Dirava ena Basileia ena Hairai Herevalaia

“Emu basileia ena hairai do idia herevalaia, bona emu siahu do idia gwauraia.”​​—SALAMO 145:11.

1. Dahaka dainai Iehova ese herevahereva karana ita ia henia?

IEHOVA be mai ena ura ta dainai, herevahereva dalana ita ia henia. (Esodo 4:11) Ena ura badana be iseda udu bibinadia ese ia idia ‘hanamoa herevadia do idia gwauraia momo.’ (Salamo 119:​171, 172) Salamo torea tauna David ia gwau: “Iehova e, oi karaia gaudia iboudiai ese oi do idia hanamoa, bona oi idia badinaia taudia ese oi do idia hanamoa. Emu basileia ena hairai do idia herevalaia, bona emu siahu do idia gwauraia. Emu siahu karadia be taunimanima do idia hadibalaidia, bona emu basileia ena hairai goevadaena danu. Emu basileia be noho hanaihanai basileiana, bona emu lohia siahuna ia noho uru iboudiai lalodiai.”​—Salamo 145:​10-13.

2. Edena negai Dirava ‘hanamoa herevadia ita gwauraia momo’?

² Iesu Keriso ena orea taudia, lauma helaga amo ia horodia taudia unai, bona edia bamodia “hutuma bada herea” danu, be idia ura bada Iehova, “noho hanaihanai Pavapavana” do idia hanamoa. (Apokalupo 7:9; 15:3) Bible bona Gima Kohorona bona Keristen bukadia ma haida stadilaia goadagoada karana amo, Dirava ita dibalaia maoromamoro; unai diba be mauri henia ranuna goevana ia lohilohi gabuna ta hegeregerena. Unai dainai, “aonega be ia lohilohi noho, ia aru goadagoada” ita dekenai. (Hereva Lada-isidia 18:4) Unai diba ese ita ia doria, ‘hanamoa herevadia ita gwauraia momo’ totona, ruma ta ruma ta dekenai ita haroro neganai, dala ai ita haroro neganai, kamonai taudia ita lou henidia neganai, bona ura taudia ita stadi henidia neganai danu. To Bible ese haroro gaukara dala idaudia ai bona nega idaudia ai karaia karana ia herevalaia danu.

Bible ena Haheitalai Haida

3. Edena negai Iesu Keriso be ia noholaia rumana lalonai ia haroro?

³ Dirava ese lauma helaga amo Iesu ia horoa murinai, Iesu ese Ioane, Andrea, bona Petro danu be ia boiridia ia noholaia rumana dekenai do idia lao, bena unai dina ibounai lalonai ia haroro henidia, iena haroro negana ginigunana unai. (Ioane 1:​35-42) Iesu be dala dekenai “ia raka lao neganai” Mataio ia itaia, ia hamaoroa, “Lauegu murinai oi raka.” Vadaeni ia toreisi, ia murinai ia raka.​—Mataio 9:9.

4. Iesu ese Samaria hahinena ia haroro henia neganai, dahaka ia gwau, bona unai dainai dahaka ia vara?

⁴ Iesu ese ‘aonega ia lohilohi bona ia aru goadagoada’ dalana ia haheitalaia namo herea. Ena be Sukara dekenai Iakobo ena ranu gurina badinai ia helai neganai, ia hitolo bona ia hesiku, to Samaria hahinena ta ia haroro henia; unai hahine be ranu utua totona ia mai. Iesu ese ia hamaoroa, ia gwau: “Lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai sinavai bamona do ia aru noho, bona mauri ranuna do ia henia. Ma mauri hanaihanai danu do ia henia.” Iesu ese unai hahine ia haroro henia murinai, hahine ia lao bona ma haida ia hamaorodia, bena idia momo idia hebou Iesu ena hereva kamonai totona.​—Ioane 4:​6-42.

5. Filipo bona aposetolo Paulo be edena dala idaudia amo idia haroro?

⁵ Haroro tauna Filipo ese kariota ta lalonai ia helai tauna ia haroro henia. Unai neganai unai tau ese Isaia ena peroveta herevana ia duahia. Ia ese Filipo ia noia kariota ai do ia gui, bena Filipo ese “Iesu ena Sivarai Namona ia hadibaia.” Hari Etiopia tauna ese Filipo ena hereva ia abia dae bena bapatiso ia abia. (Kara 8:​26-38) Aposetolo Paulo be dibura rumana ta lalonai ia noho neganai, tano ia marere bada dainai ena kwatua auri be sibona idia kokia murinai, gima tauna ia haroro henia. Bena dahaka ia vara? “Ia, mai ena ruma taudia ibounai danu nega tamona bapatiso idia abia.”​—Kara 16:​19-34.

