Idau Negai Helaga Gaudia Idia Tomadiho Henia Ena Badina

NAMONA be oi laloa lagani 1700 ia matamaia murinai oi be Naples, Italy, dekenai oi noho. Diba ia tahua Irish tauna George Berkeley be unai hanua ena dubu badana dekenai ia noho idau negai tomadiho gauna ta vairanai ia gini. Ia be mai daradara ida “San Gennaro” eiava “Saint” Januarius, Katolik taudia “helaga tauna,” ena laulau dekenai ia noho rara aukana ia manoka bona ranu bamona ai ia lao ena hoa karana ia raraia.

Naples hanua dekenai unai bamona kara ia do vara noho. Hegeregere, lagani haida gunanai, nega ta ena be medu bada ia diho to taunimanima momo herea be unai dubu lalonai idia vareai, bona idia gwau hoa karana ta ma ia vara. Kadinal bisop badana ese taunimanima momo ia hakaudia lao bona unai laulau idia loaloalaia neganai, taunimanima be mai moale danu edia imadia idia hapatapataia. Oibe, idia gwau “San Gennaro” ena rara aukana ia manoka bona ranu bamona ai ia lao bona nega momo unai bamona ia vara. Idia gwau lagani 1300 amo ia mai hari, unai idau negai tomadiho gauna dekenai unai hoa kara ia vara.

Katolik sene herevana ia gwau, taunimanima ese idia gwauraia helaga tauna ese unai idau negai helaga gauna ta, (Latin gado relinquere, ena anina be “idia rakatania gauna”) ia rakatania. Hereva ta Dizionario Ecclesiastico bukana lalonai ia gwau, idau negai helaga gaudia “edia anina korikori be, Helaga Tauna ena tauanina eiava ena tauanina kahana ta bona iena mase tauanina ena kahu, bona ena anina badana ta be helaga tauna ena tauanina ia daua toho dainai, unai gau idia tomadiho henia be namo.”

Pope ese Ia Gwauraia Maoro

Ita daradara lasi, taunimanima momo be idau negai helaga gaudia idia tomadiho henidia badina nega momo hoa gaudia idia vara neganai unai gaudia idia gaukaralaia. Pope ese ia gwauraia maoro dainai, ia hedinarai taunimanima momo be unai dainai unai idau negai helaga gaudia idia ura henidia.

Idia hanaia lagani 70 lalodiai, pope idauidau hani ese idau negai gaudia idia laloa bada. Katolik magasin ta lalonai idia gwau Pius Namba 11 hegeregerena, Pope Pius Namba 12 be “Saint Lisieux ena idau negai helaga gaudia edia laulau be ena tauanina dekenai ia atoa.” Paul Namba 6 ese “aposetolo [Toma] ena ima kwakwikwakina ta be ena toretore patana dekenai ia atoa,” bona John Paul Iharuana ese “Saint Benedict” bona “Saint Andrew” edia mase “tauanina . . . kahana ta be ena noho rumana dekenai ia atoa.”​—30 giorni, March 1990, rau 50.

Pope ese unai kara ia gwauraia maoro dainai, ita hoa lasi taunimanima momo idia ura sibodia edia ruma dekenai unai idau negai gaudia idia abia, eiava dubu dekenai idia tomadiho henidia. To, idau negai helaga gaudia tomadiho henia karana ese Dirava ia hamoalea, a?

[Picture on page 3]

“Reliquary” lalonai, tomadiho ena idau negai helaga gaudia idia udaia idia dika idia lao garina

[Credit Line]

Courtesy of the British Museum