Iehova ese Iena Bese Ia Naridia Tanona Ai—Hungary

HUNGARY be Europe ena bogaragina kahanai, bona tanobada ena sivarai dekenai unai tano dekenai gau dikadia momo idia mamia. Ena be edia king ginigunana, Stephen, ese unai tano taudia ia gwauhamatalaidia Virgin Mary dekenai, bona lagani 1001 neganai idia doridia Keristen ladana idia abia totona, to idia be hisihisi bada idia davaria.

Lagani handred momo lalodiai, Hungary dekenai tuari be momo dainai idia manoka, bona nega momo ma bese haida ese idia kwalimu henia. Unai tuari lalodiai hanua momo edia taunimanima idia hamasedia ore, gabeai idau tano taudia ese unai hanua idia noholaidia. Unai dainai, unai tano taudia be bese idauidau momo amo idia mai. Tomadiho dalanai, unai tano taudia edia kahana toi amo kahana rua bamona be Katolik taudia, to Reformation karana be gabeai ma gabu haida dekenai idia abia dae.

Dala Maragina ai Ia Matamaia

Lagani 1908 neganai Baibel ena hereva momokani ena uhe idia hadoa matamaia. Unai neganai Iehova ena Witness taudia, guna idia gwauraidia Bible Students, edia amo hereva momokani ia abia hahinena ta ese unai uhe ia hadoa. Iena haroro dainai momo be sivarai namona idia tahua. Unai nega sisina murinai, United States amo idia giroa tatau rua be colporteur gaukara dekenai sivarai namona be nega ibounai idia harorolaia. Sisina sisina hereva momokani be gabu ma haida dekenai idia abia dae, bona Kolozsvár dekenai printa masini ta idia gaukaralaia hamatamaia.

Idia karaia namonamo ripoti ginigunana be 1922 ai idia abia, unai neganai hanua 10 amo Bible Student taudia 67 idia mai Keriso ena mase Anibou idia karaia totona. Edia haroro gaukara amo anina ia havaraia haraga, unai dainai dubu gunalaia taudia ese gavamani bona niuspepa karaia taudia idia veridia haroro gaukara idia koua totona.

Dagedage Ia Bada Ia Lao

Lagani 1928 ai, Katolik pris tauna Zoltán Nyisztor be buklet ta ia torea, ladana be Millenialist Bible Students. Unai buklet lalonai Bible Student taudia be inai bamona ia herevalaidia, ia gwau: “Idia be red bolshevist taudia mai edia tuari kohu edia dika idia hanaia, badina Baibel idia gaukaralaia diba lasi taudia idia veridia kerere dainai. Hungarian Royal State Police be edia gaukara idia raraia namonamo.”

Unai nega lalonai gaukara goadagoada tadikaka ta Josef Kiss be kongregesen ia vadivadi henidia. Polisi taudia be hehuni dalana ai idia raraia. Lagani 1931 lalonai ia be tadikaka ta ena ruma dekenai ia noho neganai polisi taudia idia mai haraga bena idia oda henia, maoromaoro ia lao siri. Tadikaka Kiss be iena kohu ia haboudia noho lalonai, polisi tauna ta ese iena ipidi ena kahana aukana amo ia botaia bona hagaria hereva ia henia, ia gwau: “Karaharaga, bema lasi, oi do lau gwadaia!” Tadikaka Kiss be vairana moalena ia karaia bena ia gwau: “Vadaeni, egu gabu dekenai do lau lao haraga,” to ia be iena guba helarona ia gwauraia badina ia be horoa Keristen tauna.

Tuari taudia be Tadikaka Kiss ida idia lao train dekenai. Debrecen kongregesen tadikakadia ese idia naria noho ia be June 20, 1931, ia mai totona, to ia ginidae lasi. Tadikaka idia laloa iena inai taudia ese idia alaia, bena momokani guba dekenai “iena gabu dekenai ia giroa” vadaeni. Ena be iena gaukara idia hadokoa, to siahu taudia be hereva momokani ena diari idia habodoa diba lasi.

Nega momo idia haroro totona aonega daladia idia gaukaralaidia. Hegeregere, lagani 1935 bamona, tadikaka ta be Tiszakarád dekenai ia mase. Unai neganai, gavamani taudia sibodia be gwaumaoro idia henia neganai mase taudia guridia herevadia idia karaia diba. Tadikaka dekenai gwaumaoro idia henia miniti tamona guriguri bona miniti tamona ane idia karaia totona. Polisi taudia be mase hereva dekenai idia mai bona ipidi bona kaia amo unai kara idia biagua. Hanua taudia momo idia mai badina idia ura idia itaia edena dala ai mase tauna guria kara idia karaia.

