Moale Karadia—Edia Namo Oi Moalelaia, Edia Dika Oi Dadaraia
“Tau ta ena dala namo herea be inai: Ia aniani, ia inuinu bona iena gaukara ia moalelaia.”—KOHELETE 2:24.
1. Moale karadia dekenai Iehova ese ena taunimanima be edena dala idauidau amo ia durudia?
IEHOVA ese iena hesiai taudia ia hakaudia dainai hahenamo momo idia davaria. Moale karana dekenai unai ia hedinarai goevagoeva. Iena hakaua herevana ese Keristen taudia ia durudia lalohadai maorona moale karana dekenai idia abia totona. Tomadiho orea haida ese edia taunimanima edia dabua bona kara dekenai taravatu momo idia atoa, idia laloa moale karadia kahirakahira iboudiai be idia dika. Bona ma taunimanima haida, ena be Iehova ena taravatu bona ia gwauraia dala maorodia idia noho, to idia hamakohidia, bona unai moale karadia idia do tahua noho.—Roma 1:24-27; 13:13, 14; Efeso 4:17-19.
2. Idau negai, dahaka ese Dirava ena lalohadai moale karana dekenai ia hahedinaraia?
2 To, Dirava ena taunimanima be edena bamona? Taunimanima momo ese Bible idia stadilaia hamatamaia neganai, Dirava ese taunimanima ia havaraia neganai, idia lalodiai moale ura henia karana ia atoa ena sivarai idia hoalaia. Iseda tamana bona sinana ginigunadia dekenai gaukara ia henidia—to unai gaukara be mai edia kara dika taudia momo idia hesikulaia gaukara dikana bamona lasi. (Genese 1:28-30) Namona be tanobada paradaisona lalonai idia noho taudia ese idia moalelaia diba karadia idauidau oi lalodia. Mani oi laloa, uda sisiadia raraia karana idia moalelaia bada bona dika ta idia davaria lasi, bona edia mauri ena dina ta ta iboudiai idia manau animal idauidau idia raraia diba danu! Bona edia aniani be namo herea momokani, badina “toana namo au ibounai ia havaraia bona aniani idia atoa au danu”!—Genese 2:9; Kohelete 2:24.
3-5. (a) Moale karadia ita karaia ena badina be dahaka be namo? (b) Dahaka dainai ita diba Dirava ese Israel taudia ia koudia lasi moale karadia idia karaia totona?
3 Unai kara ita gwauraidia moale karadia be maoro, badina Paradaiso lalonai idia karaia karadia edia badina be hari inai negai idia idau lasi: ena badina be taunimanima ia hamoalea bona ia hagoadaia kara haida (gaukara haida unai) do idia karaia totona. Moale karana ta ese unai ia havaraia neganai, ia be tauanina durua gauna. Unai ena anina be ena be Paradaiso dekenai ita do noho lasi, to tomadiho momokani taudia be nega idia atoa diba moale karadia idia karaia totona, a? Oibe. Insight on the Scriptures bukana be idau negai Iehova ena taunimanima edia moale karana dekenai inai bamona ia hereva, ia gwau:
4 “Bible lalonai Israel taudia idia karaia moale karadia idia gwauraidia momo lasi. To, ia hahedinaraia unai moale karadia be edia tomadiho ena kara goeva dekenai idia hegeregere neganai, idia karaia be maoro bona idia ura henia be namo. Edia moale kara badadia be miusik gadaralaia, ane abia, mavaru, herevahereva, bona gadara haida danu. Hehuni hereva gwauraia edia anina idia tahua totona bona henanadai aukadia henia karana idia ura henia bada.—Hhem 14:12.”—Volume 1, rau 102.
