Davana Oi Laoa Vadaeni, A?

“EDENA bamona! Momokani unai gaukara namo hereana do oi abia lasi, a?” Gaukara biagua hahinena be unai hereva dainai ia hoa. Iena gaukara hahinena ta, iena diba bada bona kara namona dainai taunimanima ese idia matauraia bada hahinena unai, ia gwau ia ura lasi lagani rua dekenai ma tano ta dekenai edukeisini ia abia bona kampani ese davana do idia karaia. Badina be dahaka unai bamona ia hereva?

Unai hahine ia gwau, bema unai bamona do ia karaia ia be lagani rua lalonai iena adavana bona natuna rua amo do ia parara. Idia be ia danu do idia noho lasi dainai do ia laloa momo. To ia be mai ena tau bona mai ena natuna dainai gau badana be Dirava ese ia henia maduna do ia huaia. Ena lalona ena hemami do ia hisihisi bona lauma dalana dekenai do ia dika, unai be hegeregere davana bada do ia henia bamona. Unai dainai, ia laloa guna murinai, ia gwau do ia karaia lasi.

Bema unai ia vara oi dekenai dahaka oi karaia? Momokani, taunimanima ibounai be unai Keristen hahine bamona do idia laloa lasi. Haida be iena gaukara turadia bamona, idia laloa ia be dala namona ia koua iena gaukara do ia hanamoa totona. Ma haida idia gwau ia be ena ruma besena ena gabeai maurina ia laloa lasi, badina idia gwau lagani rua be do idia lao ore haraga. To, iena lalona ia hadaia haraga lasi eiava iena lalona ena hemami dainai lalona ia hadaia kava lasi. Ia lalohadai namonamo bona gabeai negana totona badina namodia dainai ia karaia. Unai be dahaka?

Lalohadai Namonamo Ia Hereaia Gauna

Iena parabole herevana ta dekenai, tanobada ena aonega bada herea tauna, Iesu Keriso, be ita ia hakaua herevana ia henia. Iesu ia gwau: “Bema tau ta ia ura kohoro ruma do ia haginia, ia be guna do ia helai diho bona ena davana do ia laloa, bema ia be ruma do ia karaia haorea diba, o lasi? Ia be ruma ena badina bema ia hamatamaia, to bema ia haorea lasi, vadaeni do idia itaia taudia ibounai ese do idia kirikirilaia, do idia gwau, ‘Inai tau ese kohoro ruma haginia totona ia hamatamaia, to ia goada lasi, ia haorea lasi.’ ”​—Luka 14:​28-30.

Taunimanima iboudiai idia laloa aonega dalana be gau badana ta oi do karaia lasi neganai namona be unai gau ena davana karaia dalana oi laloa guna. Hegeregere, bema tau ta ia ura ruma ta ia hoia, do ia lao haraga gwauhamata pepana ia sainia guna, to davana ia henanadailaia lasi bona ia tahua lasi ia hegeregere davana ia karaia totona, a? Unai bamona ia karaia neganai taunimanima do idia laloa ia kava. Oibe, lalohadai namonamo dalana be gau ta oi do karaia lasi neganai ena davana oi laloa guna.

Unai parabole dekenai Iesu ena hereva ena anina be dahaka? Unai parabole ia do herevalaia hamatamaia lasi neganai, ia gwau: “Ena satauro bema ia huaia lasi bona lauegu murina dekenai bema ia raka lasi tauna be lauegu diba tahua tauna lasi.” (Luka 14:27) Unai dainai, unai karoa ena siri ma haida ese idia hahedinaraia Iesu be dina ta ta ibounai lalonai, hanaihanai ita karaia gaukaradia totona lalohadai namonamo dalana ia gwauraia lasi. Lasi, ia be iena hahediba tauna ai ita lao totona ena hekwarahi ia herevalaia.

Iena parabole herevana amo, Iesu ese ia hahedinaraia iena hahediba tauna ai ita lao totona iseda kara do ita haidaua bona iseda ura gaudia haida do ita dadaraia. Badina be dahaka? Badina hari inai nega lalonai taunimanima be kohu idia tahua momo bona sibodia edia ura gaudia idia laloa bada. Taunimanima momo be sibodia edia tauanina moalelaia karadia idia laloa guna, idia be lauma gaudia eiava edia turana karana Dirava dekenai idia laloa bada lasi eiava idia laloa lasi. (2 Timoteo 3:​1-4) To, unai lalohadai eiava ura be Iesu Keriso ese ia hahedinaraia karana amo ia idau. Ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia henia, taunimanima ibounai hamauria totona.” Ia be tauanina gaudia lasi, to lauma gaudia ia laloa bada, bona ia gwau: “Lauma be mauri ia havaraia, tauanina be namo ta ia havaraia lasi.”​—Mataio 20:28; Ioane 6:63.