6. Haida ese Stefano idia hodoa mase murinai, Iesu ena hahediba taudia be edena bamona idia haroro reana?

⁶ Hari inai nega lalonai, tano haida dekenai gavamani ese taravatu idia atoa dainai, Keristen haroro gaukarana be ruma ta ruma ta dekenai idia karaia diba lasi, unai dainai dala idaudia amo sivarai namona idia harorolaia. Ena be haida ese ita idia dagedage henia, to iseda kudouna ese ita idia doria, Dirava ena Basileia ena hairai ita gwauraia totona. Stefano idia hodoa mase murinai, hahediba taudia idia dagedage henidia bona idia hakarohodia neganai, unai hahediba taudia be gabu idauidau dekenai idia lao. To, sivarai namona idia harorolaia noho, bona reana dala idaudia ai edia Basileia harorolaia gaukarana idia karaia.​—Kara 8:​4-8; 11:​19-21.

7. Paulo be sibona ena ruma ai idia koua neganai, dahaka ia karaia, bona unai dainai dahaka henanadai ia vara?

⁷ Bema dibura rumana ai ita idia koua, eiava ita gorere o ita raka diba lasi dainai iseda ruma dekenai bema ita noho hanaihanai, dala idauna ta amo Dirava ena Basileia ena hairai ita gwauraia diba. Lagani rua lalodiai, sibona ena ruma lalonai Paulo idia koua bona Roma ena tuari taudia ese idia gimaia. Mai ena lalohisihisi ida ia noho kava lasi, to taunimanima ia boiridia do idia vadivadi henia, bena “vadivadi taudia ibounai ia abia dae. Dirava ena Basileia ia harorolaia, bona Lohiabada Iesu Keriso ena sivarai ia hadibaia. Ia hereva mai goada danu, bona tau ta ia koua lasi.” (Kara 28:​16-31) Unai be haheitalai namona! Bema oi be Iehova ena Witness tauna ta bona oiemu ruma bema oi rakatania diba lasi, Paulo ena kara oi tohotohoa diba a?

8. Paulo ese sibona ena ruma dekenai idia mai taudia ia haroro henidia dainai, dahaka namo ia vara?

⁸ Paulo idia gimaia taudia ta ta ena nega ena nega ia idia gimaia, unai dainai Dirava ena Basileia ena hairai ia gwauraia negadiai, idia momo idia kamonai. Ita diba ia ese unai gima taudia ia haroro henidia danu. Ena haroro dalana idauna ese anina bada ia havaraia dainai, Paulo be inai hereva ia torea: “Inai lau dekenai idia vara gaudia ese Sivarai Namona idia koua lasi. Lasi, inai lauegu hisihisi ese Sivarai Namona ia durua bona ia hatubua noho. Badina be Kaisara ena ruma idia gimaia tuari taudia ibounai, bona iniseniai idia noho taudia ibounai danu idia diba vadaeni, Keriso ena hesiai gaukara dainai lau be dibura rumai lau noho. Bona ekalesia varavara momo lau idia laloa, diburai lau noho. Vadaeni inai idia laloa noho dainai, edia lalona ese goada idia davaria. Edia gari idia laloa lasi, bona Sivarai Namona idia harorolaia noho.” (Filipi 1:​12-14) Bema dibura rumana ai ita idia koua dainai ruma ta ruma ta dekenai ita haroro diba lasi, Paulo hegeregerena Dirava ena Basileia ita harorolaia diba. Unai ese iseda tadikaka do ia hagoadadia!

9, 10. Dahaka danu ese ia hahedinaraia Keristen taudia gunadia be nega idauidau bona gabu idauidau ai idia haroro?

