Emu Lalona Oi Biagua!

“TAUNIMANIMA edia lalona ia stadilaia tauna ta ia gwau, mauri laganidia 50 idia do abia lasi neganai do idia mase taudia 6 6 iboudiai amo, reana 5 5 be badu haraga taudia bona taunimanima edia momokani idia abia dae lasi taudia.” Unai ripoti be The New York Times niuspepa, January 17, 1989 gauna, lalonai ia hedinarai. Times niuspepa ia gwau, Doketa Redford B. Williams, profesa ta, Duke University Medical Center, Durham, North Carolina dekenai, “ese taunimanima momo ia stadilaia murinai, unai lalohadai ia abia.” Times magasin dekenai ia gwau: “Ia gwau, taunimanima edia momokani idia abia dae taudia edia kudouna idia dika haraga lasi, badina edia harana bona edia tauanina varovaro idia hadikaia lasi.”

Bema tau ta ia badu, ena rara ia heau namonamo lasi, reana ia hahodi namonamo diba lasi bona ma gau dikadia haida ia davaria diba. Ia badu dikadika neganai, ia lalohadai namonamo diba lasi, bona nega momo unai murinai ia lalo-metau bada herea. Danu badu ese tau ta ena goada lauma dalanai ia hadikaia diba. Vadaeni, Bible lalonai ia gwau: “Lalo-manau ese tauanina ia hamauria.” (Hereva Lada-isidia 14:30) Oibe, emu lalona oi biagua namonamo neganai, emu tauanina ena goada oi naria. To ma badina haida dainai iseda lalona ita biagua be namo.

Aonega Dalana Oi Badinaia

Idia laloa namonamo taudia iboudiai idia ura mai aonega ida kara idia karaia. Unai bamona do oi karaia dalana ta be emu lalona oi biagua namonamo. Unai hegeregerena, Hereva Lada-isidia 29:11 lalonai ia gwau: “Kava tauna ese ena lauma ibounai ia ruhaia, to aonega tauna ese ia dogoatao, ia manau.”

Bible lalonai nega momo “lauma” ena anina be tau ta ena lalohadai badana, unai lalohadai dainai dala ta ia badinaia. “Kava tauna” ese iena lauma ibounai ia “ruhaia,” badina ia biagua diba lasi. Badu herevadia ia gwauraia haraga, bona iena hereva dainai idia vara diba gaudia ia laloa lasi. Iena lalohadai badana dainai, reana kava tauna be ena vairana ai badu toana ia abia guna. Bena, murinai, dagedage herevadia bona kavakava karadia amo iena lalohadai badana do ia hahedinaraia.

To, aonega tauna ese iena lauma “ia dogoatao, ia manau.” Iena lalohadai ia biagua bona ia laloa namonamo, ia badu haraga neganai, dahaka ia vara diba. Ena be reana ia badu be maoro, to ia lalo-parara bema kara ta ia karaia haraga ia badu neganai, dika bada ia havaraia diba. Unai dainai ia ese ena lalona ia biagua, bona sibona ia koua, ena badu ia hahedinaraia kerere garina. Ia ese Iehova ia naria, ia durua totona, reana iena lalona ai guriguri kwadogina ia karaia haraga. Gabeai, taunimanima iboudiai edia namo ia laloa dainai, aonega tauna ese iena badu ia hakerua diba, bona Bible ena hereva bona Dirava ena ura hegeregerena, ia laloa namonamo diba. Danu, aonega tauna ia lalo-parara bema nega daudau lalonai ena badu ia negea lasi, to ia bada noho, unai be namo lasi, badina unai dala amo reana ena lalona ia ha-aukaia bena aonega lasi dalana do ia badinaia, bona kara dika do ia karaia.

