Do Oi Gwau, “Lau Inai! Lau Oi Siaia,” A?

“Iehova . . . ia gwau: ‘Daika do lau siaia, bona daika be ai dainai do ia lao?’ Bona lau gwau: ‘Lau inai! Lau oi siaia.’ ”​—ISAIA 6:8.

1, 2. Tau ta mai ena adavana ese dahaka idia moalelaia bada?

“MAI emai moale ida inai revareva ai torea, umui ai hadibaia emai lalona idia hegeregere, emui ura hegeregerena Colombia dekenai do ai lao. Aiemai gaukara iniseniai, Ecuador dekenai, ai moalelaia bada danu.” Unai be Iehova ena Witness taudia rua edia revareva ena hamatamaia herevana. Idia be Ecuador dekenai idia lao, Watch Tower Society ena branch opesi matamatana haginia gaukarana durua totona.

² Unai hesiai taudia be Ecuador dekenai idia lao, ruma haginia totona sibona lasi, to idia ura Keristen hahediba gaukarana danu idia karaia. Edia revareva lalonai idia be ma idia gwau: “Ai davaria haroro gaukara be mai anina bada. Pura toi idia lao vadaeni, ai taunimanima 8 be maketi dekenai ai lao bena unuseniai buka 73 bona magasin 40 ai hariharilaidia. Vanegai Bible stadi matamatadia rua ai hamatamaia. Ai itaia, branch rumana matamatana iniseniai haginia be mai anina bada. Lau mai egu adavana ida ai ura umui ai tanikiu henia, badina dala umui kehoa, ai be inai gaukara idauna do ai karaia lou” Colombia dekenai.

3. Momo ese Isaia ena lalohadai edena bamona idia tohotohoa?

³ Hari tau mai ena adavana, bona ma taunimanima momo herea danu, idia gwau edia lalona idia hegeregere idau tanona ta dekenai do idia gaukara. Edia lalohadai be Isaia ena lalohadai hegeregerena. Nega ta Dirava ia gwau: “Daika do lau siaia, bona daika be ai dainai do ia lao?” Isaia be unai hereva ia kamonai neganai, ia gwau: “Lau inai! Lau oi siaia.” Bena Dirava ese ia hamaoroa, ia gwau: “Oi lao, inai bese oi hamaoroa, oi gwau: ‘Tatau e, umui kamonai loulou, to umui lalo-parara lasi.’ ” (Isaia 6:​8, 9) Isaia ena lalona ia hegeregere, Dirava ese do ia siaia, dahaka do ia karaia totona, bona unai dainai dahaka ia vara? Hari inai negai idia vara gaudia haida be unai hegeregere a, bona unai ese dahaka ita ta ta ia hadibalaia?

Isaia Ia Siaia Ia Haroro Totona

4, 5. (a) Dahaka be Iuda lalonai ia vara noho, Isaia ese karoa 6 lalonai ia gwauraia matahanaina ia abia neganai? (b) Isaia ia matahanai neganai, dahaka ia itaia?

⁴ Lagani 777 B.C.E. ai, King Usia ena mase laganina lalonai, Iehova Dirava ese Isaia ia nanadaia, ia gwau: “Daika do lau siaia?” (Isaia 6:1) Bena lagani 170 murinai, lagani 607 B.C.E. ai, Babulono taudia ese Ierusalem idia hadikaia ore, bona Iuda taudia iboudiai be edia tano amo idia abidia oho. Iehova ia diba unai lalohisihisi gauna do ia vara, unai dainai Isaia ia siaia do ia harorolaia totona. Vadaeni, iena haroro gaukarana amo dahaka ita diba?

