaria​—ena kwarana ia giroa ela doruna kahanai. Siahu ta ese ena aiona ia hakwaidua vadaeni, kokoroku hamasea karana hegeregerena. Aiemai gunalaia tauna ese ia lulua laumana ia badu dainai ena davana ia henia unai. Unai lauma be ala-ala laumadia mai edia dagedage.”

Puripuri Karadia bona “Tauanina ena Kara”

Unai babalau karadia ruaosi lalodiai kara mirodia, heudahanai, bona ala-ala idia vara. Unai kara bona Dirava ena kara be idia idau vaitani. Unai kara dainai ita diba unai lauma be daidia. Idia gwau idia be Dirava ena hesiai taudia, to edia kara bodaga bona edia ala-ala karadia ese idia hahedinaraia idia ese Dirava ena inai tauna, ala-ala tauna ginigunana, Satana Diabolo ena kara idia tohotohoa. (Ioane 8:44) Ia be edia biaguna. Idia be iena heduru laumadia​—aneru dikadia, o demoni unai.​—Luka 11:​15-20.

To reana oi henanadai, oi gwau: ‘Unai kara dikadia, Satana amo idia mai karadia, be nega ta ta sibona babalau karadia dekenai idia hedinarai eiava? Babalau amo lauma namodia do lau davaridia diba, bena lau do idia durua Dirava kahirakahira dekenai do lau lao totona, a?’ Lasi, badina Bible ia gwau babalau be “tauanina ena kara” ta, Keristen karadia hegeregeredia lasi.​—Galatia 5:​19-21.

Apokalupo 21:8 ese “meamea taudia” bona “abidadama lasi taudia, kara bodaga taudia, taunimanima idia alaia taudia, lebulebu taudia, . . . kaivakuku idia tomadiho henia taudia, bona koikoi taudia” ia gwauraidia hebou. Dirava ese mai edia ura ida idia koikoi, idia heudahanai, idia ala-ala, bona meamea o babalau karadia idia karaia taudia, be edena bamona ia lalodia? Edia kara ia inai henia momokani!​—Hereva Lada-isidia 6:​16-19.

Bema ta ese puripuri karadia ia tahudia, anina be Iehova Dirava ia inai henia karadia be ia ese ia ura henidia. Iehova ia dadaraia bona ena inai tauna badana, Satana mai ena heduru taudia ia durudia. Inai mani oi laloa: Oi ura emu inai taudia ia durudia tauna ta kahirakahira dekenai do oi noho a? Lasi, ani? To idau, do oi ura iena amo do oi siri. Vadaeni, Iehova Dirava ena kara be unai hegeregerena. Hereva Lada-isidia 15:29 ia gwau: “Iehova bona kara dika taudia edia padana be daudau.”​—Salamo 5:4 itaia danu.

Puripuri ese Mase Ia Havaraia

Puripuri tahua karana ese mase ia havaraia. Idau negai Dirava ese ena bese taudia Israel dekenai ia oda henidia, rohe bona meamea taudia do idia hamasedia. (Levitiko 20:27; Deuteronomi 18:​9-12) Unai dainai Bible ia gwau, meamea taudia ese “Dirava ena Basileia do idia abia lasi.” (Galatia 5:​20, 21) To idau, “edia davana be dika. Idia be unai gohu, lahi bona salifa idia araia noho gabunai do idia lao. Inai be mase iharuana” eiava mase hanaihanai. (Apokalupo 21:8) Vadaeni, Kerisendom ena tomadiho oreadia haida ese puripuri karadia idia taravatulaia lasi, to Bible ena hereva ia idau lasi.

Bema puripuri karana ta oi tahua matamaia vadaeni, dahaka oi karaia be namo? Namona be unai kara oi hadokoa haraga bona oi rakatania. Dirava ena peroveta tauna Isaia ena sisiba Israel taudia dekenai oi badinaia be namo. Hari inai negai, taunimanima haida be unai Israel taudia hegeregeredia kara mirodia idia karaia, to idia laloa unai kara amo Dirava idia tomadiho henia danu. Unai dainai unai Israel taudia edia sivarai ese mai anina bada gaudia ita ia hadibaia.

