Mozambique Ena Hanua Badana Idauna Maputo Dekenai Haroro Gaukarana!

Lagani 1991 lalonai, Mozambique dekenai, gavamani ese Iehova ena Witness taudia dekenai gwaumaoro idia henia idia gaukara totona. Unai murinai, unai medu bada siahu gabuna, Africa ena mairiveina kahana diho konena dekenai, Dirava ena Basileia ena sivarai namona harorolaia gaukarana ia bada ia lao haraga. Henunai sivaraina ese Mozambique dekenai Iehova ena Witness taudia edia Bible hadibaia gaukara dalana ia herevalaia; unai gaukara bada be Maputo, hanua badana dekenai, idia karaia.

INDIA Ena Davara ena ranu sisina siahuna ese hodahoda ia hasiahua sisina dainai, Mozambique be gabu namona. Kone dekenai be niu audia mai hairai bona motumotu maragidia momo mai edia davara nadi idia noho. Unai tano ena diho kahanai koura badana ta ia noho bona unai ese lai momo ia koua​—unai be gabu namona unai tano ena hanua badana, Maputo, ia noho totona.

Unai tano ena toana be mai hairai bona ia maino to ena sivarai gunana dekenai be dagedage herevadia momo. Lagani daha momo lalodiai, tano idau taudia ese idia biagua. Arab taudia be guna bena gabeai be Portugal taudia. Katolik Dubuna ese Portugal taudia ia durudia unai tano ena kohu idia henaoa totona​—aivori, golo, bona igui hesiai taudia. Lagani daha momo lalodiai idau bese biagudia ese idia dagedage henidia murinai, unai tano dekenai sibodia idia lohiaia totona heai ta ia hamatamaia bena lagani 1975 lalonai independens idia abia. To madi, unai ese edia mauri dalana ia hanamoa lasi, badina unai tano lalonai idia be sibodia idia tuari heheni, taunimanima idia hisihisi bada, bona unai ese kerere lasi gunika hanua taudia momo ia hadikaia.

Hanua Badana, Maputo

Idia hanai lagani ten lalodiai, Mozambique taudia tausen momo be dika amo idia heau oho totona edia hanua maragidia idia rakatanidia bona hanua badadia dekenai idia lao. Unai ita itaia momo Maputo dekenai, unuseniai, Portugal ena dala idauna ai bona Africa ena kala momo dekenai ruma idia haginia bona unai ese hanua ena toana ia hamauria bamona. Hari inai negai, bema Maputo ena dala badadia dekenai oi raka lao, do oi itaia dala badinai au momo idia tubu, bona taunimanima hutuma momo idia raka lao edia gaukara karaia totona. To gau ta ia idau. Maputo ena misinari tauna ta, Rodrigo, ia gwau: “Ena be taunimanima be hutuma bona mauri dalana be mai ena hekwarahi, to taunimanima edia toana be idia turana bamona. Taunimanima idia badu henia taudia momo do oi davaria lasi!” Oibe, taunimanima momo idia diba Mozambique taudia momo be moale bona turana karaia haraga taudia.

Momokani, Africa ena gabu momo dekenai bamona, taunimanima davaria gabuna be maketi dekenai. Unuseniai oi lao totona Chapa 100 dekenai oi guia diba, unai be PMV taraka maragidia edia ladana. Vaia edia kara bamona, taunimanima momo be taraka ena murimuri ai idia kamokau bamona, to momo lasi be taraka lalonai. Reana oi raka loaloa be namo.

Mozambique taudia be bisinesi karaia momo taudia. Maputo ia vadivadi henia tauna do ia itaia taunimanima momo be dala badinai bona dala edia daiguni dekenai patapata idia atoa, sitoa bamona idia karaia. Oi ura au huahua, uma aniani, raurau eiava aniani hanamoa gaudia oi hoia, a? Taunimanima ibounai ubua totona idia hegeregere. Oi ura ia mauri noho kokoroku oi hoia, eiava cashew [okari bamona] au huahua aukadia, eiava emu ruma haginia totona raurau oi ura hoia, a? Oi ura gauna hoia totona be oi hekwarahi lasi, bona gau ibounai idia karaia mai moale danu. Oiemu tamaka idia hagoevaia eiava emu motuka idia huria diba. Mai ena auri siahuna bona plastik amo, mero matamatana ta ese emu anina bada pepapepadia do ia kumia diba danu.