⁵ Isaia ese unai gaukara ia abia neganai, ia itaia gaudia ia hoalaidia bada; ia gwau: “Lau ese Iehova lau itaia, terona latanai ia helai, ataiai ia heabi isi; ena dabua latana ese dubu ia hahonua. Ia ataiai serapi idia gini. Idia ta ta be mai edia apena 6. Rua amo ena vairana ia koua, ma rua amo ena aena ia koua, ma rua amo ia roho. Bena idia boiboi heheni, idia gwau: ‘Tuari oreadia edia Iehova be helaga, helaga, helaga. Iena hairai ese tanobada ibounai ia hahonua.’ ”​—Isaia 6:​1-3.

6. Dahaka dainai Isaia be guba gaudia ia itaia be hahenamo ta ia dekenai?

⁶ Isaia ia diba, Usia be muramura mai bonana ia gabua gwauraia dainai dubu ena helaga daiutuna lalonai ia vareai mai ena hekokoroku ida neganai, Dirava ese lepra gorerena amo ia hagorerea, badina be ia be hahelaga taudia edia iduhu tauna ta lasi dainai. Unai dainai Isaia ia diba, Dirava ese ena noho gabuna ia haheitalaia be hahenamo badana ia dekenai! Isaia, goevadae lasi tauna, ese ena matana amo Iehova ia itaia lasi, to matahanai amo ia itaia. (Esodo 33:​20-23) Ia itaia gaudia ia hoalaia. Mai siahu bada anerudia, serapi, ia itadia, Iehova ena terona ai idia hesiai henia. Idia diba Dirava ia helaga, unai dainai edia ‘vairadia’ idia koua, bona Dirava ena helaga idia boiboilaia. Tanobada tauna ta ese unai ibounai do ia hoalaia bada, ani?

7. Isaia be edena bamona ia hereva, bona dahaka dainai ita danu be unai bamona ita laloa reana?

⁷ Unai dainai Isaia ia gwau: “Lau madi o! Lau boio inai, badina be lau be bibina miro tauna, bona bibina miro taudia bogaragidiai lau noho; badina be egu matana ese Pavapava, tuari oreadia edia Iehova, idia itaia vadaeni.” (Isaia 6:5) Isaia ia diba ia be Dirava ena gwaukau tauna, to unai matahanai dainai ia diba ia be goeva lasi, bona ena bibina idia goeva lasi dainai ia hegeregere lasi, unai Pavapava helagana mai hairaina ena hesiai gaukara do ia karaia. Ita haida danu be iseda kara dika ita laloa negadiai, reana ita laloa ita hegeregere lasi, Dirava do ita guriguri henia bona ena ladana be ita dekenai do ia noho. Unai dainai, Isaia dekenai ia vara gauna ma ta ena sivarai ese ita ia hagoadaia diba.

⁸ Serapi ta be ia dekenai ia roho lao, ena imana ai be gida ta, animal bouboulaia patana amo ia abia gauna. Aneru ese Isaia ena uduna ia daua toho, ia gwau: “Itaia! Inai gau ese oiemu uduna bibinadia ia daua toho vadaeni; emu kerere ia abia oho bona emu kara dika ia gwauatao.” (Isaia 6:​6, 7) Solomon ena negai, Iehova ese lahi na guba amo ia hadihoa neganai, unai amo ia hahedinaraia boubou patana ia moalelaia; unai boubou gaudia ese hahelaga taudia Dirava vairanai idia hagoevadia vaitani diba lasi be herevana. (2 Sisiga 7:​1-3; Heberu 10:​1-4, 11) Gida ese Isaia ena miro ia araia ore neganai, ia diba Iehova ese ena kara dika ia gwauatao dainai ia hegeregere haroro gaukarana badana do ia karaia. Unai be reana dahaka ena toana, vaira negana totona?