⁹ Keristen taudia ginigunadia edia nega lalonai, nega momo dala idaudia ai bona nega idaudia ai idia haroro, unai dainai gabeai buka ta ese inai bamona ia gwauraidia: “Keristen tauna ta, lagani 200 lalonai Carthage dekenai ia noho reana, ese edukeisini bada idia abia taudia haida edia sivarai ia torea. Dina ta ai, loia uhaudia toi, idia hetura heheni momokani taudia, be kone dekenai idia lao laga-ani totona. Idia rua be Keristen taudia, bona ta be dirava koikoina tomadiho henia tauna. Nega sisina murinai tomadiho idia herevalaia . . . Nega taina daudau lalonai tomadiho idia hepapahuahulaia. Edia sivarai ena dokona be inai: ‘Ai toiosi be mai emai moale ida emai ruma dekenai ai lou lao. Ta ia moale badina Keristen hahediba herevana ia abia dae, bona rua idia moale badina idia hakaua lao unai hereva dekenai.’ Inai sivarai be ia vara momokani gauna ena sivarai lasi, to Minucius Felix ese ia torea, Keristen taudia edia kara gwauraia hedinarai totona.” (Church History 1​—The First Advance: AD 29​—500, John Foster ese ia torea bukana, rau 46, 48) Oibe, hari sivarai ese ia hamomokania, sibodia idia gwauraia Keristen taudia be dala idauidau ai bona nega idauidau ai idia haroro.

¹⁰ Buka ma ta ese Keristen taudia gunadia inai bamona ia gwauraidia: “Keristen hahediba herevadia idia abia dae taudia idia momo daekau hanaihanai. Herevana gabu ta dekenai idia lao bisinesi karaia totona eiava taunimanima ese idia dagedage henidia dainai idia heau lao gabu idauna ta dekenai, to Keriso idia harorolaia . . . Idia momo be edia gaukara idia karaia negana lalonai, idia abia dae hahediba herevadia be ma haida dekenai idia gwauraia.” (The Missionary Enterprise, Edwin Munsell Bliss ese ia torea bukana, rau 14) Oibe, Basileia harorolaia taudia gunadia be ruma ta ruma ta dekenai idia haroro bona dala idaudia ai bona nega idaudia ai idia haroro danu.

Laloa Guna bona Hegaegae

11. Iesu be dahaka gau idauidau ia herevalaia, Dirava ena hereva momokani ia gwauraia hedinarai totona?

¹¹ Iesu bona ia murinai idia raka taudia gunadia hegeregeredia, namona be ita danu be ruma ta ruma ta dekenai ita haroro, bona dala idaudia ai bona nega idaudia ai ita haroro danu be namo. Unai ita karaia namonamo totona, gau badana be ita laloa namonamo guna bona ita hegaegae. Iesu ese taunimanima ia hedavari henidia gabudia idauidau ai bona negadia idauidau ai, idia hadibadia totona ia ese memero maragidia, aniani, dabua, manu, palaoapalaoa, guba ena toana, bona taunimanima edia gaukara danu ia herevalaia. (Mataio 4:​18, 19; 6:​25-34; 11:​16-19; 13:​3-8; 16:​1-4) Ita danu be gau idauidau momo ita herevalaia diba, Dirava ena hereva momokani gwauraia hedinarai totona.

12. Peleini o PMV amo gabu ta dekenai ita lao gwauraia neganai, dahaka ita hegaegaelaia diba bena peleini o PMV dekenai do ita haroro diba?

¹² Park gabuna dekenai ita helai neganai, ita badinai ia helai tauna ita haroro henia diba, eiava sitoa lalonai laini dekenai ita naria noho neganai, ita vairanai eiava murinai ia gini tauna ita haroro henia diba. Paulo be Atena dekenai ia noho neganai, “hoihoi gabuna lalonai danu, dina ibounai ia lao, unuseni ia davaria taudia dekenai ia herevahereva.” (Kara 17:17) To nega idaudia ai bona dala idaudia ai do ita haroro totona, ita hegaegae be namo. Hegeregere, peleini eiava PMV amo gabu ta dekenai oi lao gwauraia a? Namona be Bible bona pepapepa, magasin, eiava buklet haida oi abia lao danu. Taunimanima vairadiai Keristen bukadia duahia karana ese edia matana ia veria bena oi hereva henidia diba.

