“Ita Herevahereva be mai Ena Nega”​—Edena Negai?

MARY be doketa taudia edia heduru hahinena ta hospital ta dekenai. Iena gaukara ena taravatu ta be, hereva hehunidia do ia gwauraidia hedinarai lasi. Iena gaukara ta be doketa taudia edia ripoti bona gorere taudia edia kadi ia naridia namonamo, idau taudia ese idia abidia garina. Unai provinsi ena gavamani ese taravatu ia atoa, hospital dekenai idia gaukara taudia ese gorere taudia edia sivarai be idau taudia dekediai do idia gwauraia hedinarai diba lasi.

Dina ta ai Mary ese lalo-hekwarahi ta ia ese gorere taudia edia kadi ia failidia neganai, ia davaria hahine ta, sibona ena Keristen tomadiho oreana hahinena, be hospital ena doketa ta ese ena bogana dekenai ia noho natuna ia hamasea. Ia daradara unai. Bible ena hereva hegeregerena unai hahine ena kara be elda taudia dekediai do ia gwauraia hedinarai a, herevana bema unai bamona do ia karaia ena gaukara amo do idia hadokoa, o do idia fainia, o ena gaukara biaguna do idia samania, a? Eiava Hereva Lada-isidia 11:13 ena hereva dainai namona be unai kara ia gwauraia hedinarai lasi? Unai siri ia gwau: “Sivarai ia abia loaloa tauna ese hereva hehunidia ia hahedinaraia, to mai ena abidadama tauna ese do ia hunia noho.”​—Hereva Lada-isidia 25:​9, 10 itaia danu.

Nega ta ta ai Iehova ena Witness taudia ese unai bamona lalo-hekwarahi idia davaria. Mary hegeregerena, idia ese King Solomon ena hereva idia laloa; ia gwau: “Gau iboudiai be mai edia nega korikori, bona gaukara iboudiai guba henunai idia karaia be mai edia nega korikori: . . . ita herevahereva lasi be mai ena nega bona ita herevahereva be mai ena nega.” (Kohelete 3:​1, 7) Unai be Mary do ia herevahereva lasi negana korikorina, eiava ia be ia diba gauna do ia herevalaia negana korikorina, a?a

Idia vara gaudia be idauidau, unai dainai ta ese kara tamona, hegeregere Mary ena kara, ia gwauraia diba lasi taunimanima iboudiai ese idia badinaia totona. Momokani, bema Keristen ta be unai bamona lalo-hekwarahi ta do ia davaria, namona be gau iboudiai do ia lalodia namonamo, bona Bible ena taravatu hegeregeredia bona gavamani ena taravatu hegeregeredia ena lalona do ia hadaia edena bamona do ia karaia, bena Iehova vairanai ena lalona do ia goeva. (1 Timoteo 1:​5, 19) Ta be ia goevadae lasi dainai kara kerere maragina ia karaia neganai, inai hereva Bible lalonai be mai anina, ia gwau: “Lalokau ese kara dika momo ia koua.” (1 Petro 4:​8, NW ) To, ta ese kara dika badana ia karaia neganai, namona be Keristen tauna ese Dirava ia lalokau henia bona ena Keristen bamona ia lalokau henia dainai unai kara dikana do ia gwauraia hedinarai, unai amo kara dika tauna ese heduru do ia abia diba bona kongregesen do ia goeva noho diba a?

Bible ena Taravatu Badinaia

Edena Bible taravatudia be mai anina inai hekwakwanai dekenai? Ena taravatu ta be, kara dika badana ta ia karaia tauna ese ia hunia toho be maoro lasi. “Ena kara dika ia hunia tauna do ia namo lasi, to ena kara dika ia gwauraia hedinarai bona ia rakatania tauna ese hebogahisi do ia davaria.” (Hereva Lada-isidia 28:13) Iehova ese gau ibounai ia itaia. Haida edia kara dika ia hehuni ela bona dina ta. (Hereva Lada-isidia 15:3; 1 Timoteo 5:​24, 25) Nega haida Iehova ese ta ena kara dika hehunina be kongregesen tauna ta dekenai ia hahedinaraia, do idia hamaoromaoroa totona.​—Iosua 7:​1-26.