9. Isaia ena haroro herevana ena anina be dahaka?

⁹ Unai hoa gauna be Isaia dekenai ia vara guna, bena Iehova ese haroro gaukarana ia henia. (Isaia 6:​8, 9) To dahaka dainai Isaia ia hagania, taunimanima do ia hamaorodia, do idia kamonai loulou to do idia lalo-parara lasi? Dirava be ma ia gwau: “Inai taunimanima edia lalodia oi haduhudia, bona edia taiadia oi hakudimadia, bona edia matadia oi hakapudia, edia matadia amo do idia itaia . . . bena do idia helalo-kerehai bona do idia namo lou garina.” (Isaia 6:10) Anina be Isaia ese Iuda taudia do ia hereva auka henidia dainai do idia badu, bena unai dainai Iehova do idia dadaraia noho, a? Lasi. Unai ese ia hahedinaraia, ena be Isaia ese ena haroro gaukara do ia hagugurua goevagoeva mai ena momokani ida, to Iuda taudia momo do idia kamonai lasi.

10. (a) Taunimanima idia kara edia matadia idia kepulu bona edia taiadia idia kudima hegeregerena, be daika ena kerere? (b) Isaia ena henanadai, “Ela bona edena negai?” ena anina be dahaka?

¹⁰ Kerere be taunimanima edia. Ena be Isaia ena haroro gaukara dainai do idia “kamonai loulou” diba, to diba bona lalo-parara do idia abia lasi. Dirava ia hereva vadaeni, ia gwau idia momo ese edia kudouna idia ha-aukaia bona lauma gaudia idia laloa lasi dainai, do idia kamonai lasi. Idia ta ta do idia kamonai reana. Idia momo edia matadia do idia kepulu, hakamoatao muramurana ese ia hakapudia auka masemase hegeregerena. Unai dika do ia noho ela bona edena negai? Isaia ese unai ia laloa dainai, inai bamona ia henanadai, ia gwau: “Iehova e, ela bona edena negai?” Dirava ia haere, ia gwau: “Ela bona hanua do idia dika momokani, bona taunimanima ese do idia noholaia lasi.” Bena unai bamona ia vara, Isaia ia mase murinai. Babulono taudia ese Iuda taudia iboudiai idia abidia oho, bena Iuda ‘tanona ia dika momokani.’​—Isaia 6:​11, 12; 2 Hanua Pavapavadia 25:​1-26.

11. Isaia ena haroro herevana ese taunimanima edia lalona edena bamona ia hagoadaia?

¹¹ Dokonai, Iehova ese Isaia ia hamaoroa unai dika hanamoa dalana ta ia noho; ia gwau: “[Tano ai] karoa gwauta amo karoa ta do ia noho.” Oibe, ia be “au badana bamona, idia utua oho bena ena badina ia noho bamona; ena badina be uhe helagana.” (Isaia 6:13) Lagani 70 lalodiai Babulono ai idia noho, bena uhe ta, bese orena unai, be Iuda dekenai idia lou lao, au badana ena badina be ia tubu lou hegeregerena. (2 Sisiga 36:​22, 23; Esera 1:​1-4; ma Iobu 14:​7-9; Daniel 4:​10, 13-15, 26 itaia danu.) Unai dainai, ena be Isaia ena hereva be mai metauna, to helaro namona ta ia gwauraia danu. Bible ena hereva ma haida dainai, ita diba Isaia ena kara ese gabeai do idia vara gaudia idia laulaulaidia.

