Baibel Bukadia Ai Karadia, Taravatu Ia Noho Neganai

MALCOM G. VALE ESE INAI SIVARAI IA GWAURAIA

“Children bukana umui printaia.” Tuari negana lalonai Australia ai Iehova ena Witness taudia edia branch naria tauna ese unai bamona lau ia hagania neganai lau hoa. Guna, August 10, 1941 ai, unai buka be hebouhebou ta ai St. Louis, Missouri, U.S.A. ai idia halasia. Badina be dahaka unai hahegani lau hoalaia?

BADINA be January 1941 ai, gavamani ese emai haroro gaukarana ia taravatua, unai dainai buka karaia be mai ena hekwarahi. Ma danu, Children bukana ena rau iboudiai be 384 bona laulau mai edia kala idauidau danu idia noho. Emai printa masini idia hegeregere lasi, pepa be momo lasi, bona gaukara taudia be buka karaia dalana idia diba lasi.

Taravatu ia noho neganai buka ai karadia dalana be gabeai do lau gwauraia, to Australia branch opesi ena printa gaukarana naria tauna ai lau lao dalana do lau gwauraia guna.

Egu Noho Gunana

Lagani 1914 ai lau vara, Ballarat, Victoria ai. Egu tamana be mai ena printa bisinesi unai hanua ai. Unai dainai printa gaukarana lau dibaia, Tamagu ena bisinesi ai lau gaukara neganai. Church of England (Anglikan) ena dubu ai ane-abi oreana ai ane lau abia bona dubu ena gaba lau toua. Lau be mai egu dala Sunday sikuli tisa ai do lau lao, to lau daradara.

Lau daradara badina be dubu oreana ena hahediba herevadia haida, hegeregere, Toi Tamona Diravana herevana, hel ena lahi herevana, bona taunimanima be mai edia mase diba lasi laumadia herevana lau nanadailaidia, to ta ese lau abia dae diba haerena ia gwauraia lasi. Bona danu, nega ta ta emai haroro tauna ese tomadiho oreana maragina ladana Iehova ena Witness taudia ia gwauraidia mai ena badu ida. Hanua badana mai ena taunimanima 40,000 ese unai orea maragi hereana idia badulaidia ena badina be lau daradaralaia.

Sunday ta ai, adorahi gurigurina murinai dubu murimurinai lau gini neganai, Metodis Dubuna amo kekeni haida idia raka hanai. Idia ta, ladana Lucy, lau hereva henia bena unai murinai ai hetura heheni. Gabeai lau ia boiria ena ruma do lau lao ena tamana sinana hedavari henidia totona. Lau hoa maragi lasi, badina be lau davaria ena sinana, Vera Clogan, be Iehova ena Witness hahinena ta. Nega momo Baibel ai herevalaia hebou, bona ena hereva ena anina lau lalo-pararalaia.

Nega sisina murinai, Lucy bona lau ai headava, bena lagani 1939 ai, Melbourne, Victoria ai, ai noho. Ena be Lucy be Iehova ena Witness hahinena ta ai ia lao vadaeni, to egu lalona lau do hadaia lasi. September 1939 ai Tanobada Ibounai Tuarina Iharuana ia matamaia neganai, Baibel amo lau dibaia vadaeni herevadia lau haerodia matamaia. January 1941 ai gavamani ese Iehova ena Witness taudia edia gaukara ia taravatua karana ese lau ia durua egu lalona do lau hadaia totona. Egu mauri be Iehova Dirava lau gwauhamatalai henia bena nega sisina murinai bapatiso lau abia.

Emai Noho Dalana Ai Haidaua Vaitani

Unai neganai, ai be ruma namona ta ai rentalaia noho Melbourne ai. To, nega daudau lasi murinai, ai idia boiria, Witness taudia ma haida ida do ai noho hebou totona. Emai kohu momo ai hoia, emai mahuta patana bona seipi sibodia ai dogodiatao bena pioneer taudia edia ruma dekenai ai hanai, unuseniai ai noho. Printa gaukarana lau karaia noho, unai dainai moni lau henia diba unai ruma ena davana karaia totona. Unai ruma ena tatau oredia danu be unai bamona idia karaia. Unai dainai emai adavadia be dina dina iboudiai haroro gaukarana idia karaia diba, bena hanuaboi ai bona Saturday bona Sunday ai ai bamodia, haroro gaukarana ai bona Keristen heboudia ai.