Bible ena taravatu ma ta be Levitiko 5:1 ai; ia gwau: “Bema tau ta be inai bamona ia kerere, hadikaia herevadia ia kamonaia, to ia itaia gauna eiava ia diba gauna bema ia gwauraia hedinarai lasi, ena kerere ena davana do ia abia.” Unai “hadikaia herevadia” be Dirava gwauraia dika herevadia lasi. To idau, ta ese ma ta ia kara dika henia neganai, dika ia davaria tauna ese taunimanima ia boiboi henidia, ia haganidia unai kerere idia diba o idia itaia taudia be kota dekenai do idia gwauraia hedinarai ia idia durua totona. Unai bamona ia boiboi neganai, hadikaia herevadia ia gwauraia, Dirava ese kerere tauna, ena ladana be ta ese reana ia do gwauraia hedinarai lasi tauna, be do ia hadikaia herevadia unai. Unai dala amo ia taravatudia idia diba gaudia do idia hunia lasi. Unai kerere idia diba taudia be unai hereva idia kamonai neganai, edia maduna be kerere taudia be kota dekenai do idia samania. Bema unai bamona idia karaia lasi, Iehova ena amo ‘edia kerere ena davana do idia abia.’

Unai hahegani amo Siahu Ibounai Diravana ese Israel taudia ta ta iboudiai ia haganidia, idia itaia karadia dikadia be kota taudia vairadiai do idia gwauraia hedinarai, hahemaoro do idia karaia totona. Ena be Keristen taudia be Mose ena Taravatu henunai idia noho lasi, to unai taravatu be do mai anina Keristen kongregesen dekenai. Unai dainai, reana nega haida Keristen tauna ese kerere ta be elda taudia ia hamaorolaidia be maoro. Momokani, tano haida edia taravatu be, gaukara taudia ese idia naridia ripoti o kadi edia hereva hehunidia be idau taudia dekediai idia gwauraidia hedinarai diba lasi. To, bema Keristen ta ese gau ta ia gurigurilaia vadaeni, bona ia laloa Dirava ena taravatu ese taunimanima edia taravatu ia hanaia dainai namona be ia diba gauna do ia gwauraia hedinarai, vadaeni Iehova vairanai unai maduna do ia huaia. Unai bamona negadiai Keristen tauna ese ‘Dirava ia kamonai henia be namo, to taunimanima ia kamonai henia be dika.’​—Kara 5:29.

Namona be ita gwauraia vadaeni gwauhamatadia ita lalodia maragi lasi, to taunimanima edia oda hegeregeredia ita gwauraia gwauhamatadia haida ese reana Dirava ena taravatu ta idia utua, Ia sibona do ita badinaia taravatuna unai. Ta ese kara dika badana ta ia karaia neganai, ia ese Iehova Dirava ia kara dika henia, unai dainai Dirava ese taunimanima vairadiai ia gwauraia dika tauna ai ia lao. (Deuteronomi 27:26; Hereva Lada-isidia 3:33) Keristen kongregesen lalonai idia vareai taudia idia gwauhamata, kongregesen do idia hamiroa lasi bona ma haida do idia durudia idia goeva noho totona, bena kongregesen do ia goeva noho diba.

Ita ta ta eda Maduna

Vadaeni, Mary ese unai Bible herevadia ia lalodia reana, bena ena lalona ia hadaia edena bamona do ia karaia be namo. Ia laloa aonega aonega dalana be inai, do ia kara haraga lasi, to gau ibounai do ia lalohadailaia namonamo guna be namo. Bible ena sisiba be inai: “Oiemu dekena tauna oi samania kava lasi; oiemu bibinadia amo oi koikoi lasi.” (Hereva Lada-isidia 24:28) Ta ena kara dika hamomokania totona, namona be uitnesi taudia rua o ma haida ese ena kara dika idia gwauraia hedinarai. (Deuteronomi 19:15) Bema Mary ese unai hahine ena bogana dekenai ia noho natuna hamasea karana ena hereva haida sibona be hospital ena kadi dekenai ia itaia, reana ia laloa do ia samania diba lasi, badina unai kara dika hamomokania gaudia be momo lasi. Reana ena kadi ia torea tauna ese ma hahine ta ena ripoti be iena kadi dekenai ia torea kerere, eiava ia vara gauna ena sivarai be dala idauna amo ia torea kerere.

