Daidia be Tanobada Ena Diari Idia Gavaia?

“Umui hedinarai tanobada ena diari bamona.”​—FILIPI 2:15, NW.

BAIBEL ia hahedinaraia goevagoeva Iesu be “diari badana,” “tanobada ena diarina.” (Isaia 9:2; Ioane 8:12) To Iesu be tanobada ai ia noho neganai, taunimanima haida mo ese idia gavaia. Momo ese idia dadaraia, bona diari koikoidia, dibura idia loalaia bona hereva koikoidia idia gwauraidia taudia unai, be idia gavadia. Dirava ena Hereva ese unai taudia ia gwauraidia inai bamona, ia gwau: “Unai taudia be aposetolo koikoidia, gaukara koikoi taudia, Keriso ena aposetolo momokani lasi. To unai be hoa gauna lasi. Badina be Satani sibona ese iena kara ia senisia diba, bona ia ese diari aneruna ena kopina ia atoa diba. Unai dainai Satani ena hesiai taudia, bema edia kara idia senisia, bona taunimanima vairanai idia be kara maoromaoro taudia bamona, inai be hoa gauna, a? To dokonai, edia kara hegeregerena davana do idia abia.”​—2 Korinto 11:​13-15.

2. Iesu ia gwau taunimanima kota henidia ena badina be dahaka?

² Unai dainai, ena be diari be namo herea, to haida mo sibodia ese idia ura henia. Iesu ia gwau: “Kota henia ena badina be inai, diari be tanobada dekenai ia mai vadaeni, to taunimanima ese dibura idia ura henia bada, diari be idia ura henia maragi, badina edia kara be ia dika.”​—Ioane 3:​19, 20.

Dibura Idia Ura Taudia

³ Iesu be tanobada ai ia noho neganai danu be unai bamona ia vara oi laloa. Dirava ese Iesu dekenai siahu ia henia, hoa karadia do ia karaia, unai amo do ia hamomokania ia be Mesia. Haheitalai be, Sabati dinana ta ai ia ese matakepulu tauna ta ena matana ia hanamodia, hari tau be ia vara neganai ena matana idia kepulu. Unai be hebogahisi kara namo hereana! Unai tau ese ia moalelaia bada! Ia roharoha diba negana ginigunana be unai! To tomadiho gunalaia taudia edia lalohadai be edena bamona? Ioane 9:16 ia gwau: “Vadaeni Farisea taudia haida [be Iesu idia herevalaia,] idia gwau, ‘Unai tau be Dirava dekena amo ia mai lasi, badina be Sabati dinana ia badinaia lasi.’ ” Edia lalodia idia kerere momokani! Ena be Iesu ese unai matakepulu tauna ena matana be hoa dalanai ia hanamodia vadaeni, to unai tau dainai idia moale lasi, bona ena matana ia hanamodia tauna, Iesu, idia hanamoa lasi, to idia gwauraia dika! Unai bamona idia karaia neganai, idia ese Dirava ena lauma idia hereva dika henia reana; Dirava ese do ia gwauatao lasi kererena idia karaia unai.​—Mataio 12:​31, 32.

3, 4. Iesu ena nega lalonai, tomadiho gunalaia taudia be edena dala amo idia hahedinaraia idia ura lasi diari idia gavaia?

⁴ Gabeai, unai koikoi taudia be guna ia matakepulu tauna dekenai Iesu idia henanadailaia neganai, unai tau ia gwau: “Ia! lau be lau hoa, badina be umui diba lasi ia [Iesu] be edeseni amo ia mai, to ia ese lauegu matana ia kehoa. Ita diba Dirava ese kara dika taudia edia hereva ia kamonai henia lasi, to ia dekenai ia matauraia bona ena ura ia karaia tauna ena hereva be ia kamonai henia. Tanobada ia hamatamaia dekena amo tau ta ese mai matakepulu danu ia vara tauna ta ena matana ia kehoa ena sivarai ta ita do kamonaia lasi. Inai tau [Iesu] be Dirava dekena amo bema ia mai lasi, be ia ese gau ta do ia karaia diba lasi.” Tomadiho gunalaia taudia be dahaka idia karaia? “Idia haere henia, idia gwau, ‘Oi be kara dika lalonai oi vara, to edena bamona ai dekenai oi hadibaia, a?’ Vadaeni idia ese idia lulua murimuri dekenai.” Hebogahisi lasi momokani! Edia kudou be nadi bamona. Unai dainai Iesu ese ia hamaorodia, ena be edia matadia amo idia itaia diba to lauma dalana ai idia matakepulu.​—Ioane 9:​30-41.