Unai dainai, iena hahediba taudia ai idia lao gwauraia taudia dekenai sisiba ia henia neganai idia be davana idia hegaegaelaia guna, Iesu be tanobada davana lasi, to lauma gaudia edia davana ia herevalaia. Idia dekenai dahaka be anina bada gaudia, tanobada ese ia henia toho tauanina namo gaudia eiava iena hahediba taudia ai idia lao neganai lauma gaudia namodia? Unai dainai unai parabole bona ma ta danu ia gwauraia murinai, iena hereva dokona be inai, ia gwau: “Unai dainai, umui be emui gau ibounai bema umui rakatania lasi, umui be lauegu diba tahua taudia lasi.” (Luka 14:33) Hahediba tauna ai ia lao gwauraia tauna ia ura unai bamona ia karaia, bona ia hegeregere ia karaia totona, a? Eiava unai be davana badana bona ia karaia diba lasi?

Lalohadai Maorona

Ena be tanobada gaudia haida be namo idia havaraia haraga diba, to lauma gaudia ese namo idia havaraia nega daudau totona bona idia hamoalelaidia daudau diba. Iesu be inai bamona ia laloa, ia gwau: “Inai tanobada dekenai kohu do umui haboua lasi, iniseniai manumanu ese dabua idia ania ore, bona raraka ese auri ia hadikaia, iniseniai danu henaoa taudia ese ruma idia makohia bona gau idia henaoa. To umui emui kohu be guba dekenai do umui haboua, unuseniai manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi.” (Mataio 6:​19, 20) Iseda nega lalonai, moni ena hoihoi siahuna ia manoka, bisinesi hoihoi dalana ia dika, banika edia heau dalana ia dika, bona unai bamona gaudia dainai, tanobada gaudia dekenai sibona idia tabekau henia taudia edia mauri ia dika haraga. To aposetolo Paulo ese ita ia hagoadaia, ia gwau namona be “matana idia itaia gaudia [ita] laloa lasi, to matana idia itaia lasi gaudia [ita] laloa.” (2 Korinto 4:18) To edena dala ai unai bamona ita laloa diba?

Iseda Haheitalai Tauna, Iesu Keriso, ita tohotohoa neganai unai bamona ita karaia diba. Tanobada ai ia noho neganai, ia be moale gaudia iboudiai ia dadaraia lasi, badina sivarai ia gwau nega haida headava aria bona moale ariadia dekenai ia lao. To, ia hedinarai momokani ia be lauma gaudia ia lalodia bada. Iena Tamana ena ura ia hagugurua totona, ia ese ena mauri durua gaudia haida ia dadaraia danu. Nega ta ia gwau: “Uda sisia be mai edia nadi matuna, bona atai manu be mai edia ruma, to Taunimanima ena Natuna be ena kwarana atoa gabuna lasi.” (Luka 9:58) Ia laloa Tamana ena ura ia karaia be gau badana bona moale ia havaraia, unai dainai mai ena kudou ibounai ida ia gwau diba: “Egu aniani be inai, lau ia siaia Diravana ena ura do lau karaia, iena gaukara do lau karaia haorea momokani.”​—Ioane 4:34.

Iesu ese Satana ena hedibagani ia dadaraia dalana amo ia hahedinaraia ia laloa bada gaudia be dahaka. Diabolo ese Iesu ia dibagania Dirava ese ia henia siahuna ia gaukaralaia sibona ia hanamoa totona, sibona ena tauanina ia hamoalea totona, bona tanobada dekenai ladana badana ia abia bona taunimanima ese idia ura henia totona. Iesu ia diba reana unai gau namodia ia abia dalana tamona be davana bada ia henia​—Dirava ese do ia moale henia karana ia haboioa​—unai davana ia ura lasi ia henia, badina gau ibounai amo iena turana karana ena Tamana dekenai be ia laloa bada gauna. Unai dainai ia ese Satana ena hedibagani ia dadaraia haraga, ia daradara lasi.​—Mataio 4:​1-10.

Ita be Keriso murinai ita raka taudia dainai, ita ura iseda Biaguna ia laloa bada gaudia ita laloa bada danu. Satana ese hari tanobadana ia biagua; gau momo be reana ita dekenai namo idia havaraia diba, to unai ese iseda turana karana Dirava dekenai idia hadikaia diba. Gau haida, hegeregere moni gaukara dekenai haida oi hanaidia karana, oiemu dagi habadaia totona edukeisini badana oi tahua, orea lasi tauna o hahine oi bamoa do umui headava totona, eiava idia maoro momokani lasi bisinesi karadia dainai emu abidadama ia boio diba bona Iehova be oi dekenai ia moale noho karana ia ore. Namona be unai bamona hedibagani ita abia neganai ena anina ena dokona ita laloa namonamo guna.