To, Mary be ma gau haida ia diba diba unai taihu ese ena opereisen ena davana ia henia vadaeni, anina be ena akaun dekenai idia torelaia opereisen herevana ia hamomokania. Danu, ia diba unai taihu ia headava lasi, unai dainai ia diba ia sihari kava. Unai dainai Mary ia ura bada unai kerere hahinena do ia durua mai ena lalokau ida bona Iehova ena orea do ia naria ia goeva noho totona. Ia ese Hereva Lada-isidia 14:25 ia laloa, unai siri ia gwau: “Hereva momokani ia gwauraia hedinarai tauna ese mauri ia havaraia, to koikoi tauna ese hereva koikoi ia gwauraia.”

Mary ese hospital bona gavamani edia taravatu ia laloa, to ia laloa inai kara dika dekenai Bible ena taravatu ese unai taravatu ia hanaia. Ia laloa unai taihu ese do ia badu henia lasi bona do ia samania lasi. Unai dainai Mary ese unai gau idauidau ia lalohadailaidia neganai, ia laloa hari be “herevahereva” negana, “herevahereva lasi” negana lasi.

Mary ese ia laloa gauna ma ta be inai: Daika do ia hereva henia, bona edena bamona do ia hereva henia namonamo diba? Elda taudia dekenai ia lao maoromaoro diba, to ia laloa unai taihu dekenai do ia lao guna. Unai be lalokau karana. Mary ia laloa unai taihu ia kara dika vadaeni reana, to ia diba namonamo lasi; unai dainai ia laloa bema unai taihu do ia nanadaia dahaka ia vara, bema unai kara dikana ia karaia lasi, do ia ura ia vara momokani gauna do ia gwauraia hedinarai, eiava bema momokani ia kara dika, do ia ura ena kerere do ia gwauraia hedinarai. Bema unai taihu ese ia vara gauna be elda taudia ia gwauraia hedinarai vadaeni, Mary do ia hadibaia, bena Mary ese unai gau do ia tahua lasi. Mary ia laloa, bema unai taihu ese Dirava ena taravatu ia utua, bema opereisen ia abia ena bogana dekenai ia noho natuna hamasea totona, to bema elda taudia ia do hadibadia lasi, do ia hagoadaia ena kara be elda taudia dekediai do ia gwauraia hedinarai totona. Bena Iakobo 5:​13-20 ena hereva hegeregerena, elda taudia do idia durua diba. Vadaeni, unai bamona ia vara. Mary ese ia davaria unai taihu be lauma dalanai ia manoka, bona ta ese ia doria opereisen ia abia ena bogana dekenai ia noho natuna hamasea totona. Ia hemarai bona ia gari dainai ena kara dika ia hunia, to gabeai elda taudia edia heduru ia abia dae mai ena moale ida, badina idia durua lauma dalanai ia goada lou totona.

Bema Mary ese kongregesen ena elda oreana taudia ia hadibadia guna, hospital ena hereva hehunidia haida idia kamonai neganai, edena bamona do idia karaia? Idia be Iehova ena orea naria taudia, unai dainai Iehova ena ura bona Bible ena taravatu idia dekenai do idia laloa, bena unai hegeregerena edia lalona do idia hadaia edena bamona do idia karaia be namo. Bema ta ese ia samania tauna be Keristen tauna ta, bapatiso ia abia vadaeni bona kongregesen ta lalonai ia gaukara noho tauna, elda taudia ese gau iboudiai do idia lalohadailaidia namonamo guna, Mary ia karaia bamona, bena edia lalona do idia hadaia, unai samani herevana do idia tahua eiava lasi. Bema idia laloa kara dikana ta ia vara dainai “hatubua muramurana” be kongregesen lalonai ia noho, reana edia lalona do idia hadaia hahemaoro komiti do idia karaia unai kerere tahua totona. (Galatia 5:​9, 10) Ena kerere sivaraina idia kamonai hahinena bema nega daudau sisina lalonai hebou dekenai ia mai lasi bona taunimanima vairadiai ia be sibona ia gwauraia lasi ia be Iehova ena Witness hahinena ta, vadaeni, reana elda taudia ese kara ta do idia karaia lasi ela bona do ia hahedinaraia lou ia be Witness hahinena ta.