5 Mai kwalimu danu David be tuari amo ia giroa lou neganai, Heberu hahine ese edia gita bona edia tareko (tambourine) idia gaukaralaidia edia moale karana (Heberu, sa·chaqʹ) lalonai. (1 Samuel 18:6, 7) Unai Heberu hereva ena anina be “kiri,” bona Bible haida dekenai idia gwau unai hahine be “moale havaraia hahinedia.” (Byington, Rotherham, The New English Bible) Maua helagana idia huaia lao neganai, “David bona Israel besena ibounai idia moale bada herea mai goada ibounai danu, Iehova vairanai, mai anedia bona hatai-hatai gaudia idauidau bona tareko bona bota-bota auridia idauidau regedia danu.” Mikala, David ena adavana, ena lalohadai unai moale karana dekenai ia maoro lasi, ia ura lasi David be unai moale karana dekenai ia vareai. (2 Samuel 6:5, 14-20) Igui hesiai taudia be Babulono amo do idia giroa lou neganai unai bamona moale karadia do idia karaia Dirava ese ia perovetalaia.—Ieremia 30:18, 19; 31:4; Salamo 126:2 itaia danu.
6. Keristen Greek Revarevadia ese edena bamona ita idia durua lalohadai maorona moale karadia dekenai ita abia totona?
6 Namona be ita danu be moale karadia ita laloa namonamo. Hegeregere, ita diba Iesu be moale karadia ia dadaraia eiava lasi, a? Ia be nega ia atoa aniani amo ena tauanina ia hamoalea totona, hegeregere Levi ia karaia “aria badana” dekenai ia lao. Bona ia aniani bona ia inuinu dainai sibodia edia kara maoromaoro idia laloa hekokoroku taudia idia maumauraia neganai, Iesu ese edia lalohadai bona kara ia dadaraia. (Luka 5:29-31; 7:33-36) Danu, inai oi laloa, headava ta dekenai ia lao bona kara ta ia karaia moale karana durua totona. (Ioane 2:1-10) Iesu ena tadina dailaina Iuda ia gwau Keristen taudia be ‘lalokau ariadia’ idia karaia, reana unai ena anina be ogogami taudia be idia lao diba aniani bona hebamo namo karana idia moalelaia totona.—Iuda 12.
Moale Karana Ena Nega bona Gabu Korikori
7. Dirava ena Hereva ese edena bamona ita ia hagoadaia moale karana ita laloa namonamo totona?
7 Kohelete 10:19 ese inai hereva namona ia gwauraia, ia gwau: ‘Aniani be kiri ia havaraia gauna, bona vine ranuna ese taunimanima edia mauri ia hamoalea.’ Unai siri ese ia hahedinaraia moale karana be ia kerere lasi eiava ia dika lasi, ani? To, unai buka tamona ma ia gwau: “Gau iboudiai be mai edia nega korikori, . . . taitai be mai ena nega bona kiri be mai ena nega; lalohisihisi be mai ena nega bona mavaru be mai ena nega.” (Kohelete 3:1, 4) Oibe, ena be Bible ese moale kara namodia ia gwauraia dika lasi, to ita ia sisiba henia ita laloa namonamo totona. Unai sisiba haida idia gwau namona be moale karana be nega korikori dekenai ita karaia bona ita karaia badabada lasi. Bona moale karana totona taunimanima momo idia hebou neganai ita ia hadibaia dahaka dika be nega momo idia vara diba.—2 Timoteo 3:4.
8, 9. Ita noholaia negana dainai bona Dirava ese ita ia henia gaukarana dainai, namona be iseda lalohadai moale karadia dekenai be dahaka?
8 Ita kikilaia vadaeni, Iuda taudia be Babulono amo idia giroa lou neganai, ena be edia gaukara be ia bada, to moale karadia idia karaia danu. To, guna Ieremia ia gwau ‘ia be edia hevaseha bona moale orea edia bogaraginai ia helai lasi.’ (Ieremia 15:17) Dirava ese ia dekenai gaukara ta ia henia do ia vara hahemaoro dikana ena sivarai do ia harorolaia totona, unai dainai unai be moale karana ia karaia negana lasi.
9 Hari inai nega lalonai, Keristen taudia ese gaukara idia abia Dirava ia gwauraia helaro namona bona iena hahemaoro herevana Satana ena tanobada dekenai idia harorolaia totona. (Isaia 61:1-3; Kara 17:30, 31) Unai dainai ia hedinarai goevagoeva namo lasi iseda mauri lalonai moale karadia ita laloa momo. Haheitalai ta be inai: Damena sisina eiava ma gau namona ta be aniani dekenai ita atoa ena mamina hanamoa totona. To unai gaudia do oi bubua badabada bena aniani ena mamina oi hadikaia, a? Lasi momokani. Iesu ena hereva Ioane 4:34 bona Mataio 6:33 dekenai hegeregerena, namona be ita laloa bada gauna—iseda aniani—be Dirava ena ura ita karaia. Unai dainai moale karana be damena bamona. Namona be iseda tauanina ia hagoadaia bona ia durua, namo lasi tauanina ia hadikaia bona ena mamina be ia namo lasi.