5, 6. Keriso ena negai tomadiho gunalaia taudia be dahaka idia karaia bena unai amo idia hahedinaraia dibura idia ura henia?

⁵ Ma nega ta ai ia hedinarai goevagoeva unai tomadiho koikoilaia taudia ese Dirava ena lauma idia kara dika henia; mase amo Iesu ese Lasaro ia hatorea isi lou negana unai. Unai hoa karana dainai hanua taudia momo ese Iesu idia abidadama henia. To tomadiho gunalaia taudia edia kara umui laloa. “Unai dainai, dubu biagudia bona Farisea taudia be kaunsolo taudia idia boiria idia haboua, idia gwau, ‘Edena bamona do ita karaia, badina be unai tau ese toa momo ia karaia? Bema ita dogoatao lasi, taunimanima ibounai ese do idia abidadama henia, vadaeni Roma taudia do idia mai, iseda Dubu Helaga bona iseda bese do idia [abidia oho].’ ” (Ioane 11:​47, 48) Edia dagi bona edia ladana bada idia laloa momo. Idia ura bada Roma taudia do idia hamoaledia; Dirava be herevana. Unai dainai dahaka idia karaia? “Unai dina dekena amo idia ese Iesu alaia mase totona dala idia tahua.”​—Ioane 11:53.

⁶ Unai sibona, a? Lasi. Edia kara ma ta amo idia hahedinaraia dibura idia ura henia bada. “Dubu biagudia idia hereva hebou, Lasaro danu do idia alaia, idia gwau. Badina be Lasaro totona Iuda taudia momo idia raka siri, Iesu dekenai idia abidadama henia.” (Ioane 12:​10, 11) Edia lalohadai be dika rohoroho! Ena be sibodia edia dagi naridia totona unai ibounai idia karaia, to dahaka ia vara? Unai uru ena nega lalonai, lagani 70 C.E. ai, Roma taudia idia mai bona idia tuari henidia; edia dubu helagana bona edia bese sibodia lasi, to edia mauri danu be idia ese idia abidia oho!​—Isaia 5:20; Luka 19:​41- 44.

Iesu Ena Hebogahisi

⁷ Unai hegeregerena, hari inai nega lalonai danu haida ese lauma diarina idia ura henia lasi. To hereva momokani idia ura henia taudia idia ura diari dekenai do idia mai. Idia ura Dirava be edia Atai Herea Lohiana, bona Dirava ese ia siaia tauna, Iesu, idia tahua mai edia ura bada ida, diari ena anina do ia hadibalaidia totona, bona idia gavaia. Iesu be tanobada ai ia noho neganai, lalo-manau taudia momo ese idia gavaia. Farisea taudia danu ese unai idia gorea diba lasi. Idia maumau, idia gwau: “Tanobada ibounai be iena murina dekenai idia raka vadaeni.” (Ioane 12:19) Mamoe bamona taudia ese Iesu idia lalokau henia, badina be iena kara be idau vaitani, unai tomadiho gunalaia taudia, sibodia edia namo bona siahu idia tahua goadagoada taudia, hegeregeredia lasi.​—Mataio 23:​4, 5.

⁸ Iesu ena kara be idau vaitani oi laloa: “Taunimanima hutuma ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Bona edena bamona ia kara henidia? Satana ena orea ese ia hadikadia vadaeni taudia ia hereva henidia, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa. . . . Badina be lauegu huaia auna be ia metau lasi, bona huaia neganai danu hekwarahi lasi.” (Mataio 11:​28-30) Isaia 61:​1, 2 ese Iesu ia perovetalaia, bona ia ese unai hereva ia hagugurua, unuseniai ia gwau: “Iehova ena lauma be lau latanai ia noho, badina be Iehova ese lau ia horoa, sivarai namona manau taudia dekenai lau gwauraia totona. Lau ia siaia lalohisihisi taudia hagoadaia totona.”

Diari Abia Taudia Idia Haboudia

⁹ Guba dekenai ia daekau negana amo, Iesu ia naria ela bona Dirava ena nega korikori ia ginidae Basileia siahuna ia dekenai ia henia totona. Unai neganai ia be “mamoe” bona “nanigosi” do ia hapararadia. (Mataio 25:​31-33; Salamo 110:​1, 2) Unai nega ia ginidae ‘nega dokona’ be 1914 ai ia hamatamaia neganai. (2 Timoteo 3:​1-5) Dirava ena guba Basileiana ena lohia siahuna ia abia neganai, Iesu be iena idibana kahanai idia ura diari idia gavaia taudia ia haboudia. Tanobada Ibounai Tuarina Ginigunana murinai, unai haboua gaukarana ia bada ia lao.