Anina Badana

12. Edena Bible siridia dainai Iesu be Isaia Badana ita gwauraia diba?

¹² Isaia ia mase bena lagani 700 bona ma haida murinai Iesu Keriso ia ginidae, ia ese Isaia ia hereaia dainai ena ladana be ita hatoa Isaia Badana. Taunimanima ta ai ia do lao lasi neganai, ena lalona ia hegeregere, ena Tamana ese do ia siaia tanobada dekenai, ia haroro totona. Isaia ese ia torea herevadia danu ia harorolaia. (Hereva Lada-isidia 8:​30, 31; Ioane 3:​17, 34; 5:​36-38; 7:28; 8:42; Luka 4:​16-19; Isaia 61:1) Iesu ese ena hahediba dalana ia gwauraia hedinarai neganai, Isaia karoa 6 ena hereva ia gwauraia. (Mataio 13:​10-15; Mareko 4:​10-12; Luka 8:​9, 10) Unai ia gwauraia be maoro, badina be Iesu ena hereva idia kamonai neganai, Iuda taudia momo idia ura lasi do idia abia dae bona do idia badinaia, Isaia ena negai idia noho Iuda taudia edia kara hegeregerena. (Ioane 12:​36-43) Danu, lagani 70 C.E. ai, Iuda taudia, Iesu ena hereva dekenai edia ‘matadia idia kepulu bona edia taiadia idia kudima’ taudia unai, be idia mase, lagani 607 B.C.E. ai idia noho taudia idia mase bamona. Aposetolo edia negai, Ierusalem dekenai ‘hisihisi bada herea ia vara, Dirava ese tanobada ia karaia nega dekena amo hisihisi unai bamona idia vara lasi, gabeai danu unai bamona ta do ia vara lou lasi.’ (Mataio 24:21) To, Isaia ia peroveta hegeregerena, taunimanima haida, “uhe helagana” unai, be idia kamonai. Idia be lauma besena ta ai idia lao, “Dirava ena Israela,” iena lauma amo ia horodia taudia, unai.​—Galatia 6:16.

13. Dahaka dainai ita diba Isaia karoa 6 ena hereva ena anina do ia vara lou?

¹³ Hari ita ese Isaia karoa 6 ena anina ma ta do ita laloa. Inai oi lalo-pararalaia totona, aposetolo Paulo ena hereva, lagani 60 C.E. bamona ai ia gwauraia, mani oi laloa. Ia hahedinaraia badina be dahaka Roma dekenai “Dirava ena Basileia ia hadibaia bona ia harorolaia” neganai, Iuda taudia momo ese iena hereva idia abia dae lasi. Badina be Isaia 6:​9, 10 ena hereva ia momokani lou unai. (Kara 28:​17-27) Unai ena anina be Iesu ese tanobada do ia rakatania murinai, iena horoa hahediba taudia ese gaukara ta Isaia ena hegeregerena do idia karaia a? Oibe!

14. Iesu ena hahediba taudia ese gaukara ta Isaia ena hegeregerena edena bamona idia karaia diba?

¹⁴ Iesu, Isaia ia hanaia tauna, be guba dekenai ia daekau gwauraia neganai, ia gwau iena hahediba taudia ese lauma helaga do idia abia bena iena ladana do idia “gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:8) Aneru ese boubou patana amo ia abia gidana ese Isaia ena kerere ia abia oho hegeregerena, Iesu ena boubou gauna dainai Dirava ese ena hahediba taudia edia “kara dika ia gwauatao.” (Levitiko 6:​12, 13; Heberu 10:​5-10; 13:​10-15) Unai dainai, Dirava be ena lauma helaga amo ia horodia diba, unai lauma ese do ia hasiahudia bena Keriso ‘ena ladana do idia gwauraia hedinarai, ia lao bona tanobada ena kahana ibounai.’ Dirava ese Isaia, bona Isaia ia hereaia tauna, Iesu, ia siaidia ena hereva harorolaia totona. Unai hegeregerena, Iesu murinai idia raka taudia, horoa taudia unai, “be Dirava ese ia siaidia . . . Keriso ida.”​—2 Korinto 2:17, NW.

15. Iseda nega lalonai, taunimanima momo ese Keristen taudia edia haroro herevana edena bamona idia laloa, bona unai dainai vaira neganai dahaka do ia vara?