Nega sisina murinai, Watch Tower Society ena branch opesi ese lau bona egu adavana idia boiria Sydney do ai lao. Emai mahuta patana bona seipi ai hoidia bona ai abia torehai monina ai haloua, to tereini amo Sydney do ai lao henia davana karaia totona, Lucy ena maoheni rinina ai hoia!

Tuari negana ena taravatu dainai bona gavamani ese emai orea ia taravatua dainai, Baibel bona Baibel gwauraidia bukadia be tano idaudia amo ai abidia diba lasi. Unai dainai, Australia branch opesi taudia edia lalohadai be printa gaukarana do idia karaia hehuni, lauma anianina do idia halasia noho totona, bena lau idia boiria unai gaukara do lau naria totona. Lau be George Gibb, lagani 60 ai Australia branch ena printa gaukarana ia karaia tauna, ida ai gaukara hebou. Unai neganai lau idia hagania, “Children bukana umui printaia.”

Printa Kohudia Abidia Lou

Unai tuari laganidia ai hoa karadia momo ai karadia. Hegeregere, emai printa gaukarana hamatamaia totona, masini ai abidia be namo. Tuari be do lasi neganai ai gaukaralaidia masinidia be gavamani ese ia abidia vadaeni, bona Society ena printa rumana maragina ia koua bona ia gimaia. Edena dala amo masini be unai ruma amo do ai kokidia bena gabu idauna ta do ai laohaidia, printa gaukarana do ai karaia hehuni totona?

Gima taudia mai edia ipidi be dina bona hanuaboi ai Society ena ruma idia gimaia. Vadaeni, ruma ena haba ta ena murimuri kahanai be tereini edia dala kwadogina ta, idia gaukaralaia momo lasi dalana. Unai dainai hanuaboi ai, Esekiel 12:​5-7 ese ia gwauraidia karadia bamona, Betele ena gaukara taudia haida ese ruma ena biriki haida idia kokidia bena ruma ai idia vareai bona biriki idia atodia lou, ta ese do ia davaridia garina. Pura rua lalodiai unai bamona idia karaia loulou lalonai, printa masinidia haida edia kahana iboudiai idia kokidia. Bena kahana iboudiai idia lasilaidia regerege lasi, gima taudia vairadiai!

Gabeai printa kohudia ma haida be gabu idaudia amo ai abidia, bena printa gaukarana ai karaia goadagoada hehuni, Sydney ena gabu idauidau ai. Children bukana ai karaia, bona The New World, “The Truth Shall Make You Free,” bona The Kingdom Is At Hand bukadia, bona Yearbooks of Jehovah’s Witnesses, lagani 1942, 1943, 1944, bona 1945 gaudia. Bona, tuari neganai gavamani ese aiemai gaukara idia taravatua negana lalonai, Australia ai Iehova ena Witness taudia ese Gima Kohorona ta idia reaia lasi. Unai ese ai ia hadibaia Iehova ena imana ia kwadogi lasi.​—⁠Isaia 59:⁠1.

Inspekta Taudia Idia Mai Neganai

Tuari neganai gavamani taudia be taunimanima idia diba lasi horadia ai printa bisinesi dekediai idia lao, idia printaia gaudia sekedia totona. Unai dainai, printa gaukarana ai karaia hehuni gabuna ta be mai ena gau ta foloa ai. Ta be unai ruma ai ia vareai gwauraia neganai, bema risepsen hahinena ia diba lasi ia eiava ia laloa ia be inspekta tauna, unai gau ia moia, ruma lalonai idia gaukara taudia hadibadia totona.

Unai gau ia moia neganai, gaukara taudia haida be uindo amo idia lasi. Gaukara taudia oredia, edia ladana be gavamani idia hadibaia vadaeni taudia, be idia noho, Gima Kohorona magasin bona Baibel idia gwauraia gaudia ma haida, idia karaia noho gaudia, idia hunidia. Idia hunidia dalana be inai: Idia printaia vadaeni gaudia idaudia, murimuri taudia ese idia odalaidia gaudia, edia bada be Gima Kohorona o dahaka edia bada hegeregerena, be idia latadiai idia atodia.