10. Dahaka dainai ita ta ta ibounai be ita karaia moale karadia ena nega ena bada do ita laloa namonamo be namo?
10 Oi naria bona inai oi laloa: Reana, taunimanima kahirakahira iboudiai do idia gwau moale karana dekenai nega bada idia henia lasi bona idia laloa bada lasi, ani? Bema idia lalo-parara idia karaia badabada, edia kara do idia haidaua. Unai dainai, namona be ita ta ta iboudiai be iseda kara do ita tahua namonamo; iseda mauri lalonai moale karana ena bada be dahaka? Reana sisina sisina ita habadaia ela bona ita laloa bada, a? Haheitalai ta be inai: Ruma dekenai ita ginidae neganai, maoromaoro ita lao televisen ita kehoa totona, a? Wiki ta ta iboudiai nega bada ita atoa moale kara haida ita karaia totona, hegeregere Friday bona Saturday hanuaboi dekenai? Do ita lalohisihisi bema unai nega ia ginidae bona ruma dekenai ita noho, to moale karana ta ita hegaegaelaia lasi, a? Ma henanadai rua be inai: Moale karana ta dekenai ita lao neganai, reana ita noho daudau dainai eiava iseda ruma dekenai giroa totona nega bada ia ania dainai, ita davaria murina dinana dekenai iseda tauanina idia hesiku bada dainai, reana Keristen hesiai gaukarana ita karaia diba lasi eiava iseda moni gaukara gabuna dekenai biaguna ena gaukara ita karaia namonamo diba lasi, a? Bema nega haida, eiava nega momo, iseda moale karana dainai unai bamona ia vara, oi laloa unai be moale karana maorona bona ita lalohadalaia namonamo vadaeni karana, a?—Hereva Lada-isidia 26:17-19 itaia danu.
11. Dahaka dainai ita abia hidi moale karadia ita lalohadailaia namonamo be maoro?
11 Danu, namona be ita abia hidi moale karadia ita laloa. Ena be ita be Dirava ena hesiai taudia, to unai dainai ita gwau lasi iseda moale karadia be nega iboudiai idia namo. Namona be aposetolo Petro ena toretore herevana horoa Keristen taudia dekenai oi laloa, ia gwau: “Gunaguna umui be Dirava diba lasi taudia hegeregerena umui noho. Emui kara gunadia be inai: matabodaga, sihari kava, kekero, lebulebu, uaina umui inua momo, bona kaivakuku dikadia umui tomadiho henia.” (1 Petero 4:3) Unai taudia dekenai ia be mai ena badu danu ena imana ia duduia henidia lasi, ia gwau lasi iena tadikaka be tanobada taudia edia kara idia tohotohoa. To, (unai negai bona hari danu) gau badana be Keristen taudia idia gima noho, badina haraga herea moale karadia dikadia ese ita idia hakererea diba.—1 Petero 1:2; 2:1; 4:7; 2 Petero 2:13.
Edia Dika Dainai Ita Gima Noho
12. Petero Ginigunana 4:3 ese ia hahedinaraia ita idia hakererea diba karadia be dahaka?
12 Unai dika karadia haida be dahaka ita gima noho totona? Petero ia gwau ‘uaina inua momo bona lebulebu’ karadia. Germany tauna ta ia gwau unai siri dekenai idia gaukaralaia Greek herevadia edia “anina badana be aria dekenai idia inuinu hebou karana.” Switzerland profesa ta ena toretore lalonai ia gwau unai nega lalonai unai bamona kara be ia bada, ia gwau: “Unai sivarai ese idia hegaegaelaia hebou karadia eiava kalabu ia gwauraia, bona unai siri dekenai unuseniai idia karaia hemarai karadia ia gwauraia hedinarai.”
