Nega Kahirakahira—Tanobada Dekenai Hisihisi be Lasi!

TANOBADA dekenai hisihisi lasi negana do ia mai haraga, a? Unai be sivarai namona bema taunimanima be nega momo tauanina dekenai, harana dekenai, eiava lalona dekenai idia gorere! Oibe, taunimanima milion momo do idia moale bada herea bema kensa gorere, eiava vairana varovaro gorere, ladana tic douloureux, bona kudou gorere idia havaraia hisihisina do idia ore. Harana dekenai gorere bada idia abia taudia do idia moale bema idia ania hisihisina bada ia ore. Bona ma taunimanima milion momo do idia moale bema edia gari, lalohisihisi, lalona ena mamina dikana, laloa momo karadia, lalo-hekwarahi bona moale lasi nohona ena hisihisi do idia ore. To, hisihisi mamina ibounai do idia ore be namo, a?

University of California, San Francisco dekenai, tauanina ia stadilaia tauna, Allan Basbaum, ia gwau: “Bema hisihisi mamina ita abia diba lasi, unai ese dika do ia havaraia.” Unai bamona ia hereva be mai ena badina namona. Hisihisi mamina ita abia neganai, ita diba gau ta ese iseda tauanina ia hadikaia.

Bema tauanina dekenai hisihisi ita mamia diba lasi, dika do ita davaria. Time magasin ena sivarai ta ese unai ia hamomokania, ia gwau: “Lagani 12 merona ena kiri toana be namo herea, to madi, ena tauanina toana be ia dika herea. Ena imana bona aena idia gageva, gorere ta ladana rickets ia abia bamona. Ena imana kwakikwaki haida be lasi. Ena tuina dekenai toto badana ia abia, bona ena udu bibinadia ia koria ela bona rara ia diho. Ena toana be ta ese ia dadabaia dikadika natuna bamona . . . Ia vara neganai, ena tauanina sisina ia kerere dainai, hisihisi mamina ia abia diba lasi. Ena ima kwakikwaki haida idia dika badina gau ta ese ena imana ia moia eiava ia araia neganai, hisihisi mamina ia abia lasi dainai ena imana ia kokia lasi. Ena aena turia idia gageva bona garugaru idia dika badina ia raka eiava ia heau neganai, tano ia botaia auka. Ena tuina dekenai toto ia abia badina ia rau neganai, gau haida idia gwadaia, to unai mamina ia abia lasi. Bema ena turiana ta do ia hamokohia eiava ena koekoe be garugaru amo ia veria, hisihisi mamina ia abia diba lasi dainai, do ia boiboi lasi heduru ia abia totona.”

Taunimanima milion momo be gorere dainai hisihisi idia ania, bona taunimanima haida idia gwau unai be Dirava ena kerere. To, taunimanima ese hisihisi idia ania dainai, Dirava ita gwauraia dika be maoro, a?

Kerere be Dirava ena, A?

Idia ore vadaeni lagani 6,000 lalonai, taunimanima ese hisihisi idia ania tauanina dekenai, harana dekenai, bona lalona dekenai. Momokani, Keristen taudia ginigunadia edia nega lalonai, Keristen aposetolo Paulo ia gwau: “Dirava ese ia karaia gaudia ibounai be idia hisihisi noho, hahine ese natuna ia havaraia ena hisihisi bamona. Oibe, idia tai noho, guna, ia mai bona harihari.” (Roma 8:22) Hisihisi ena mamina koua totona muramura idauidau ita hoia diba, bona doketa idauidau amo heduru ita abia diba, to tanobada ibounai dekenai taunimanima be hisihisi idauidau idia do ania noho. Haida be hisihisi bada idia ania dainai, Dirava idia gwauraia dika, gunaguna Iobu ena adavana ia doria unai bamona ia karaia totona hegeregerena! To, Iobu ia diba unai bamona ia karaia be kavakava bona maoro lasi.​—Iobu 2:​9, 10.

Taunimanima be hisihisi idia ania neganai, unai be Dirava ena kerere lasi. To, unai be ita itaia diba lasi koikoi tauna bona iseda tamana bona sinana ginigunadia edia kerere dainai, hisihisi ita ania. Dahaka dainai?

