Duahia Taudia Edia Henanadai
Sekaria, Ioane Bapatiso ena tamana, be malana dika bona taia kudima ai ia lao, Luka 1:62 ese ia hahedinaraia hegeregerena, a?
Haida idia gwau Sekaria be taia kudima ai ia lao danu. Bible sivarai dekenai ita duahia, ia gwau: “[Natuna] ena ladana do idia hatoa Sekaria, tamana ena ladana do idia hatoa gwauraia. To ena sinana ia haere, ia gwau, ‘Lasi, iena ladana be Ioane.’ Idia gwau, ‘Be, unai be oiemu iduhu tauna ta ena ladana, a?’ Vadaeni idia ese edia imana dekena amo mero ena tamana dekenai toana idia henia, idia nanadaia mero ena ladana be edena bamona do ia hatoa. Sekaria ese torea gauna ta ia gwauraia, vadaeni inai bamona ia torea: ‘Iena ladana be Ioane.’ ”—Luka 1:59-63.
To, unai sivarai dekenai hereva ta ia gwau lasi Sekaria be nega ta taiana amo ia kamonai diba lasi.
Guna, aneru Gabriel be Sekaria ia hamaoroa natuna mero ta do ia abia bona iena ladana do idia hatoa Ioane. Buruka tauna Sekaria be unai hereva ia abia dae be auka. Aneru ia haere, ia gwau: “Oiemu uduna do ia koua, oi be do oi hereva diba lasi, ela bona lauegu hereva gaudia ibounai do idia vara. Lauegu hereva gaudia be edia nega korikori dekenai do idia vara momokani.” (Luka 1:13, 18-20) Aneru ia gwau Sekaria ena kamonai dalana lasi, to iena hereva dalana, do ia idau.
Unai sivarai be ma ia gwau: “Ia [be dubu amo] raka murimuri dekenai neganai be idia [naria taudia] ta dekenai ia hereva diba lasi. Vadaeni idia diba ia be Dubu Helagana dekenai gau idauna ta ia itaia vadaeni. Ia be toa dekena amo idia dekenai ia hadibaia, badina iena uduna be ia koua momokani.” (Luka 1:22) Unai Greek herevana “uduna be ia koua” anina be iena hereva dalana, eiava iena kamonai dalana, eiava unai dala rua idia hegeregere lasi. (Luka 7:22) To Sekaria be edena bamona? Oi laloa dahaka ia vara iena gorere ia ore neganai. “Unai neganai ena uduna ia kehoa, ena malana danu ia maoro, vadaeni ia hereva, Dirava dekenai ia hanamoa.” (Luka 1:64) Unai dainai ita laloa Sekaria ena hereva dalana sibona ia dika.
Vadaeni, badina be dahaka ma haida be Sekaria “edia imana dekena amo . . . idia nanadaia [natuna] mero ena ladana be edena bamona do ia hatoa”? Gado idia hahanaia taudia haida danu idia gwau unai hereva ena anina be “imana ena toana amo” eiava “imana ena gado amo.”
Aneru ese Sekaria ia hamaoroa negana murinai ia hereva diba lasi, ena hereva dalana tamona sibona be imana amo, unai be imana ena gado bamona, iena hereva ia gwauraia totona. Haheitalai be, dubu dekenai “toa dekena amo” ia hereva henidia. (Luka 1:21, 22) Gabeai, torea gauna ia ura abia neganai, ia be imana eiava toa amo ia hereva. (Luka 1:63) Unai dainai, reana idia danu idia noho taudia be ia hereva diba lasi negana ai edia imana eiava toa amo idia hereva danu.
To, reana Luka 1:62 dekenai ia herevalaia toana ena anina korikori ta ia noho. Elisabeta be iena natuna mero ena ladana ia gwauraia. Unai dainai, iena hereva idia dadaraia lasi, to reana dalana maorona idia karaia bona iena tau ena ura idia nanadaia. Unai bamona idia karaia diba kwarana idia hamarerea neganai eiava imana ena toana amo. Sekaria dekenai edia henanadai idia torea lasi dainai ese ia hahedinaraia iena hahine ena hereva ia kamonai. Unai dainai, kwarana ia hamarerea eiava unai bamona toa amo be inai bamona ia hereva, ‘Vadaeni, ita ibounai (oi danu, Sekaria) be iena ura ita kamonai, to oiemu hereva dokona be dahaka natuna ena ladana dekenai?’
Bona unai murinai ma hoa karana ta ia vara, bona unai ese Sekaria ena malana ia haidaua. “Unai neganai ena uduna ia kehoa, ena malana danu ia maoro, vadaeni ia hereva.” (Luka 1:64) Iena kamonai dalana ia idau lasi unai dainai idia herevalaia lasi.