Isaia ena Sisiba Badinaia

Isaia 1:4 ese ia hahedinaraia, Israel taudia ese “Iehova idia rakatania, . . . iena amo idia raka oho vaitani.” Ena be Dirava idia rakatania, to boubou bona tomadiho karadia idia karaia, bona idia guriguri. To unai ibounai be anina lasi! Edia lalona dekenai idia ura lasi Iehova ena ura do idia karaia, unai dainai Iehova ia hamaorodia, ia gwau: “Lauegu vairana do lau hunia emui ai. Ena be guriguri momo do umui gwauraia, to do lau kamonai lasi.” Unai Israel taudia ese kara mirodia idia karaia, ‘edia imadia be rara amo idia hahonudia,’ unai amo Dirava idia dadaraia.​—Siri 11-15.

Dahaka idia karaia be namo, bena Iehova ese do ia abidia dae lou? Isaia 1:16 ia gwau: “Sibona umui huria; sibona umui hagoevaia.” Bema unai sisiba ita badinaia, kara mirodia, “tauanina ena kara,” puripuri danu, do ita hadokodia bona do ita tahudia lasi. Ita diba puripuri ia gunalaia tauna be Satana Diabolo, unai dainai do ita inai henia.

Namona be puripuri gaudia iboudiai ita negedia. Izaak be unai bamona ia karaia. Ia gwau: “Dina ta ai, lau ese egu puripuri gaudia iboudiai be lauegu ruma vairanai lau haboudia, bena ira amo lau hamakohidia sisisisi. Lauegu dekena hahinena ia boiboi lau dekenai, ia gwau lau karaia karana be gabeai do lau lalohisihisilaia. Ia boiboi noho negana lalonai bensini be idia latanai lau bubua bena lahi amo lau gabudia ore.”

Lagani 28 gunanai Izaak be unai bamona ia karaia. Ena kara ia lalohisihisilaia a? Lasi vaitani. Hari inai negai ia be mai ena moale ida Iehova ena hesiai gaukara ia karaia. Ia be Keristen hesiai tauna ta Iehova ena Witness taudia edia kongregesen ta lalonai.

Isaia 1:17 lalonai sisiba herevana ma ta be inai: “Kara namo karaia dalana umui tahua.” Anina be Iehova ena Hereva, Bible unai, ita stadilaia ‘unai dekena amo Dirava ena ura be do ita diba momokani. Do ita diba edena kara be namo, edena kara Dirava ia ura henia, bona edena kara be goeva momokani.’ (Roma 12:2) Ita diba gaudia bema ita badinaia, hahenamo do ita davaria. Asamaja ese unai ia davaria.

Ena be Asamaja ena varavara bona ena dekena taudia be mai edia badu ida idia koua toho, to mai ena boga-auka ida Iehova ena Witness taudia ida Bible ia stadilaia bena nega sisina murinai puripuri karadia ia rakatania. Unai murinai ena mauri Iehova Dirava dekenai ia gwauhamatalaia bena hebouhebou ta ai bapatiso ia abia. Hari, lagani 12 idia ore murinai, mai ena moale ida ia gwau: “Bapatiso lau abia negana ema, lauma ese lau idia hahekwarahia lasi.” Mai ena kiri danu ia gwau: “Lau bapatiso dinana ena hanuaboi ai lau mahuta mase, lauma ese lauegu mahuta idia hadikaia lasi. Dabai lau toreisi haraga lasi dainai hebouhebou ena nega korikori ai lau ginidae lasi.”

Doko Diba Lasi Hahenamodia

Hari inai negai, Izaak bona Asamaja be mai edia lalona ibounai ida salamo tauna Asaf ida idia gwau diba: “Lau be Dirava badinai lau noho be namo.” (Salamo 73:28) Momokani, Iehova badinai idia noho dainai, edia tauanina dekenai bona edia lalona dekenai hahenamo idia davaria. To gau badana be edia lalona dekenai maino ia noho bona Iehova ena turadia ai idia lao vadaeni.

Puripuri karadia rakatanidia be mai ena hekwarahi bona mai ena hisihisi, to do oi davaria hahenamodia ese unai ibounai ia hanaia momokani. Momokani, unai kara rakatania be auka. Suriname hahinena ta ladana Lintina van Geenen ese unai ia davaria. Lagani momo lalodiai ia hekwarahi puripuri karadia rakatania totona, bena ia kwalimu. Iena sivarai be hereva gabena lalonai do ita duahia diba.

[Picture on page 5]

Asamaja Amelia ia gwau: “Lauma ese . . . lauegu mauri idia hadikaia. . . . Idia herevalaia gaudia be dika herea!”