13. Pati dekenai kekero havaraia diba muramura gaukaralaia karana be edena bamona haida ia hakereredia? (Isaia 5:11, 12)
13 Pati badadia dekenai kekero havaraia muramurana ia noho dainai, taunimanima momo ia hakereredia. Bible ese kekero muramurana sisina inua karana ia taravatulaia lasi. Unai hamomokania totona inai oi laloa, Iesu ese Kana dekenai headava ariana lalonai ia ese uaina ia karaia. Reana unuseniai idia inua kekero lasi, badina Iesu ese Dirava ena sisiba ia abia dae, unai sisiba be uaina idia inua momo taudia ida do ia noho lasi. (Hereva Lada-isidia 23:20, 21) To inai oi laloa: Unai aria ia naria tauna ia gwau aria ma haida dekenai uaina namona idia atoa diho guna ‘bona taunimanima idia kekero murinai, uaina sisina ia namo idia atoa diho.’ (Ioane 2:10) Unai dainai, nega momo headava ariana dekenai Iuda taudia idia inuinu kekero, badina uaina momo ia noho iboudiai idia inua totona.
14. Pati ia hegaegaelaia bona ia biagua Keristen tauna be dahaka dahaka ia karaia diba kekero havaraia diba muramurana ese ta ia hakererea lasi totona?
14 Unai ia vara dainai, pati idia karaia neganai, Keristen taudia haida idia laloa bema idia boiridia taudia edia kara idia biagua diba, idia be uaina, bia, bona unai bamona gaudia ma haida do idia gaukaralaia be namo. Bema pati be ia bada herea bona biaguna ese iboudiai edia kara ia sekea diba lasi, hegeregere ita kikilaia Iuda headava ariadia bamona, kekero muramura ia bada neganai haida ia hakereredia diba. Reana unai pati dekenai ia lao tauna ta be guna inuinu kekero tauna bona ia hekwarahi bada unai kara ia rakatania totona. Mani oi laloa, bema kekero muramura bada herea ia noho bona ta ese ia biagua lasi, unai tau ena lalona do ia veria ia inuinu bada totona, bena ia kekero neganai pati ena mamina do ia hadikaia. Germany lalonai, kongregesen naria tauna ta be tamana ta danu, bona ia gwau tadikaka bona taihu idia hebou neganai moale karana ta idia karaia totona, iena ruma bese ese unai hebamo karana amo namo idia davaria. To, ma ia gwau, bema unuseniai bia idia gaukaralaia momo hekwakwanai do ia vara diba.
15. Moale karadia karaia neganai, dahaka ita karaia taunimanima naridia namonamo totona?
15 Kana dekenai headava ariana be mai ena “biaguna.” (Ioane 2:8) Ita gwau lasi unai ena anina be ruma bese ta be haida idia boiria neganai idia aniani hebou eiava idia hebamo totona, biaguna ta do idia abia hidi naridia totona. Unai be ruma bese ena tamana ena maduna. To, herevana ruma bese rua sibona idia hebou eiava taunimanima orea badana idia hebou, namona be ta ia noho unai hebou karana ia naria totona. Tama sina momo ese unai idia sekea edia natuna mero eiava kekeni be moale karana dekenai idia boiria mai neganai. Unai pati ia karaia tauna idia hereva henia, idia ura diba daika ese unai moale karana do ia naria, bona do ia noho ela bona ia doko. Keristen tama sina momo ese edia sediual idia haidaua unai moale karana dekenai buruka taudia bona memero kekeni danu idia hebamo totona.
16. Namona be iseda lalohadai pati ena bada dekenai be dahaka?
16 Watch Tower Society ena Canada branch amo inai revareva ai davaria, ia gwau: “Elda taudia haida idia laloa sisiba ai abia vadaeni moale karana ena orea do ia bada lasi totona, unai dainai bema headava ariana dekenai momo idia boiria idia be unai sisiba idia dadaraia. Idia gwau sisiba ita abia ita biagua diba pati maragi sibona ita karaia totona, bona ia kerere bema headava ariana dekenai taunimanima 200 eiava 300 idia boiridia mai.”a Namo lasi ita gwau ita laloa taunimanima hida be pati dekenai idia mai diba, to herevana unai pati ia maragi eiava ia bada, gau badana be naria tauna ia noho gau ibounai idia heau namonamo totona. Kana dekenai headava ariana dekenai Iesu ese uaina sisina bada ia karaia dainai, ia hahedinaraia taunimanima momo idia noho, to biaguna ese idia ia naria namonamo. Unai nega lalonai aria ma haida dekenai unai bamona ia vara lasi; reana idia bada dainai edia biaguna ese idia ia naria namonamo diba lasi. Taunimanima momo be moale totona idia hebou neganai, naria dalana be ia auka danu, badina inuinu momo manoka taudia be mai edia dala edia ura idia karaia totona. Pati neganai bema naria tauna be lasi, unai bamona manoka taudia be kerere havaraia karadia idia havaraia diba.—1 Korinto 10:6-8.