Tadikaka ta be mase mauana badinai ia gini bona miniti 30 lalonai ia guriguri, to taunimanima idia gwau ia karaia dalana bamona be guna idia kamonai lasi. Idia gwau: “Bema pris taudia 6 ese mase herevana idia karaia, lalona ena mamina do ia hamarerea lasi unai bamona.” Tadikaka ta be gado namona amo ane ia hamatamaia gwauraia, to polisi ta ese ia hamaoroa ia karaia lasi. Gabeai, polisi taudia idia gwau, ena be idia daradara to guriguri idia koua diba lasi.

Dagedage ia lao noho lalonai, Lajos Szabó, Reformed Church ena pris ta, be iena 1935 buklet lalonai, Antichrist by the River Tisza, ia torea, ia gwau: “Tomadiho dalana ai taunimanima dekediai bolshevism idia harorolaia be aonega momokani . . . Marx be Keriso bamona ia hedinarai . . . Keriso Ena Inai tauna mai ena dabua kakakakana bona Iehova ena Witness taudia idia noho.”

Gavamani ese Idia Taravatudia Laganidia

Lagani 1939 lalonai, gavamani ese Iehova ena Witness taudia edia gaukara idia taravatua. Idia gwau edia gaukara be “tomadiho bona taunimanima ia hadikadia.” Adventist, Baptist, Evangelical, bona Presbyterian taudia be Witness taudia hadikaia buklet idia printadia. To Iehova ese iena hesiai taudia ia lalodia boio lasi, bona ma tano haida Witness taudia ese idia naridia. Ma danu, Dirava ena taunimanima Hungary dekenai be abidadama hagoadaia ekspiriens momo idia abia.

Hegeregere, tadikaka ta be Czechoslovakia amo baege ta mai ena magasin momo ia mailaia neganai, customs tauna ta ia henanadai, ia gwau: “Dahaka ia noho oiemu baege dekenai?” Tadikaka ia hereva momokani, ia haere: “Gima Kohorona.” Customs tauna be imana ia karaia, hegeregere ia laloa unai tadikaka ia kava, bena ia lao dalana ia koua lasi. Unai dainai, lauma aniani be Hungary dekenai ia mai namo.

To, dagedage ia doko lasi. Tadikaka idia dogodia tao noho, bona idia ta ta hadiburadia nega be idauidau. Bena edia gaukara tahua oreana ta be oda idia abia Iehova ena Witness taudia idia panisidia totona. Lagani 1942 lalonai, tatau, hahine, bona natudia idia haboudia bona hosi rumadia bona idia noho lasi Iuda taudia edia sikuli lalodiai idia koudia. Hua rua lalodiai dagedage mai hisihisi idia henidia, bena idia kota henidia bona idia gwauraidia kerere taudia. Haida idia henia kota panisi be edia mauri lagani oredia lalonai dibura dekenai do idia noho; ma haida be lagani 2 ia lao 15 dibura dekenai do idia noho. Tadikaka toi​—Dénes Faluvégi, András Bartha, bona János Konrád​—kota amo idia abia panisi be aiona amo do idia taua dae idia mase totona, to gabeai unai panisi idia haidaua bena idia gwau edia mauri lagani oredia lalodiai dibura dekenai do idia noho. Bena, tadikaka 160 be Bor ena mase havaraia kamepa dekenai idia abidia lao. Unai tano ena hetoana idia hanaia neganai, idia hamaorodia idia mauri noho lalonai edia tano ai do idia giroa henia lasi. Unai kamepa dekenai idia laohaidia Iuda taudia 6,000 amo 83 sibodia idia roho mauri. To, Witness taudia amo, hani sibona idia mase, bona oredia be edia hanua ai idia giroa.

To, Iehova ena Witness taudia haida danu be edia abidadama dainai idia mase. Tanobada Ibounai Tuarina Iharuana be kahirakahira ia ore neganai, Nazi taudia be tadikaka haida idia hamasedia. Bertalan Szabó, János Zsondor, bona Antal Hónis idia pididia mase, bona Lajos Deli be ena aiona amo idia taua dae.​—Mataio 24:9.