Dala dekenai bisinesi idia karaia taudia haida be gavamani ena maoro idia abia lasi. To, herevana, idia karaia. Gavamani ena maoro idia abia lasi bisinesi taudia idia gwauraidia dumba nenge, anina be “emu aena dekenai oi tabekau.” Sedira, unai ladana idia abia badina be gavamani taudia idia mai gau ibounai idia sekea namonamo totona, edia bisinesi idia koua garina aena dekenai idia heau oho haraga be namo.

Bonana amo ita diba gwarume maketi kahirakahira ai ita mai vadaeni! Dina ta ta ibounai ena adorahi negana ai, Costa do Sol ena kone dekenai, haoda taudia be unai dina lalonai idia abia gwarume idia mailaia neganai edia bouti dekenai be gaukara bada idia karaia. Gwarume edia toana bona edia bada be idauidau, to danu, idia be bava, ura, bona taunimanima momo ese idia herevalaia Mozambique pai, idia noho. To, Maputo dekenai bona ena kahirakahira dekenai idia karaia haoda gaukara idauna ta ena sivarai reana oi ura oi diba.

“Taunimanima Haoda Henia”

Mozambique dekenai gavamani ese gwaumaoro idia henia murinai, taunimanima momo ese Iehova ena Witness taudia idia ura henidia bada. Tau ta ese iena moale ia gwauraia, ia gwau: “London dekenai, umui momo be dala dekenai lau itaia. Lau lao gabudia ibounai dekenai Iehova ena Witness taudia lau itaia. Hari lau moale badina iniseniai umui noho danu.”

Bema Portuguese bona Tsonga, unai tano ena gadodia, ai idia abia Bible bona bukadia edia namba ese ia hahedinaraia maoro, unai taudia be momokani lauma gaudia idia laloa bada. Ma misinari ta, Paula, ia gwau Saturday momo dekenai, idia be bazaar, eiava maketi badana dekenai, magasin 50 bona ma haida idia henia diba. Taunimanima momo be Memero Kekeni Edia Henanadai​—Haere Maorodia bukana idia ura henia. Tuari dainai, matamata taudia momo edia tano ia boio eiava edia tama sina idia mase, bona unai buka ese ia herevalaia kara namodia bona hakaua herevadia idia ura henia bada.

Africa taudia edia hemarai lasi kara dekenai, kamonai taudia momo be misinari tauna dekenai do idia hebou iena hereva idia kamonai henia totona. Dala badinai idia hebou neganai nega momo Bible herevahereva namona idia karaia. Taihu ta be sivarai namona ta ia gwauraia.

“Nega ta, dala dekenai lau haroro neganai, lau gari bada badina tuari orea ena motuka ta be lau kahirakahira ai bereiki ia moia haraga. Tuari tauna matamatana ta be kahirakahira idia gini taudia haida ia boiboi henidia, ia gwau: ‘Unai hahine oi hamaoroa iniseniai ia mai.’ Lau be ia dekenai lau lao neganai, tuari tauna ena vairana ia moale, bona ia gwau: ‘Umui be taunimanima namodia. Ai moale umui be iniseniai ai itaia. Lau laloa matamata taudia edia buka ta be umui dekenai ia noho. Lau ura ta lau abia danu.’ Lau hamaoroa lau dekenai ta ia noho lasi, to lau hamaoroa idia mai neganai, iena ruma dekenai ta do lau abia lao.”

Buka Haboua Rumana amo Buka Idia Abia

Taunimanima momo be buka idia ura henia dainai, South Africa dekenai, Watch Tower Society ena branch opesi be wiki rua rua iboudiai Maputo ena buka haboua rumana dekenai buka idia abia lao. Misinari ta, Manuel, ese buka haboua rumana ia naria bona buka hariharilaia gaukarana ia naria.

Daba ta, lagani bada tauna ta ia vareai bona ia henanadai unai ruma be dahaka totona idia gaukaralaia. Manuel ia gwau unai rumana dekenai Bible bukadia idia atoa. Unai tau ia raka oho, to miniti tamona lalonai ia giroa.

Ia henanadai, ia gwau: “Oi gwau inai be Bible bukadia, ani?”

Manuel ia haere, ia gwau: “Oibe, unai be maoro.”

Unai tau ia henanadai, ia gwau: “Inai be dahaka orea?”