Buka Helaga lalonai, ia hahedinaraia gunaguna aneru ta be ia kara maoromaoro, to gabeai ia mataganigani bona siahu bona dagi badana ia tahua. Taunimanima be tanobada dekenai idia vara matamaia neganai, unai aneru ia diba gabeai tanobada paradaisona dekenai, taunimanima iboudiai be Siahu Ibounai Diravana, Iehova, do idia tomadiho henia. Unai aneru ena kudouna ia dika dainai, Gau Ibounai Havaraia Diravana ia gwau-edeede henia, bona ia ura taunimanima be ia dekenai do idia tomadiho henia. Ena koikoi karana dainai iena ura dikana ia hedinarai. Bena, unai dala amo, kara dika be tanobada dekenai ia vara.

Iehova Dirava ese tau ginigunana, Adam, ia hamaoroa bema kara namona bona kara dikana hadibaia auna ena huahua ia ania, do ia mase. (Genese 2:​15-17) To Adam ena adavana, Eva, ena lalona ia veria Dirava ia gwau-edeede henia totona. Unai lauma aneru Koikoi Tauna be gaigai ena uduna amo Eva dekenai ia gwau: “Dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, [Eva bona adavana unai] bona Dirava bamona do umui noho, kara namona bona kara dikana do umui diba.” (Genese 3:​1-5) Unai be koikoi hereva ginigunana, bona unai aneru dikana be “koikoi ibounai edia tamana.” (Ioane 8:44) Eden umana dekenai ia ese gaigai ia gaukaralaia, unai dainai, Buka Helaga dekenai idia gwauraia “idaunegai gaigaina, bona iena ladana be Diabolo bona Satani.”​—Apokalupo 12:9.

Kara dika ia vara dainai, taitai bona hisihisi ese taunimanima ia guidia. Dirava ena hereva ia momokani, badina Adam ia kara dika dinana dekenai, Dirava ese unai kerere taudia ia hahemaoro henidia do idia mase totona. Iehova vairanai, Adam bona Eva be hahemaoro idia abia dinana dekenai idia be hegeregere idia mase bamona. (Luka 20:​37, 38 hahegeregerea.) Eden lalonai, Iehova ese kara dika hahine ginigunana dekenai, ia gwau: “Emu rogorogo ena hekwarahi, do lau habadaia, bona oiemu hisihisi mara neganai.” (Genese 3:16) Eden ena murimuri kahana dekenai, paradaiso ia noho lasi, unai dainai mai hekwarahi danu, Adam ese uma ia karaia aniani idia abia totona. Ia dekenai Iehova ia gwau: “Do oiemu vairana ena varahu do ia diho bona do oi gaukara auka tano ena anina abia totona. Ia lao bona tano dekenai do oi giroa lou, badina be tano dekena amo oi mai. Oi be tano amo vara gauna, bona tano dekenai do oi giroa lou.” (Genese 3:​17-19, NW) Unai neganai, hisihisi ese taunimanima ia guia hamatamaia.

Vadaeni, hisihisi ese ita ia guia badina Adam dekena amo goevadae lasi tauanina, kara dika, bona mase ita abia dainai. Aposetolo Paulo ia gwauraia inai bamona: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika.” (Roma 5:12) To, Dirava ena Hereva ese ita ia durua hisihisi ita haheaukalaia totona, badina ita ia hadibaia dahaka dainai Iehova ese hisihisi kara ia koua haraga lasi bona ita ia hadibaia kahirakahira do ia haorea. Gaigai eiava “koikoi ibounai edia tamana,” Satana Diabolo, ese kara maoromaoro tauna Iobu ena abidadama tohoa totona ia hahisia neganai, Dirava ese ia koua lasi. Diabolo ia gwau Iobu ese kohu ia abia dainai, Dirava ia abidadama henia, to ia lalokau henia dainai lasi. (Iobu 1:​8-12) To Iobu ena abidadama Iehova dekenai ia goada noho, bona unai ese ia hamomokania ena be taunimanima idia goevadae lasi, bona edia abidadama tohoa auka gaudia be momo, to Ia idia lalokau henia dainai, idia hesiai henia noho mai abidadama danu bona Iena lohia dalana idia abia dae noho diba. Iobu be mai ena abidadama danu ia haheauka noho karana ese Iehova ena ladana ia hahelagaia, bona ia hedinarai Satana be koikoi tauna, bona unai kara maoromaoro tauna ese hahenamo momo ia davaria. (Iobu 42:​12-17; Iakobo 5:11) Iobu ena sivarai amo ita diba Dirava ena ura ia guguru neganai, hisihisi do ia haorea. To edena bamona ita diba momokani unai do ia vara?