Nega ta, inspekta taudia rua idia mai neganai, komik pepadia latadiai idia helai, to unai pepa henudiai be Gima Kohorona, boi hanuaboi ai printaia gaudia. Printa rumana ma ta ai, dina ai murimuri taudia edia oda gaudia ai printadia, bona hanuaboi ai bona Saturday bona Sunday ai Gima Kohorona ai printadia.

Pepa Abia Dalana

Pepa be printa gaukarana totona ai abia be mai ena hekwarahi. Printa oreadia badadia haida ese idia abia pepana ibounai idia gaukaralaia lasi, badina be tuari neganai edia bisinesi ia maragi, unai dainai edia lalodia idia hegeregere edia pepa orena do idia hoihoilaia​—⁠momokani, davana bada idia gwauraia. To, nega ta dala idauna ta amo pepa ai abia.

Kada ta ese pepa mia koremana momo be Australia ia laohaia neganai, gadobada ai dika ia davaria bena davara ese pepa momo ia hadikaia. Unai pepa ibounai be oksen ai idia atoa, bena ai hoa badina be ai mo sibona ai ura hoia. Unai dainai davana maragi amo ai hoia. Pepa be dina ena siahu amo ai hakaukaua bena ai utua, unai amo momo be printa masini ai ai gaukaralaia diba.

Pepa mia koremana be edena bamona do ai gaukaralaia? Ai laloa bema komik bukadia be unai pepa amo do ai karadia, idia duahidia taudia do idia moalelaidia noho. Unai dainai, pepa kurokurona, ia amo komik bukadia be guna ai karaia gwauraia pepana, be ai gaukaralaia, Gima Kohorona bona Society ena gau ma haida printadia totona.

Hahine Edia Gaukara Namona

Tuari neganai, Australia ai Keristen hahinedia momo ese buka karaia gaukarana idia dibaia. Adorahi ta ai, dina ia siahu bada herea neganai, idia haida be sibodia idia gaukara ruma maragina ta ai, Sydney ena dala maragina ta ai. Uindo bona iduara iboudiai idia koudia, ta ese do ia itadia garina. Kamoa tao muramurana amo bonana dikana mai ena siahu ia dae. Unai siahu idia haheaukalaia be auka, unai dainai edia deresi idia kokidia.

Bena tau ta be iduara ai ia pidipidi. Idia boiboi henia, idia nanadaia ia be daika. Ia haere, ia gwau ia be gavamani ena leiba opesa ta. Tuari neganai iena depatmen be mai ena siahu, kampani be gaukara taudia ai idia dabu gabudia do ia siaidia lao. Taihu ese idia hamaoroa unai negai iduara idia kehoa diba lasi, badina be edia deresi idia kokidia vadaeni, gabu ia siahu dainai.

Opesa ia naria sisina, bena ia gwau ia be gabu ta do ia lao bena kerukeru do ia lou mai edia gaukara sekea totona. Karaharaga taihu ese ai idia rini henia, bena unai hanuaboi ai taraka ta ai siaia, idia karaia bukadia iboudiai abidia bona gabu idauna ta ai laohaidia totona.

Aiemai printa gaukarana idia karaia hehuni taudia momo be guna unai gaukara idia diba lasi, unai dainai lau diba Iehova ena lauma ese ia durudia bona ia hakaudia, unai gaukara karaia totona. Egu adavana Lucy be buka karaia gabuna ai ia gaukara. Ia bona lau be mai emai ahuna unai gaukara ai be hahenamo badana ta ai dekenai.