Manuel ia haere, ia gwau: “Iehova ena Witness taudia.” Bona ma ia gwau: “Inai bukadia be inai gabu amo aiemai kongregesen taudia dekenai ai siaia.”

Unai tau ena vairana ia moale bona ia gwau: “Iehova ena Witness taudia, a? Gau momo dainai umui dekenai lau moale bada. To lau be umui dekenai gau ta dainai lau lalohisihisi.”

Mai hereva manada danu, Manuel ia henanadai, ia gwau: “Dakaha dainai ai oi moale henia?”

Unai tau be iena hereva ena anina ia gwauraia, ia gwau: “Umui karaia bukadia dekenai lalona veria gaudia idia noho bona diba habadaia herevadia dainai lau ura henidia bada. To lau lalohisihisi gauna be lau ura buka momo lau abia, to lau abia diba lasi. Maputo dekenai umui karaia bukadia ai ura henia bada.” Bena ia torea lista ta lau ia henia, unai lista dekenai be Watch Tower Society ese idia karaia bukadia edia ladana, bona Gima Kohorona bona Noga! magasin momo, ia reaia gaudia, ia torea danu.

Manuel dekenai ia hamaoroa, ia gwau: “Inai lista be hanaihanai lau dogoatao. Iehova ena Witness taudia lau davaria neganai, idia dekenai idia noho bukadia lau abia. Bema lau oi durua lauegu lista dekenai idia noho bukadia lau abia totona, lau be moni davana bada do lau henia.”

Idia herevahereva noho. Manuel ia davaria unai tau ese Iehova ena Witness taudia ia davaria nega ginigunana be lagani 1950 murinai, unai neganai ia ese Creation bukana ia duahia. To unai neganai, Portugal gavamani ese Iehova ena Witness taudia edia gaukara idia taravatulaia dainai, iena diba ia bada lasi.

Gabeai, unai tau ena opesi dekenai ia vadivadi henia neganai, Manuel ia itaia ia dekenai idia noho Watch Tower bukadia iboudiai be plastik dekenai ia kumia bona ibounai ia atoa namonamo. Manuel be unai tau ese ia do abia lasi bukadia ia henia diba, bona dala ia hegaegaelaia unai tau bona iena ruma bese dekenai Bible stadi ia karaia totona.

Lauma dalana dekenai unai hadohado bona dairia gaukarana ese huahua bada ia havaraia, Dirava ese unai gaukara “ia hatubua.” Ia hahedinaraia vadaeni Mozambique dekenai, kudou-maoro taudia momo do idia gogoa diba!​—1 Korinto 3:6; Ioane 4:36.

Ena be Hekwakwanai Idia Noho to Tiokratik Dalana Ia Goada Noho

Hari, Maputo lalonai bona ia kahirakahira gabudiai kongregesen 50 idia noho. To, Iehova ena Witness taudia edia Kingdom Hall ta ia noho lasi. Badina be dahaka? Unai tano dekenai moni be bada lasi dainai, ena be kongregesen taudia momo be lagani momo lalonai mai edia tano to idia hegeregere lasi Kingdom Hall ta idia haginia totona.a

Herevana hekwakwanai idia noho to unai ese gaukara ia bada ia lao dalana ia koua lasi. Harihari, Mozambique ena iho kahana ai Bible stadi 5,000 bona ma momo herea idia karaia. Taunimanima momo be stadi idia ura henia dainai taravatu haida idia atoa. Bema ta be stadi ia noia, unai anina be reana kongregesen hebou iboudiai dekenai do ia lao danu.

Taunimanima ese idia noholaia kava tanona dekenai ia noho kongregesen ta dekenai taunimanima 189 be Sunday ena hebou dekenai idia lao, to unai kongregesen lalonai sivarai namona harorolaia pablisa taudia be 71 sibona. Unai orea badana be ruma ta murimuri ai, guhi lasi gabuna dekenai idia hebou. Taunimanima ese idia itaia lasi totona haba ta idia atoa, unai be auri bona reirei amo idia karaia. Hebou ta ta iboudiai vairanai, unai gabu idia daroa, bona kamonai taudia momo, taunimanima badadia danu, be tano dekenai geda latanai idia helai. Hereva idia kamonai henia namonamo! Kamonai matamata taudia momo be stadi neganai edia Gima Kohorona be lasi dainai, paragraf duahia negana ai idia kamonai namonamo, bona hebou gunalaia tauna ese henanadai ia henia neganai idia momo ese edia imana idia abia isi.