Nega Namona Ia Kwadogi Sibona

Tanobada ibounai tuarina iharuana murinai, gau idia idau lou. Politikol pati idauidau be gavamani tamona idia karaia, bona idia gwauhamata taunimanima be do idia kara namo henidia. Kamepa amo idia giroa tadikakadia be maoromaoro idia haroro hamatamaia bona kongregesen idia haginidia. Idia laloa Iehova ese ruhaia mauri dalana ia henidia idia be iena ladana badana idia hanamoa totona, idia laloa lasi idia ia ruhaia tanobada kohu do idia haboua totona. Lagani 1945 ena dokona ia ginidae neganai, Basileia harorolaia pablisa taudia 590 idia gaukara. Lagani 1947 lalonai ruma badana ta idia hoia Watch Tower Society ena branch opesi kehoa totona, bona unai tano ena hebouhebou badana ginigunana be spot gadara rumana lalonai idia karaia. Idia hebou taudia be 1,200, bona Hungary ena gavamani train oreana be hebouhebou dekenai idia mai taudia dekenai tiketi ena hoia davana idia hamaragia 50 pesen amo.

To, ruhaia mauri namona ena nega be daudau lasi. Nega sisina murinai, Komiunis Pati be siahu ia abia, bona gavamani ia idau. Iehova ena taunimanima edia namba ia bada dainai gavamani matamatana ese idia lalodia, badina lagani 1947 lalonai pablisa taudia be 1,253, to 1950 lalonai edia namba be 2,307. Unai lagani lalonai, gavamani taudia be haroro gaukara idia koua totona hekwakwanai idia havaraia hamatamaia. Idia gwau haroro totona gwaumaoro pepadia idia abia be namo, to idia abia gwauraia neganai gavamani taudia idia ura lasi idia henidia, bona National Guard edia polisi ese unai gwaumaoro pepadia idia tahua taudia idia botadia. Niuspepa sivaraidia be hanaihanai Witness taudia idia gwauraidia dika, idia gwau idia be ‘king lohia dalana idia abia isi gaukara taudia.’ To inai ita laloa, Komiunis taudia be siahu idia do abia lasi neganai, Witness taudia be dibura kamepadia ai idia siaidia, badina idia gwauraidia ‘Komiunis Iuda taudia edia gaukara taudia.’

Gari Negana Ia Hamatamaia

November 13, 1950 neganai, branch naria tauna bona gado ia hahanaia tauna (guna kota ia gwau edia panisi be do idia mase taudia rua unai) bona sekit ginigunana naria tauna idia dogodia tao. Idia abidia lao tano henunai dibura ruma dika hereana ai, 60 Andrássy Street, Budapest ai, unuseniai idia “hamanokadia” gwauraia. February 2 murina lagani lalonai kota idia abia. Branch naria tauna be kota amo ia abia panisi be lagani 10 dibura dekenai do ia noho, gado ia hahanaia tauna ena panisi be lagani 9 ia abia, bona sekit naria tauna ia abia panisi be lagani 8 ia abia. Idia toi edia kohu idia kokia. Idia kota henidia lalonai, kongregesen naria taudia ma hani be kota amo idia abia panisi be, dibura ai do idia noho lagani 5 ia lao 6 dekenai, kota taudia idia gwau unai tadikakadia be gavamani idia hamorua toho.

Tadikakadia be sekuriti aukana dibura rumana lalonai idia atodia, unuseniai revareva, pasolo, eiava vadivadi taudia idia mai diba lasi. Edia ruma besedia ese edia sivarai idia kamonai lasi. Gadi taudia be edia ladadia idia gwauraidia diba lasi. Idia diba idia be daika daika totona, idia ta ta iboudiai edia aiona dekenai au maragina mai ena namba idia atoa. Haba dekenai saini ta ia gwau: “Dibura taudia oi naridia sibona lasi; oi inai henidia.”

Witness taudia be edia gaukara idia karaia hehuni, to haroro gaukara ia doko lasi. Ma Witness taudia be idia hadiburadia taudia edia gabu idia abia. Gabeai, idia danu idia dogodia tao. Lagani 1953 ia mai neganai, tadikaka 500 bona ma haida idia dogodia tao, idia kota henidia bona dibura rumana ai idia atodia, to sivarai namona be seini amo idia kwatua diba lasi. Tadikaka haida sibodia be gadi edia gwauhamata namodia idia abia dae bona idia moru.

Gabeai Negana Ia Namo Gwauraia

Lagani 1956 ena keru sisina negana ai, unai tano taudia be gavamani idia gwau-edeede henia hamatamaia. To Soviet ena tuari orea ese unai gwau-edeede karana idia koua, bona Komiunis Pati idia siahu lou.