¹⁵ Tanobada Ibounai Tuarina Ginigunana ena dokona murinai, horoa Keristen taudia idia diba Dirava ena hereva idia harorolaia be mai anina bada. Idia harorolaia herevana ta be inai: “Dika davana henia dinana, iseda Dirava ena,” be ia kahirakahira. (Isaia 61:2) Unai dina ai, Kerisendom taudia, idau negai Israel taudia hegeregeredia sibodia idia gwauraia Dirava ena orea taudia, ese dika do idia davaria. Ena be lagani momo lalodiai Dirava ena horoa witness taudia be mai edia abidadama ida idia haroro, to Kerisendom lalonai idia noho taudia momo ese ‘edia lalodia idia haduhudia, bona edia taiadia idia hakudimadia, bona edia matadia idia hakapudia.’ Isaia ena peroveta herevana ese ia hahedinaraia, unai bamona do idia karaia noho “ela bona hanua do idia dika momokani, bona taunimanima ese do idia noholaia lasi, bona ruma lalodiai taunimanima do idia noho lasi, bona tano do ia dika momokani.” Inai tanobada oromana dikana ena dokona be unai.​—Isaia 6:​10-12.

“Lau Oi Siaia”

16. Dahaka dainai ita gwau diba, “hutuma bada herea” ese gaukara ta, Isaia ena gaukara hegeregerena, idia karaia noho?

¹⁶ Hari inai negai, abidadama Keristen taudia milion toi mai kahana edia helaro be, Bible ena gwauhamata hegeregerena, tanobada paradaisona lalonai mauri hanaihanai do idia abia. Iesu ena rara, ia bouboulaia gauna, dainai Dirava ese inai “hutuma bada herea” edia kara dika ia gwauatao diba. Danu, horoa Keristen taudia oredia ida idia gwau, “Lau inai! Lau oi siaia” neganai, Dirava ena lauma amo siahu bona heduru idia abia. Ia siaidia, dahaka idia karaia totona? Roma 10:​13-15 lalonai Paulo ia gwau: “ ‘[Iehova] ena ladana idia noinoi henia taudia ibounai be mauri do idia davaria.’ To idia abidadama henia lasi taudia be edena bamona Lohiabada do idia noinoi henia diba? Bona iena sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai edena bamona do idia kamonai? Bona haida bema idia siaidia lasi, haroro taudia be edena bamona do idia haroro? Buka Helaga [Isaia 52:7] dekenai ia torea hegeregerena, ia gwau, ‘Sivarai Namona ena moale idia mailaia taudia edia aena be namo herea momokani, ani.’ ”​—Apokalupo 7:​9-15.

17. Isaia ena peroveta herevana hegeregerena, dahaka hereva ita harorolaia?

¹⁷ Mani inai oi laloa lou: Isaia be do ia harorolaia herevana ibounai ia do diba lasi neganai, ia gwau, “Lau inai! Lau oi siaia.” To hari be idau. Hari inai negai Dirava ia boiboi, ia gwau: “Daika do lau siaia, bona daika be ai dainai do ia lao?” neganai, ita diba vadaeni dahaka hereva be Dirava ena ura hegeregerena do ita harorolaia. Unai hereva ta be hadibaia herevana, “dika davana henia dinana, iseda Dirava ena” sivaraina unai. Ma ta be “Sivarai Namona ena moale” herevana. Unai hegeregerena, ia “siaidia” taudia ese “idia guidia taudia ruhadia nege bona dibura rumana ai idia koudia taudia edia matadia hapapadia” karana idia harorolaia. Unai bamona gaukara amo moale bada ita davaria diba, ani?​—Isaia 61:​1, 2.

18, 19. Edena dala idaudia ai taunimanima momo idia gwau “Lau oi siaia”?