10. Iesu ese ia gaukaralaia taudia taunimanima haboudia totona dainai dahaka henanadai ita henia?

¹⁰ Keriso Iesu ese unai gaukara ia gunalaia, bona unai haboua gaukarana ia namo herea ia lao. Hari inai negai taunimanima momo herea tanobada besedia iboudiai amo be lalo-diari ai tomadiho momokani idia badinaia hebou; nega gunadia iboudiai be inai bamona lasi. Bona hari inai nega lalonai Dirava bona Keriso edia amo ia mai diarina idia gavaia taudia be daidia? Daidia be Filipi 2:15 ena hereva hegeregerena idia karaia, unai be ‘tanobada taudia edia huanai idia hedinarai, hisiu ese tanobada idia hadiaria bamona’; daidia be ma haida idia boiridia ‘mauri ranuna idia abia dae, davana lasi’?​—Apokalupo 22:17.

11. Kerisendom ena kara be dahaka lauma diarina dekenai?

¹¹ Kerisendom ese unai ia karaia, a? Kerisendom be unai diari ia hahedinaraia lasi, ia be tomadiho dekenai taunimanima ia hapararadia. Tomadiho gunalaia taudia be Iesu ena negai tomadiho idia gunalaia taudia hegeregeredia. Dirava bona Keriso edia amo ia mai diari momokanina idia hahedinaraia lasi. Lagani 32 idia lao vadaeni, magasin ta ladana Theology Today lalonai ia gwau: “Mai emai lalohisihisi ida ai gwau inai diari be Dubu Oreana lalonai ia hedinarai badabada lasi. . . . Tanobada taudia bogaragidiai dubu oreana ia noho bona ena toana be idia bamona ia lao. Ia be tanobada ena diari lasi, to tanobada sibona lalonai idia hahedinaraia diaridia ia hahedinaraidia mo.” Bona hari inai nega ai Kerisendom ena toana ia dika vadaeni. Ia be tanobada ena diari ia hahedinaraia lasi, to dibura ia hahedinaraia badina Satana bona iena tanobada be unai sibona idia henia diba. Oibe, hereva momokani ena diari be Kerisendom ena tomadiho oreadia edia amo ia mai lasi.

12. Hari inai negai daidia be diari loalaia momokani oreana taudia?

¹² Hari inai negai ita be mai eda goada ida ita hereva diba, ita gwau, Iehova ena Witness taudia edia tanobada matamata oreana be diari loalaia orea momokanina. Lalohadai tamona ai, unai orea taudia iboudiai​—tatau, hahine, bona memero kekeni danu​—ese edia diari, Iehova bona Keriso edia amo idia abia diarina, be taunimanima iboudiai vairadiai idia hahedinaraia, mai edia lalo-tamona momokani ida. Lagani gunana lalonai, tanobada ibounai lalonai, Iehova ena taudia edia kongregesen kahirakahira 70,000 lalodiai, diari loalaia taudia milion hani bona ma haida be taunimanima dekenai Dirava bona iena palani idia harorolaia. Vanegai laganidia ta ta lalodiai, taunimanima ita itaia lauma dalanai diari ena lalo-parara idia tahua taudia edia namba ia bada noho. Taunimanima tausen momo be Baibel idia stadilaia bona hereva momokani idia diba maoromaoro murinai bapatiso idia abia. Momokani, “Dirava ia ura taunimanima ibounai ese mauri do idia davaria, bona hereva momokani do idia diba.”​—1 Timoteo 2:4.

13. Iehova ena amo ia mai diarina be dahaka ida ita hahegeregerea diba?

¹³ Hari inai negai Iehova ese diari ia siaia mai noho; inai be iena idaunegai besena ese Aigupito idia rakatania neganai ia karaia karana hegeregerena: “Dina ta ta Iehova be idia edia vairana dekenai ia lao, ori latana tano amo ia daekau ena lalonai, idia edia dala hedinaraia totona, bona hanuaboi be lahi latana tano amo ia daekau ena diari lalonai ia hakaudia. Inai dekena amo dina lalonai bona hanuaboi lalonai idia laolao diba.” (Esodo 13:​21, 22) Unai dina ena ori bona hanuaboi ena lahi, Dirava ese ia karaia hakaua gaudia, idia abidadama henidia diba. Idia abidadama henia diba Dirava ese ita do ia hadiaria totona ia karaia gauna, dina, ita abidadama henia diba hegeregerena. Unai bamona danu, ita ese Iehova ita abidadama henia diba, ia ese hereva momokani tahua taudia edia raka dalana be inai dina gabedia dikadia lalodiai do ia hadiaria noho. Hereva Lada-isidia 4:18 be ita ia hadibaia, ia gwau: “Kara maoromaoro taudia edia dala be daba matana bamona; ena diari ia bada ia lao ela bona dina ia hedinarai momokani.”