¹³ Namona be taunimanima oi hanamodia bona oi gado-namo henidia guna. Hegeregere, basi dekenai bema tau burukana ta be oi badinai ia helai, reana inai bamona do oi hereva diba: “Lauegu ladana be​—​—. Lau ese iseda mauri ena anina lau laloa momo. Taunimanima momo be hora momo lalodiai moni gaukara idia karaia loulou dainai, idia be nega lasi edia mauri ena anina do idia laloa. Iseda mauri laganidia idia momo neganai, ita lalo-parara mauri ena nega ia kwadogi sibona, bona ita henanadai, ita gwau: ‘Mauri ena anina be inai sibona a?’ Dirava ese ita taunimanima ia havaraia neganai, ia be mai ena palani namona ita totona, a?” Oi naria sisina, oi hereva henia tauna do ia haere diba totona. Bena reana Dirava ena palani taunimanima totona do oi gwauraia diba bona Apokalupo 21:​3, 4 lalonai ia gwauhamatalaia gaudia do oi herevalaia diba. Dala idaudia ai bona nega idaudia ai do oi haroro namonamo totona, kongregesen heboudia ai bona Keristen bukadia ai oi dibalaia herevadia do oi gaukaralaia diba.

Anina Namona Ia Havaraia Diba

14. Tadikaka ta be peleini lalonai ia helai neganai, ia badinai ia helai tauna ia haroro henia dainai, dahaka namo ia vara?

¹⁴ Iesu bona ia murinai idia raka taudia ginigunadia hegeregeredia, namo ita davaria diba, nega idaudia ai bona dala idaudia ai ita haroro neganai. Haheitalai ta be inai: Witness tauna ta be peleini lalonai ia helai neganai, ia badinai ia helai tauna, ami opesa tauna, lagani 20 lalodiai ia headava tauna unai, ia hereva henia. Hari tau ena adavana be drag ia ania momo, nega momo sibona ia hamasea toho, bona ia rakatania gwauraia badina ia ura tau matamatana ta do ia adavaia. Witness tauna ese Gima Kohorona bona Noga! magasin amo ia abia heduruna, Bible ena heduru unai, ia gwauraia neganai, ami tauna ese magasin sabskripsen ia abia bona ma magasin haida ia abidia ena adavana dekenai siaidia totona. Peleini dekenai idia gui taudia ma haida ese Witness tauna ena hereva idia kamonai. Dahaka ia vara? Iena haroro dainai, sabskripsen 22 idia abidia, bona magasin 45 bona buka 21 danu!

15, 16. (a) Idia ida idia gaukara hebou taudia idia haroro henidia taudia haida edia sivarai mani oi gwauraidia. (b) Unai ese anina ia havaraia dainai, dahaka oi karaia be namo?

¹⁵ Oi ida idia gaukara hebou taudia oi haroro henidia diba a? Tadikaka ta be Gima Kohorona bona Noga! magasin haida ia atoa ena gaukara gabuna ena digudigu daiutuna lalonai. Ia ida ia gaukara tauna ta ese unai magasin ia duahia, bena hari tadikaka ia hereva henia bona magasin sabskripsen ia abia. Bible stadi ia abia dae bona ena kara bodagadia ia rakatania. To Dirava ena ladana ia gwauraia negadia iboudiai ena adavana ese ruma ia rakatania. Hari tau ia ura ena tomadiho oreana amo do ia doko neganai, ena haroro tauna ia mai, unai idia herevalaia hebou totona, to hahine sibona be ruma dekenai ia davaria. Hahine ese haroro tauna ena hereva ia kamonai neganai ia hoa, badina be ena hereva amo ia hahedinaraia ena abidadama be lasi, bona Iehova ena Witness taudia ia samanidia koikoi dainai. Ena adavana ena kara ia itaia vadaeni, ena kara ia haidaua momokani bona hari ena kara be namo herea. Hahine ese haroro tauna ia hamaoroa, ia gwau: “Lau bona emai natudia danu be emu tomadiho oreana amo do ai doko, unai dainai emai doko pepana danu oi torea!” Gabeai, hari tau mai ena adavana be Witness taudia ai idia lao bona bapatiso idia abia.