¹⁸ Bema “Sivarai Namona ena moale” oi harorolaia loulou, Isaia karoa 6 ena hereva be hari ita laloa lou dainai reana oi be sibomu inai bamona do oi nanadaia diba: Edena bamona lau ese Isaia 6:8 ena hereva do lau hagugurua diba? Inai hereva ena matamanai ai gwauraidia taudia ruaosi hegeregeredia, taunimanima ma handred haida ese tanobada ibounai dekenai branch rumadia haginia gaukarana idia durua. Ma haida be ruma haginia gaukarana idia diba lasi, to Basileia harorolaia taudia be momo lasi tanodia dekenai idia lao. Bema ta ia ura unai bamona do ia karaia, namona be International Bible Students Association ena branch opesi ia nanadaia guna. Momokani, gau badana be, ta ese ena palani ia lalohadailaia namonamo guna, badina be gado, noho dalana, moni gaukara, bona ma gau haida danu be reana do idia idau vaitani, idau tanona ta dekenai. To, ena be idia idau vaitani, to oi gwau lasi oi hegeregere lasi. Taunimanima momo, edia lalohadai be “Lau inai! Lau oi siaia,” taudia be idau tanodia dekenai idia lao bona unai dainai Dirava ese ia hanamodia bada.​—Hereva Lada-isidia 24:27; Luka 14:​28-30 itaia.

¹⁹ Taunimanima ma haida​—headava lasi taudia, bona tatau mai edia adavadia bona mai edia natudia danu​—be sibodia edia tano dekenai idau hanuadia dekenai idia lao, Basileia harorolaia taudia eiava Keristen kongregesen naria taudia be momo lasi gabudia unai. (Kara 16:​9, 10) Unai idia karaia totona, reana edia ura gaudia haida idia dadaraia, hegeregere idia ura henia gaukarana idia karaia lasi, to gaukara idauna mai ena pei maragina idia karaia. Ma haida be edia moni gaukarana amo idia ritaea haraga bena hora haida sibodia lalodiai moni gaukara idia karaia, unai amo idia be mai edia nega bada haroro gaukara do idia karaia. Headava taudia be mai edia natudia ida idia gwau, “Ai inai! Ai oi siaia,” unai be namo herea. Isaia ena ruma bese be unai bamona. Iena adavana be peroveta hahinena ta hegeregerena Dirava ena ura ia karaia, bona Isaia ena natudia danu ese idia bamoa, peroveta herevadia ia gwauraia neganai.​—Isaia 7:​3, 14-17; 8:​3, 4.

²⁰ Bema hari inai negai oi be dala lasi unai bamona do oi karaia, namona be inai oi laloa: ‘Hari lau karaia diba gaukarana ibounai lau karaia a, Isaia ia karaia bamona?’ Dirava ena hereva oi harorolaia goadagoada, herevana medu ia diho, eiava dina ia siahu bada, eiava taunimanima idia lalo-hesiku; momokani, Isaia be unai bamona ia karaia. Mai emu lalo-goada ibounai ida “Sivarai Namona ena moale” oi harorolaia! Iehova ia gwau vadaeni, “Daika do lau siaia?” Oiemu kara amo oi hahedinaraia oiemu haere be Isaia ena haere bamona, oi gwau: “Lau inai! Lau oi siaia,” Iena hereva harorolaia totona.

Inai Oi Laloa Lou

◻ Isaia be karoa 6 lalonai ia gwauraia matahanaina ia abia neganai, dahaka ia vara noho, bona ia ese dahaka ia itaia?

◻ Dirava ese ia siaia, dahaka gaukara karaia totona?

◻ Dahaka dainai Iesu be Isaia Badana ita gwauraia diba, bona ena hahediba taudia ese gaukara ta Isaia ena hegeregerena edena bamona idia karaia?

◻ Oi ese Isaia ena lalohadai edena bamona oi tohotohoa diba?

8. Aneru ta be dahaka ia karaia, bona ena kara ena anina be dahaka?

20. Isaia 6:8 ena hereva oi laloa neganai, oi be sibomu dekenai edena bamona oi henanadai be namo?

[Picture on page 19]

Isaia ia hagoevaia bena ia siaia haroro totona

[Picture on page 20]

Momo idia gwau vadaeni, “Lau inai! Lau oi siaia”