Iehova ese Ia Hanamoa Lalohadaina

“LOHIABADA ese oiemu lauma (o lalohadai) dekenai do ia noho. Dirava ena hariharibada umui ibounai danu do ia noho.” Unai hereva amo Paulo ese ena revareva iharuana Timoteo dekenai ia hadokoa. (2 Timoteo 4:22) Unai hanamoa hereva dainai Timoteo bona idia bamoa taudia idia moale bada, badina idia diba Iehova ese ia hanamoa lalohadaina idia hahedinaraia!

To, Iehova ese ia hanamoa lalohadaina be dahaka? Inai lalohadai namona idia abia taudia edia kara be dahaka? Bona edena dala amo ita ese inai lalohadai namona do ita hahedinaraia, Iehova ena hahenamo ita abia totona?

Unai henanadai haerelaidia totona, namona be Mose ena negai idia vara gaudia edia sivarai ita laloa. Unai negana lalonai Israel besena be tano gagaena dekenai idia noho. Iehova ese idia dekenai gwauhamata ia karaia bona ena Taravatu ia henidia, bena murinai ia haganidia dahaka dahaka do idia karaia ia do idia tomadiho henia gwau palai rumana ta, do idia abia loaloa diba gauna, do idia karaia, bona karaia totona golo bona davana bada gaudia momo do idia gaukaralaidia, bona mai edia diba idauidau gaukara taudia ese do idia haginia. Mose ese unai bese taudia ia haganidia sibodia edia ura hegeregerena harihari gaudia do idia henia bona unai gaukara do idia durua. Ia gwau: “Ura taudia ese edia harihari gaudia do idia mailaidia, Iehova ena, golo bona siliva bona kapa bona varo gadokagadokadia bona dabua kakakakadia . . . Bena gaukara taudia iboudiai do idia hebou bona Iehova ia haganidia hegeregerena do idia karaia: dubu mai ena palai bona mai ena guhi ida.”​—Esodo 35:​5-19.

Unai bese taudia be dahaka idia karaia? Esodo karoa 35 orena ese ita ia hadibaia, ia gwau, ‘edia kudoudia ese idia doridia’ bona edia ‘lalohadai ese idia hagoadadia’ taudia ese harihari gaudia idia mailaidia, bona mai edia goada danu idia gaukara, unai amo idia hahedinaraia idia ura momokani idia heduru. (Siri 21, 22, 26) Esodo 36:6 ese ia hahedinaraia, harihari gaudia momo herea idia henia dainai “Mose ese hereva ta ia halasia, bona unai hereva idia gwauraia hedinarai kampa taudia iboudiai dekediai, ia gwau: ‘Tau ta eiava hahine ta ese ma harihari gaudia do idia mailaidia lasi dubu totona.’ Unai hereva dainai taunimanima ese harihari gaudia henia karana idia hadokoa.” Oibe, idia koudia unai! Guna, Iehova ena hahegani hegeregerena, Mose ese taunimanima ia doridia lasi, to ia hamaorodia, “Ura taudia ese edia harihari gaudia do idia mailaidia.” Unai dainai unai bese taudia edia lalona idia ura do idia heduru, bona unai amo hahenamo bada idia davaria; idia moale bada, bona Iehova ese ia naridia bona ia durudia, edia gaukara ibounai dekenai.

Lagani momo murinai, King Hesekia ese tomadiho momokanina Israel dekenai ia haginia lou negana lalonai, haida ese edia lalohadai namona unai bamona idia hahedinaraia. Hesekia ese taunimanima ia haduadia neganai, hebou taudia ese “boubou gaudia bona hahenamo ena harihari gaudia idia mailaidia; bona ura kwalimu taudia iboudiai ese lahi amo gabua boubou gaudia idia mailaidia.” Edia kara dainai dahaka ia vara? “Hesekia bona taunimanima iboudiai be idia moale, Dirava ese taunimanima ia kara henidia karadia daidiai; badina unai kara ia vara haraga dainai.”​—2 Sisiga 29:​31-36.

Keristen Taudia edia Lalohadai Maorona

Keristen taudia danu idia ura unai bamona do idia heduru, a? Filipi 1:​3-5 lalonai, Paulo ese Filipi Keristen taudia edia kara ia torelaia, ia gwau: “Umui lau laloa negadia ibounai Dirava lau tanikiu henia noho. Bona umui totona lau noinoi neganai, lau egu guriguri be mai moale danu. Badina be umui ese lau umui durua noho Sivarai Namona do lau harorolaia totona. Emui durua ia doko lasi umui matamaia dinana ia mai bona hari.” Unai Filipi Keristen taudia be edena dala amo sivarai namona harorolaia gaukarana idia durua? Siri oredia idia hahedinaraia edia mauri dalana idia haidaua Bible ena hahegani idia badinadia totona, bona haroro bona hadibaia gaukaradia amo sivarai namona idia harorolaia goadagoada danu.