17. Moale karadia hegaegaelaia neganai, dahaka ita karaia bena unai ese ia hahedinaraia ita be Keristen ena lalohadai ita abia?
17 Pati ia heau namonamo totona gau badana be idia palani bona idia hegaegaelaia namonamo. Ita gwau lasi kara ta ita karaia unai pati ia idau totona eiava taunimanima do idia laloa noho totona, hegeregere, mavaru pati dekenai dabua idauna idia karaia eiava idau negai taudia edia dabua toana idia karaia, tanobada taudia edia pati bamona. Oi laloa Gwauhamata Tanona lalonai abidadama Israel taudia ese pati idia hegaegaelaia bena idia boiridia taudia idia hamaorodia Aigupito eiava ma tano ta edia kaivakuku tomadiho henia taudia edia dabua bamona idia karaia, a? Idia ese hegahusi mavaru do idia hegaegaelaia, eiava unai nega lalonai kaivakuku tomadiho henia taudia idia ura henia bada miusik ena rege bada do idia gadaralaia, a? Sinai Ororo dekenai, idia ese reana Aigupito taudia idia ura henia bada miusik bona mavaru idia karaia dainai kerere ia vara. Ita diba vadaeni Dirava bona iena hesiai lo tauna Mose ese unai moale karana idia ura henia lasi momokani. (Esodo 32:5, 6, 17-19) Unai dainai, namona be pati ena biaguna eiava naria tauna do ia diba ane do idia abia eiava do idia mavaru; bema oibe, namona be unai kara be Keristen ena kara goeva do ia hadikaia lasi.—2 Korinto 6:3.
18, 19. Iesu be headava ariana dekenai idia boiria karana amo dahaka ita diba, bona dahaka ita karaia unai kara ita tohotohoa totona?
18 Hereva dokona be inai, namona be ita laloatao ‘Iesu bona iena hahediba taudia be unai headava ariana dekenai idia boiridia mai.’ (Ioane 2:2) Momokani, Keristen tauna ta eiava ruma bese ta be ma haida do idia vadivadi henidia idia moale bona hagoadaia heheni totona. To, pati hegaegaelaia neganai, ia hedinarai goevagoeva, namona be oi diba daika do idia mai, unai be heduru bada hekwakwanai koua totona. Elda ta, Tennessee, U.S.A. dekenai ese ena natudia memero bona kekeni be idia tubu daekau neganai idia be nega ibounai hesiai gaukarana idia karaia. Tau ta ese ia bona ena hahine pati totona ia boiridia mai neganai, eiava edia natudia ia boiridia mai neganai, unai hereva idia abia dae lasi ela bona unai pati biaguna idia hereva henia bona idia diba pati biaguna ia diba daidia do idia mai. Unai kara amo iena ruma bese taudia idia naridia idia kerere lasi totona, badina moale kara totona idia hebou neganai bona idia gwau iboudiai do idia mai diba, hegeregere aniani hebou totona, pikiniki totona, eiava bolo gadara ena eksasais totona, haida ese kerere idia davaria.
19 Iesu ia gwau namo lasi pati karaia neganai varavara taudia, nega daudau turadia, eiava uru tamona eiava taga hegeregerena taudia sibona ita boiridia mai. (Luka 14:12-14; Iobu 31:16-19; Kara 20:7-9 itaia danu.) Bema do oi boiridia taudia do oi laloa namonamo neganai, namona be edia lagani idauidau bona edia taga idauidau Keristen taudia oi boiridia mai. (Roma 12:13; Heberu 13:2) Reana idia haida be lauma dalanai idia manoka eiava idia be kamonai matamata taudia, to lo Keristen taudia idia bamodia neganai namo do idia davaria diba.—Hereva Lada-isidia 27:17.