Unai hekwarahi neganai emai gaukara be edena bamona idia naria? Gavamani ese Iehova ena Witness taudia edia branch naria tauna ia hagania hanua ta ai do ia noho; unai hanua bona Sydney edia padana be kilomita 100 bamona. Gavamani ena taravatu dainai unai hanua ena ihuana amo kilomita 8 unukahai bona inikahai ia hanaia diba lasi. Unai neganai taravatu dainai hua ta ta bensin lita 4 mo ai hoia diba, motuka ta ta edia. To tadikaka ese gas karaia gauna ta idia karaia. Daramu ta, ena metau be ton kahana ta bamona, be motuka ena murina kahanai idia atoa. Ia lalonai gida idia araia kabon monoksaid gas karaia totona, bena motuka be unai amo ia heau. Pura iboudiai lau bona tadikaka haida be hanuaboi haida unai motuka ai ai heau lao branch naria tauna ena noho gabuna kahirakahira ai, ia kororo vadaeni sinavaina ai do ai hedavari henia totona. Unai amo ai be mai emai dala gau idauidau ai herevalaidia, bena unai murinai daramu be gida amo ai hahonua lou gas karaia totona, bena daba ia do rere lasi neganai ai lou lao Sydney.

Gabeai, Australia ena High Court ai Iehova ena Witness taudia edia gaukara taravatua karana idia kotalaia. Hahemaoro tauna ia gwau unai taravatu be “koikoi bona auka” bona Iehova ena Witness taudia ia gwauraidia maoro, ia gwau gavamani ena siahu idia hadikaia toho lasi. High Court taudia iboudiai ese ena hereva idia abia dae, unai dainai emai Basileia gaukaradia be taunimanima vairadiai ai karaia lou diba.

Gaukara bona Hahenamo ma Haida

Tuari murinai, aiemai printa gaukarana idia karaia hehuni taudia momo ese pioneer gaukarana idia karaia. Gabeai idia haida be Watchtower Bible School of Gilead idia lao, New York ai. Lucy bona lau danu ai ura unai sikuli do ai lao, to emai natuna kekenina ia vara dainai ai be dala lasi, bena egu lalona lau hadaia printa gaukarana do lau karaia lou. Iehova ai noia ai do ia durua Basileia gaukaradia do ai tahudia guna totona, bona momokani, ai ia durua. Bena hesiai gaukarana ma ta lau karaia.

Lloyd Barry ese lau ia rini henia. Hari ia be Iehova ena Witness taudia edia Hakaua Oreana tauna ta, to unai neganai ia be sekit naria tauna Sydney ai. Lau ia nanadaia aiemai sekit hebouhebouna ena dina be lau diba eiava. Lau gwau Oibe neganai, ia gwau: “Ai ura oi ese aniani do oi naria.”

Lau hoa unai, bena lau gwau: “Unai bamona gaukarana be guna lau karaia lasi.”

Ia gwau: “Tadikaka e, hari be nega namona unai gaukara do oi dibaia!” Lau dibaia, bona aniani naria gaukarana, distrik hebouheboudia ai danu, lau karaia lagani 40 mai kahana lalodiai.

Aiemai printa bisinesi ia bada ia lao dainai, nega momo lau be tano idaudia lau lao, bisinesi totona. Intenesenel hebouheboudia be New York City bona United States ena hanua ma haida ai idia karaia negadiai, dala lau karaia, emai bisinesi gaukarana unai tano ai be unai negadiai do lau karaia. Bena lau be mai egu dala, hebouhebou edia aniani naria taudia bona dipatmen ma haida naridia taudia ida do lau herevahereva. Unai ese lau ia durua, lauegu hebouhebou gaukarana Australia ai do lau karaia namonamo totona.

Hari lau bona Lucy be ai buruka vadaeni; lau be 1914 ai lau vara bona ia be lagani 1916 ai ia vara. Ai laloa bema unai nega murinai sisina ai vara, reana ai hegeregere gaukara ma haida do ai karaia. To ai moale badina be Baibel ena peroveta herevadia haida edia anina idia vara neganai emai matadia amo ai itadia. Iehova ai tanikiu henia inai hahenamo dainai: Taunimanima momo ai stadi henidia bona ai durudia hereva momokani idia dibaia totona, bona hari ai itadia iena hesiai idia lao henia. Aiemai guriguri be iena hesiai do ai lao henia ela bona hanaihanai, nega ibounai ia do ai gwauraia guba bona tanobada edia Pavapava Badana.

[Pictures on page 29]

Printa rumana Strathfield Betele ai, lagani 1929-73

George Gibb be printa masini ta badinai ia gini; inai masini bona ma haida be printa rumana ena haba amo idia lasilaidia