Ma kongregesen ta ena pablisa taudia be 59, to taunimanima 140 be hanaihanai hebou dekenai idia mai. Nega momo guhi lasi gabuna dekenai idia hebou. To, medu negana ai, unai kongregesen taudia hutuma be ruma bada lasi ena daiutu rua lalonai idia hebou. Haida be ruma ena raka lao, raka mai dalanai, nadunadu daiutuna lalonai, bona dehe dekenai idia helai. Unai taudia, memero kekeni momo danu, be hereva idia kamonai henia namonamo mai moale danu.

Hebouhebou dekenai, ia hedinarai momokani Mozambique dekenai gaukara be do ia bada momokani. Vanegai, sekit hebouhebou ta idia karaia hanua ena bogaragina dekenai, boromakau idia tuari henia gadara gabuna dekenai. Oi laloa pablisa 3,000 bamona idia hoa bada herea badina taunimanima 10,000 be unai hebouhebou dekenai idia mai!

‘Uiti Ena Anina be Bada’

Unai bamona sivarai ese idia hahedinaraia namonamo Mozambique dekenai gaukara bada ia do noho. Branch opesi be kongregesen haida dekenai vanegai sibona sekit naria tauna idia siaia lao nega ginigunana. Heduru bada idia abia kongregesen iboudiai dekenai orea ena heau dalana maorona idia karaia totona.

Kongregesen taudia idia moale bada danu badina vanegai Gilead misinari taudia idia ginidae. Maputo ena elda tauna ta, Francisco, ia gwau: “Inai be gaukara do ia hanamoa dalana badana ta. Ai ese unai gaukara ai ura henia bada. Ai dekenai lalokau ia noho. To ai be orea ena gaukara daladia momo ai diba lasi. Namona be diba taudia ese ai idia hadibaia edena bamona ai karaia totona. Hari, ai moale bada badina misinari taudia be ai danu idia noho.”

Misinari taudia idia moale edia tadikaka idia hesiai henia totona. Hans be lagani 20 Brazil dekenai hesiai gaukara ia karaia, bona vanegai Mozambique dekenai idia siaia, bona ia gwau: “Mozambique dekenai ai gaukara be namo herea! Mamina ai abia hutuma momo be iseda orea dekenai do idia vareai. Gaukara bada ia do noho. Maputo dekenai ma misinari 10 eiava 20 ese ai idia durua be namo.”

Mozambique dekenai, tiokratik gaukara ia bada haraga dainai, Iesu ena hereva ita laloa, ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mataio 9:​37, 38) Ai laloa Mozambique dekenai Iehova ese iena hesiai taudia edia noinoi, unai bamona, do ia haere henia.

Mozambique ena atai laurina kahana ai Iehova ena Witness taudia tausen momo be lagani 12 eiava ma haida lalonai dibura gabudia ai idia noho. Idia haida be vanegai Maputo dekenai idia giroa lou neganai, idia dekenai ia noho gauna be edia tauanina dekenai idia hahedokilaia dabua sibona. Idia dekenai ia bada gauna be abidadama! Kahirakahira ai idia noho tanodia dekenai edia Witness tadikakadia ese aniani bada bona dabua momo idia siaia lao dainai mauri dala matamatana lalonai idia vareai.

[Footnotes]

[Picture on page 23]

Saturday daba iboudiai kongregesen taudia momo idia lao Keristen haroro gaukara idia karaia totona

[Pictures on page 24]

Lagani 5 merona Jaimito oi itaia. Ia be dibura kampa dekenai ia vara. Hari inai negai, Jaimito ena tama sina be Maputo dekenai idia giroa lou dainai idia moale. Wiki ta ta ibounai, Jaimito ena tamana, Francisco, ese ruma bese ibounai ia haboua edia Bible stadi idia karaia totona. Tama sina ruaosi be nega bada idia henia edia natudia idia haroro namonamo totona. Jaimito ia moale maketi badana dekenai buka ia henia totona

[Picture on page 25]

Kongregesen taudia edia Kingdom Hall be lasi, to unai ese gaukara ia bada noho dalana ia koua lasi. Nega momo, hebou dekenai idia mai taudia edia namba ese pablisa edia namba be nega rua amo ia hanaia