Moale Karana be Mai Ena Gabu
20, 21. Dahaka dainai iseda mauri lalonai moale karadia ita karaia be namo?
20 Ita be Dirava gari henia taudia dainai, namona be iseda moale karadia ita laloa namonamo, badina ita ura idia maoro bona ita ura lasi idia dekenai nega bada ita negea. (Efeso 2:1-4; 5:15-20) Lauma helaga amo Kohelete ia torea tauna ena lalohadai be unai bamona, ia gwau: “Moale lau hanamoa, badina be taunimanima edia gau namona tamona, dina henunai, be do idia aniani, do idia inuinu bona do idia moale; badina unai ese edia hekwarahi ai do ia bamodia, edia mauri dinadia lalodiai, dina henunai Dirava ese ia henidia unai.” (Kohelete 8:15) Unai bamona moale karadia ese tauanina do idia hagoadaia bona idia be heduru namona hari inai negai idia vara hekwakwanai bona lalo-hekwarahi gaudia hanaidia totona.
21 Haheitalai ta be inai: Austria pioneer hahine ta ese ena turana ia tore henia. Ia gwau: “Vanegai ai lao bona pikiniki namona ai karaia. Taunimanima 50 bamona ai lao gohu maragina ta Ferlach taoni kahirakahira dekenai. Tadikaka B———— ese ai ia gunalaia, ena motuka dekenai ia abia lao kohudia be auri toi, pani atoa totona, idia lokua diba helai gaudia, patapata, bona bolo gadara (table-tennis) patana danu. Ai ibounai ai moale bada herea. Taihu ta be ena accordion ia mailaia, unai dainai Basileia ane momo ai anelaidia. Tadikaka bona taihu matamatadia bona burukadia ese hebamo karana idia moalelaia.” Tau ta ese unai moale karana ia hegaegaelaia namonamo dainai mai moale danu taihu ese ia laloatao, bona kerere ia vara lasi, hegeregere inuinu kerere eiava hevaseha dikadia idia vara lasi.—Iakobo 3:17, 18.
22. Ena be moale karadia ita karaia diba, to namona be ita ta ta ibounai be dahaka sisiba herevana ita laloa noho be namo?
22 Paulo ese ita ia hagoadaia ita naria namonamo bona tauanina ena ura dikadia do ita karaia lasi, unai anina be ita idia tohoa diba karadia do ita laloa hegaegaelaidia lasi. (Roma 13:11-14) Unai be pati hegaegaelaia karana danu. Unai sisiba ita badinaia neganai, hekwakwanai ita dadaraia diba, ita be haida bamona lasi, idia be lauma dalanai idia mutu. (Luka 21:34-36; 1 Timoteo 1:19) To, namona be mai aonega danu moale kara namodia ita abia hidi, unai ese ita ia durua iseda turana karana Dirava dekenai ia goada noho totona. Unai neganai namo do ita davaria badina moale kara namodia be Dirava ena harihari gauna ta.—Kohelete 5:18.
[Footnotes]
a Gima Kohorona magasin, January 1985 gauna, ena rau 16 ese headava bona headava ena aria dekenai sisiba namona ia henia. Namona be do idia headava gwauraia tauna bona kekeni, bona idia durudia taudia danu, ese headava ena palani idia do karaia lasi neganai, unai hereva idia riviulaia.
Dahaka Ita Diba?
◻ Bible dekenai dahaka hereva namodia moale karana dekenai ita davaria diba?
◻ Dahaka dainai ita karaia gwauraia moale karadia edia nega bona unai moale karadia edia toana ita lalohadailaia namonamo be namo?
◻ Moale karana ia hegaegaelaia Keristen biaguna ese dahaka dahaka ia karaia diba hekwakwanai ia vara lasi totona?
◻ Ita karaia moale karana ia maoro bona ita karaia namonamo neganai, ia be edena dala amo Keristen taudia ia durudia diba?
[Picture on page 18]
Moale karana ia hegaegaelaia biaguna eiava naria tauna ena maduna be ia boiridia mai taudia ese kerere ta idia davaria lasi