Laloa Namonamo Guna

Gaukara biagudia be mai edia maoro edia Keristen gaukara taudia do idia oda henidia, edia “hereva do idia badinaia momokani,” edia taravatu hereva hehunidia dekenai danu. (Tito 2:​9, 10) Bema ta be ena gaukara gabuna ai hereva metauna amo ia gwauhamata, namona be unai gwauhamata ia laloa maragi lasi. Unai hereva metauna ese ena hereva ia hagoadaia. (Salamo 24:4) Bema gavamani be mai ena taravatu hereva hehunidia dekenai, bona ta ia gwauhamata unai hereva do ia gwauraidia hedinarai lasi, unai be gau maragina ta lasi. Unai dainai, bema Keristen tauna be ena gaukara dainai eiava ma gau ta dainai taravatu ta hegeregerena ia gwauhamata gwauraia, hereva hehunidia do ia gwauraia hedinarai lasi, namona be ia laloa namonamo guna, bema Dirava ena taravatu ia badinaia dainai unai gwauhamata do ia hamomokania diba lasi neganai dahaka hekwakwanai do idia vara diba. Bema tadikaka ta o taihu ta ia mai ena gaukara gabuna dekenai bisinesi karaia totona o heduru abia totona, edena bamona do ia karaia? Gaukara haida, hegeregere doketa, hospital, kota, bona loia gaukara dekenai hekwakwanai idia vara diba. Gavamani ena taravatu ita dadaraia diba lasi bona hereva metauna amo ita karaia gwauhamatana ita laloa maragi diba lasi, to Iehova ena taravatu ese taunimanima edia taravatu ia hereadia.

Tadikaka haida be loia taudia, o doketa taudia, o akaun naria taudia; to idia diba hekwakwanai idia vara diba, unai dainai taravatu be pepa dekenai idia torea vadaeni, bena bema tadikaka ta ia mai idia dekenai heduru abia totona, hereva hehunidia do ia gwauraia hedinarai lasi neganai, idia hamaoroa namona be unai taravatu ia duahia guna. Unai dala amo unai tadikaka do ia diba, ia durua tadikakana ese ena kara dikana ta bema do ia davaria, do ia hagoadaia kongregesen ena elda taudia dekediai do ia lao ena kerere gwauraia hedinarai totona. Danu, ia diba bema unai bamona do ia karaia lasi, ia durua tauna ese elda taudia do ia hadibadia.

Reana nega haida, ena be kamonai Keristen tauna ia gwauhamata vadaeni hereva hehunidia do ia gwauraia hedinarai lasi, to Dirava ena Hereva ia diba dainai ia laloa namona be ia vara gauna ia gwauraia hedinarai, Dirava ena taravatu hereadaena ia badinaia totona. Namona be ia boga-auka bona ia kara mai ena aonega ida. Iena kara ena badina be, ia ura kerere tauna do ia durua bona ia ura Keristen kongregesen ia goeva noho. Do ia kara lasi, ta ia spai henia totona. Namona be kara kerere maragidia ita gwaudiatao badina Bible ia gwau, “lalokau ese kara dika momo ia koua,” bona namona be “nega 70 X 7” ta ena dika ita gwaudiatao. (Mataio 18:​21, 22) Unai be “ita herevahereva lasi” negana korikorina. To ta ese kara dika badadia ia hunidia toho neganai, reana unai be “ita herevahereva” negana korikorina.

[Footnote]

[Picture on page 31]

Bema Witness tauna ta ia kara dika, ita hagoadaia elda taudia ida idia herevahereva be maoro bona lalokau karana, badina ita diba mai edia hebogahisi bona lalo-parara ida do idia durua