Basileia Ena Diari Hahedinaraia

¹⁴ Iehova be lalo-diari ena Badina, bona Keriso be unai diari Hahedinaraia Tauna Badana, to namona be Iesu idia gavaia taudia danu ese unai diari do idia hahedinaraia. Iesu ese ia herevalaidia, ia gwau: “Umui be tanobada taudia ibounai edia diari. . . . Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai umui emui Tamana guba dekenai do idia hanamoa.” (Mataio 5:​14, 16) Iena orea taudia be taunimanima vairadiai do idia hahedinaraia diarina ena anina korikorina be dahaka? Inai dokona negana lalonai dahaka do idia hadibalaia? Iesu ia gwau lasi iena orea taudia ese democracy o dictatorship o tomadiho oreadia be gavamani ida do idia gaukara hebou dalana o tanobada ena palani idauna ta be do idia harorolaia. Lasi, to Mataio 24:14 ai ia peroveta, ia gwau, ena be dagedage taudia tanobada ibounai lalonai haroro taudia do idia koudia toho, to “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” Unai hegeregerena, hari inai negai diari loalaia taudia ese Dirava ena Basileia idia harorolaia; unai gavamani ese Satana ena tanobada do ia haorea bona kara maoromaoro tanobada matamatana do ia havaraia.​—1 Petero 2:9.

15. Diari idia ura henia taudia be edeseniai do idia tahua?

¹⁵ Diari idia ura henia taudia be inai tanobada ena heagi herevadia bona ena palani dainai dala maorona amo idia raka siri lasi. Unai hereva bona palani iboudiai be kahirakahira do idia ore vaitani, badina be tanobada be kahirakahira do ia ore. Kara maoromaoro idia ura henia taudia be tanobada ena gabu daudaudia ai Dirava ena Basileia ena diari idia harorolaia sivarai namona do idia tahua. Idia be Apokalupo 7:​9, 10 ese ia perovetalaia taudia, ia gwau: “Lauegu matana lau negea, hutuma bada herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be [Dirava ena] helai gabuna badana vairanai bona Mamoe ena Natuna [Keriso] vairanai idia gini . . . Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ” Siri 14 (NW) ia gwau: “Inai taudia be hisihisi badana amo idia mai vadaeni.” Oibe, inai tanobada ena dokona amo do idia roho mauri, bena tanobada matamatana do idia noholaia bona Dirava ena Basileia henunai mauri do idia moalelaia, ela bona hanaihanai.

Tanobada Matamatana Lalonai be Diari Ena Lalo-Parara

¹⁶ Unai tanobada matamatana be hereva momokani ena diari bada ese do ia hadiaria. Dirava ese inai tanobada oromana do ia haorea negana oi laloa. Satana mai ena lauma dikadia, bona iena politikol, bisinesi, bona tomadiho oreadia iboudiai danu do ia haoredia! Satana ese taunimanima edia lalodia ia ania daladia iboudiai danu be do idia ore. Anina be, Aramagedono murinai, inai tanobada dikana ia durua gauna ta, niuspepa o magasin o buka o buklet o pepapepa ta, be lasi. Taunimanima hakereredia herevadia o laulaudia be tanobada tivi o reidio siteisini amo do idia halasidia lasi. Satana ena tanobada ena hakererea siahuna dikana ibounai be Dirava ese siahu karana badana tamona amo do ia haorea!​—Mataio 24:21; Apokalupo 7:14; 16:​14-16; 19:​11-21.

17, 18. Satana ena tanobada do ia ore murinai, taunimanima edia mamina lauma dalana dekenai be edena bamona oi herevalaia?

¹⁷ Unai be heduru bada herea! Unai dina amo, Iehova ena amo ia mai lauma diarina namona sibona ese taunimanima do ia hakaudia. Isaia 54:13 ia peroveta hegeregerena: “Emu natudia maruanedia iboudiai be Iehova ese do ia hadibadia, bona emu natudia maruanedia edia maino do ia bada.” Iehova ia gwauhamata, iena lohia siahuna ese tanobada ibounai do ia biagua dainai, Isaia 26:9 ena hereva hegeregerena, “tanobada noholaia taudia ese kara maoromaoro do idia dibaia.”