Aonega tauna ese aposetolo Paulo ena sisiba danu ia badinaia, ia gwau: “Bema umui badu neganai, kara dika do umui karaia lasi. Bona dina do ia diho lasi neganai emui badu do umui haorea. Satani ena dala do umui kehoa lasi.” (Efeso 4:​26, 27) Bema oi badu be maoro, oiemu badu oi dogoatao lasi, bona namona be dina ia do diho lasi neganai emu badu oi haorea. Dahaka dainai? Badina bema unai bamona oi karaia lasi, dala do oi kehoa Satana Diabolo ese oi do ia hamorua totona, bona reana oi do ia veria kara dika ta do oi karaia bena Dirava ese oi do ia badu henia totona. (Salamo 37:​8, 9) To idau, namona be emu lalona oi biagua bona oi kara haraga unai hekwakwanai, reana oi badulaia gaudia unai, oi hanaia totona.​—Mataio 18:​15-17.

Emu Lalona Oi Hakerua

Hereva Lada-isidia ena siri ma ta ia gwau: “Ena hereva ia dogoatao tauna ena diba be bada herea, bona lalo-parara tauna be ia badu haraga lasi.” (Hereva Lada-isidia 17:27) Dirava ena Hereva ia diba tauna ese “ena hereva ia dogoatao” bona ia badu neganai ia hereva momo lasi. Ia naria namonamo, badu ena siahu ese ia hamorua garina, badina ia diba Iehova ida ia hetura bona iena gabu maorona Dirava ena orea lalonai ia laloa. “Lalo-parara tauna” ese dala ia tahua iena lalona ia hakerua bona lalohadai dalana maorona ia badinaia totona. Unai lalohadai oi badinaia dainai, gau haida ese oi idia habadua neganai, oi danu ese emu lalona do oi biagua namonamo diba, to unai neganai kavakava tauna do ia kara dika.

Unai hegeregerena, Bible ia gwau: “Ia badu haraga lasi tauna be lalo-parara tauna korikorina, to ia haheauka diba lasi tauna be kavakava bada herea.” (Hereva Lada-isidia 14:29) Ita badu neganai, bema ita kara haraga, ita kara kavakava diba. Namona be hereva momo o kara kava dainai idia vara diba gaudia ita laloa namonamo! Bema lasi, reana tau ta do ia kara kava bona aonega lasi karana do ia karaia, bena unai dala amo do ia “kavakava bada herea.” Unai dainai, Dirava hegeregerena, oi “badu haraga lasi,” bona do oi kara kava lasi bona aonega lasi karadia do oi karaia lasi.​—Esodo 34:6.

Oi Hekokoroku Lasi

Hekokoroku dainai reana tau ta ese ma taunimanima haida edia namo ia laloa lasi, bona reana ia badu haraga danu. Unai dainai Bible ia gwau: “Badu tauna ese heiriheiri ia havaraia, bona badu momo tauna ese kerere momo ia karaia.” (Hereva Lada-isidia 29:22) Bema tau ta ese iena lauma ia biagua namonamo lasi to ia “badu,” reana iena turadia bogaraginai “heiriheiri ia havaraia.” Bona “badu momo tauna ese kerere momo ia karaia.” Oibe, kara dika do ia karaia​—mai ena aonega bona Dirava ia gari henia tauna ia ura dadaraia gauna unai.

Oi laloaboio lasi Iehova ese hekokoroku bona heagi dainai idia badu taudia edia kara ia ura henia lasi. (Hereva Lada-isidia 16:18) Namona be Dirava ena heduru ita tahua, hahetoho ita haheaukalaia totona bona ita kara manau be namo, to mai hekokoroku ida ita badu o ita badu dikadika be dika.​—Hereva Lada-isidia 29:23.

Oi Kara Manau

Bema dagi bada tauna ese oi ia gwau henia, oi manau be gau badana. Unai bamona negana ai, reana emu ura ginigunana be dahaka? Reana oi hereva haraga o oi hereva dika gwauraia. To Bible ena sisiba be inai: “Bema lohia tauna ta ena lalona ia badu oi dekenai, oiemu gabu oi rakatania lasi, badina be hemataurai ese kara dika badadia ia koua.” (Kohelete 10:4) Mai manau ida ita haere be aonega karana! Momokani, “hereva manauna ese badu ia koua.” (Hereva Lada-isidia 15:1) Mai manau ida ita haere totona, iseda lalona ita biagua be namo, to unai aonega dalana ese hekwakwanai ia hanaia bona maino ia havaraia.