¹⁶ Lagani momo idia lao vadaeni, tadikaka ta England dekenai ese ia ida ia gaukara hebou tauhauna ta ia haroro henia, bona ia boiria Iehova ena Witness taudia edia hebou ta dekenai do ia lao, laulau haida itadia totona. Bena lagani 31 murinai, unai tadikaka, hari ia be United States lalonai ia noho, ese revareva ta ia davaria; unai revareva ena hereva be inai: “Lau ura oi lau hadibaia unai [tauhau] oi haroro henia dainai namo ia vara. Lagani rua murinai ma tadikaka ta ese ia haroro henia, magasin ia henia, bona Kingdom Hall dekenai ia hakaua lao . . . Ia be Witness tauna ai ia lao, lagani 1959 ai bapatiso ia abia, bona hari ia be kongregesen ena elda ta . . . Lagani 14 murinai ena adavana be Witness hahinena ai ia lao bona bapatiso ia abia. Ma lagani rua murinai ena natuna kekenina ese bapatiso ia abia bona hari ia ese regular pioneer gaukara ia karaia North Derbyshire dekenai . . . Ashford dekenai unai tauhau oi haroro henia dainai, iena adavana bona ena natuna kekenina, bona ena taihuna (kasin sista) bona unai hahine mai ena natuna hahinena bona ravana bona natudia 5, bona ena kasin sista ena natuna hahinena ma ta ena natuna kekenina ta, iboudiai be Witness taudia ai idia lao vadaeni. . . . Ted e, lau ura oi lau tanikiu henia, badina be . . . hari lau gwauraia sivaraina be lau sibona egu sivarai, lau oi haroro henia bena unai dainai idia vara gaudia edia sivarai inai.

17. Iehova ena Witness memerodia bona kekenidia be edena dala amo sikuli dekenai idia haroro diba?

¹⁷ Umui sikuli memero bona kekeni e, sikuli dekenai emui sikuli turadia bona emui tisa umui haroro henidia diba. Sikuli gaukara umui karaia neganai, hegeregere sivarai ta umui torea o umui herevalaia neganai, Bible ena hereva danu umui torea toho a? Ecuador dekenai, haisikuli kekenina ta, Bible stadi ia abia kekenina unai, ese sivarai ta haisikuli dekenai ia torea gwauraia neganai, Awake! August 22, 1985 gauna ena hereva ta, “Hiroshima​—Has Its Lesson Been Lost?” (“Hiroshima​—Ena Dika Idia Laloaboio A?”) amo heduru herevadia haida ia abia. Bena bese idauidau edia toretore helulu ta lalonai iena hereva dainai idia hanamoa bona unai dainai Japan dekenai idia siaia davana lasi, unuseniai ia laolao totona. Momokani, Keristen magasin ai karaia lasi, haida be toretore helulu dekenai ai hakwalimudia totona. To inai sivarai ese ia hahedinaraia inai magasin ese namo idia havaraia diba bona idia amo haida ese Dirava na sikuli dekenai idia hanamoa diba.

18. Taihu ta ese ena ruma ena daiutu ia rentalaia gwauraia haneulatona ia haroro henia dainai, dahaka ia vara?

¹⁸ Taihu ta be moni sisina ia abia totona, ena ruma ena daiutu ta ia rentalaia gwauraia. Haneulato ta ese ia rini henia, ia ura unai daiutu do ia rentalaia. Taihu ese hari haneulato ia hamaoroa ia be Iehova ena Witness hahinena bona ia ura lasi ena ruma ai taunimanima do idia lebulebu. Ma ia gwau, vadivadi taudia be hanuaboi momokani dekenai ruma ai idia noho diba lasi, bona, bema uhau idia mai, namona be nega ibounai idia be ia itaia diba gabuna dekenai idia noho. Hari haneulato ia naria sisina, bena ia gwau: “Lau be kekeni badana neganai [Witness taudia ida] ai stadi, to lau laloa momo lasi. Unai dainai kolesi dekenai lau lao.” Taihu ese ia nanadaia, ia ura do ia stadi lou eiava, bena ia haere, ia gwau, “Oibe.” Gabeai, hari haneulato, mai ena sinana bona ena tadina danu, be Iehova ena hesiai taudia ai idia lao bona bapatiso idia abia. Unai ia vara, badina taihu ta ese dala idauna ta amo ia haroro henia.

19. Bahamas dekenai, Witness taudia be idia davaria kava hahinena ta idia haroro henia dainai, dahaka ia vara?

¹⁹ Bahamas dekenai, Katolik hahinena ta ena lalona ese ia botaia, badina lagani 5 lalodiai guriguri dekenai ia lao lasi. Unai dainai Sunday dabana ta ai, medu ia diho lalonai, dubu dekenai ia raka lao. Witness taudia toi ese idia itaia bena edia motuka lalonai idia udaia​—bona idia haroro henia. Ena dubu dekenai idia ginidae neganai ia diho lasi, badina ia ura hereva ma haida do ia kamonai, unai dainai motuka lalonai ia helai, idia be edia Bible stadi tauna udaia totona idia lao neganai. Idia giroa lao neganai dubu dekenai ia diho lasi, to Kingdom Hall dekenai ia lao, badina ia ura ma hereva haida do ia kamonai. Unuseniai ia kamonai pablik harorona be motuka ai idia herevalaia herevana hegeregerena. Bible stadi ia abia, bona ia ida ia noho tauna (ena natudia 4 edia tamana) ia siaia oho, bena lagani 1986 ai, Nassau ai, hebouhebou ta ai bapatiso ia abia. Ia moale, badina be motuka lalonai haida ese idia haroro henia dainai!