Keristen taudia iboudiai ese unai dala amo mai edia ura bada danu haroro gaukara idia karaia be gau badana. Heberu 13:15 ia gwau: “Namona be Dirava do ita hanamoa, Iesu ena ladana dainai. Bona inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” Unai dainai, ita Keristen taudia ta ta iboudiai ese sivarai namona ita harorolaia neganai, ita hahedinaraia ita ura Iehova tomadiho henia taudia momokanidia hegeregeredia unai gaukara do ita karaia. Danu, Bible ese Keristen taudia ia sisiba henidia, ia gwau: “Kara namodia do umui laloaboio lasi, bona kohu lasi taudia danu umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.”​—Heberu 13:16.

Ma dala ta amo unai tadikaka Filipi dekenai ese hari lalohadai namona karana idia hahedinaraia. Karoa 4 lalonai Paulo ese ia hahedinaraia nega haida moni amo idia durua sivarai namona harorolaia gaukarana ia habadaia totona. (Filipi 4:​14-17) Gunaguna Iehova idia tomadiho henia taudia edia kara namona idia tohotohoa unai. Idia ese ‘edia gau namodia amo Iehova idia hanamoa.’ (Hereva Lada-isidia 3:9) Hari inai negai, dala ia kehoa neganai, ita be mai iseda lalohadai maorona dainai ita danu ita heduru a?

Lalohadai Maorona Ia Hedinarai Hari

Hari inai nega ena dina gabedia lalodiai taunimanima momo herea ese sibodia edia ura idia tahua, to Salamo 110 ese ia hahedinaraia hari inai negai taunimanima momo ese sibodia edia ura do idia dadaraia, gaukara ta durua totona. Siri 3 ese ia hahedinaraia, Mesia ese lagani 1914 lalonai ena Basileia dekenai ia lohia matamaia murinai, Dirava ena taunimanima momo ese gaukara totona “sibodia do idia henia mai edia ura danu,” unai taudia edia momo be “daba rere ena paripari bamona.” Unai hereva ia momokani a?

April, lagani 1881 ai, The Watchtower magasin lalonai, idia noinoi taunimanima 1,000 ese sibodia do idia henia pioneer gaukara idia karaia totona. May, lagani 1881 ena magasin ese ia hahedinaraia unai gaukara idia abia dae taudia ese “davana do idia abia guba dekenai.” Lagani 4 lalodiai taunimanima 300 bona ma haida ese unai gaukara idia abia dae​—unai be momo herea badina unai nega lalonai Watch Tower Society oreana dekenai idia vareai Keristen taudia idia do momo lasi.

Hari inai nega lalonai danu, taunimanima momo ese unai bamona lalohadai maorona idia hahedinaraia noho. Haheitalai be inai: Lagani 1986 ai, hua ta ta iboudiai pioneer gaukara idia karaia noho taudia edia averes be 391,294. Lagani gunana amo idia be 21.2 pesen amo idia bada daekau, anina be lagani tamona lalonai ma taunimanima 68,473 ese pioneer gaukara idia abia dae! Pioneer gaukara idia karaia diba taudia sibodia lasi to ma haida danu ese inai lalohadai maorona idia abia.

Idia momo be Bible ia gwauraia maduna haida idia huaia, hegeregere​—edia ruma bese idia naria, edia tamana bona sinana burukadia o goreredia idia naridia​—bona ma haida idia gorere dainai pioneer gaukara idia karaia diba lasi, to edia nega hegeregerena mai edia ura danu sibodia idia henia Dirava ena hesiai gaukara idia karaia totona, bona Iehova idia hamoalea unai. Tano momo lalodiai Basileia harorolaia gaukarana badana idia karaia taudia hutuma be pioneer taudia lasi, to moni gaukara idia karaia eiava edia ruma bese ena maduna idia huaia, eiava Bible ia gwauraia maduna ta idia naria taudia unai. Momokani, Iehova ese ia hanamoa lalohadaina idia abia unai.

Lalohadai Maorona Idia Hahedinaraia

Mose bona Hesekia edia negai hegeregerena, hari inai negai danu, dala ia noho, mai edia ura bada taudia ese gaukara ta dekenai idia heduru totona, hegeregere kongregesen ta ese Kingdom Hall eiava unai bamona rumana ta idia haginia gwauraia neganai. Edia lalohadai maorona dainai haida idia heduru, a? Oibe, idia heduru momokani!

Kingdom Hall ta idia haginia gwauraia neganai, idia momo ese lalohadai maorona idia abia dainai idia heduru. Hari, Kingdom Hall momo idia haginidia haraga. Idia karaia dalana be inai: Witness taudia handred momo do idia mai bona Saturday dabai ia lao Sunday hanuaboi do idia gaukara hebou unai Kingdom Hall do idia haorea vaitani totona. Gaukara taudia be hanuaboi ibounai lalonai idia gaukara, bona niuspepa torea taudia idia gwau idia karaia gaukarana be “hoa gauna ta.” Friday dinana dekenai ruma ena semenisi floa sibona ia noho hegaegae, to Sunday hanuaboi neganai Kingdom Hall ibounai idia haginia vadaeni!