Aonega Momokanina ese Oi Do Ia Naria

Lagani haida gunanai, Asia ena hanua badana ta dekenai, Keristen tau matamatana ta dekenai, dala ia kehoa ma tano ta dekenai ia lao iena edukeisini ia habadaia totona. Ena be ia lao vadaeni sikuli namona ta dekenai bona iena moni gaukara ia namo, to ia laloa unai be hegeregere lasi; ia ura iena mauri ma ia hanamoa noho. Iena Keristen turadia be ita herevalaia vadaeni Bible siridia amo idia hereva henia iena lalohadai ia haidaua totona, to iena lalohadai hegeregerena ia karaia noho. Ena be iena abidadama ia dogoatao noho ia hamatamaia neganai, to sisina sisina Bible ia moalelaia karana dekenai ia manoka ia lao, bona daradara ia havaraia. Lagani tamona bamona lalonai, iena abidadama ibounai ia boio bona ia gwau Dirava ia abidadama henia lasi. Momokani, edukeisini ia habadaia dainai moale sisina ia davaria. To nega sisina lalonai dagi badana ia moalelaia totona davana bada ia henia​—iena abidadama ia dika bona mauri hanaihanai ia haboioa diba!​—1 Timoteo 1:19.

To, Dirava dekenai edia turana karana ia hadikaia diba gaudia idia koua taudia be Iehova ena amo hahenamo bada idia abia.

Hegeregere, sivarai ta be atai dekenai ai gwauraia hanuana dekenai tau matamatana ma ta; ia ese ruma hahairaia bisinesi ia karaia. Iehova ena Witness taudia ida Bible stadi ia hamatamaia hua haida sibona murinai hedibagani ta ia abia​—idia ura ia be ruma ta ia hanamoa bona K29,000 do ia abia. To, unai ia karaia totona ia be gavamani edia taravatu haida ruma haginia dalana dekenai do ia utua, bona maoro lasi dalana ai do ia karaia. Ia diba Keristen taudia be gavamani ena taravatu idia badinaia be namo dainai, ia diba unai gaukara ia abia neganai Dirava be ia dekenai do ia moale lasi. (Roma 13:​1, 2) Unai gau iboudiai ia laloa namonamo murinai, ia gwau unai gaukara do ia abia lasi. Dahaka ia vara? Unai abidadama karana dainai lauma dalana dekenai ia tubu haraga. Lagani tamona lalonai, ia goada ia lao ela bona ia gwauhamata bona bapatiso ia abia. Iena bisinesi ia hoia bona unai amo lauma gaudia tahua totona nega ia habadaia diba. Hari, mai moale ida, ia be Iehova ena hesiai gaukara ia karaia goadagoada.

Unai tatau rua ese idia henia davana idia laloa guna. Dahaka dainai idia be dala tamona idia abia hidi lasi? Dirava amo ia mai aonegana! Edena bamona? Aonega ena anina be oi diba gaudia oi gaukaralaia gabeai namo hanaihanai oi abia totona, bona Dirava ena amo oi abia aonegana ena anina be oi diba gaudia be Dirava ena ura hegeregerena oi gaukaralaia. Ena be unai tatau rua be Bible ena Hereva dekenai edia diba ia noho, to idia gaukarlaia daladia be idau. Hereva Lada-isidia bukana ia gwau: “Aonega be oiemu lalona dekenai do ia vareai, bona diba oi abia dainai do oi moale; lalohadai maoromaoro ese oi do ia naria, lalo-parara ese oi do ia gimaia namonamo, oi be kara dika amo ia ruhaia totona.”​—Hereva Lada-isidia 2:​10-12.

Dirava ena Hereva, Bible, be aonega momokanina ena badina, bona dala ta oi abia hidi totona hakaua hereva oi tahua neganai hanaihanai Bible dekenai oi lao diba. Oi sibona emu matana dekenai oi aonega lasi, to inai sisiba oi badinaia, ia gwau: “Iehova oi abidadama henia mai emu kudouna ibounai danu, bona oi sibomu emu aonega dekenai oi tabekau lasi. Oiemu raka dalana ibounai dekenai ia oi laloa, bena ia ese oiemu dala ibounai do ia hamaoromaorodia.” (Hereva Lada-isidia 3:​5, 6) Namona be ita manau bona ita ura ta ese ita ia hadibaia, namo lasi hari inai nega lalonai tanobada ena gabu ibounai dekenai idia karaia bamona ita sibona iseda ura ese ita ia veria momo.

Oibe, ita hadoa hegeregerena do ita gogoa, bona ita abia hidi daladia hegeregerena anina ita abia be maoro. (Galatia 6:​7, 8) Unai dainai gau ta oi do karaia lasi neganai oi laloa namonamo guna ena davana be dahaka. Namo lasi oi laloa unai namo gauna ta ese emu goada lauma dalana dekenai, eiava emu turana karana Iehova Dirava dekenai, ia hadikaia. Aonega totona oi noinoi bona lalohadai maorona bona dala maorona oi abia hidi totona oi noinoi, badina hari oi abia hidi daladia dainai oi mauri eiava oi mase diba​—ela bona hanaihanai!​—Deuteronomi 30:​19, 20 itaia danu.

[Pictures on page 28]

Iena mauri lalonai lauma gaudia eiava moni gaukara do ia laloa bada?