Idia hadiburadia Witness taudia iboudiai idia ruhadia vadaeni, to taunimanima momo idia diba tadikakadia haida be dibura dekenai idia atodia lou edia panisi negana do idia haorea totona, to ma haida idia hadiburadia lasi. Gabeai, 1964 neganai, dagedage ia ore sisina. Siahu taudia be mase guridia bona headava ariadia idia hadikadia lasi. Sekit heboudia be uda dekenai idia karaia. Nega haida unai hebou idia hadikaia, to Witness taudia ma haida be dibura dekenai idia siaidia lasi.

Lagani 1978 neganai, naria tadikaka haida idia lao diba Vienna ena hebouhebou ta dekenai. Danu, unai lagani lalonai, siahu taudia idia gwauhamata Iehova ena Witness taudia dekediai gwaumaoro do idia henia edia orea do idia rejista totona, to lagani 10 idia hanaia guna bena unai bamona ia vara. Lagani 1986 neganai, distrik hebouhebou ginigunana idia karaia Kamara Forest ena Youth Park dekenai, bona siahu taudia be unai idia diba. Saini ta idia atoa, bona ia gwau unai be Iehova ena Witness taudia edia “Dirava Ena Maino” Distrik Hebouhebouna. Murinai laganina ai, “Iehova Abidadama Henia” Distrik Hebouhebou idia karaia, bona 1988 neganai tadikaka be “Dirava Ena Hahemaoro Goevagoeva” Distrik Hebouhebou idia moalelaia.

Vadaeni, Idia Ruhadia!

June 27, 1989 be dina namo hereana, badina unai neganai tadikaka be pepa ta idia abia, ia gwau Hungary dekenai, Religious Organization of Jehovah’s Witnesses be gavamani amo gwaumaoro idia abia edia gaukara idia rejista totona. July neganai, Budapest Sports Hall badana dekenai taunimanima 9,477 be “Dirava Kamonai Henia” Distrik Hebouhebou dekenai idia mai. Lagani 1990 ai, “Gado Goevadaena” Distrik Hebouhebou be unuseniai idia karaia, bona Hungary ena siti badadia ma toi dekenai hebouhebou idia karaia.

Gavamani ena taravatu edia gaukara dekenai idia kokia vadaeni dainai, idia be intenesenel hebouhebou ginigunana idia hegaegaelaia diba. Ena be keru be bada herea, to Budapest ena Népstadion dekenai idia karaia, unuseniai taunimanima 40,601 be tadikaka edia helalokau heheni karana idia moalelaia. Hakaua Oreana taudia haida idia mai bona edia hereva amo tadikaka edia abidadama idia hagoadaia, bona unai hebouhebou dekenai buka matamatadia bona buklet, mai edia kala hani laulaudia, idia halasidia.

Hari Inai Negai Idia Vara Gaudia

Hari, Hungary gado dekenai, Gima Kohorona bona Noga! magasin be English gado gauna toana hegeregerena, nega tamona ai idia halasidia. Lagani 1992 ai, Hungary gado ai Yearbook idia printaia hamatamaia. Sivarai namona harorolaia pablisa taudia edia namba 1971 neganai be 6,352, to ia bada daekau haraga ela bona January 1993 neganai edia namba be 13,136.

Hari inai nega lalonai, Hungary ena Iehova ena Witness taudia edia tomadiho idia taravatua lasi, to ruma ta ruma ta dekenai idia lao haroro. Edia kongregesen be 205, bona April 17, 1992 ai, taunimanima 27,844 be Memorial heboudia dekenai idia mai. Ela bona Kingdom Hall edia namba do idia hegeregere neganai, kongregesen taudia be sikuli ai, kastom kara rumadia ai, taunimanima lasi tuari taudia edia rumadia ai, bona taunimanima lasi Komiunis Pati opesi dekediai idia hebou. Lagani 1992 negana amo, kongregesen 10 be edia Kingdom Hall idia gwauhamatalaidia, bona ma hebou gabudia haida idia haginidia noho.

Nega idia idau bona gwau-edeede karadia lalodiai, tadikaka be abidadama dekenai Iehova Dirava bona iena Natuna, Iesu Keriso, edia badinai idia gini noho, bona idia haroro noho. Unai hekwakwanai negadia ese idia hadikadia ore lasi, badina Hungary dekenai, Iehova ese iena bese taudia ia naridia.​—Hereva Lada-isidia 18:10.

[Map on page 9]

(For fully formatted text, see publication)

Vienna

AUSTRIA

Budapest

Debrecen

HUNGARY

ROMANIA

[Picture on page 10]

Budapest dekenai Iehova ena bese taudia idia hebou