Tano haida lalodiai branch rumadia badadia idia haginidia, bona mai edia ura bada taudia ese unai gaukara idia durua diba. Unai gaukara badana idia karaia taudia momo be davana lasi dekenai idia gaukara, unai be hoa gauna momokani. Taunimanima momo ese edia goada idia henia unai gaukara karaia totona, to unai sibona lasi; taunimanima momo ese harihari monidia idia henia dainai ruma ena kohu idia hoia diba. Nega momo, Witness taudia ese unai ruma haginia davana idia hamaragia, kohu haida idia henia davana lasi neganai.

Unai bamona heduru karana ta ia vara Sydney, Australia dekenai branch matamatana idia haginia lalonai. Tadikaka haida Queensland ena gabu daudauna ta dekenai idia noho ese timba idia utua bona idia hegaegaelaia namonamo murinai, Sydney dekenai idia siaia taraka badadia 4 amo, unai timba bema idia hoia ena davana be K70,000 bamona! Western Australia amo Witness taudia be nega momo basi dekena amo idia lao Sydney dekenai, kilomita 4,000 idia heau unai, bona wiki 4 idia noho unuseniai heduru gaukarana davana lasi dekenai idia karaia totona. Idia momo be unai gaukara idia durua hua haida lalodiai, bona idia haida idia heduru lagani ta bamona lalonai bona edia diba idauidau idia gaukaralaia. Idau negai ia mai hari Iehova ese mai edia ura bada danu idia heduru taudia ia hanamodia, bona hari inai negai tano idauidau ai unai heduru karadia be nega momo idia karaia.

Danu, Witness taudia edia hebouhebou maragidia bona badadia dekediai mai edia ura bada taudia idia heduru diba. Unai hebouhebou iboudiai dekediai volantia taudia idia tahudia, nega haida hua rua hebou vairanai heduru taudia idia tahudia gaukara idia karaia hegaegae totona, bena hebouhebou do ia heau namonamo diba. Hebouhebou idia karaia noho lalonai nega momo Witness taudia 4 4 amo ta ta do idia volantia, gaukara idia karaia totona, bona edia heduru dainai mai moale danu hebouhebou do ia heau namonamo diba. Reana idia heduru totona aniani idia hegaegaelaia, eiava hebou gabuna idia hagoevaia. Reana idia karaia gaukarana be hebou taudia momo ese idia itaia lasi. To Iehova ese unai heduru gaukarana ia itaia! Bona ia ese mai edia ura bada danu idia heduru taudia do ia hanamodia. Keristen taudia be ‘lalokau dekenai idia ta ta dekenai durua idia henia’ neganai ahuna namona idia abia; hebouhebou negadiai volantia gaukara oi karaia dainai oi danu be unai ahuna namona oi abia a? Reana oi be mai emu ruma taudia iboudiai ida do umui karaia hebou diba, ani?​—Galatia 5:13.

Hebouhebou dekediai ita be mai iseda dala heduru gaukara ita karaia totona, to namona be dina ta ta iboudiai dala ita tahua heduru karadia ita karaia totona. Hegeregere, Kingdom Hall idia haginia vadaeni neganai, hagoevaia bona hanamoa gaukarana dekenai oi heduru a? Iehova ese tauanina dalanai oi ia durua dainai, oi ese heduru monina sisina oi henia Kingdom Hall durua totona, a? Bona gau badana be inai, oiemu gabu taudia dekenai sivarai namona oi harorolaia bona hahediba gaukarana oi karaia hanaihanai, a? Ma gaukara ta ese iseda haroro gaukarana ia hanaia lasi, badina Iesu ia gwau, inai tanobada ena dokona ia do ginidae lasi neganai, haroro gaukara ita karaia be mai anina bada.​—Mataio 24:14; 28:​19, 20; Kara 1:8.

Iehova ese ia hanamoa lalohadaina idia abia taudia iboudiai dekenai inai hereva ia momokani, ia gwau, Iehova ese “emui kara namodia do ia laloaboio lasi. Umui ese Dirava umui lalokau henia.” Oi danu, bema mai emu ura bada danu oi hahedinaraia oi ura oi heduru, vadaeni “Iehova ena hahenamo​—taga ia habadaia bona lalohisihisi sisina ia atoa kau lasi” gauna, do oi abia.​—Heberu 6:10; Hereva Lada-isidia 10:22.

[Box on page 26]

Mai moale danu ia henia tauna be Dirava ese ia lalokau henia noho.​—2 Korinto 9:7.