Bema kerere ta oi karaia lasi to tau ta ese oi ia gwau henia, namona be dagi bada tauna ese dala ia koua lasi emu kara ena badina do oi gwauraia hedinarai totona. Momokani, oi hereva henia neganai, namona be manau dalana ai oi hereva henia badina emu helaro be iena lalohadai kererena do ia hamaoromaoroa. Namona be dagi bada tauna ese iena lalona ia biagua namonamo bona dala ia kehoa emu kara ena badina oi gwauraia hedinarai totona. Unai dala amo do ia hahedinaraia ia be mai ena aonega bona mai ena goada.

Namona be Keristen taudia iboudiai, dagi bada taudia bona dagi lasi taudia, idia laloatao, “ena lalona ia guia diba lasi tauna be ena magu ia makohia hanuana ta bamona.” (Hereva Lada-isidia 25:28) Ia lalo-manau lasi tauna bona ena lalona ia biagua diba lasi tauna lalonai lalohadai kereredia idia vareai haraga diba, bona unai lalohadai dainai kara kereredia ia karaia diba. Haheitalai goevadaena ia hahedinaraia tauna, Iesu Keriso, ia “dagedage lasi bona [ia] manau.” (Mataio 11:29) Danu, kara manau be Dirava ena lauma helaga ena kara ta, bona Keristen taudia idia guriguri unai kara idia abia totona be maoro.​—Luka 11:13; Galatia 5:​22, 23.

Dahaka Dainai Emu Lalona Oi Biagua be Namo?

Taunimanima ese ita idia hereva henia neganai, bema mai manau ida idia hereva, ita moale, to bema mai badu ida idia hereva, nega momo ita diba lasi dahaka dainai idia badu. Reana kara dika tauna ta ese iena badu ia hunia. Reana ma tau ta ese unai tau ia kara dika henia, eiava unai tau ia laloa ma tau ta ese ia kara dika henia, to momokani ia kara dika henia lasi. Unai dainai, badu tauna ia ura ia badu henia tauna ia kara dika henia, to ena ura ia hunia! Unai tau ese ia badu henia tauna ia inai henia dainai, reana mai ena koikoi ida ia naria ela bona dala ia kehoa ia ese ia badu henia tauna do ia gwauraia dika bona ena ladana do ia hadikaia totona. Momokani, gau badana be Keristen tauna ese dala ia koua, unai lalohadai be ia lalonai do ia bada ia lao garina. Ioane ia gwau: “Tau ta bema iena tadikakana ia badu henia neganai, unai tau be dibura lalonai ia noho. Bona dibura lalonai ia raka noho dainai, ia lao noho gabuna ia diba lasi, badina be dibura ese iena matana ia hakepulua dainai.” Ioane be ma ia gwau: “Iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.”​—1 Ioane 2:11; 3:15.

Bema tau ta ese hekokoroku, koikoi karana, eiava Dirava laloa lasi karana idauna ta ia hunia, ia ese Dirava ia koia diba lasi. Bema taunimanima vairanai ia hereva badabada ia gwau ia be kara maoromaoro tauna eiava taunimanima edia matana ai kara maoromaoro ia karaia, to ia koikoi, iena kudouna lalonai idia noho gaudia be Dirava amo ia hunia diba lasi. Hereva Lada-isidia 16:2 lalonai ia gwau: “Tau ta ena dala iboudiai be goevagoeva, ia sibona vairanai; to Iehova ese ena lalona ia tohoa.” Dirava ita koia diba lasi.

Oi ese namo do oi davaria totona, bona ataiai ai kikilaia Bible herevadia dainai, Iesu bona ma aonega taudia haida edia kara oi tohotohoa be namo, idia hekokoroku lasi bona idia kara manau. Dala iboudiai ai, emu lalona oi biagua!