¹⁸ Karaharaga, tanobada ena mamina ibounai do ia idau, do ia namo ia lao. Hari inai negai iseda lalona idia hahisia karadia bona matabodaga karadia be gabu iboudiai lalodiai idia vara, to unai neganai iseda lalona hagoadaia bona hamoalea gaudia mo do idia vara. Unai nega lalonai idia noho taudia iboudiai be Dirava bona ena palani herevadia momokanidia do idia hadibalaidia. Isaia 11:9 ena peroveta herevana ena anina do ia vara guguru; ia gwau: “Tanobada be Iehova ena diba maoro karana amo do ia honudae, davara ia honudae hegeregerena.”

Diari Gavaia be Gau Badana

¹⁹ Hari inai negai, inai tanobada oromana dikana ena lagani ginigabedia lalodiai, gau badana be tanobada ena diari do ita gavaia. Bona namona be ita naria namonamo bona ita gima, badina be dibura ena siahu taudia ese ita idia tuari henia goadagoada; edia palani be ita do idia koua bena diari lalonai do ita raka noho lasi. Ita idia koua toho taudia be dibura ena siahu taudia​—Satana, iena demoni, bona ena tanobada oreana. Unai dainai aposetolo Petro be sisiba ia henia, ia gwau: “Do umui laloa maoromaoro bona naria namonamo. Umui ia tuari henia tauna, Satani be leona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.”​—1 Petero 5:8.

19, 20. Dahaka dainai diari idia ura idia gavaia taudia be do idia naria namonamo?

²⁰ Diari idia itaia matamaia taudia be Satana ese dala idauidau amo do ia koudia toho, unai amo do ia doridia toho, dibura lalonai do idia raka noho totona. Reana edia varavara eiava edia turadia gunadia, hereva momokani idia inai henia taudia, amo do ia doridia toho. Eiava reana tomadiho koikoi ena hahediba herevadia o Dirava idia abidadama henia lasi taudia edia hereva amo idia dekenai daradara ia havaraia dainai, Baibel ena hereva do idia daradaralaidia. Eiava reana idia sibodia edia ura dikadia amo do ia hahekwarahidia bena Dirava ena taravatu do idia badinaia be auka.

21. Dirava ena tanobada matamatana ai idia ura idia noho taudia be dahaka idia karaia be namo?

²¹ Herevana dahaka koua gaudia idia noho, oi ura ogogami, taravatu utua karadia, hahemaoro kerere, bona tuari be tanobada ibounai dekenai do idia ore murinai mauri do oi moalelaia, a? Oi ura gorere iboudiai do idia ore bena mauri be paradaiso tanobadana ai do oi moalelaia ela bona hanaihanai, a? Vadaeni, Iesu Keriso be tanobada ena diari hegeregerena oi abia dae, bona iena orea taudia, “mauri sivaraina” idia dogoatao namonamo taudia bona ‘tanobada ena diari bamona idia hedinarai taudia’, edia haroro herevana oi kamonaia.​—Filipi 2:​15, 16.

Edena Bamona Do Oi Haere?

◻ Tomadiho gunalaia taudia be edena dala ai idia hahedinaraia idia be dibura idia ura henia taudia?

◻ Iesu be taunimanima dekenai edena bamona ia laloa?

◻ Diari loalaia taudia haboua gaukarana be edena bamona idia karaia?

◻ Nega kahirakahira dahaka idau karadia mai anina bada be do idia vara?

◻ Dahaka dainai hari inai negai tanobada ena diari ita gavaia be gau badana?

1. Baibel be tomadiho diari koikoidia edena bamona ia gwauraidia?

7. Badina be dahaka hereva momokani idia ura henia taudia momo be Iesu dekenai idia mai?

8. Tomadiho koikoi taudia bamona lasi, to Iesu ena lalohadai be edena bamona ia idau?

9. Lagani 1914 lalonai dahaka anina bada gaudia idia vara?

14. Namona be diari loalaia taudia ese dahaka idia herevalaia badabada?

16. Hisihisi badana dekenai dahaka do ia vara Satana ena tanobada dekenai?

[Picture on page 14, 15]

Kudou-auka Farisea taudia be Iesu ese ena matana ia kehoa tauna idia lulua