Hisihisi Do Ia Ore Dalana

Iehova ese dala namona ia hegaegaelaia taunimanima edia hisihisi ia haorea totona. Unai dala be iena Natuna, Iesu Keriso dekenai, ia ese ena mauri ia bouboulaia dainai. Iesu be “Dirava ena Mamoe Natuna ia mai inai, ia be tanobada ena dika kokia tauna.” (Ioane 1:29) Tanobada dekenai “ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri [ena tanobada mauri goevadaena] do ia henia, taunimanima ibounai hamauria totona.” (Mataio 20:28) Gwau-edeede karana dainai, Adam ese mauri goevadaena mai ena helaro namona ibounai ia haboioa. To, Iesu ese ena mauri ia bouboulaia karana amo mauri goevadaena ena dala ia kehoa lou. (1 Timoteo 2:​5, 6; Heberu 7:26) Momokani, “Dirava ese inai tanobada [taudia] ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:16.

Dirava ia gwauhamata vadaeni hisihisi do ia haorea totona. Kara dika ese ia havaraia hisihisina do ia haorea negana ia perovetalaia neganai, ia ese Keristen aposetolo Ioane ia hasiahua inai hereva ia torea totona:

“Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni. . . . Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ ”​—Apokalupo 21:​1-5.

Iesu ia henia boubou karana dainai, kamonai taudia ese nega kahirakahira namo bada do idia davaria. Basileia ena siahu henunai unai namo do idia davaria, bona kara maoromaoro taudia be nega bada lalonai, unai Basileia inai bamona idia gurigurilaia: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:​9, 10) Guba Basileia dekenai, Iesu Keriso do ia lohia ela bona ena inai taudia ibounai be ena aena henunai do ia atodia, danu, hisihisi bona taunimanima edia inai gauna ginigabena, mase, do ia haoredia.​—1 Korinto 15:​25, 26.

Oibe, kamonai taudia totona, nega kahirakahira Dirava ese ‘edia matana ranu ibounai do ia dahua, bona mase, lalohisihisi, taitai, bona hisihisi be do ia haoredia momokani.’ (Apokalupo 21:4) Harihari inai peroveta herevadia be lauma dalanai idia guguru, to gabeai, tauanina dalanai do idia guguru danu, ia gwau: “Lauegu mauri e, Iehova oi hanamoa, . . . Ia ese emu kara dikadia iboudiai ia gwauatao, ia ese emu gorere ibounai dekena amo oi ia hamauria.” “Tau ta do ia gwau lasi: ‘Lau gorere.’ ”​—Salamo 103:​1-3; Isaia 33:24.

Hisihisi be Edena Negai Do Ia Ore?

Nega kahirakahira hisihisi gaudia do idia ore. Oibe, iseda nega lalonai do ia ore, hari idia mauri noho uru taudia do idia itaia. Bible ena peroveta herevadia idia guguru dainai, ia hedinarai goevagoeva ita be hari nega dikana ena dokona kahana dekenai ita noho. Harihari, tuari, doe, bona tano mareremarere be momo, bona tanobada ibounai dekenai, Iehova ena Witness taudia be sivarai namona idia harorolaia karadia be Iesu ia gwauraia “toana” gaudia haida, bona ena be matana amo ia ita itaia lasi, to unai ese ia hahedinaraia Iesu be ena guba Basileia mai hairaina danu ia “giroa mai” vadaeni.​—Mataio 24:​3-14, 21, 34.

Nega kahirakahira, “guba gunana bona tanobada gunana” do idia ore, unai be Satana Diabolo ena orea mai ena gavamani. “Davara” dikana eiava taunimanima dikadia do idia ore. Bena Dirava ese ia hanamoa “guba matamata” be “tanobada matamata” do ia lohiaia hamatamaia negana do ia ginidae, unai neganai, taunimanima iboudiai be kara maoromaoro taudia. Unai gabu dekenai be “kara maoromaoro sibona do ia noho.”​—Apokalupo 21:​1; 2 Petero 3:13.

Dirava ena Basileia gavamani matamatana henunai unai hahenamo do idia vara, bona unai nega be ia kahirakahira dainai, namona be ita moale. Hisihisi bona mase be do idia vara lasi tanobada matamatana ena sivarai ma haida do oi tahua be namo. Oibe, unai nega be ia kahirakahira mai, bona Iehova Dirava idia lalokau henia bona ena hereva idia badinaia taudia ibounai be unai hisihisi lasi tanobadana dekenai do idia noho.