Dirava ena Basileia Herevalaia Noho!

20. (a) Ruma ta ruma ta dekenai haroro bona nega idaudia ai haroro be edena bamona ita lalodia be namo? (b) Bema ta ia gari dainai ia ura lasi ia davaria kava tauna do ia haroro henia, goada be edena bamona ia davaria diba?

²⁰ Ena be Iehova ena Witness taudia be dala idaudia ai bona nega idaudia ai idia haroro, to ruma ta ruma ta dekenai haroro idia hadokoa diba lasi. Ruma ta ruma ta dekenai haroro gaukarana be Bible ena hereva hegeregerena, bona anina ia havaraia danu. (Kara 5:42; 20:​20, 21) To, dala idaudia ai bona nega idaudia ai ta ia haroro neganai, anina ia havaraia diba, unai dainai namona be Iehova ena hesiai taudia iboudiai be unai dala ai idia haroro danu. Iseda varavara, sikuli turadia, idia ida ita gaukara hebou taudia, bona taunimanima ma haida​—ita davaridia gabudia iboudiai dekenai, ita be mai eda dala Dirava ena Basileia ena hairai do ita gwauraia. Unai dainai namo lasi gari eiava hemarai ese oi do ia koua. (Hereva Lada-isidia 29:25; 2 Timoteo 1:​6-8) Bema oi gari, namona be oi guriguri, Iesu ena hahediba taudia be dagedage negana lalonai idia guriguri hegeregerena. Dirava idia noia, idia gwau: “Lohiabada e, . . . oiemu hesiai taudia dekenai goada oi henia, vadaeni ai ese oiemu hereva do ai gwauraia, gari lasi.” Dirava ese edia guriguri ia kamonai a? Oibe, badina “idia hebou ruma ia marere, bona Lauma Helaga ese ibounai ia hahonua, bona Dirava ena hereva idia gwauraia, mai goada danu.”​—Kara 4:​23-31.

21. Dahaka ese iseda lalona do ia hagoadaia, nega idaudia ai bona gabu idaudia ai do ita haroro totona?

²¹ Unai dainai namona be oi laloa, dala idaudia ai bona nega idaudia do oi haroro neganai, unai ese anina do ia havaraia. Namona be oiemu lalokau Dirava dekenai ese oi ia doria nega idauidau ai bona gabu idauidau ai do oi haroro totona. Oi goada karaia, bona dala ia kehoa neganai hereva momokani oi gwauraia hedinarai mai emu lalona ibounai ida. Oibe, Dirava ena Basileia ena hairai oi harorolaia noho.

Edena Bamona Do Oi Haere?

◻ Edena Bible siri ese idia hahedinaraia nega idauidau ai ita haroro be namo?

◻ Edena dala ai ita hegaegae diba, nega idaudia ai do ita haroro totona?

◻ Gabu idauidau ai bona nega idauidau ai ita davaridia taudia bema ita haroro henidia, unai dainai dahaka do ia vara diba?

◻ Ruma ta ruma ta dekenai haroro bona nega idaudia ai bona gabu idaudia ai haroro, be edena bamona ita laloa be namo?

13. Basi dekenai oi helai neganai, bema tau burukana be oi badinai ia helai, edena bamona do oi haroro henia matamaia diba?

[Picture on page 26]

Bema emu ruma oi rakatania diba lasi, Paulo be sibona ena ruma ai idia koua neganai ia haroro bamona oi haroro, a?

[Picture on page 29]

Bema ita hegaegae namonamo guna, dala ia kehoa neganai ta do ita haroro henia namonamo diba

[Box on page 31]

Dirava ese gari laumana ita dekenai ia henia lasi, to siahu bona lalokau bona aonega laumana ita dekenai ia henia vadaeni. Unai dainai, iseda Lohiabada ena sivarai do oi gwauraia hedinarai, do oi hemarai lasi.​—2 Timoteo 1:​7, 8.